Ka Makaainana, Volume I, Number 26, 25 June 1894 — Page 8

Ka Makaainana.

 

HONOLULU, OAHU, POAKAHI, IUNE 25, 1894.

 

KELA A ME KEIA.

 

            Poakahi i hala i hoomaka ai ke kau o ka Aha Hookolokolo Kiekie ma ka banako. Lehulehu no na hihia hoohalahala.

            Ua lilo ae i ka waihona hoahu mea kahiko Bihopa o ke Kula Kamehameha kekahi o na kii pohaku i loaa ai ma Mokupuni Neka.

            E hoomaka ana ka hoomaha o na Kula AUpuni a pau ma ka Poalima, Iulai 13, a e hoomaka hou ana ma ka la 10 o Sepatemaba.

            A hiki mai i keia la, aohe o Lunakanawai Kaapuni Waikina i hooholo i kona manao no ka hoowahawaha Aha o ka nupepa Adavataisa.

            O ka malamamoku me na luina elua o ka moku Emepire i noho iho ai mahope nei, ua holo aku no Kapalakikp ma ka Auseteralia o ka Poaono nei.

            Aia he puka nui ma ka uwapo Osianika, a he mea pono e hana koke ia mamua o ka loaa ana o kekahi ulia. Auhea ka hoi o Rowela a me kona hoki?

            Eia ka Mikahala ke hoomaemae hou ia nei a o ka Iwalani ke holoholo nei ma kona wahi ma na awa o Kauai, me he la e hala aue he eono mau pule.

            Ua hoopaiia o Kuanalewa (w) he $10 imua o ka Aha Apana i kakahiaka Poalima iho la, no ka hoopuka i na olelo ino i kekahi o kona hoa wahine makai o Iwilei aenei.

            Oluolu ka auhau a hoea iuka o ka nuku o Nuuanu, ke kau maluna o na kaa hali ohua nunui a F. Kamika. E awihi ae i kana hoolaha ma kahi wahi o keia helu.

            He ewalu poe luina mahuka o ka Piladelepia i hopuia e na makai i ka Poaono nei. Kaui no na aka a na kaiko, oiai, ua loaa he ola hou mawaho ae o na haawina mau.

            Ua lonoia aia he mahae iwaena o na Pukiki. O ke kumu ka, aole loa lakou i makemake iki o ko lakou hookaia i ke kuleana koho balota malalo o ke kumuhinu hou a na Pi Gi.

            Ma ke Kinau o kakahiaka Poakolu iho la i huli hoi mai ai o A. Rosa a me kona haku, W. Mahuka, mai kela hihia koi poho a Misi Alise Ea, ma ke kau kiuro mai nei o Wailuku.

            I ka wanaao Poaha nei, ua paa iho la i ka hopuia o Jack Napoliona me Mrs. Nora S. Kamaiopili no ka hewa moe lealea. Ua loaa pono aku ka laua e u hiolani like ana me na muki hoomaumau ana.

            Ma kela pauahi o ka La Pule i hala, ma ka hooikaika ana e huki i ka pahuhao o ke keena oihana kaa o D. Makorisetona, ua naki pu ia ke au o ka peahi lima o E. F. Imihofa, kane a Haina. Eia ke pii ae nei kona oluolu.

            Ua holo hoomaha aku nei o W. M. Gifada no Kapalakiko ma ka Auseteralia o ka Poaono nei, a oiai oia a me Mr. Anavaro ua kaawale aku, Na F.A. Sofa e lawelawe uo laua ma ke ano Luna Kiekie a Kanikela no Potugala. A me ko Gifada wahi hoi iloko o ka hui kalepa o W. G. Iwini Ma, na H. M. Wini opio e lawelawe nona.

            O nehinei ka la hoano o Ioane Bapetizo, ao ka Poaha ae hoi ko Petero Hemolele la hoane. He mau anaina pule ko ka la hope ma na luakini Enelani ma Roma.

            He aha ike a hookipa ka o haawina ae no Lualii Kikania ma kahi noho o Hakipuu i ka auwina la Poaha iho la. Ua lehulehu no na poe i hiki aku. Malaila ka bana Pi Gi kahi i hoolaulea ai.

            O ka nui o na lilo no keia kau kiure mai nei o ka Aha Hookolokolo Kaapuni ma Wailuku, ua hiki aku ai i ka Huina o $977.80. Ua hoomaka ke kau i ka la 6 a pau no ka manawa i ka la 19 o Iune nei.

            Poaha iho la i hopuia ai kela hiena Pukiki, Jeo Fereira, no ka hoopuka ana i na olelo hooweliweli i kekahi wahine Pukiki, a imua o ka Aha Apana i ka Poalima nei i aoia mai ai oia a hookuuia.

            Ua lilo mua no ka hoi o Mokupuni Neka ia Amerika Huipuia iloko o 1856, wahi a ka olelo a kekahi mea iloko o na nupepa Amerika. Owai ana la ka oi, o ke Aupuni Kuikawa paha, a i ole ia, o Amerika Huipuia paha?

            Eia ka na makai kaulia ke kiai makaala loa nei ia Wasinetona Pa i nei mau po, no ka hope ia o ala mai ka he haunaele mai laila mai. Ahu no hoi ka pala a keia poe! I kiai nui ia no paha i na aka o lakou iho, e ahona no la hoi ia.

            Ua koma aihue ia kauhale noho o Hanale Kamika, ma Kaliu, Koleaka, i kahi wa o ka Poakolu iho la, a ua lilo aku he $11. Ia ahiahi iho, hora 6.30 paha, i hoikeia aku ai i ka Oihana Makai, a o ka lakou koe a paa ae ua piko pau iole la.

             Ma ka la 20 ino nei, ua wawahi iho la ke kolohe i ka puka komo o ka halekuai i ka Papa Ola ma Kalaupapa, a lawe aku la i na dala o loko o ka halekuai i koho wale ia ma kahi o ka $100. O kahi laki loa aole i wawahiia ka pahuhao dala.

            Awakea Poakahi i hala i lilo ai ia J. T. Walakahauki opio kekahi apana aina o D. H. Nahinu, i make, e waiho ana ma Kalahiki, Kona Hema, Hawaii, no $530. Ua hooliloia keia malalo o ka hooko ana i kekahi moraki ia J. T. Walakahauki.

            Auwina la Poakahi i hala iho la, mauka o Kapalama, ua haule o Wile Hopena, keiki a Robata Hopena, mai luna iho o kekahi lio ana e holo ana me ka noho ole a ua eha kukonukonu oia, me ka manaoia ua make loa oia, no ka mea, ua ku a hope o kona poe i ka honua. Ua pohola hou ae no oia a ua oluolu hoi i keia wa.

            Ua hoopaiia he makai, oia o Wile Linise (William Lindsey), a me Ross Spencer a me kekahi Pake, imua o ka Aha Apana i ka Poalima, la 15 nei, no hookahi makahiki hoopaahao pakahi no ka hooweliweli ana me ka pu panapana i kekahi wahine Iapana a lawe mai he $25 mai iaia mai, mamuli o ka lakou koi ana aku no $50. Iloko o kahi po o Mei aku nei ka hanaia ana o kei mea ma kekahi hale ma alanui Nuuana, oiai, o ua o Linise, he makai oia no ka Papa Ola, a hoopauia i Mei 81 no ia hewa. Aohe a lakou kumu palo, a ua hoohalahala nui aku iluna. I ke kolohe?

            Ua kuai iho nei ka o J Noble (Keoni Nobala) i na mea holohau a pau o ka hale holohau ma Manamana, a e lawe aku ana ka oia a me kona hoahanau a wehe i hale holohau ma Kailua, Hawaii, i ka la 4 ae o Iulai.

            I ka po Poaha iho la i malamaia ai ka hoike hookuu o ke Kulanui o Punahou, maloko o ka luakini Papukaua, a ua heluhelu mai na haumana e puka ana i ka lakou mau kumuhana lehulehu o ka noonoo ana. Ua piha u aku no o laila.

            Ma muli o ko Kane ae maoli ana no i kone hewa, imua o ka Aha Apana i ka Poaha iho la, e hoi ana oia no eono malama hana ooleo ma Kawa. He aihue keia hewa ona, a no elua ana lawelawe ana, hookahi he paka mai kekahi Pake i ka Poalua aku, a o ka lua, he upa-ake hululio mai kekahi Kepani aku i ka Poakolu mai, a Poaha@ la hoi, kopiia a miko.

            Ma ka Monowai e ku mai ana i ka Poaha iho, mai na Panalaau mai, e loheia mai ai na lono piha no kekahi olai weliweli mai nei ma Welinetona, ke kapitala o Nu Zilani, he mau is mahope aku o ka haalele ana i ka Mariposa ia Aukalana ma kana huakai hope loa mai nei. Ua hoonaueueia na kauhale a ua hoopoino loa ia kahi o lakou.

            I ka Poaha nei iho la i hookolokoloia ai na kanaka Manila elua i hopuia ai i ka la 9 nei,

ma Kamakela aenei, no ka powa a ki pu ia ai a ku o Moemoe. He la holookoa ka hana ana a ua waihoia aku la ko laua hihia no keia kau kiure ae o ka Aha Hookolokolo Kaapuni. Ua kauia ko laua pela he $500 pakahi, a na C. W. Akepoka laua e pale.

            Ua hookahakaha paikau io ae no na pualikoa Pi Gi i@ no Poakahi i hala, ma Hal@ Kuea, a ilaila ae no ka bana Pi Gi. Aohe no i lehulehu loa lakou, he 200 paha, a pau ka paikau ana, kai huakai ma alanui Puewaina, eia nae, aohe i makauia e ka lehulehu. Palaweka ka mahina o ia po, e hoike mai ana i ko lakou hoowahawahaia e na ouli o ka po, a ua konane pono mai hoi ia lakou i kai ai a hoepau i ka paikau ana.

            Maluna mai o ka mokupea W. H. Daimona i kakahiaka Poalua iho la, i hoi mai ai o T. E. Evana me ke ola maikai a nanaina ohaoha, mahope o ka hala ana o ka makahiki a oi ma Amerika Huipuia me kona poe, oiai, akahi no oia a ike hou ia lakou no 18 makahiki. Nui ka hauoli o ka wahine a me na keiki i ke ike hou ana i kona mau maka.             Ua holo pu mai nei me ia kekahi kaikuahine ona, oia o Mrs. Williams.

            Hora 12 paha e ka po La Pula i hala, la 17 nei, i make ai o Charles Flagg, he wiliki no ka Halewai, ma ka Halemai Moiwahine. He hano kona mai a no kahi wa aenei kona hoomanawanui ana a no ka hiki ole a ano paupauaho loa mai, ua hoounaia oia i ka la 7 nei no ka halemai. Auwina la Poakahi maneleia aku ai kona kino make a nalo iuka a Maemae, malalo o ka hooponopono ana a ka Hope Ilamuku, a i ukaliia hoi e na makai. Ua piha iaia ke 53 paha o na makahiki.

            Ua hoopiiia o Kale Aki, loio, i ka Poalima nei e kekahi haku Pake ona no ke apuka i ka waiwai i haawiia iaia, oia hoi, he $185, no ke kuai ana i kekahi aina. Wahi a ko makou lohe mai ua hoole ka oia no kona hewa.

            Ua pakuiia mai i ka Papa Loio o Hawaii nei ma ka Poalua i hala o A. Bruson, he loio a lunakanawai i pau no Kaleponi, a me Geo. J. Stoneman, he lala no na Papa Loio o na makuaina o Misigana a me Wasinetona, a ua aeia aku laua e lawelawe i ka oihana loio ma na Aha a pau o Hawaii nei. Oiai, aole na palapala o ka inoa mua me ia, na A. S. Hakawela oia i hooia aku imua o ka Aha Hookolokolo Kiekie.

            Mahope iho o ka lele paikau ana mai o ko ka Piladelepia poe i ka Poalua i hala iho la, ua noiia ae no ka hooleleia mai o ko ke Kamepiona poe iuka nei e hookahakaha paikau ai, a ua loaa aku ka aeia ia Kapena Ruka i ke ahiahi iho no o ia la. Eia nae, i kakahiaka Poakolu ae hoi, ua hooleia aku e Kuhina Haki, mahope iho paha o ke kukakuka ana o ka Aha Kuhina. Aole i maopopo ke kumu o keia hoole ana.

           

            Po a ao ae Poaha, la 14 nei, ua paa i ka hopuia e Kapena Waipa a me na makai malalo ona he 38 poe Pake, mauka iki aku o alanui Moi, ma alanui Nuuanu, ma kahi o Asawana, no ka piliwaiwai fana--tana. Ekolu i ae okoa i ko lakou hewa imua o ka Aha Apana i ka Poakahi i hala iho la, oia na poe na lakou ia hana, a he $20 pakahi na hoopai. Eha poe e iho i ahewaia a hoopaiia he $6 pakahi. Ua pau ka nui iho i ka hookuuia.

            Ua hooliloia ka mokumahu Waimanalo ma ke kudala ana ana a Kimo Mogana i ke awakea Poaona nei, ma ke kauoha a ka Aha Kiekie ma o ka Ilamuku la, a ua lilo no $1,000 ia W. R. Kakela, kahu waiwai, a na Kapena W. Davisi i koho nona. E hooholoia aku ana ka moku e kekahi poe hui malalo o na lawelawe ana a ua kapena la no ka hali ukana a me ka hoopakele ana i na moku ili. O ka hua iho la keia o kona ili ana ma Mokuleia mamua aku nei a e hanaia nei hoi imua o na Aha mawaena o ka ona a me na hui panihakahaka.

            Awakea Poaono nei i pelukua aku ai ka Auseteralia no Kapalakiko, a na ka Bana Pi Gi i kipaku aku. Lehulehu na ohua i laweia aku, ua hele a ohuohu i na lei, a pomaikai no hoi na pee kau lei. O ke ano mau no hoi ka i ikeia makai o ka uwapo Osianika, o ka hele a laukanaka. Iaia i holo ai a waho pono ae o Leahi a ma o aku paha, hora 2 paha ia, ua hekau oia, hookuuia he waapa, hoe a loaa kekahi mea huli hoi ae. a holo loa aku la ka moku ma kana huakai moana. Heaha la ia mea?

 

NO KA PALI O NUUANU.

 

            E hooholo mau ia aku ana na KAA HALIHALI OHUA o F. Smith i kela a me keia hebedoma no ka nuku o Nuuanu. I ka hora 10 o ke kakahiaka. No ke Sabati, e haalele ana i ke kulanakauhale i ka hora 10 o ke kakahiaka a me ka hora 3 o ka auwina la. E loaa ana he manawa n na poe makemake e makaikai i ka nuku o Nuuanu e hanu ai i na ea oluolu. O ka auhau no ka hele ana a hoi mai, he hapalua wale no.

            In. 23-4mnw°                                                                                                                                      F. SMITH