Ka Makaainana, Volume I, Number 22, 28 Mei 1894 — Na Ehu Wawae o Kalani. [ARTICLE]
Na Ehu Wawae o Kalani.
I ke ahiahi Poaha i ikeia ai o ka Mariona a ku mai ai oia, la 17 nei, a mamua ae o kona lohe ia ana mai a hoea mai, ua pa iho la kekahi kikiao makani oolea a ku ke ehu o ka lepo. Na kahiko no ia olelo-ke pa pukikio mai ka makani, eia aku he moku nui a ku mai. Nolaila, i ka pa oolea ana mai o kela kikiao, e puehu liilii ana ka ehu lepo, na lau laau maloo, ka ino la hoi o kahi moku hali kauoha ke oili mai ana, i wahi la hoi e ko ai o ka ehu wawae o Kalani, eia ka auanei aole. Ua hora paha a oi ka pa ana a lai pu wale iho la no mahope iho o ka hora 7 o ia ahiahi. A i ka auwina la o ka Poalua iho la, ua haule mai la he wahi kuaua hoopulu lepo, o ia hoailona ʻehu wawae no paha ia, pela no me ka enaena a ikiiki o keia mau la, he mau loina wale no paha ia no ka mea e hoea mai ana. E kakaii hoomanawanui no kakou, aohe no e nele ana ka hōea mai iloko o ko kakou pauaho ole.