Ka Makaainana, Volume I, Number 13, 26 March 1894 — Page 5

HONOLULU, OAHU, POAKAHI, MARAKI 26, 1894. 5

Aupuni, i Ianuari 20, “ua waiho ia ka ninau Hawaii imua o ka Ahaolelo a ua hooko pono ia hoi kana mau ao a kuhikuhi kuikawa.” Mamuli o keia palapala ae la, ua eu awiwi ae la o Bila Alani, me he kii la, a noi aku e hoolahaia keia palapala ma na nupepa Hawaii, i moa hoi e hoopauia ai o ko na Hawaii makau, a lawe nui ae paha i ka hoohiki ihohee a apu auhuhu a lakou no ke koho elele ana.

Ma ka hoomaopopo ana iho nae hoi, aia paha i Milu kahi ke kanaaho o ua poe la i loaa mai keia kupapau polopolena a lakou i huai ae la. O na olelo ana a ua o Iana, i kekuaia hoi e Alani, no ko na Hawaii makau i ka lawe i kela hoohiki o hoopaiia, he oiaio ole loa a aole kahua no ia mau olelo. Aohe mea a ka Aha Senate i hana ae no ka ninau Hawaii. Ua mumule o Peresidena Kalivilana a ke kali la no, a eia no hoi ke Aliiaimoku a me kona lahui ke kakali hoomanawanui nei no ka paneia, oiai, aohe a Kalivilana mau hooia ana ua haalele mai oia ia kakou, oiai, ua pane pili oihana oia i ke Alii i kona manao e hoihoi hou iaia a me ke Aupuni malalo ona a ke kulana mamua aku o ke kipi o Ianuari 17, 1893. A oiai no hoi, aole i loaa mai he pane ma ko Amerika Huipuia aoao no kela akeakea a ke Aliiaimoku, nolaila, ua waiwai ole loa no keia huai ana ae la i ka iwi make i polopolona kahiko loa. Ke hooia aku nei no hoi makou ia lakou aohe hopohopo o ka lahui o hoopaiia, aka, aole loa o lakou makemake iki i ka lakou mau pahele mai, i wahi hoi e loaa ai o ko lakou kakooia aku. Hele loa pela! E hoomanawanui no ka lahui a me makou pu no hoi kekahi, me ka pauaho ole a lilo io paha hoi makou i poe lalau a kuhihewa, a ina hoi ua kuhihewa, poho no auanei kahi o lakou ma ia mea. O ko lakou hoka a hoohakaia, oia no auanei ko ka lahui olioli; o ko makou kuhihewa hoi, oia no auanei hoi ko lakou pokoli mai. Aole loa e puni aku!

“HUAI KA ULU O LELE.”

            Pehea la e hiki ai ia kakou ke hoomaopopo o keia ke au oi aku o ka pakiko ma na hoolilo dala ana no ka pono o ke Aupuni a me ka pomaikai hoi o ka lehulehu? Eia iho kekahi wahi hoomaikeike a makou: Ua loaa i ka Moi ka uku o $20,000 no ka makahiki, a mai loko mai o ia uku ua hanai ai ia kekahi poe, oia hoi, ua ukuia na kahu, a pau pu me na kauwa lawelawe ponoi o ke Alii, a he lehulehu lakou; a nolaila, ua holo aku ia mau dala ma na makalua lehulehu e hoopomaikai ai i na poe kalepa nunui a liilii paha, a o ka lehulehu holookoa no hoi kahi i pomaikai. I keia au hoi he $12,000 no Kolekaaka no ka makahiki, oia hookahi wale no a me kana wahine, aohe o laua mau kahu a mau kawa paha, a ina he mau kauwa, he kakaikahi loa; nolaila, ia laua wale iho no ia mau dala, aohe malele aku ma o a maanei o a makalua lehulehu e hoopomaikai ai a e hoowaiwai ai paha i ka lehulehu ma na ano a pau. Halahu no ua poe iniiniki a ahu hoi ka pala o ka ai pakiko ana. Pakiko kea no maka nanaina aku, aka, ma kahi hoi o ka pomaikai, he neo ia no ka mea, ua aaiole ka ulu.

            O kela aliimoku o luna o ka Bosetona, Luciene Iana, ka oi pookela ma na olelo wahahee a piha hoopunipuni maopopo loa. Mawaho ae o kana i olelo ai no ko ke Alii ona, imua o kela Komite Nieniele Hawaii o ka Aha Senate, ua olelo aku oia ua hoolaunaia oia imua o ke Alii, i ka hookuuia ana o ka Ahaolelo, maloko o ke keena o ke Kuhina Kalaiaina. Hele pela ua lapuwale! A o kekahi hoi, pakele o Uilama Huaita mai weluwelu i ka lehulehu, a ua lalau lima okoa ia aku ka, iaia ka i haiolelo ai mahope iho o ko na Kuhina hooko ole ana i ko ke Alii makemake. Ka hoopunipuni e! Aole loa keia mau mea i hanaia ma ia la, he ole loa no.

            A he mau mea e ae no kahi ana i wahahee aku ai, me ka ike no hoi paha kahi aohe poe malaila e hiki ai ke pani aku i kana mau hoopunipuni ana. Mailuna nae hoi o ka ia nei epa ana i hookahua ai o Senatoa Mogana i kana hoike piha lepo, ekaeka a olalau. Eia no hoi o Alapaki, ka mea i ikemaka i na mea i hanaia, a ina paha he uhane kahi ona, hoike ae la hoi i na mea oiaio – aole ke Alii i ona, aole i lawelawe lima ia kekahi hoa o ka Ahaolelo, a pela aku. Oia nae paha hoi, mamuli o kea mau olelo hoopunipuni i loaa ai he kakooia no lakou ma kela hoike hapanui a ua komite la. He la hookolokolo no ko lakou a hoea mai. O ka nupepa pahemo alaula ka i kokua i kela mau epa a ua aliimoku la, a akaka wale ai no hoi ke ano o na mikanele ma o ko lakou wahaolelo, aohe hoopunipuni a mea ino ole paha ia lakou, ina ia he mea no lakou e pono ai, a i pololei wale ai no o Kakina – ae no oia e hui pu me ke diabolo ina he mea ia e pono ai lakou a loaa hoi ka lanakila.

            Ua oleloia i holo aku nei ka o Wile Kakela Iana me Kale Kuke i Hawaii, ma keia Kinau aku nei, no ka hele haiolelo a me ka paipai ana i ko na kanaka Hawaii lawe ae a kakauinoa iho I kela olelo hoohiki umii paa a lakou Pi Gi, a pela e kaahele ai a hoea hou mai ianei. O ka makou no ke ike mai ia laua hoomamao aku, oiai, e imi ana laua ma ka pelo ana i ola no lakou. E pomaikai ana no hoi laua ke nui mai na poe huli mai mahope o ka laua, no ka mea, ua kapule ka pala o ka maia.

            No ka nupepa pahemo liula iho nei kekahi manao alakai e makemake ana e hooneleia na Hawaii i ka pono koho, a e lilo hoi lakou i poe kuewa iloko o ko lakou aina ponoi. Eia nae, ua hoole loa ke Aupuni oehaa i kela manao kaeku o ia wahaolelo ma ia aoao imua o ka Ahaolelo o ka Poaha iho la. Oia no nae hoi ka mea a na komisina kipi i makemake ai e loaa mai ia Hawaii, malalo hoi o kea no hooponopono aupuni a lakou i iini ai e loaa mai ina kakou i hoohuiia. Akaka no hoi kea no o na koaka.

            O kekahi hoi o na mea ano nui loa i oili ae imua o ka halawai ana o na Aha o ua poe Pi Gi ni i ka Poaha iho la, oia no ka unuhiia ana o kela kanawai hoopaa inoa a hoohaiki i na Pake, i waihoia ae hoi ma kea no he kumuhana ma ko na Kuhina aoao. Oiai nae hoi, ua ulu ae ia kumuhana malalo o ka anai paa ana a ka Ligi Amerika, o kahi hilu nae hoi ua mumule loa ka moho kuai kamaa o ua Ligi la, a hui pu aku la no hoi me Mama Emaluka, he mea kue loa i na lahui Asia. Wiwo okoa paha ua poe oehaa nei i na keiki o ka Aina Pua, a oia iho la paha ka pane i ka lakou olelo hooholo. Ku i ke a’u la, ke pipika wale la no.

            Nui ka makemake o ka Ligi e kuu akea ia i aha puhiohe ma na auwina la o na La Pule, a ua noiia pela ma o ko lakou wahaolelo la i ka Ahaolelo o na hanaiahuhu a lakou e pue nei. Ua hoopii kue aku nae hoi ka Luakini Hui Kuwaena [Kaukeano hou] a me ka Ahahui Opiopio Karistiano haole. O makou kahi i makemake i kela kuu akea ia, a ua kokua no hoi o Kolekaaka i kela manao, no ka mea, aole ia i kue i ke Kanawai Sabati e ku nei, oiai, o ka hopohopo hoi ia o kahi o ua poe loea la. E hewa ia, loaa kahi hoohala no na poe paaua mawaho a e o ka manawa hele pule. Oia paha, ho mai!

            Ma na moku a me na eke leta o eia mau la e hoounaia aku ai mai ka halepai o ka Hoku aku he heluna nui o na palapala i paiia ma ka olelo kumu, main a pepa pai alanui me na huapalapala nunui a me na pepa heluhelu no kauhale, e pili ana hoi no ka mea pili i ke kau koho balota no na elele hana kumukanawai e hoea mai ana. Hookahi no hana pono ia mau palapala, ke hoea aku, oia no ka hoihoi aku no kiona, a e hoohalike aku me ka hanaia ana iho nei o ke Kuokoa puka la. Oia maoli no ka hana pono.

Na Wahi Keiki Puhi Ahi.

            Imua o ka Aha Apana i ka Poalua a me ka Poakolu iho la i hookolokoloia ai o Kahananui a me Kahana, na wahi keiki i hopuia ai no ke puhi ana i ke ahi i ka hale ohua o ka Mea Hanohano A. Rosa ma Kaalawai, malalo o ka hoopiiia ana no na mea ino wale, ma ke degree ekolu, ma ka hoopoino ana i kekahi waiwai malalo iho o $100 ka waiwai io. A mahope iho hoi o ka paio ana o na aoao a elua, a ua hoopaiia laua e hoi i Keoneula e u noho ai no eha malama pakahi. Ua hoohalahala aku ko laua mau loio Kahookano a me Kane no keia kau kiure ae. He puhi ahi ko laua kumu hoopii mua, aka, i ko Akoni hoi ana mai nei mai Kauai mai, ua hoemiia iho la, oiai, he opiopio loa laua, he 10 makahiki pakahi paha.

Hopuia no ka Wawahi Hale.

            He wa i hala ae ua moraki aku kekahi mea aina mauka aenei o Holokahana, a no ka hookaa ole ia, ua lilo ka aina a me ka hale ia Buluka Kakalaika. A he mau la aenei i hala ua uwaiia mai kela hale e Kolii a i kekahi aina okoa mai nona, me kona olelo nona ua hale la, a me kona hoike mua ole i kona manao uwai i ka mea nona ua aina la i keia wa. I kakahiaka Poalima nei, ma ke kauoha a ua o Kakalaika ua hele aku o Hanare Kipili a me na kanaka hana e hoonee hou mai i ua hale la a kahi mua i ku ai. Ua papa aku o Kolii ia lakou ma o kekahi palapala mai kona loio mai, Kale Aki, a oiai hoi ua hoomaka ka hana, aohe lakou i hoolohe mai i kana kauoha. Aole i emo ma ia hope iho pau nui ana i ka hopuia no ka wawahi hale a pau nui ae no i ka pelaia. Imua o ka Aha Apana i kakahiaka Poaono nei ua pau nui i ka hookuuia. Ua olelo ae o Kakalaika ina no e lilo ana oia he $1,000, e hoi hou ana no kela hale a kahi i ku mua ai.