Ka Makaainana, Volume II, Number 6, 6 August 1894 — Page 2

Ka Makaainana.

 

Ka Makaainana.

HONOLULU, OAHU, POAKAHI, AUGATE 6, 1894

 

HE MOOLELO KAAO

NO

MONE TIKERO

KA

HOLOLIO I KA WA HOOILO

KA

UI MAALO I KE KUPULAU

A O KE

KEIKIALII HARE MATINE

KE

KIAHA OPAKA O NINEWA

 

MOKUNA XII.

 

Ke aloha o ka Ipo i ka Ipo-

Hanini ka waimaka elo ka laau-Ka Ui Maalo i ka wa Kupulau iluna o Hagara-Ke kaoo o na poe me na mekala kila no Arabia-Ka hoohui mare i ka wa Hooilo-Ike kumaka i ka nani o Mokuleia, aohe laula a koe aku.

 

Mahope iho o ka pau ana o kana mau kanaenae ana i na pali kahi i kamaaina iaia a i walea hoi i kona lio, me ke au ana ae o kona mau maka ma o a maanei, a hoohuli ae la oia i ke poo o kona lio a mokio pololei aku la imua ma kahi e hoea aku ai i ko laua wahi pupupu hale, kahi a kona kahuhanai e noho mai la me ke kali ana i kana hanai no kona hoi aku.

A iaia i hoea aku ai, e noho mai ana no kona wahi kahuhanai ma ka aoao o kana wahi kapuahi hoopumehana, a e hoomoa ana hoi i mau wahi meaai no kona paina ahiahi.  Iaia nae i ike mai ai i kana hanai e hoi aku ana maluna o kona lio keokeo, puili koke ae la oia i kona mau lima a puana ae la i keia mau olelo.

“O ka’u ia i kali iho nei me ka manao ua loaa ia la oe me kekahi ulia popilikia, eia ka aole.  E lele iho, e kuu keiki, a e hoike ma i ka mea hou o kau huakai i hele aku nei ma kou alahele.”

Lele iho la oia mai luna iho o kona lio a hookuu iho la i kona lio e ai wahi weuweu, a noho iho la oia iluna o kekahi noho laau i paneeia mai e kona kahuhanai.

Kau mai la na maka o kona kahuhanai maluna ona, me he mea la e hakilo ana paha oia i ke ano a me na manao e Iolii la iloko o ka puuwai o kana hanai, ka mea hoi a kekahi poe i makahehi loa ai, a e ake nui nei hoi e noho haku maluna o ua Ui Maalo la i ka wa Kupulau; aka, aole e hiki, no ka mea ua lilo mua ia i ka mea a kekahi poe i hanai ai a nui.

Iaia e hoomau ana i ka nana ana i kana hanai, pane aku la oia:

“E kuu keiki, e oluolu mai oe e hoike mai i ka mea hou o kau huakai loihi i hele aku nei a me ka hopena o na mea i hana ia ma kou alahele.”

“Ae, e kuu makua, e hoike aku no au ia oe i lohe ai oe i ke ano o ka’u huakai, a me ka nuhou e hauoli ai a me a’u pu no hoi kekahi”

Paipai ae la kahi kahuhanai i kona mau lima a akaaka ae la me ka hoopuka pu ana ae i keia mau olelo:

I mai nei oe, e kuu keiki e hauoli ana au ke lohe aku i kau mea hou e hoike mai ai.  E hoike mai, e kuu keiki, a na Alahe, ke Akua o kou mau kupuna a me kou lahuikaka e kokua ia oe.”

Hookuene pono iho la oia i kona noho a haliu pono aku la imua o kona makua, alaila, pane aku la oia:

“Ua ike oe, e kuu makua.  Na’u i hoihoi aku ke kino o ka Pua Lilia o Zubieda me ka poino ole imua o kona makua, a o ka mea i hanaia mahope iho o ko maua hoea ana aku i kauhale oia no ka hooholoia ana e hoohui ia maua i hookahi.  A o ka wa i manaoia ai, ua kokoke mai no ia, no ka mea, ke hele aku nei iloko o na la mua o ka hooilo, na la hoi au a me a’u e poina ole ai.

“Mai laila ae, ua hele aku au no ka home kuahiwi o kuu hoaloha a hoike aku iaia i ka mea a’u i hoike aku la ia oe, a ua ae mai oia me kona mau kanaka e hele pu aku me a’u no ke komo pu ana iloko o na la lealea e malamaia ana ma Arabia iloko o ia la kamahao e hiki mai ana.  A ke hoomaopopo mai la anei oe, e kuu makua, i na mea a’u i hoike aku la.”

“Ke hoomaopopo nei au, e kuu luhi.  Ia oe ana ka e pau ai ko kaua noho ana maloko o keia ululaau, kahi a kaua i noho ai no na manawa loihi me ka hoomanawanui ana i ke anu me ke koekoe,” a puili ae la oia i kona mau   lima me ka haawi ana ae he mau olelo kanaenae.

Alaila, ku ae la ua keiki hololio la iluna me ke kokua pu ia mai nei e kona kahuhanai, a liuliu iki ko laua nana hoomau ana o kahi i kahi, pane aku la ke kahuhanai:

“E hiki mai ana ka la e kau ai oe ma ka nohoalii o kou makuahine nana oe i haakohi mai.  A ia oe e hoi ae ai a noho ma ka nohoalii, e hoomanao oe i kou makuahine;  aole hoi oia wale, aka, e nana i kou mau hoaloha kou koo hoi e onipaa ai kou aupuni, na poe nana e kiai i kou maluhia.  E kuu keiki e lei i ka Pua Lilia o Zubieda me ka hoomanao pu ana i kou home i hanaiia ai me ka wai o na pua.  A maluna ae o na mea a pau, e malama i ke ola o ke kanaka, mai ae i ka maka o kau pahikaua e hoopuluia me ke koko o kekahi kanaka o waia auanei oe me kou aupuni, a lilo i mea hoihoi ole.

Ae aku la ua hololio la me ka manao hauoli no na olelo a kona makua, me ka i pu ana aku no nae,-“O kau mau mea a pau i hoopuka mai ai, oia ka’u e hooko aku ai, no ka mea, aohe o’u makemake e hoohaukae i ka maka o ka’u pahikaua me koko o kekahi kanaka o ko’u lahui.”

“Hauoli, e kuu keiki; pela kaua e pono ai me ka manaolana na Alahe ke Akua o kou mau mau kupuna e kokua ia oe.”

Pau ae la ka laua mau kukai olelo ana, noho iho la laua e paina i na wahi meaai uuku i hoomoaia, a hiki wale no i ka piha ana o ka lua o ka inaina.

(Aole i pau.)

 

Haalele i Puna na Hoa’loha.

Ma ka auinala Poakolu, Iulai 25, 1894, ma ka home noho o Mr. me Mrs. Pahukoa, ua haalele mai la i keia ola ana o Mrs. Palau Kaluhilaau mahope o ke kaa ma’i loihi ana.  I ka hora 10 o ke kakahiaka Poaha ae, Iulai 26, i hoolewaia aku ai m e ka hiehie o kona kino wailua, malalo o ke alakai ana a ko Kalaupapa bana i noho pooia hoi e Mr.C.N Kealakai, penei ka hoonohonoho ana:

Ekahi, ka bana, elua, hukikaa, ekolu, kaikunane o ka mea make a me na moopuna, eha, na opuu rose o Pauahi Home i malama noeau ia e Makuahine Marrianne, elima, na makamaka ame hoa’loha.  Hiki i kahi i hoomakaukau ia ai o kona home ko-u. Ua lawelaweia ka heluhelu buke e ka Rev. T. Wendelina me ke eehia. 

Nolaila, ke haawi ae nei makou i na hoomaikai i ka mea nana i hana, a pela i oleloia ai, “he lepo no oe, e hoi no ka lepo i ka lepo,” a ke noi pu ae nei no hoi ka makou leo pule e hoomamaia na ohana e paiauma ana me ka luuluu.  A ke haawi hou ae nei ko makou leo hoomaikai ia Makuahine Marrianne no kona ae ana e komo pu ae kana poe pua rose iloko oia hoolewa.  Aloha no ia makua i hoea mai i kou one e Kalaupapa, a waiho na iwi o ke kamahele i nei aina malihini, aloha ka ohana i ka ike ole i kona hanu hope loa.

                                                                                                J.K. KALEIKAU.

                                                                                Kalaupapa, Iulai 26, 1894.

 

 

 

LAUOMIDIHAE

KA

UI MOHAI IA I KE KOKO

KA

NANI I ALANA IA I KA OI O

KA PAHIKAUA.

Ka Mea Huna iloko o ke Kiaha

Waina

Ka Mea Pohihihi i ka Maka o ke

Kuikele.

A O KE

KEIKI NUMAREDINA

Ke

Komo Lima Maka Popoki.

 

MOKUNA XI

 

Owai aku kela?-He malihini mai ke Komohana mai-Ke kiu a Numaredina iluna o Halegula-Ka manu nunu iloko o ka hale aniani-Makaikai i ka nani o ke kihapaipua o Numere-Numaredina o Hurema ka hoa e like ai.

 

Ninau hou aku la ua kaikamahine la i kona makuakane hanai:

“Owai la ka enemi a lakou e kue aku ai?”

“O ka enemi hookahi a lakou e kue aku ai,” wahi a ua kupua la i pane aku ai imua o kena hanai, “oia no kela wahine ino hoopunipuni e makemake nei e kaili aku ia oe ma ia’u aku, a e hoomare aku hoi ia oe me Numaredina, ka mea a na kanaka e kapa mau ai “ka nani o Hurema.”  Oia ua enemi la, e kuu keiki, a ke ukali pu mai la mahope o kona meheu ua keikialii la, no ka manao ana maloko o na paia o kou halealii e hipuu ia ai olua.  E kuu keiki, aole, aole loa e ae kou makua ia mea, no laila, iluna o ka aina o ke Ao Olino kaua e hoomaha ai.”  Ia manawa no i keehi ino iho ai ua kupua la i kahi ana e ku ana, a naue ae la ua aina la me he hoonee ana la @ ke olai.

Iloko o ia manawa i pa iho ai kekahi kikiao makani me ka ikaika, kui iho la ka hekili a olapa pu hoi me ka uwila, a iloko o keia mau hoailona i hoikeia ae la i hoi aku ai ua kupua la me kana mea i luhi ai no ko laua aupuni.

A iloko o ke aheahe malie i ikeia aku ai, aole na kuahiwi, na puu, na ululaau a me na awawa.  O ka nani o ka aina i ka manawa mamua iho, aole ae la ia, aka, o ka waiho oneanea wale iho no o ka aina me na kauhale e kuku ana, a me na