Ka Makaainana, Volume I, Number 13, 26 March 1894 — Page 3

HONOLULU, OAHU, POAKAHI, MARAKI 26, 1894. 3

HE MOOLELO KAAO
-NO-
MONE TIKERO
-KA-
HOLOLIO I KA WA HOOILO
-KA-
UI MAALO I KE KUPULAU
A O KE
KEIKIALII HARE MATINE
-KE-
KIAHA OPAKA O NINEWA.

MOKUNA IX

Ka hololio iloko o na Ululaau-
            Ka makua me ke keiki-Ke
            Kupua Figinedera.

            I ka wa i haule iho ai o ua powa nei iluna o ka honua, ua holo mai la kona mau kanaka a hoopuni ae la iaia, a oia no hoi ka manawa i kau ae ai o ua Hololio pahaohao la i kana o-le ma kona waha a puni aku la no elua manawa, aoia oia no ka wa i pau ae ai ke kaua ana a hoi mai la ko laua poe kanaka mai ke alualu ana i na poe mahuka aku.
            Ia manawa i hele mai ai kekahi o na aliikoa o ua alii powa nei a noi mai la i ka oluolu o Mone Tikelo e hoopakele ae i ko lakou mau wahine a me na keiki, a e lilo lakou i mau pio nana.
            Ua ae aku la ua Hololio la i ka wa hooilo i ke noi a ua alii koa la, a kala mai la oia ia lakou.
            Mahope iho o ka akoakoa ana mai o ko laua mau kanaka ua nana pono ia iho la ke alii o na powa ina paha ua make loa a i ole, ua eha wale na paha. I ka nana ia ana iho nae, aia hoi, ua haalele kahiko mai la ka uhane i ke kino.
            Nolaila, ma ke kauoha a ua Hololio la, ua hookauia iho la ke kino o ua alii powa la iluna o kekahi aha ma ka a hoolewaia aku la no kona home noho kuahiwi kahi hoi a kana wahine a me kona ohana e noho mai la me ka mokumokuahua o ka naau no ka lohe ana aku mai na poe i mahuka aku, ua make ko lakou haku.
            Ua hoea aku la ka huakai iwaena o kekahi ululaau, a e ku ana hoi ilaila ka hale o kekahi Moneka a hooaumoe iho la ka huakai ilaila ia po a hiki i e ao ana: Alaila hoihoi loa ia aku la ke kino puanuanu o ua alii powa nei no kona home, me ka ukali pu ia o na Kahuna Moneka la. A ua malamaia iho la he hoolewa hanohano no na a me kona mau hoa make.
            I ka wa i hookomo ia aku ai ka pahu o na powa nei iloko o ka lua, oia no ka manawa i hele iho ai o ua Hololio la i ka wa Hooilo a ma ke poo o ka lua me kona hoa’loha, a haawi iho la he mau olelo kaukau iaia a oia no manawa i kulu pakakahi iho ai ka waimaka o na mea a pau e kuku aku ana e nana. A pau kana mau olelo kaukau, uhi ia iho la ka lepo maluna ona, a noho iho la oia iloko o kona home puanuanu a hiki i ka wa a ka anela e puhi ai i ka pu no ka hoola ana i na poe make no ka la hookolokolo ma kela ao.
            A pau na hana ma ka luakupapau o ke alii o na powa, ua huli hoi aku la na mea a pau o ka kakou koa me kona hoa’loha a me ko laua mau kanaka ua hoi loa aku la no lakou no ko lakou mau home. A i ka wa i uhi mai ai ka malu o ka poi a lakou, ua hoaumoe iho la lakou iwaena o ua pu ha laau a hiki i ka oili ana mai o na kukuna o ka la maluna o ka honua, a oia ko lakou wa i hoomau hou aku ai i ka hele ana a hoea i ke kulanakauhale a ua pua lilia la o Subieda.
Mawaho o ke kulanakauhale i hoomoana iho ai lakou, o Mone Tikero a me Igeboseda, o laua wale no kai u haele aku a komo iloko o ka pa alii, a hoea imua o na ui la me kona makuakane a ua apoia mai laua me ka pumehana.
            Hele mai la ka Moi a hopu mai la i ka lima o ko laua hoopakele, a pane mai la.
            “Nou a me kou hoaloha ko’u mau hoomaikai he nui ma o ko olua hele ana mai e kokua ia’u a me ka’u kaikamahine iloko o ka pilikia, a i na la paha i keia la , aole maua maloko o ko maua halealii nei.
            “E hoolohe hou mai e ka mea nona na helehelena maemae a’u e ike nei, ua aie nui au i kau mau hookauwa ana no ko’u ola nei, a pela no hoi me kou hoaloha a me ko olua mau kanaka. Aole o keia wale no kau mau hana maikai ia’u, aka, o ka elua iho la keia.
            “Mamuli o keia mau hana maikai o ke ano hoaloha a makamaka no hoi, ke haawi nei au i kau kaikamahine hookahi wale iho no i kokoolua nou ma keia ao, oiai, aole a’u makana e ae e hiki ai ia’u ke hookea aku i pau ae ai keia ale nui o’u.”
            Ma keia mau olelo pokole huli ae la ua Moi la a nana aku la maluna o kana kaikamahine, aia hoi kona mau helehelena ke ke hoike mai la i na manao ka hauoli palena ole me na minoaka ana no hoi ma kona mau papalina, a me he mea la, ua komo iho la iloko ona na manao kaena e i ana: “O ka uhu iho keia e lou ai o kau makau, pau kou ike ana i ke ao aina.”
[A puka hou aku.]

NA PALAPALA.

            [Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna iho o na poe na lakou i kakau mai.]

He Noi i ka Holomua.

MR. LUNAHOOPONOPONO:

            Ke noi aku nei au i ka oluolu o ka lunahooponopono o ka Holomua, e hoopukaia ka inoa pololei o ka mea nona kela manao i puka ma kou helu o ka la 10 o Feberuari i hala, mai ke kai malino mai o Ehu, e pili ana i kekahi makua i hou i kana bepe i ka puhi, oiai, ua ano opulepule oia, ua pakele nae ke ola o ke keiki.
C. KAAWA.
            Honolulu, Mar. 10, 1894.

MR. LUNAHOOPONOPONO:

            Ma ka’u leta aku ia oe o ka la 31 o Ianuari i hoopukaia ma na kolamu o kau nupepa o ka la 12 o Feberuari, ua heleia mai au e hookui e ka Luna Nui o ka Panalaau nei, oia o A. K. Hutchinson, e pili ana no kekahi mau hoakaka a’u ma kahi e olelo ana – “No ka mea, aole i malama pono ia ke ola o a keiki e na makuahine Virigine, ina lakou e malama pono i ke ola o keia poe, alaila, aole e nui ka make. Eia wale no ka lakou nei o ke dala, aia malaila ka hilinai nui loa o keia poe, aole ma ke ola o ka lahui.”
            No na mea e pili ana i ka make o na poe e noho ana ma ia home, he mea oiaio loa kela, a pela pu no me ka malama pono ole ia o ke ola o na poe e noho ana ma ia home. Eia kekahi poe ke noho nei mawaho i haalele i ua home la no ia kumu. Eia no hoi kekahi haole ke noho nei ma ka halemai o Kauka Goto o C. Heine ka inoa he Geremania oia a mai poino oia ma ua home la no ka haawi pono ole ia i kahi mea ai a me ka loaa ole o na lapaau kupono ana oiai oia maloko o ua home la. I keia wa ua loaa i ua haole la he maha malalo o na malama pono ana a ka Luna Nui o ia hale T. K. Nakanaela. I kona komo ana mai ma ua halemai la ua hele a nawaliwali, me ke kookoo e hiki ai, a me ka hapaiia e hiki ai i ai, a me ka hapaiia e hiki ai i ke kapu auau. Aka, i nei manawa ua loaa ka ikaika i kona kino.
            Ma kahi e olelo ana- ma ke dala wale no ko lakou nei hilinai nui, aole ma ke ola o ka lahui. Ua olelo mai o A. K. Hutchison, aole ka he ukuia o kela poe. Ina he oiaio, alaila ua kuhihewaia paha au ma ia olelo ana a’u. Aka, o ka lohe o na mea a pau a me a’u pu he ukuia no lakou e noho nei, a e imi aku ana au i ka oiaio o kela. A ina ke ukuia nei ke poo o na Virigine e like me ko’u lohe, alaila, o ko lakou uku like ia ana no ia, a me ko’u ike no hoi a pela no me na mea a pau, eia keia poe ke noho nei maloko o na hale maemae loa me ka nui o ka lilo o ka Papa Ola, a o ka lakou mea e makemake ai e hookoia aku ana no ia.
            Eia kekahi ma ka la a ua A. K. Hutchison nei i hele mai ai e hookui ia’u, ua olelo ae la oia, e hoopauia ana ka lapaau ana o Kauka Goto maanei a e hoihoiia aku aku ana na na Virigine e lapaau na mai ma keia mua aku. O keia kana olelo mau mai ka wa e noho lapaau ana o Kauka Goto ianei a hiki iho la i keia wa. He lili oia ia Kauka Goto. A ina e lilo io ana na hooponopono lapaau ana o ka panalaau nei i Virigine e like me ka ua Kanewalii nei i olelo ai alaila, aohe waiwai, oiai, he lapuwale na lawelawe lapaau ana ma Pauahi Home, aole i hanaia e like me ka makemake o ke kauka, ua hana wale iho no e like me ko lakou makemake iho a ua ike kumaka ia ka lakou hana. Mamuli o na lawelawe pono ole ia ana o ka ke kauka laau, ua nui ke kanalua o ke kauka a he maikai nae ia ia lakou. Ina he mau pilikia no lakou ua hooko koke ia, me ka hakalia ole, a ina no ka home o Kauka Goto aole e hooko koke ia ana.
            Eia hoi keia ehaeha o ua luna nui nei o makou, no ka’u hoike ana ka i ka make mau o na poe mai ma ka home o a opio kane. Ke pane nei au me ka oiaio, mai ko’u noho ana mai a hiki i keia wa he oia mau ka make, o ka eiwa keia o ko’u mau mahina o ka noho ana ma keia wahi a aole i nele ka make ole o na poe ma keia home. I ka wa ka i ka Makua Damiano, aole he nui o na poe make. Ke hoike nei au i keia ma ka hoopilimeaai ole, aole hoi me ka hakuepa. A i pane ia mai au e hoike hou aku no au.
J. B. M. KAPULE.
Kalawao, Feb. 22, 1894.

            [Ke manao nei makou ua lawa na olelo ana no keia mea. Ua akaka lea ia makou ka pololei ole o kau mau kuhi ana no ko na Virigine puni i ke dala, no ka mea, ua molia lakou ia lakou iho e noho iwaena o na poe i loohia i mai popilikia. He mea oiaio no eia ke loaa nei i na Virigine a pau, ma kea no kokua wale ia aku no e ke Aupuni, he $20 no ka malama ia lakou pakahi, aole nae hoi ia i haawiia ma ke ano uku no ka lakou, hana, oiai, ua manawalea lakou i ko lakou luhi no ka pono o ka Hoola o ia ano poe popilikia e like la me oukou. Aohe loa o makou manao ua pono iki keia mau kipehi ana a he mea pono e hookiia. Aia ke ola i ke Akua, aole loa iloko o ko lakou mau lima, a he poe lima lawelawe a hooke kauoha wale no lakou. L. H.]