Ka Makaainana, Volume I, Number 19, 7 May 1894 — Page 1

Ka Makaainana.

BUKE I---Ano Hou.   Honolulu, Oahu, Mei 7, 1894 HELU 19

 

KOHO BALOTA OEHAA.

-

Hauoli na Kumukaia a me na Kuewa i ke Kue Ole ia.

            Ua hoea mai a ua hala aku ka la koho balota a na pakaha, i ka Poakolu iho la, la 2 nei, me na loina ano nui ole no na hana i lawelaweia ma ia la mawaho ae o ka pau nui ana o na moho o ka Aoao Uniona Amerika i ke kohoia. Ma Oahu nei wale no kahi kue ano nui, mai kekahi mahele ae no o ia aoao i ano mahae aku, a lilo he ekolu moho i ua aoao kue la, e hoike moakaka lea mai ana ia i ka nawaliwali maopopo loa o ke Aupuni. I ka la mamua iho, ua hoopuka ae ka aoao koo Aupuni i kekahi palapala e hoike ana i na moho o ia aoao, oia hoi, he elima no, oia o       

L. C. Ables, T. J. King, Charles L. Carter, John Kidwell a me A. K. Kunuiakea, a e hiki no i kela a me keia mea koho e hookomo i ke koho pakahi ana no ia kualima i 1 1.5, oiai, he eono moho e kohoia ai, aka, i ka la i koho ai, ua haule he elua o keia mau moho ae la, a lilo i ka moho o ka Apana 3, oia ka Lunakanawai Apana, ka oi o ka la ma ka lilo ana iaia ke alakai, he hoohoka maopopo loa i ka poai e ake nei e lilo a e kailiku aku i ka pono kaokoa o keia aina. A pela no hoi me na moho a na Pukiki, ua heleuluulu laua iwaena o ia lahui a ku no ua poai la i ka hoka. Eia hoi ka puana o na hana o ia la:

A. G. M. ROBERTSON……………………………1566

LEMUEL C. ABLES……………………………….1209

CHARLES L. CARTER……………………………1109

J. M. VIVAS………………………………………..1088

ANTONIO FERNANDES…………………………1082

A. K. KUNUIAKEA………………………………...612

Henry Kiemme…...…………………………………..610

Thomas J. King…...…………………………………..578

John Kidwell………………………………………….419

J. C. Cluney…………………………………………..321

John Mitchell………………………………………… 135

                                                     8729

Na koho hakina……………………………………..    4

Huina koho nui……………………………………… 8733

            O na inoa mua eono ka i puka no ka mokupuni holookoa. Ua kohu La Pule keia la koho iho la i ka maluhia, o kekahi kumu no hoi paha no ka nui ole loa no hoi o na poe koho, a he ole loa hoi ko ka lahui pikokoi aku ma na wahi kohe. Lehulehu na poe i hele ole e koho, a pela no hoi me ua balota i kiolaia, eia nae, aohe i akaka ia makou ka nui. E kue a e hoopii ana o Keleme imua o ka Aha Kiekie no na koho mawaena ona a me Kunuiakea, a ina e aeia ana, alaila, helu hou ia na balota.

            Oia like ana no na lono mai Hawaii mai, koe wale no o ka moho i holo kuokoa aku me ka paa ole o kona inoa ma ka balota, ua haule oia i ka huelo o ka lahui o kona luaui, a poho hewa na palapala liilii o ke pai ana iho nei a hoouna aku nei iwaena o na hoa`loha ma na Kona a me Kau. Eia iho ko laila haina moe:

D. H. HITCHCOCK………………………………..776

F. S. LYMAN………………………………………742

D. H. KAHAULELIO……………………………...644

H. L. HOLSTEIN……………………………………593

J. KAUHANE……………………………………….585

W. Horner……………………………………………577

W. C. Aohi…………………………………………… 50

                                                                                     3997

            A mai Maui, Molokai, a me Lanai mai hoi, ua puka aku la no ka moho kuokoa a ko Hana poe, a Iosepa hoi @@ poholalo ai, oia hoi, hoounaia aku nei o ua o Iosepa e ko Hana hui i ka hui nui ma Wailuku, oia a me Kahookele, me ke kauohaia o W. Pogue ka lakou moho, a oia hoi ka laua moho e hooikaika ai. Eia nae, i ka u hoea ana aku i Wailuku, mamuli paha o na peloia mai, ua ae aku la o Iosepa i kona inoa e lilo oia ka moho a haaleleia iho la hoi ka moho ona a me kona hoa i kauohaia ai e hooikaika. A i ka huli hoi ana a hoike aku i ka mea i hana ia e laua, ua pii ka ena o ko lakou hui a kukala okoa ae ai ia. Pogue o ka lakou moho ia. Ea, poholalo io no ua kahunapule la. Eia iho no ka haina nane o ia mahele koho:

J. W. KALUA………………………………………...473

H. P. BALDWIN……………………………………..362

J. K. IOSEPA…………………………………………315

W. F. POGUE………………………………………...290

W. Y. HORNER……………………………………... 250

                                                     1690

            A ma Kauai hoi a me Niihau, aohe mau paonioni ana no laila, a ua hele okoa no ko laila mau moho. Aole i loaa mai ia makou na hoike no ke heluna koho.

            I mea e maopopo ai ka nui o na poe koho a me na balota i kohoia, e puunane ae i ka huina nui o na moho i aeia no ka mahele hookahi.

-

            He paani hookuku kinipopo Pelekane ko ka Poaono i hala. Aperila 28, mawaena o 11 poe o ke Kamepiona a me ko uka nei poe, a ua kaa ke eo i na keiki mai o ke kai, he 58 kue ia 37.

 

Poe Makai Hoeha Pake.

            I ka Poakahi i hala, Aperila 30, i hookolokoloia ai kela poe makai ekolu, oia o Toma Abbey (makai kkiu Kepani), Akoni Bright (makai Pukiki) a me C. Opunui, imua o ke Aha Apana, no ka hoeha ana i kekahi Pake i ka wanaao o Aperila 15. Ma na olelo ike imua o ka Aha, he eha keia poe makai i hele nui ai ia po La Pule e huli i ke kuke Kepani mahuka o ka mokukaua Adamu, a ua hala aku no hoi ka pawa o ia po a ua maluhiluhi nui, ua haule nui iho a nonoho nui ana ma ke ala helewawae me kihi komohana o na alanui Konia me Pauahi. Oiai lakou e hoomaha nui ana me ka hoonanea, hoea ana he wahi keiki paele me ka pila gita, a mahope iho he keiki Hawaii me ka pila puhi waha. No ke ano mehameha paha o ua poe makai nei, ua koi aku e hookakikani mai laua, a ua aeia mai. Iloko o keia hauoli, ua eu ae o Akoni a hoomaka e hulahula, a oiai hoi e hauoli nui ana pela, haule mai ana he poi wai mai luna iho o ka hale a lakou e lealea nei mawaho a pau loa ua poe huli Kepani nei i ka “pulupe nei ili i ke anu” me kekahi waiala kupaoa. No ka ikaika a pakui loa o ua wai la, nolaila, pii ae la hoi kahi kai o kahi makai Kepani a hele huli aku la no ka mea nana ua wai la i nini mai a loaa aku nae e iho mai ana i ke alapii, a o ka lele aku la no hoi ia a hoomaka aku la e pepehi. Ike hoi o Akoni i ko ka Pake loha a ku i ka hoku, pepehi aku la no hoi oia a me ke peku pu. A ua olelo no hoi ka Pake ua pepehi o Opunui iaia. Ano ole na makai i ka hoeha pilikino iaia, ua hopu nui iaia e laweia i ka Halewai, a elua paha hora ma ia hope iho, ua hookuuia, oiai, aohe ona kumu hoopii i hoopaa ia ai. Eia no ke kakau la na hoailona o kona hoehaia ana e na kiai maluhia. Ua ahewaia o Toma a me Akoni a hoopaiia e uku i $25 pakahi. Ua heohalahala ka inoa hope i kona hihia. Pakele hoi o Opunui ma ka apua.

-

Raiana Aihue Daimana

            I kakahiaka Poalua i hala i kaalo iho ai o Keoki Raiana, kela mea aihue momi o ke kalaunu, ma ke alo iho o ko makou keena nei me kona mau aahu maoli a me ka paa no o ke kalapu hao i kekahi wawae ona a me kona hii pu ae no hoi i ke kaulahao a me ka poka, malalo o ka lawe ana a W. Kamana. Ua ku aku oia imua o ka Aha Apana ia hele ana, no ka hookolokoloia no ka hoao ana e mahuka mai ka laina paahao aku, e like no me ka makou i hoike aku ai ma ka helu i hala. Iiaa imua o ka Aha, ua ninauia mai oia ina paha ua makaukau oia e pane nona iho, a ua olelo aku oia: “Makemake au e ike i ke Kanikela Amerika mamua o ko`u pane ana.” Ua hoike ae ka Hope Ilamuku e aeia no kana noi, aka, mamua o ka hooko ana akuia mea, e hookomo hou aku ana oia he kumu hoopii okoa, @a hoi, no ka lawe huna i kekahi mea @ake, he pu panepane, a hoao ai e ki ia Kahananui, Lui a me Fereira, he poe hoa paahao nona i Aperila 26. Ua ninau hou ia aku oia ina paha ua makaukau oia e pane no ke kumu hoopii ihope, a ua pane ae no oia e like la me ka mua.

            A ma ia hope iho, ua laweia aku oia e Hope Ilamuku Balaunu a me Kamana i ke keena Kanikela-Kenerala o Amerika Huipuia, a ua hapalua hora paha oia a me ke Kamikela-Kenerala, o laua wale no, iloko o kekahi keena. Ilaila, ua koi aku oia i kona hoopakeleia, oiai, he kanaka Amerika oia, aka, ua hooleia mai me ke aoia mai nae hei e ku no oia no kona hookolokolo ia, no ka mea, he hewa keia nana i hana ma keia Aupuni. No ke ko ole o kona makemake ilaila, nolaila, ua koi oia e ike i ke Kuhina Amerika, a oiai nae, aia ke Kuhina i Waikiki e noho nei, ua aeia no ia noi ana a laweia oia ilaila, aohe no nae he wahi kanaaho i loaa mai iaia malaila, a ua like no me ka mea i loaa mai iaia mai ke Kanikela-Kenerala aku. Ua hoomoeia kona hihia hope mai ia auwina la mai, oiai, ua makemake hou oia e hoolako mai ke Kanikela me ona loio nona, aka, no ka hoao ana e mahuka mai ka laina paahao aku, ua kapae ae oia i ka manao hookolokolo a ua waiho loa ia aku no ka Aha Kaapuni.

            Nolaila, i ka Poakolu iho la i hookolokoloia ai oia no i ke kumu hoopii hope, a ua lehulehu ua hoike i ninaninauia ae. Ua ho@@auia mai no i ka Poaha a me ka Poalima, me kona kukulu aku no i mau hoike ma kona aoao e kue ana i na hoike o ka aoao Aupuni, malalo no hoi o kona pale ponoi ana no iaia iho. O ua olelo ike ma ka aoao hoopii, ua ane like loa no ia me ka makou i hoike ai ma ka helu i hala, ma ke ano nui, a koe wale no paha ma kekahi mau wahi. Eia nae, aole ka Lunakanawai Apana i hilinai i kana pale, oiai, ua kaa ke koikoi o na ike ma ko ke Aupuni aoao, a nolaila, ua hookau mai la oia i ka hoopai o ewalu malama hana oolea hou, e hoomakaia mahope aku o ka pau ana o kona manawa paahao mua e paa nei no ka aihue daimana. E kiai makaala loa ia aku ana oia ma keia mua aku ma ka papalua ana aku paha i kona poe kiai.