Ka Makaainana, Volume II, Number 2, 9 Iulai 1894 — Page 7
This text was transcribed by: | Jasmynn |
This work is dedicated to: | Hienie Nuuhiwa Davis |
Ka Makaainana.
HONOLULU, OAHU, POAKAHI, IULAI 9, 1894 7
NA AINA MAMAO
Na Lono Huikau mai na Wahi Like Ole mai o ke Ao nei.
Make ka Peresidena o Farani.
Ma Laiona, oiai, ua hele aku o Peresidena Sadi Kano ilaila i ka wehe ana i kekahi aha hoikeike, ua hou pahi ia oia e kekahi hiena limakoko i ka po o Iune 21. Iaia i haalele aku ai i ke Keena Kalepa, kahi i malamaia ai o kekahi papaaina, no ka hele aku i ka hale keaka i ka hora 9:15 p.m., ua oili aku he kanaka opiopio mai loko aku o ke aluka me kekahi owili pepa ma kona lima, lele aku la a kau ma ke alapii o ke kaa, me ka manaoia he palapala hoopii kana, a i ka lalauia ana mai, ua unuhi ae oia he pahi mai loko ae o ia owili a hou aku la i ka opu o ka Peresidena. Ua hina koke aku oia ihope me ka pau o ka ike a ua lawe koke ia aku no kona wahi i noho. Kauoha koke ia na kauka loea, aka, ua hiki ole ia lakou ke kaohi i ke kahe makawalu ana o ke koko. Iloko o na hooikaika ana a na kauka, ua pahua ko lakou ike, a ua make oia mahope o ka hora 12 ia aumoe.
Mamua ae o ka hanaia aua o keia karaima, i ka Peresidena hoi ma ke ala no ka hale keaka, e hooho hauoli ana ka lehulehu no ko lakou Peresidena a oili ae ai keia limakoko mai waena mai o ia aluka nui. Ua lilo keia hana i mea hoowelawela a hooinaina loa i ka lehulehu, a ua hopuia ka hiena. He anaki@a Italia oia, he opiopio umiumi ole o 21 paha makahiki, noua ka inoa o Cisere Giovani Sauato, a he puhi palaoa kana hana ike. Ua palena ole ko ka lehulehu piena a inaina, a i ka loheia ana he Italia ka mea nana i hou pahi i ko lakou Peresidena, ua hoopoino wale ia aku no na poe Italia malama halekuai hala ole. Mai haehae liilii ia ua hiena la e ka lehulehu, aka, i pakele wale no i ke akeakea o na makai. Aia oia ke paa la a ke kiai loa ia la o hoao oia e kaawe iaia iho. Ua haawi aku ke Aupuni o Farani i na hooia ana i ke Aupuni o Italia no ka hoopoino ole ia o na Italia hala ole.
Ko Farani Peresidena Hou
Mamuli o ka akoakoa like ana ae o na mahele kau kauawai a elua, ka Aha Senate a me ka Aha Elele, ma Vasaile, a ua uluaea ma ka la 26 me ka maopopo ole, aka, ma ka la 27 ae, ua koho lokahi ia o M. Casimir-Perier, he mea ano kanahai mai ma kona mau manao kalaiaina a he Kuhina Nui mua no hoi. Ua manaolana na poe ake maluhia a holomua oia ka mea kupono loa, a o na poe welawela hoi o na manao, aohe hewa ke make oia i kekahi powa hou aku, oiai, he kanahai ka manaoia he ano makau wale paha ka olelo ana. Aka, ua kaunuiia oia ke alakai e nee aku ai o ko Faiani holomua imua.
Komo Uwao na Pualikoa.
Ua hoea aku he pualikoa Aupuni o 700 kanaka ka nui malalo o Generala Baruka i Karipili Kariki, Iune 8, a ua lilo lakou i mea uwao e hiki ai ke malamaia ka maluhia. Ma ia hana, ua lanakila lakou. Ia kakahiaka, ua nee aku na makai no ka papukaua o Puu Bulu, a me he la o ka ulele wale io aku no koe. Eia nae ua hoonoho o Generala Baruka i kona mau puali mawaena o na makai a me na poe eli lanahu, a pela iho la i paleia ai ko lakou huhui like ana ae. Ahiahi iho, ua hoopoaipuniia o Puu Bulu a ua hoike akea ae o Generala Baruka e ae no oia i ka haawi pio aku o na poe eli, aka, aole oia e hoonele aku ia lakou me ka lakou mau pono kaua. Lehulehu na makai i inaina no keia hana a hoomaka nui iho la e haalele. Ua oleloia no hoi aia ke mahuka la he lehulehu o na poe eli i hoopukaia na palapala hopu no lakou.
Mamuli o keia hana a Generala Baruka i ano emi mai ai ka manao inaina mawaena o na aoao paonioni, a ua ano mamao loa aku hoi ka ulele paio io ae o na aoao elua mai ko ka manawa i hui ai he alo a he alo. Ua nee aku na pualikoa, mai kona kulana mawaenakonu o na pualikoa elua, ma ke ano e hiki ole ai i kekahi aoao ke kue aku i kekahi. Lehulehu na hoao ana o na makai e nee aku imua, aka, ua akeakeaia mai e na pualikoa. Hookahi manawa ua holo aku o Generala Baruka a imua pono o na makai a kamailio oluolu aku la oia, a i kona huli ana aku e hele ua haawiia aku he ekolu mau huro ana nona. Ua oi aku ko Generala Baruka makemake ia e na makai a me na koa mamua ae o Kaukana-Generala Tanase, he mea hoi i kue ma kana mau lawelawe ana i na makai a kokua hoi i na poe eli. O ke ano hae kaua hoi keia o na poe eli, ua io wale, a ua pau nui aku, hoi i ka mahuka ma o a maanei na poo no lakou na palapala hopu i hoopukaia, a e lilo aua hoi i mea hana nui na Makai Nui Paoa e hili aku i ua poe la.
Auwina la no o ia la, Iune S. i kai aku ai na pualikoa ae Puu Bulu a ma kahi kokoke i hoolulu nui ai. Ua makaukau na poe eli e haawi peo mai ia lakou. Aia hoi na makai kokua wale aku no ke kauhilii la no ka hoi i ko lakou mau wahi, a o na makai uku wale aku no koe, a aohe no hoi lakou i mahuahua loa e hiki ai ke lilo i mea kue aku. E hoao aku ana ka makai nui e hopuhopu i ua poe la, oiai, ua ae oia i ke kulana i hanaia ma o ka uwao ana me ke akahela. O ka Peresidena hoi keia o ka hui o na paahana, aole oia i ike hou ia mai kona hele ana no Deneva i ka Poaono, la 2 aku. Ua holo aku na alakai, a o kekahi hoi, iaia i ike aku ai i ko na makai hoao mai e pu. O kekahi poe alakai e ae, ua auhee nui aku no na kuahiwi a me na owawa. E lawe nui ia aku ana hoi na poe eli i koe iho no kahi o lakoiu e hiki nui ai ke hoopaa ia a ke kakali hoi no ko lakou hookolokoloia.
Ma na mokuaina hoi keia o Viriginia Komohana a me Ohio, ua oi aku ke ano ahikanana loa o ua poei eli la. Ua panikuia na alahao a hiki ole i na kaamahu ke holo a ke hali hanahu aku. Ma kekahi mau wahi, ua hoohaunaele ae no ua poe la me ka hiki ole ke hoopioia, a ua hoahuia ke aa, na kua laau a me na @iea hoopahu maluna o na alahao. Iloko o na hoao ana e hooholo aku i na kaa me ka piha lanahu, ua lilo wale no i mea hoopahuaia. Ua kauoha ke Kiaaiana o Viriginia Komohana he elima pualikoa no Wilina, e hoopio ai i ka haunaole malaila, a he eono hoi pualikoa no Bogo Rune. Aia ka piena loa o kela poe hoohaunaele i na hui kaamahu. Ua 500 a oi aku ko lakou heluna ma keia mau wahi pakahi, a ina e hoeuia mai ana e na pualikoa ma ka aoao mai o Ohio, alaila, o ka uwai aku no ia o ua poe la i ka lakou hana ma ka aoao o Viriginia Komohana, a ua like no hoi ka poino @aa ana ma ia aoao e liko la me ia ma kela aku. O na alahaka hoi keia ma Ohio, ua pau i ke puhi ahi ia. A ma Piladelepia Hou, Ohio, ua ki poka ia kekahi kaa i piha me na koa, aka, i ka wa i maopopo ae ai e hele aea ua puali la no ka halekoa malalo o ke kauohaia, ua haawi ae ke aluka i na hooho huro ana. Ua lilo ko ka Makai Nui heluhelu ana ae i ke kanawai hoala kipi hoohaunaele @ inoa hoomaopopo ole ia aku.
Na Hunahuna Laulaha.
Ua hopuia mai nei ma Rio de Ianeiro, Berazila, he elua mau luna o kekahi hui kalepa Pelekaue, a na manaoioia mamuli o ka hoolako ana a ua hui ia ia na io hipa Auseteralia i na poe kipi.
Iune 10 i hookuuia ai o Koke Balaunu a me Keoni mai ka halepaahao aku o lakou i hoopaa nui ia ai ma Wasinetona.
Ma ka mahele komohana o ka mokuaina o Penesilivania, A.H., ua hanau ae kekahi wahine i Feberuari 27, 1893, he elima keiki, ekolu kaikamahine a me elua keikikane. Ke ola maikai la no lakou a pau.
Ua halawai o Viena, ke kapitala o Auseturia, me kekahi ino hua hekili o ka holelei ana, i oi loa aku hoi i ko ka 1848. Ekolu poe i make, me he la i ka uwila paha. Ua koho wale ia ua 100,000 na pukaaniani i pau i ka nohaha, a ua nui no hoi ka poino i loaa i na mala aiea kanu.
Ua hopohopuia o ka hookipa ana a Kapena Tomasi o ka mokukaua Amerika Beninetona ia Peresidena Ezeta i pau o Salavadoa, he mea ia e hookomo hou aku ai i ke Aupuni o Amerika Huipuia iloko o na hihipea kalaiaina kuwaho, ina no paha he maikai ka hana a me ka manao i hookoia.
Ua ku aku ma Kuinitaona, Irelani, Iune 8, ka mokumahu Lucania o ka hui Canada, a o ka oi loa aku ia o ka manawa hele loa ma ka moana Atelanika, he 13 minute ka haule iho mai ka manawa holo loa mamua aku nei, a ua holoia no hei e ia he 17 mile oi ae mai kana mau hele ana mamua. He 5 la 12 hora a me 58 minute kona manawa holo.
Nui ka poino ma Beritania Kolumebia a me Keomolewa mamuli o na waikahe, a ua unipaa pu ia ka aina. Poino ua mea ulu, na holoholona, na kahale, a pela aku, a ua kehoia ma kahi o $2,000,000 ke p@ho a he 1,500 i hooneleia me na home ole. He waikahe keia mamuli o ka hehee o ka hau, a hui pu aku no hoi me ka makani oolea. Aohe hiki i ua kaamahu ke holo. Ke akakuu mai la nae hoi ka wai.
Ua hoike ae ke Aupuni Beritania i ke Aupuni Panalaau o Kanada e hoomau ana no ia i ka hoolimalima a hoohana ana i na Pake ma kahi o na limahana ili keokeo ma ke kahua papu palekaua e hanaia la ma Esekuimala. He pane keia i kekahi palapala i hoounaia e ke Aupuni Panalaau ma ke koi a ko Vitoria lala i ka Anaolelo o laila, e olelo ana hoi oia no ka nui loa e na limahana ili-keokeo e loaa ma ia Okaua-aina.
Lehulehu na wahine ohumu kipi e Rusia i hopuhopu nui ia mai nei, no ke kokua i na poe anakisa, a he poe koikoi kekahi iwaena o ia poe. Loheia ma Ladana, Mei 26, ua huiia ka hale o Baronese Marikofa a ua loaa he papainoa o na wahine kiekie. He haumana wahine kekahi i hoohuoiia a ua kaualupeia aku oia e na makai mai kona moe aku me ka aahu ole. Ua pakele aku oia mai na poe na lakou i hopu iaia, lele iloko o ka muliwai Neva a make. O na kuke keia o ka halealii imiperiala na pau nui i ka hoopauia, no ka hopohopoia o hookomo laaumai ko lakou iloko o na mea ai.