Ka Makaainana, Volume II, Number 2, 9 July 1894 — Page 3

Ka Makaainana.

 

NA MOKUPUNI.

 

            Malalo o keia poo ae la e hoopuka mau aku ai makou mai keia manawa aku, i na mea hou mai kela a me keia pea o ko kakou aina nei, me ke ano he mau lono pili kuloko iho ia no kakou nei.

 

Hakaka me he Pipi la.

 

MR. LUNAHOOPONOPONO:

            Ma Naalehu, i ka la 17 o Iune, mamuli o ka ona pia, ua hoolele iho la kekahi mau keiki i na ai a ka ui, nana aku no ia la kua ka puali o ke kanaka ui, pii na namu haole, liki na puupuu.  No ka ike no paha hoi kahi i ka hoopakelo aku a ka ulua ia hai.  ke nana aku ia laua, oia no oe o ka hakaka ana an na pipi pulu, ka hooke aku hooke mai.  Haila au a ika pono i ka hookui o na poe i ka papahele, oia no ia la o ke kanaka i poiia e ke kai ka hele a paholehole ka ili.  O ka ona pia mai ke kumu o keia mau hana, a o ia ka 'u e ninau nei, auhea la na makai o ke Aupuni Pi Gi?  He mea mau nei i na makai o keia wahi, aia a he haalele hana, wikiwiki ka alwe i ka halepaahao, i keia hakaka hoi, he neo ia.

                                                                                                            I. IMAKUA.

                                                                                                            Naalehu, Kau, Hawaii, Iune 27, 1895.

 

Huakai Hele ma ka Aina Mauna no Hilo Hanakahi.

MR. LUNAHOOPONOPONO.

            Ma ka la 4 o Iune, ua kiiia mai la o Mrs. A.K. Haaheo, ma Hilea, e ka Makai Kua, a laweia no Waiohinu no ka ma'i hookaawale ohana, a na Ikaaka, he makai, i lawe ae kekahi mau ma'i no Punaluu, o Keoki Kaua a me Kane Hoopii no Kale mai o Ku Puaakuni.  He ekolu ma'i i nana mua ia e ke kauka ia ahiahi, a hookuuia hookahi, oia o Kane Hoopii, o ke koena iho haumoe pu makou iloko o ka hale hoopaa ma'i.

            Ma ka po Poalua ae, ua laweia mai la o Beni Namauu a hoaumoe pu hou makou, a i ke kakahiaka Poakolu, hiki mai la ke kuka a nana i na ma'i k koe, a o kana huaolelo i hoopuka ae ai, "Oe hele Molokai, nui ka ai a me ka i'a, nui no ke kanaka malila, kaukau wale no, no hanahana."  Pau ka olelo hiu aku la kela hele, noho iho la makou e noonoo no na wahi pono kino, oiai, aia no ia mau mea a pau i ka hale.  Ua hele aku au a me ka wahine a kekhi mea ma'i, o Elena, e noi i ke oluolu o ka Hope Makai Nui W. J. Yates, e hookuu mai i ka maua mau ma'i e hoi pu makou i ko makou home e hooponopono ai no na wahi pono kino, a i ike pu hoi i ka ohna a a hiki i ka la e laweia ai no Hilo.  A ua ae oluoluia mai ia noi.

            Poaha, hora 8 a.m., haalele makou ia Honuapo a naue aku la a hiki ma Pahala, hoomahe malaila a kamau wahi pola kope, a liuliu iki kau hou ma na lio no ke ala mauna.  Oiai makou e hoonee ana i ko makou mau holoholna imua, aia no kahi manao i hope.  Hu ae la ke aloha i ka ohana, na makua, na hoa hoi o ka aina.  Ke huli mai a nana i hope, aia o Makanau a me Puuauuhe e ku kehakeha ae ana i ka malie, hu ae la ke aloha i kahi e hele ai, oiai na la mamua, me ha la e hea mai an e hoi hou i hope, eia nae, ua hala ka manawa, no Hilo Hanakahi ka pahu hopu.

            Ma keia huakai ehel a makou, o J. Naluahi ka maik i hele pu me makou, he ewalu ko makou nui ma nei huakai.  Hiki ma Kapapala, hoohainu wai i na wahi holoholona o makou, ukuhi na omolle i ka wai, oiai, he kula wai ole aku ia e hele aku ai.  He malie ka mauna ma keia hele ana a oluolu no hoi, a aia na kumu ohia loloa e nee hope ana ma ko makou aoao, a no ka hora 6 a oi o ke ahiahi ua hiki aku la makou ma Ohaikea a hoomaha makou malaila, oiai, he wahi mauu ia no na wahi holoholna e hanai ai.

            He oluolu keia makai o J. Naluahi, ia makou.  Aole ona hookikina mai ia makou e awiwe, olelo mai  oia ia makou, e hele kakou me ke kupono i na wahi holoholona o kakou, i hiki meka maikai i kai o Hilo."  Ina paha o kekahi iho o laua, ina ua pai no kelai ike oolea, no ka mea, ua hoike ae no i makai i kona mano i kekahi o makou, ina oia ka makai nana e lawe i na poe ma'i, alaila, hora 10 no o ka po hele.  Ina e hele aole oia e ae i na ma'i e hoomaha ma ke alanui, oiai, ua like pu lakou me na holoholona.  Oki pau no hoi kamanao o keia kaaka.

            i ka hoea ana mai o na kukuna o ka la maluna o ka ilikai, ua naue aku la makou.  Hiki i Kaluaopele, ike mua aku la makou i ka mahu a me ka waiho kahela mai hoi o ka home noho o ka eueu o ka lua (Madame Pele).  Aia hoi kahi uwahi e a ana iwaenakonu o ka lua he ku no i ka weliweli ke nana aku ia lalo, he uliuli pu wale no i ka pahoehoe.  Ke huli ae oe a nana ma kou aoao hema, aia hoi kahi a ua poe la e hoolei ai i ko lakou hanalepo, ku ke ahua i ka nana aku.  Hookalakupua no hoi no hana.  A no ka hale hookipi hoi, he ku no i ka nani ka hanaia ana o kona mau pukaaniani nunui e huli pono ana i ka lua, a ua kupono io no ia i home hooluolu no na poo makaikai honua.

            Haalele makou ia Kaluopele a @ aku la ko makou alahele no mua.  Loaa aku ia makou na poe hana alnui i ka mile ekahi mai Kaluaopele aku, he maemae maoli no ka hanaia ana o ke alanui, a ua puana ae au, "Ua kohu Honolulu maoli no ka hanaia ana."

            Hoomaha makou ma Waioweowe, paina ko makou aina kakahiaka, a no hapalua hora naue aku la makou a komo iloko ao ka ululaau o Olaa, aia hoi na hale nani e ku ana ma kela a me keia aoao o ke alanui.  Ilaila loaa iho la makou i ka ua lelehuna o Olaa, a ma ka hora 6 o ke ahiahi hiki makou i kai o Hilo a hui pu iho la me ko laila kamaaina, o Kale Moa, a hookipaia aku la makou no ko makou wahi e hooluoluia ai.  Ua oluolu ia no na kokua ma'i e noho pu no iloko.

            O keia kanaka, o Kale Moa, he kanaka oluolu maoli no oia, he oluolu na kukai olelo ana a he maikai no ka malamaia ana o na ma'i.  Nolaila, o makou o na poe i hoopaaia mai, ke haawi nei makou i ko makou mahalo a nui loa iaia.

S.K. MAHIOLE.

Hilo, Iune 16, 1894.

 

Hoike Hapaha o na Kula Sabati o Koolau, Kauai Hikina.

MR.  LUNAHOOPONOPONO:

            Ma ka la 24 o Iune, 1894, ua hoike ia na Kula Sabati huiia e Koolau, ma ka Luakini o Anahola, ma ka noho kahu ana mai o ke Kahukula Sabati Nui, G. B. Meheula.

            Hoomaka na hana ma ka hora 11 a.m., me ka himeni a me ka pule a Kale Kahee.

            Ku mai ke Kahukula Sabati Nui a wehe i na hana o ka hoike, e hoomaka ana ia Anahola ka mua, haawina o Aperila ka lakou; Koolau, haawina o Mei; o Kilauea, haawina o Iune.  Himeni nui ma ka Hoku Ao.

            Ku mai ke Kula Sabati o Anahola a hoike mai la i na mea i aoia ia lakou e ka lakou kumu.  Maikai a nani na mea i hanaia mai e lakou, e laa na himeni i hui pu ia me ka hoene o ka vaiolina a me ke ko'uko'u o ka ogana, ma o ka lawe mikioi ana a na kaikamahine puukani o ke ahi o Kalalea.  Mr.  Koana ke kumu.  He 31 haumana.

            Ku mai ke Kula Sabati o Koolau mahope mai, a ma ka nana ana ia loko, "Maikai Kauai hemolele i ka malie."  E pii ana ko lakou mau leo iluna a e iho ana ilalo, a i ke aheahe malie.  He 28 haumana.  Nui ka mahalo.  D. Trsak ke kumu.

            Pau ia, ku mai ke Kula Sabati o Kilauea.  Ianei la "pau ka pono a Kakina," no ka mea, o ka mea e kakau nei kekahi haumana, a aole e hiki ia'u ke hoomaopopo i ka maikai o na mea i hanaia.  O ka'u mea wale no e lohe ana i kela wa, oia ka ninau aku o kekahi mau haumana maloko o ka himeni ia Mose, a me ka haiia mai e na haina i ku i ka ii a loke.  Nui ka hauoli o ke anaina.  Kale Kahee ke kumu, a he 17 haumana.

            Ua malamaie he lulu dala mahobe iho o ka pau ana o na hana hoike, a penei na mea i loaa.  Kula Sabati o Kilauea, $5, Koolau $3.10, Anahola, $1, Haina, $9.10.

            Olelo hooholo a na komite no na Kula Sabati oi, penei.  Helu ekahai o Kilauea helu elua o Koolau me Anahola.  A hookuu ia na hana me ka himeni a me ka pule a Rev. S. K. Oili.

            He papaaina mahope iho ma kahi o ke Kahukula Sabati Nui, a ua ai a lawa i na mea i hoomakaukauia.

G.W. MAHIKOA

Kilauea, Kauai, Iune 29, 1894

 

NA PALAPALA.

            Aole maluna iho o makou ke koikoi o na hala a me na hewa no na manao i hoopukuia malalo o keia poo, aka, aia no maluna iho o na poe na lkoua kakau mai.

 

O ka Ulele Wale iho no Koe i na Ai a ka Ui.

MR. LUNAHOOPONOPONO:

            Ma ke Sabati, Iune 10, maloko o ka heiau o na Poe Hoano o Pahala, ua paio hupo aku kekahi Hoole Pope, malalo o kekahi ninau Baibalal i waihoia mai e kekahi lala o ua hoomana nei, a penei ke ano o ka ninau: "Ma kahi hea o ka Baibala e hoike ana, ina e amene ka mea nana e pule, alaila, amene like na mea a pau i akoakoa ma ia wahi?"

            Ua ku mai kekahi mau wahine o loko o ua Ekalesia nei a hoole, aole wahi o ka Baibala e hoike ana i ka amene like, a ua nui na hauwalaau.  Aka, o ka oi loa aku no o Hoopii, a he ku i ka hookiekie kana mau olelo.  E olelo ana ia ua hu mawaho o ka Baibala na mea e hanaia nei e na Poe Hoano.

            Mamua ae o ka hele ana aku i ka nui o keia mau hana, ua ku mai o Kahaulelio, ka mea nana ka ninau a olelo mai la e nana ma Nehemia, Mokuna VIIII., pauku 6, a penei ka heluhelu ana:  "A hoomaikai aku la o Ezera ia Iehova i ke Akua nui, a pane mai la ka aha kanaka a pau, Amene, Amene, me ka hapai ana i ko lakou mau lime iluna, a kulou iho la lakou a hoomana aku la ia Iehova ilalo no ko lakou alo ma ka honua.

            I ka wa i hoikeia aku ai ka haina o keia ninau imua o ke anaina o na hoahanau, oia ka wa i ku mai ai o Hoopii (Hoole Pole) a olelo mai la, ua hala mawaho o ka Baibala ka haina, a he nui wale aku kana mau olelo ino i ka Ekalesia o Iesu Kristo o na Poe Hoano o us La Hope, a e kaena ana no hoi ia i kona Ekalesia (Kalawina) i ka nani like me ke gula. U! O ka Ekalesia la hoi o na La Hope keia i auhulihiha iho nei ka aina i na hana aihue a pakaha.  O ka pono paha ia au e Hoopii e liki nei, o ka lilo paha o ka aina i na poe mikanele.  Oia, no ka mea, ke lili nei oe i ka Ekalesia i hele ma na kuhikuhi  a ka Baibala, a ke hoapono la oe i ka hana a kou lunaikehala hawawa.

            Ua pii ino ke kai o ka makua i na hana a kona hoahanau, a e ole wale no no na hoahanau pau ai.  I ka nana aku, ua kaa ke koikoi o na hala a me no hewa maluna o Hoopii.  Nolaila, mai opulepule hou e Hoopii, e like ae la me keia kohu hope loa.

D.J. ALOHI

Hawaloa, Kau, Iune 25, 1894.