Ka Makaainana, Volume I, Number 13, 26 Malaki 1894 — Page 8

8 HONOLULU, OAHU, POAKAHI, MARAKI 26, 1894.

No ka Pomaikai o na Luna.

            Ua hopuia iho nei o Levi Wood, kekahi o na keiki Hawaii lawe pepa o ka Hoku no ke apuka, ma ka lawe loa ana i na dala i ukuia aku iaia no ka pepa. Imua o ka Aha Apana i ka Poakolu a me ka Poaono nei, ua ae oia i kona hewa, a ua hookaulua ia ka hoopai ma na hihia a elua, oiai, he mau hoopii hou aku no koe iaia. No ka hewa mua, he wahi hapalua wale no ka mea ana i lawe. Oia ae la ke ano a makou i manao kahiko ai e hana aku i na luna apiki i ka makou pepa, a aia wale no ko lakou mai. O ka leo keia o ke aloha, o like auanei me kela keiki opio iho keia maluna ae.

KELA A ME KEIA

            He aha hulahula ko luna o Piladelepia i keia auwina la.
            I kahi la o keia pule e hoomaha ai na kula a pau no elua pule.
            I keia La Pule ae, Aperila Fulu, e ku mai ai ka Arawa mai ka hema mai.
            Ua holo aku ka mokumahu okohola Belevidia i ka Poaha iho la no ka Alika.
            Ma ka hoike a kekahi nupepa Pake, ua haalele aku ia Kina no Auseteralia he ehiku mau mokukaua Pake.
            Ma ka Iwalani o kakahiaka o nehinei i laweia mai ai he 50 poe Iapana haalele hana no Mana Kauai.
            I ka Poakolu iho la i ku mai ai ka mokumahu okohola Hawaii Alekanebera, a i kahi la mai no i holo loa aku ai no Alika.
            Kakahiaka nui o nehinei i ku mai ai ka Warimu, mai ka akau mai, a i ke ahiahi molehulehu iho no i holo loa aku ai no ka hema.
            Ua paniia ka halekuai Heiau o na Paikini i ke ahiahi Poaono nei, no ka nui paha o ka aie, malalo o ke kauoha a kekahi mea o Kapalakiko.
            Ma ke kakahiaka Poalima iho nei, hora 9, ua hanau mai la na ka wahine a K. W. Lualualei he keikikane ma ko laua home ma Kawa, Honolulu.
            Ua kipa ike like ae na kapena o na mokukaua Iapana i ka Poaha iho la, a ma ia hope iho ua kipa pu aku iluna o na mokukaua e ae.
            Eia no ke mau nei ka nokeia o na ilio mekala ole i ka hoohei kipuka kaula ia. He aoa okoa nui mai paha koe o na owau o ke Aupuni oehaa.
            I kakahiaka Poakolu iho la i huli hoi mai ai ka mokukaua Iapana Naniwa mai kana huakai aku nei i Hilo Hanakahi o ka Moku-o-Keawe.
            Ua malama ae na Ekalesia o Kaumakapili me Kawaiahao i ka hoike hapaha o ko laua mau Kula Sabati i nehinei. Ua emi loa na Kula Sabati i keia wa, aole hoi e like me na wa i hala.
            Ua kipa ike pili oihana aku ko Beritania Nui Kuhina ia luna o ka mokukaua Iapana Takasiho i ke awakea Poaono nei, a ua haawiia mai no na ki pu aloha ana nona e like me kona kulana.
            Ua hooleleia mai iuka nei i ka auwina la Poaha nei, he 385 luina o na mokukaua Iapana e ku nei a me he mea la ua lilo ia i mea hoohauoli no lakou.
            Ma ka halawai mau o ka Papa Ola i ka auwina la Poakolu iho la, ua hooholoia e hoomauia aku no ko Kauka Goto lawelawe lapaau ana i na poe mai o Kalawao.
            Piha mau na anaina haipule ma na luakini o Malieokamalu a me Sana Anaru i ka Poalima Maikai nei a me nehinei, a lehulehu no hoi na poe i hapakemaia.
            Ua huli hoi mai ka Ilamuku, i kakahiaka Poaono nei, mai Kauai mai a aohe no i oluolu ae. Eia nae, aohe ana pala aku nei o laila me na Kepani haalele hana
            Ua holo loa kela kanawai koho elele a ua Pi Gi i ka Poaha iho la. O ka hooko aku koe i ka hana, a iloko o Mei 2 aenei e malamaia ai ke koho balota ana.
            Na ke Kimo Maki i ka Poaha iho la i lawe mai i ka lono no ka nui o ka ino i ka ua a me ka uwila ma Kauai, a ua hiki ole loa na ukana ke hooleleia ma Kalihiwai.
            Elima poe haole malihini, me he poe luina la i nele i kahi hana, i noi ae i kakahiaka Poalima nei e komo iloko o ka oihana kaua Pi Gi, aole nui nae i makemakeia no keia wa.
            He pahu me 20 pu raifela o loko ka i laweia aku mai ka halekuai o Kalinipama Ma, i kakahiaka Poalua i hala iho la, a Iolani Hale maluna o kekahi kaa hali ukana.
            Ua lono wale ia oia o Walata G. Kamika, lunahooponopon o ka Hoku, ke manao nei e ahai loa aku ke pupuhi i na kaiaulu okoa aku, me ka manao hou ole e kuewa hou mai no keia mau kaiaulu.
            Ua kipa ike ae o Adimerala Iwini ia luna o ka Naniwa i ka Poaha iho la, a i ka hoi ana ua ki pu aloha ia mai. Mahope iho ua kipa ae oia iluna o ke Takasiho, a oia haawina like no i ka hoi ana.
            Aperila 14 ae e hoea mai ai ka mokumahu Kina ianei mai Kapalakiko mai. Oia aku ana ka mokumahu mua loa e ku mai ai mai Kapalakiko a ekolu la mahope iho e ku mai ai ka Mariposa.
            Apopo e hookolokoloia ai kela kuke hou paha o ke kiapa S. C. Alani. I ka Poaono nei i noho ai ka Aha kolonelo no ka noonoo ana no ko Kauhane kumu i make ai, a ua hookauluaia ka olelo hooholo.
            O ka Poalima nei ka Poalima Maikai. Ua paniia ko T. H. Kewiki Ma mau halekuai ia la a po. Awakea a aui ae hoi ka la, paa kekahi mau halekuai e ae a me na keena oihana Aupuni. O na kula kekahi i hoomaha.
            Ua kipa ike pili oihana aku o Adimerala Iwini, i ukaliia e Kuhina Wilisi me Kapena Baka o ka Piladelepia, a haawi aku i kona laoha hope ia Dole a me lakou iho no a pau. Ua kuku na kea ma ke alo o Iolani Hale a me ka bana pu. Pau ia, kono aku ka Adimerala ia Dole ma iluna o ka Piledelepia e paina ai i ka hora 2 o ia auwina la. Ua pau nui aku i kai, a i ka holo ana a me ka huli hoi ana mai, ua uina ae he 21 pu aloha no ua o Kolekaaka ma. Hiolo no na pilali o na poe ukali.
            Ua oluolu o Kaouli, i houia ai i ka pahi o kela kuke hiena o ke kiapa S. C. Alani, a ua hiki hoi ke hele. Ua puka oia a eia ke hele nei me ka oluolu.
            Aole poe i koho ae no na mahele kopaa o Ewa a me Makaweli, ma ka hoaoia ana e kudala i ke awakea Poakolu iho la, ma ko Leve keena kudala.
            Ua hooleleia na luina a me na koa malina o ke Kamepiona i ka Poalima Maikai nei no ka hele pule, malalo a ke alakai a ko lakou puali puhiohe kau aoao a me na pahu.
            Ua hookauluaia ko ke Kinau holo ana i ka hora 2 o ka auwina la Poalua iho ia a ka hora 5 o ia ahiahi. Pela no hoi me ke Kalaudine mai ia ahiahi mai a ke ahiahi Poaha iho la, a i ka Poaono iho e ku mai ai oia.
            Ua loheia mai nei e mare hou ana ka o Kakina i wahine nana he mea kakau nupepa a he mea lawelawe a malama dala no ke kii Kilauea a ua o Kakina i hoikeike ai ma Kikako a e hoikeike mai nei hoi ma ka Hoikeike Hooilo ma Kapalakiko.
            Ua paukiki ae ka holo puiwa ana o kekahi lio me ke kaapio i kakahiaka Poaha iho la ma ka alanui Papu a huli ma alanui Kalepa, a ua paa i ka hopuia e F. Fereira, kela Pukiki eleu i ka hopu mau i na lio holo puiwa, oiai oia ma kahi kokoke i ke keena Buletina. O ka 29 iho la ia o na holo puiwa ana i hoopakele ai.
            Eia he wahi haole lihiula pilalahi, i kapaia o Alabama Mikila, ke hele nei ka e hoohulihuli i na kanaka, mamuli ka o kona kamaaina ia lakou, a he hana ma ke Kula Kamehameha ka mamua, oiai, eia ke manaoia nei e hoomaka aku ke kukulu ana i na hale no ke kula kaikamahine. He neo no ka mea i loaa, oiai, aohe oia i biliviia aku.
            I kekahi kanaka, he makai kiai no ka Halemai Pupule, e holo ana ma kona lio i ke ahiahi nei a ma ka piina o Leleo, me he la ua kaheaia aku oia mahope a kaohi mai la oia i kona lio, o ka manawa no nae ia one i haule aku ai a papu ana ke alo ilalo o ke alahao a ku ana kekahi kuekue maka. O kona wahi ia i waiho a make ai a hiki i ka hapai okoa ia ana e na lima kokua a hoihoiia. Ua lohe mai makou ua pohala a ua oluolu oia.
            Ma na lono hope loa mai nei no ke kahua kaua kipi ma Rio de Ianeiro, Berazila, ua haawi pio aku o Adimerala De Gama a ua holo oia me kona mau alii iluna o kekahi manuwa Pukiki. Aka, no Adimerala Melo hoi, aia no oia i ka Hema kahi e hoomau la, aole ka haawi pio wale me ia, aka, e mau ana no ka paio ana me ka nana ole ae i ko De Gama haawi pio ana
            Aole loa i hoea mai nei ka Adimerala hou ma ka Auseteralia, a ma na lono nupepa hoi ua hoounaia oia i Berazila ma ko Adimerala Benehama wahi, a e uwaiia mai ana hoi o Benehama no ka aina Makika, he mau mokupuni mawaho ae o Nikaragua, ma AmerikaWaena, oiai, ua okaikai ia wahi a ua hooleleia na koa luina o kekahi mokukaua Beritania iuka. Ua oleloia aia ia aina malalo o ka Liona i keia wa, a heaha aku ana la ka Amerika Huipuia mea e hana aku ai.
            He ahaaina ke haawiia ana ma ka Hale Makuahine Kapiolani ma Ululani i keia Poaono iho a o na loaa a pau no ka pomaikai no ia o ia home waiwia nui o na makuahine Hawaii, kahi hoi o kahi o lakou e hoohanau maikai ia ai me ka malama a makaala pono ia.
            I ke ahiahi Poaha nei i ku mai ai ka mokukaua o na mikanele ka Hoku Ao, mai na Paemoku mai o ka Hema. Ua hoi loa mai maluna ona na Rev. R. Maka, no Butaritari, J. Kanoho, no Malakei, a me W. N. Lono, no Maiana, ma na Paemoku Gilibati. He mau mikanele haole kahi i holo pu mai ai.
            Weliweli ka nanaina o na mokukaua e kuku nei ma keia awa, oia hoi he elua Iapana, elua Amerika, a me hookahi Beritania. Ua paukukuia hoi, he keokeo a he eleele na pena liko ole ia lakou e kuku nui nei, penei: Takasiho, ma Ewa loa, keokeo, Kamepiona, iho, eleele, Piladelepia, keokeo, Adamu, eleele, a o ka Naniwa ma Waikiki loa, keokeo.
            I kekahi hapa haole e hele ana ma alanui Beritania i ke ahiahi Poaono, Maraki 17, ua holo mai he makai kaulio a hookui ana iaia. Ma keia hoopilikiaia o ia mea e helewawae ana, ua hookau hou mai ua makai olalau la i na hana a kona alelo me ka hooweliweli mai e hopu i ua mea la. Pehea ka loihi a ka Ilamuku e hoomau ae i keia poe Olelo E ano olalau ma ka oihana e hoopoino ai i ke ola o ka lehulehu ma kahi o ka hoopakele ae?
            Ae, ua hookahakaha paikau io ae no na pualikoa Pi Gi i ka po Poalua i hala iho la, mea ole ka ua ano kilikilihuna a me ka makani o ia po a ka mahina i owaka palaweka mai ai i ka uhiia e na ao kaalelewa. Mai Halealii Kuea ua poe la i kai huakai nui alanui Kapiolani a alanui Beritania, a huli hou mai a ka hale paikau. Elima wale no puali a ua alakaiia e ka puali puhi ohe Pi Gi no.
            I ka po o ka Poaha iho la, la 15 nei, i hoohikilele hauli ia ae ai o Tome Luka, kahi Liona Ulaula uuku, a me kana wahine e ko laua mau hoa’loha no ka piha ana o ko laua mare aniani, 15 makahiki. Ua konoia laua ia auwina la e hele i kauhale okoa e paina ai, a ia laua i kaawale ai i miki nui ae ai na hoa’loha a hoohiwahiwaia ko laua hale me na hae, na pua a me na mea ulu uliuli. Lehulehu na makana i loaa ae ia laua, a ua lehulehu pu no hoi na hoa’loha i hiki ae e paina pu i na mea i hoomakaukauia. Nui na mahalo no laua.
            I ka Poakolu iho la i paa ae ai he kaikamahine Hawaii i ka Halewai no ka haalelo kane. Ua oluolu hou oia e hoi me ke kane, he haole koa Pi Gi, a u hoi ana, a ia ahiahi iho no nae lawe okoa ia ae no e ke kane a paa hou ana. Imua o ka Aha Apana i ka Poalima nei i hoike ai oia no ka malama ole o ke kane, aka, i ka olelo okoa ana aku no i ka Aha he kane hapa-haole kahi ana, hoouna loa ia no Kawa no hookahi malama. Ua hoikeia ae hoi imua o ka Aha he 12 ½ wale no kona mau makahiki. I ka la i mare ai me kela haole, he wa i hala aenei, ia poi ho no lilo i ka ahaiia e kahi aku.