Ka Makaainana, Volume I, Number 14, 2 April 1894 — Inoa o na Poe Kumakaia Alii. [ARTICLE]

Inoa o na Poe Kumakaia Alii.

MR. LUNAHOOPONOPONO: Eia ma Lahaina nei ka pepa kakauinoa e pili ana i ke Aupuni, oia hoi, i Aupuni Moi a Repubalika haha, a i ole ia, i Moi okoa mawaho ae o Liliuokalani, ka Moi mua i pakahaia iho nei. Eia na inoa o na poe i kakau: Kamauu no Lahaina, Maui, he kahuna anaana; Geo. Kalilikane, Lahaina, he welo na Pali; D. Kahaulelio, Lahaina, he puuohulu; H. Hoewaa, Kahakuloa, he well na Pali; J. Saffery, Olowalu, he aloha aina mamua; Simeona (hapa nika), Lahaina, makai hookano; Kameki (hapa nike), Lahaina, palu kuha no Hona; Rev. A Pali, Lahaina, he aikane na J.W. Kalua, a me kekahi poe e ae i paa ole ma kaʻu pepa hoomanao. O keia poe i kakauinoa he poe hapa i ke keko a hapa i ka hupo. E ula ana ia o na maia a Kekuaokalani ia oukou; ahu no hoi ka pala. Hele pela oukou e na poe kumakaia i ka mea i poniia. E uwe ana oukou a mihi iho no ka oukou mau hana ino hilahila ole maoli. O kaʻu mea hilahila ole loa i koʻu ike ana, oia kekahi aloha aina i kipakuia mai ka oihana aku, oia o Jno. Saffery. Ua kipakuia oia i ka mahina o Sepatemaba, 1893, mai ka oihana makai aku o Lahaina nei, a ua

hoino no hoi i keia poe haole aihue aina i kona manawa i pau ai; aka, i keia manawa iho nei, ua pai hoi aku nei oia i na haole hoohuiaina. O keia ke kanaka i like me ka ilio ka ai hou i ka luai. Ua makemake oia e hoi hou ma ia kulana mua mamuli o ka hoopunipuniia mai. Heaha la hoi ? S. K. KANAE. Lahaina, Maui.