Ka Makaainana, Volume II, Number 11, 10 September 1894 — Page 8

Ka Makaainana.

 

8          HONOLULU, OAHU, POAKAHI, SEPATEMABA 10, 1894

 

KELA A ME KEIA.

 

            Poakahi i hala i hoomaka ai ke Kula Kamehameha.

            Ua kipa ike aku o Alaalapalu ia luna o ka Haiakina i kakahiaka Poakolu iho la.

            Po o ka la apopo e halawai ai na poe o ka Hui Waapa Healani i hoala hou ae nei ma ka Hotele Hawaii.

            I ka la apopo e au aku ai o Kaletona no Korea, kahi e aumeumeia mai la e Kina a me Iapana.

            Eha poe pee a mahuka i hoea mai ma ka Warimu.  Ua hoouna loa ia aku lakou no Vitoria, Vanekouwa.

            Ua hoolualea aku ka bana Repubalika i na poe o ka Halemai Moiwahinei ka auwina la Poakolu iho la.

            E haalele koke mai ana paha ka Haiakina ia Kou nei i kahi o keia mau la iho no na Pae@oku Nuuhiwa.

            I keia kakahiaka i hoomaka ai ke Kulanui o Iolani, a pela no hoi me na kula Aupuni a pau loa a puni ka Paeaina nei.

            O na poe kahukaa haole i hoopauia a me na poe haole puhikole e ae ia e ohiia nei i poe kiai no ka Halemai Pupule.

            Ua wawaia ae e hookohuia aku ana paha o Kapena Makai La@ale i pau oia kekahi o na makai kiai e poaloalo mau ai ma o a maanei.

            Eeno poe o ka Puali Ho@la (Salvation Army) i hoea mai ma ka Auseteralia o ka Poaono nei me ko lakou mau ano aahu kohu koa.

            I keia awakea e kuai kudala ia ai ka Hale Keaka Pake a me na kauhale e iho ma ia kahua, mamuli hoi o ko ke Aupuni hooholo ana e hoopau loa ia.

            Selo, heaha keia, kahaha@ o kamalii naau pokole o ka halepai o ka Holomua, ua olohani hou, a o ka ekolu hoi keia o ka lakou hana ana pela.  Iiio.

            Pikokoi nui na Pake ma kekahi o na pukaaniani o ka Hui Nu Hawaii, ma alanui Kalepa no ka nana ana i ke kii o ka hoopiholoia ana o ke Kao Sana e ka Naniwa.

            E weheia aku ana he aha fea a me himeni, ke hiki aku i ka la 2 o Okatoba ae, no ka pomaikai o ka luakini Katolika Roma; i mea hoi e hoomaemae hou ia ai o ka ogana kahiko o loko.

            Ua kipa ike pili oihana aku o Kanikela-Kenerala Mila o Amerika Huipuia ia luna o ke Kaletona i ka auwina la Poakolu iho la, a ua loaa mai na ki pu aloha iaia i hoi mai ai no kula nei.

            He aha puhiohe hoolaulea ke haawiia ana e ka Puali Puhiohe Lahui i keia po Poalima iho, ma ke kahua, o ka Hotele Hawaii, ma ke ano hoohiwahiwa aku i ke Komisina Beritania hou.

            E pau ana ko H. M. Wini noho luna nui ana no ka Hui Paipalapala Kekake Hawaii, oiai ua hoolilo pau loa aku oia i kona mau kuleana a pau loa iloko o ia hui.  Mea ia mai no kahi Parisa iho ka ke kumu.

            Ua loli koke ae nei ke kulana o H. Kawa@uhau Haka mai ke kulana makai kumau a i lutanela hoi no ka Wati Elua.  Oia ka hana ana a ko Molokai poe keiki.  He pani oia ma kahi o D. P. Kaiena i hoopauia.

            Piha no ka aha hoolaulea hookani ogana o Kaumakapili i ka p@ Poalua i hala iho la, a nui no hoi ka mahaloia o na himeni a me na mea no a pau i hanaia.  Ua kakaikahi no na noho @ koe iho.

            Ua holo ike pili oihana aku o E. Suha, hope Kanikela Geremania, ia luna o ka Akona i ka auwina la Poakolu iho la, a ua loaa mai no hoi ka ikeia ona me na ki pu aloha ia ana mai i ka hoi ana mai.

            Ua kipa ike pili oihana aku o Hakipuu ia luna o ke Kaletona i ka auwina la Poalima nei, a ua haawiia mai na ki pu aloha nona ma kona ano Kuhina o ko na Aina E iaia i huli hoi mai ai no uka nei.

            Eia iho na poe i hoohiki e kakoo i ke Aupuni Repubalika o na apana o Kalawao a me Kalaupapa:  C. Kopena, he makai aupuni; Kauka Oliva, he kauka aupuni; S. Keanu, he ake oihana.

            He laikini o $25 ka i hooholoia iho nei e ka Ahaolelo kuikawa no na moku kuwaho e lawelawe ana i na hana hali ukana kuloko.  O ke kumu o keia, no na moku e lawe mai nei i na lepo manu.

            Ua pii ae ke kopaa ma Amerika he 3 3/4 keneta o ka paona.  Nui ka hauoli o na poe ona mahiko maanei no ia mea, a pela no hoi no ka lilo ana o kela kanawai dute i mea mana loa me ko ka Peresidena apono ole.

            Kakahiaka Poalua iho la i hopuia ai ka malamamoku o ka Mikahala, mamuli o ka hoopii ana a kekahi Pake i holo ohua mai i kekahi pule mamua aku, no ka aihue ana i kekahi paiki.  Ua hemo koke ae no oia malalo o ka pela.

            Mahope koke iho no o ke ku ana mai o ka mokukaua Geremania Akona i ka Poakolu nei, ua pau no hoi ka hoomaemae ana i ka moku, ua hookuu ia mai la na kanaka e lele uwati iuka nei, a pela no hoi ko ke Kaletona i ke ahiahi iho.

            Ahiahi Poalua i hala i kau aku ai ka Hope Loio Kuhina hou a me kekahi poe loio ma ka Mikahala, no ke kau kiure e malamaia ma Lihue, Kauai, i ka Poakolu iho.  Elua ana paha pule pau ke kau o ka Aha Kaapuni o ka Apana Hookolokolo Elima.

            Awakea Poaono i hala, la 1 nei, i hooliloia aku ai kekahi aina o A. Rosa mauka o Kalihi no $400 wale no, malalo hoi o ka hookoia ana o kekahi moraki.  Emi no.  Aole kela aina iuka loa, aka, eia no iwaho nei, ma kela kapa ma o, mauka ae o Keonepanee.

            Ahiahi La Pule i hala, na ke kapena o ka Haiakina i alakai na hana halawai ma ka hale o ka Ahahui Opiopio haole, a i ke ahiahi nei hoi, na kekahi lutanela no o ia moku.  Nui ka mahaloia o ka laua mau lawelawe hana pono a me ka maikai pu no hoi o na kamailio ana.

            He 700 paha mau tona lanahu a ka Hui Hooholo Mokumahu Pili-Aina i hoolako aku ai i na mokukaua Geremania Akona a me Alekanederine a holo aku la.  E hele aku ana no paha e piha loa ke tausani tona.  He pomaikai ulia wale keia o keia mau la.  Ola no!

            Ke hoikeia aku nei ka lohe i ka M. K. Kuau poe lawe pepa e kii mai i ka lakou mau pepa i keia keena, no ka mea, ua paa wahi hana oia i keia wa, oia hoi, he kalaiwa no kekahi o na kaa nunui hoonalulu elemu.

            Ua owala ae ka lio o kekahi kaapio Pake, helu 195, i ka auwina la Poalima nei, mawaena o na kihi makai o ka Huina-a-Kale, a o na laau kolo na wahi i poino.  E ole e paa koke ka lio i ka hopuia, ina la ua puhi ke oka i ua kaa la.

            Aia ma na nupepa Aupuni ke kukala koho balota kuikawa a Peresidena Kole, a i Okatoba 29 e malamaia ai.  E ole nae hoi ia, piha kekahi mau aoao lehulehu o ia mau nupepa, e like la hoi me ka Adavataisa, he eha aoao.  Ua ola no !

            Kakahiaka La Pule i hala i pae hou mai ai o Lunakanawai Kaapuni Kepoikai o Maui i pau, no ka mea, eia no kona koolua ianei.  Poakahi ae, ua loaa aku iaia he laikini loio piha, ma ke ano hoomaikai aku paha iaia, i kakauia ma ka la mua aku.  Ola no nae hoi ua kanaka !"

            Elua mau l@ hapa o Hana, Maui, i noi mai @ ka loaa aku o ko laua mau laikini hou, oia o S. W. Kaai a me W. P. Haia.  Ua pane palapala ia aku ka laua aia a hooko mai laua i ko laua kupaa mahope o ka Repubalika, oia hoi, e hoohiki, alaila, loaa aku paha ko laua mau laikini hou.

            Eia o W. G. Scott, Hope Makai Nui mua o Wailuku, Maui, ke lawelawe nei i kekahi o na kulana Kapena Makai o Honolulu nei.  Nui ka piena o ko onei poe haole puni oihana no ke kikooia ana aku o keia mea no kahi e mai.  He kaaka wiwi ihu loihi me na maka aa oia, a e ole nae hoi oia, loaa ke akualapu o ka Oihana Makai.

            He aha hulahula hoolaulea ka i haawiia ae e H. A. Wilimana i ka po Poalima nei, @a ka Hotele Hawaii, no na kapena a me na alii o na mokukaua Geremania.  Ua uluwehi ke alo o ka hotele me no hae a me na kukui Iapana.  Lehulehu no na poe i hiki ae.  Na kekahi mahele o ka Puali Puhiohe Lahui i haawi ae i na leo mele.

            Poalima nei i hoopauia ai na poe Pukiki e hana alanui nei, no ka ae nui ole e hoohiki.  O ka Poaono nei ka la i oleloia no na poe Hawaii, eia nae, aohe i hoapa nu ia.  Malia i keia la ana paha.  Ua lohe mai nae hoi makou aole loa lakou a ae ana e hoohiki, no ka mea, aole i oi aku kahi dala omilumilu hookahi o ka la mamua ae o ko lakou aloha i ka aina.  Nana ae no hoi kakou i keia la a i keia mau la iho paha.

            Poaha iho la i hookolokoloia ai o Sam Stone (Kamu Pohaku), no ka hewa lawe i ka waiwai kipe me Kapena Lanale i pau, a hookuuia.  Malia ua makemake maoli ia no kona wahi e kekahi o na poe pololi oihana.  Aohe no he mau olelo ike ano nui loa e po@ o ai laua.  No kona makemake ole e noho makai hou, ua haawi ae ka Ilamuku he palapala hoomaikai nona me na olelo palu a waipahe a ka launa ole mai.  Me he la ka hoi e maona ana ke kanaka me ia ano palapala.

            I ka pii ana o ke kai i ka po o Augate 5, ma Awa Belekels, Keomolewa, i hoolanaia ae ai he mokumahu hou no ka Hui Hooholo Mokumahu Pili-Aina o ka kou nei.  Ma Kapalakiko e hookomoia iho ai kona mau enegini.  Oia ka mea a ke kapena kuli a peresidena hoi o ia hui i holo aku nei i Kaleponi e kii ai a lawe mai.

            Ua lohe mai makou ua kipe ae kela makai opunui o lalo o Ewa i ka Hope Makai Nui me kekahi uha puaa huluhulu o kuahiwi, a pomaikai wale hoi ke kaikoeke, oiai, nana ua uha puaa la i ai hoonuu iho.  Ua oleloia mai no hoi he hookahi ka kipe i koe a ua makai la, oia no kahi aina imua ponoi o kona alo, i kahi wiliki o ka halepaahao.

            Poalima nei i kauoha ae ai e Lunakanawai Kaapuni Kupa ma ke keena e hoopukaia ka palapala hookohu lunahooponopono no ka waiwai o Pekelo Kakoi i make, malalo o $5000 bona, ia Kaili, ka wahine kanemake, Ua kue aku o Lui a me Opunui, na keiki a Pekelo me ka wahine mua, i keia hookohuia o Kaili, a i keia la e hooloheia ai ka laua hoohalahala.

            He wahi hoopuoho ahi ko ke ahiahi molehulehu o ka Poaha nei no ka hale o D. Kamaka, mauka aenei o Kaowawai, Kapalama.  Ua uleu ae no na kaa kinaiahi, aka, aole loa lakou i makemakeia, no ka mea, ua pio e no ke ahi me ka nui ole o ka poino, a me he la ua $5 paha ke poho i loaa.  He ahi ka kela i loaa, wahi a ka oleloia, mamuli o ke pahu ana ae o kekahi kapuahi aila-mahu.

            Ua hopuia e Lutanela Cordes a me D. Kaapa ka malamoku o kalepa Velosite, ma ke alanui Moi nei i ke ahiahi Poalima nei ma o ka hoobuoi wale ia.  Ua huliia kona kino ma ka Halewai a loaa aku la he 6 hapalua paona tini opiuma ma kona poli.  Ua huliia kona rumi iluna o ka moku a loaa aku la he 22 mau tini opiuma o ia ano like no.  Imua o ka Aha Apana i ka Poaono nei, ua hoopaiia e uku i $500.

            Ua lilo ae nei ko D. K. Kamiki kulana elele no ke Keena o ko na Aina E @a H. K. Meemano, he mea haiolelo no lalo o Ewa.  Iaia e lawelawe ana i ka hana kiure, ua lohe oia no ko Kamiki pau, nolaila, ua hele aku oia e noi ia Kuhina Hakipuu, a ua loaa io mai no iaia, a akaka loa ai paha iaia ka pololei o na olelo o ka Buke:  "O ka mea noi, e haawiia; o ka mea kikeke, e weheia."  A o ka mea makilo, e loaa no.  Oia no ka "Hawaiian Dude."

            Ahiahi poeleele o ka Poakahi i hala i ku mai ai ke Kina mai Kapalakiko mai, a mahope iho o ka hora 2 o ka auwina la Pealua ae i holo loa aku ai no ke Komohana.  Ia po no i lele mai ai na ohua iuka nei a hoaumoe ma ka Hotele Hawaii, a no ia mea paha i makemakeia ai na puukani o ka Puali Pahiohe Lahui, ia lakou e hoolaulea ana ia Mekia Wudehausi, e hoi a ka la@ai o luna o ka Hotele e himeni ai, aole nae i aeia aku ia noi.  Ua lawe aku oia he 130 ohua Pake, he 85 o lakou i loaa na palapala ae hoi hou mai, a he 126 lapaua, 95 kane a me 31 wahine.