Ka Makaainana, Volume I, Number 13, 26 March 1894 — Page 7

HONOLULU, OAHU, POAKAHI, MARAKI 26, 1894. 7

na ulele ki poka ana ma na aoao pau. Mahope iho ua hooao a pau. Mahope iho ua hoolele poka pahu ia aku ke kulanakauhale. No hookahi hora keia kaua ana a me ia hope iho ua hooliloia ia wahi i puu opala a i puu lehu hoi a huli hoi nui mai no Buhamabula, me ka manao e hoonee aku i ka pualikoa Beritania holookoa ma ka la 8 ae. He ekolu wale no poe i eha ma ko ua Beritania aoao ma keia ulele hakaka ana.

Na Hunahuna Laulaha.

            E komo aku ana o Korea iloko o ka pohai o na aupuni iloko o ka Hui Leta.
            Ua lonoia no ka hakaka mawaena o na poe Holani a me na Pake ma ka paemoku o Sumatera.
            Ua loohia kukonukonu loa ia o Pohakuhauoli me ka ma’i mai na kauhola ana aku a kekahi mai lia anu i loaa iaia.
            Ua hooholo ke komite o ka Ahaolelo Geremania i ke kuikahi kalepa mawaena o ia aupuni a me Rusia, he 16 kue ia 12.
            Ke waiho nawaliwali loa la o Lui Kosuta, ko Hunegari kanaka makee aupuni, mahope o ka waiho mai ana a pohala a loaa hou no i na kauhola ana iho.
            Ua oleloia ua kohoia o Generala Keresepo i Peresidena no Venezuela ma ka oi nui loa, aia nae he manao pono ole i laulaha loa ae malaila no ke ano o kana mau lawelawe ana i na hana. Ma ka la 1 nei i aneane loa ai e pau loa ae na hoike koho i ka loaa.
            Mahope o ka noho kuka ana o ka Aha Kuhina o Sepania no ehiku hora, a mamuli hoi o ke paonioini ana o na manao like ole ma kekahi mau hoololi pakiko ana i manaoia, hui pu hoi me ka manao e pili ana no kona mau panalaau, ua waiho aku la ua lala a helelei iho la ka Aha Kuhina. Ua haawi aku ka Moiwahine Kahu Aupuni i ka wae ana i Aha Kuhina hou ia Kuhina Nui Segasata.
            Iloko o ka muliwai Seine, Farani, i loaa mai nei i ka la 8 nei ke kino make i manaoia no kekahi keiki hele kula Amerika o 17 makahiki, nona ka inoa o Edward Webster, ua hele a inoino, ua paa na lima i ke kupeeia a he aahu maikai no kona. Ua nalowale oia i ke ahiahi o ke Karisimasa ma Parisa. Aia no kona makuahine i Nu Ioka, ua make ka makuahine ke loaa oia. He $400,000 ka waiwia o kona makuakane i ka make ana, a ua manaoia nona ia pono ke oo ia.

            E lawe i KA MAKAAINANA, i ike ai hoi i na mea hou kuloko a kuwaho. Ke nele no, pouli ua maka.

NA MOKUPUNI.

            Malalo o keia poo ae la e hoopuka mau aku ai makou, mai kela manawa aku, i na mea hou mai kela a me keia pea o ko kakou aina nei, ma kea no he mau lono pili kuloko iho ia no kakou nei.

Ko Hookena mau Anoai.

MR. LUNAHOOPONOPONO.
            Piha mau na halawai hui opiopio o na ahahui sabati, aole hoi pela i ka wa mamua, oiai e halawai ana i ka wa maamaama, he mau wahi kauna wale no, aka, i ka hoihoiia ana i ka po e halawai ai, he keu ka piha mau. He mea kupanaha loa hoi keia.
            Ke hele nei kekahi mau wahine e komo kauhale ai i na auwina la Sabati, a o ka laua hana nui o ka himeni ma ka lehelehe oiai ko laua naau ua manao loa mai ka laua hana aku. O ka mea kupanaha loa, aohe he ike i ka pule a he hilahila ka i ka haiolele ma na kauhale. Kupanaha no! aia no hoi i hele i kauhale e hoohulihuli ai, ua haawi mua ia laua iho no na hana pono a pau loa, a pale i ka hilahila, a lilo i koa wiwo ole no Karisto, eia ka he hele hookaina’i wale iho no, me na buke nunui ma na aoao. Ea, e na wahine opio, mai hana hou pela. Mai hele hou olua me ka hookamani hoopunipuni ai i kanaka, aka, e noho malie a wehe mua ae i ka pula o ko olua mau maka a hemo; alaila, hele aku e hoohulihuli.
            Ma kekahi la o ka pule i hala, ua hoohuoi wale ia kekahi o ko makou mau opio o na kama a i elua, me ka ike o kekahi mea o ka Oihana Hooko o ke Aupuni, aka, mamina kou mea kakau i ka hoole loa ana, aole loa ka oia ike. Me he mea la, ua hala loa laua i Waialua, a i ke kai kauhaa a ka malihini, a oia ka kou mea kakau i hoomanao ae ai i neia mau hooheno:
“Ilaila au la ikemaka,
Ka huila wai o hanahana pono.”
            Ke ulu pu nei no ka palaoa me ke kikania, a malia Nana no e hookaawale i ka la mahope.
            Ua lono wale ia, ua loaa mai nei ka hookohu Lunakanawai o Thomas H. Wright, a o ka makou ia i hauoli ai. He kanaka kupono loa oia a he naauao maoli no. Ua pono no ko Haili pau ana, he ike ole a he naoupo maoli no. Ua hoike maopopo mai oia i kona hupo ma o kona lawe ana ae i ka mana o ka Oihana Hooko a hoolilo i lala no ka Oihana Hookolokolo. Hoopuka oia he palapala hopu no Jas. Bright a me kona mau makuahonowai no ka ohumu ino, a haawi i ka makai e hopu ia lakou a lawe imua o kana Aha, ma kekahi la ae no, aia hoi o Jas. Bright i Waimea, he 75 mile mai Hookena aku. Akaka ka hupo! Manao paha oia, he manu ke kanaka e lele ai a hiki i Waimea a hoi mai.
            Ma ua lono laulaha, he 9 ka nui o na poe noi Lunakanawai, aka, no ka ekaeka o ka maunu, hoi nele i ke Kula o Malama, a lawe aku la, a lilo ke keki o “Hale o Keawe.”
            Ma ka la 24 o ka mahina i hala, ua ku ka Malulani i Hookena nei he 6 paha hora, no ke kali ana i na poe haole nana aina ma Kalahiki. Eia kekahi haole ke hoohana mai nei i ua aina nei malalo o kekahi hui.

KAI MALINO.
Hookena, Maraki 12, 1894.

Hekau i ka Lulu o Hilo One.

MR. LUNAHOOPONOPONO:
            I ka auwina la Poalua, Maraki 13, ua hekau mai la i ka lulu o Hilo Leilehua ka manuwa. Iapana “Nanwa Kan.” Oiai ka lono i pahola ae ai no kona hiki mai a mamua o kona ikeia ana aku, ua loaa mai la he kauoha i ka waapa o Waiakea mai ka Luna Dute mai, Chas. Notley, e hoike ana i ka wa e ikeia aku ai ka Naniwa e hookomo mai ana i ka lae o Makahanaloa, e hiki mua aku ka waapa no ka uwapo o Kapalaoa ma Hilo. Pupuu hoolei loa, ua hookoia ke kaueha, a mai laila mai i kau mai ai na poe nana ke kauoha no lakou na inoa, Wiliama, Makai Nui, Wiliama, Kauka, a i kukaiia me na inoa maluna ae elua mau Kepani, huina elima, a holo aku la no ka Naniwa, a i ka liu wale, ua huli hoi nui mai la no uka. Eia hoi kahi epa, ua haalele mai la i Puna na hoa’loha, hemo ae la ka pili a Makalii, hiu aku la Koolau o Puakei i na Kepani – nonoho lua i Muliwaa i ka hope naue o ka waapa manuwa Naniwa. Makai o Waiakea laua i hooleleia ai, a o lakou no kula ke kaona.

LUANA I HANAKAHI KO’U ALOHA.

            Poakolu, la 14 mai, ua uluwehi ae la ke one o Hanakahi me na Kepani kane a wahine no ka holo makaikai ana aku i ka Naniwa, oiai ka leo poloai i pahola ae. Ua liuliu mai la na Kepani laweia o onei me ko lakou mau waapa no ka hoe ohua, a aolo aku la i na piha Kepani no kai o ka moku a pela me ka hoihoi ana mai me ke kue i ke kanawai o na poe nona na laikini hoe ohua, a mamuli o keia ua lawe he kanawai e hoomalu me ke ao aku ia lakou e pau ko lakou hana ana, a ua aeia mai me ka loaa ole o kekahi haunaele a ua hoihoiia mai ka pono e na mea waapa laikini a hana aku la i ka hana me ka maalahi, e ohi ana i ka hua o ia luhi ana. Pomaikai hoi paha, ola ka noho ana, ai no i ka poi aweawe i hana noeau ia mai e ke keiki o Kina, a mawaho ae o keia mau wahi mea ae la, o ka mea hilu aku, i na waapa ohua e haulani aku nei me na piha ohua Kepani, e hooholo mai ana hoi na waapa manuwa me ko lakou mau hae e hoopulelo ana i na ale kukolu, i Paikaka, i Ohele, i Kanukuokama nu la i Kawili, a o kahi mokuahi Royer hoi eia no hoi ia ke hoomanunu mai nei i ka nu’a kai o ka moana, aia hoi oili pulelo ae la kahi waapa mokuahi kolo kao o Waiakea Mill me kana ukana, na kao kopaa, e nakunaku ana kona wahi epaepa uuku i ka huhu moliolio ia e ka wai o Waiola, nana aku oe olohio lua, olohio aku a olohio mai ua wahi iki ukulii la.
            Hora 2 auwina la, ua hoouna ia mai la mai ka Naniwa mai elua mau waapa hoe i koloia kekahi e kekahi no ke aolo ana aku i na keiki (haumana kula) a me na kumu o ke Kula Hanai o Hilo, oiai lakou ma ka uwapo o Waiakea e kakali aku ana, a i ka hoea ana mai a lana ma ka uwapo o ka hale ukana o Waila Ma, o ka wa no ia o ua poe Menehune la i kau iho ai a holo aku la, a ia lakou e hoohemo aku ana mawaho o ka nalu haimuku o Kawili, ua ili iho la kekahi waapa a paa loa, a me na hoe lakou e hou ana i kokuaia e kekahi waapa no ke kolo ana, a mamua ae oia hoao ana pela, “oili pulelo ana o ke ahi o Kamaile.” Ua ikeia aku la ka oili pulelo ana o kekahi sela a ku ho ana iloko o ke kai, a he manawa ole oili hou ae la, a pela oia i palekana ai me ke kokua pu ia mai a kau hou i una o ka waapa a palekana pu me ka waapa ili, pulelo hou aku la i ka ilikai no ka Naniwa. A liu wale, ua ike hou ia aku la na waapa e hoihoi mai ana i ua poe la o ka hale kula hanai a e komo mai ana i ka nuku wai, ua lohe ia aku la na leo himeni o na opio Hawaii, e mele ana, oa no oe ka leo o ka Oo e kikiko’u ana i ka pua lehua ka hele a meha pu na leo o na keiki aukai a me ka lehulehu e ku makaikai mai ana. He maluhia ka la a hiki i ka uhi ana mai o ka po.
            Ua hauli lono wale ia mai e ka makani Moae, ua loaa aku he kono i na aliimoku o ka Naniwa mai a Geo. Viala aku ma ke kauoha a ka hui o lakou, aia he papaaina e paholaia aku ana ia lakou, a malaila nui ae ua poe aukai la a hoi mai.
            Poaha, la 15 mai, he mau wahi kulu pakaua me na ao hakumakuma e hoopuia ae la i ka lewa luna. Ua lehau hou mai la no ke one o Paikaka me na Kepani o ka Naniwa, a pela no hoi me ko uka nei i hui pu ia me na Hawaii no ka holo makaikai, nana aku ia la oia no oe ka Moa Uakea i ke kula o Puupa ka hele a luhiehu i ke one, a kaua e lea iho ai ke kaunu ana i Waiolohia, penei:-
“He makamaka no ka ke ua i Hilo,
Ka hele no a kipa i Hanakahi,
Ae,
O Hilo Hanakahi Ua Lanipili
Kipepehi pua hinano,
He Ua Kanilehua nihi hele i
ke kula,
I Panaewa no ka nu ana,
He hoolono ka kai o Hilo i ka
lehua.”
            E kala mai ia’u, oiai, ke hea mai nei ka uluwehi o ka aina, e u hoi maua, ua malu ke kula aohe lele manu.
ST. INAMONA,
Waiakea, Hilo, Mar. 15, 1894.