Ka Makaainana, Volume I, Number 10, 5 March 1894 — Page 6

6 HONOLULU, OAHU, POAKAHI, MARAKI 5, 1894.

MONE TIKERO
-KA-
HOLOLIO I KA WA HOOILO
-KA-
UI MAALO I KE KUPULAU
 O KE
KEIKIALII HARE MATINE
-KE-
KIAHA OPAKA O NINEWA.

MOKUNA IX:

Ka hololio iloko o na Ululaau-
            Ka makua me ke keiki – Ke
            Kupua Figinedera.

            Ke kuupau la oia i ka holo o koa lio, e iho ana ma na awawa, e pii ana ma na puu, e hele ana maluna o na kula pohopoho i hele a ukele i ka ua; a i ka wa e hoomaka mai ana o ua kukuna o ka la e hohola i kona malamalama maluna o ka honua holookoa, oia ka wa i hoea aku ai ua hololio la ma ka ipuka hale o Igeboseda, a pa ana kahea a “ke Koolau wahine o Puakei,” – he- mai.
            Ia manawa i komo aku ai ua keiki la iloko e halawai pu ai me kona hoaloha a ua pumehana ke aloha mawaena o laua, oiai ua loihi ka manawa o ko laua kaawale ana.
            I kela manawa i ninau koke mai ai o Igeboseda: “Heaha ka hana nui a kuu hoaloha o ka hiki ana mai nei i keia kakahiaka nui wale?”
            Pane aku la o Mone Tikero imua ona: “He hana hoi paha ka’u e ka hiki ana mai nei. Ua manao au e oe la o kaua kai komo iloko o ka pilikia, nolaila, hele awiwi mai nei no ka haawi ana aku I na kokua, i na nae he mea hiki, eia ka aole o oe.”
            “Heaha kea no o kau mau olelo e kuu hoaloha, “wahi a Igeboseda i ninau mai ai. “Ua loaa anei oe i kekahi ma’i ano e i puka ai kela mau olelo mai kou waha mai?”

“Aole e kuu hoaloha. Aole loa au i loaa me ia mau haawina, aka, o ko’u makua ka mea nana i hoike mai i kekahi hihio kupaianaha ana i ike ai i ka po nei, a ua manao oia owau la ka mea i komo iloko o ka poino, aka, i ko’u hoi ana aku iloko o ka wa kupono, akahi no a hoopau ia ae kona mau manao pihoihoi. A no ia mea i komo wale iho ai no iloko o’u na manao kohokoho wale nou, a oia iho la ke kumu o keia hiki ana mai la i mua ou.
            “Ua olelo mai nei oe he hihio kupaianaha ka kou me nana i malama i ike ai ma ka po nei,a ke ole au e kuhihewa, me he mea la, oia no kea no haawina like i loaa ia maua. Noka mea, oiai au e noho ana maluna o keia noho, ua kaia loa ia aku la au i ka hiamoe nui. A iloko o ia hiamoe nui i ike aku ai au ia oe e holo ana maluna o kekahi kula i hele a haukae i ke koko, e paio ana hoi me kekahi heluna nui o na kanaka powa a hiki i ka lanakila ana, “wahi a Igeboseda i kamailio aku ai.
            “Oia no ka haawina i loaa i ko’u makua, a-“
            Aole i pau pono ae ka Mone Tikero kamailio ana, aia hoi komo mai la kekahi o na kanaka a kamailio mai la imua o ua hiena la:
            “Aia kekahi mea mawaho i keia manawa, a ua makemake e ike i ka malihini nei.
            “E ae aku iaia e komo mai maloko nei, malia he mea hou kana e lawe mai ana imua o kakou,” wahi a Igeboseda.
            Kii ia aku la ua wahi elele la a laweia mai la imua o laua, a noho iho la ma ka noho i hookaawale ia nona.
            Alaila, kamailio aku la o Igeboseda imua o ua elele la:
            “Mai hea mai nei oe, a heaha kau hana nui o ka hiki ana mai nei i ko’u home nei?”
            “I hoounaia mai nei au e ko makou haku ka Moiwahine o na Pua Lilia, e lawe mai i keia palapala i ka mea i kapaia ka Hololio i ka wa Hooilo, a malia ua ike oe iaia- e hoike mai hoi oe ia’u i keia wa, oiai, aia ko makou aupuni iloko o ke kupilikii e noho nei, a ua makemakeia au e hoi koke aku me kekahi pane mai ua mea la nana keia leta.”
            “Eia no oia me a’u i keia wa,” wahi a Igeboseda i pane aku ai, me ka kuhikuhi ana ae i kona umiumi loloa i hele a keokeo a eu ae la mai kona noho ae me ka hele ana kau a lalau i ua palapala la ma ka lima o ka elele a lawe mai la.
            “E heluhleu awiwi iho oe i keia palapala e kau hoaloha, malia he hana nui kekahi i manaoia nau e lawelawe aku, e pono e ike kakou i keia wa,” wahi a Igeboseda i kamailio aku ai imua o Mone Tikero.
            Lalau mai lao Mone Tikero a wehe ae la i ua palapala la, me ke akahele a hiki i ka hopena. Alaila, kamailio aku la oia imua o kona hoaloha me keia mau huaolelo:
            “Ke kauoha mai nei keia palapala e hele aku au e hoopakele i ke ola o kela Pua Lilia o Subieda mai ka lima aku o na enemi. Ua pololei maoli no ka’u mea i koho wale mai nei ia’u. O ke ola ka o ka’u mea i aloha ai ka mea i upuia e pakaha. Heaha la hoi, eia mai au a hoea aku.”
            I ka lohe ana o Igeboseda i keia mau olelo a ua Hololio la, ia manawa i kaomi malie iho ai oia ma na poohiwi o ua Hololio la a i iho la:
            “E kali iki, mai pulale e kuu hoaloha. E hele pu aku ana kaua me ko kaua mau kanaka a e hookuu aku kaua i ka elele e hoi e mamua a hoike aku imua o kona haku, e hiki aku ana kakou iloko o ka manawa pokole.”
            Hookuu ia kau la ua wahi elele la e hoi, a noho iho la o Igeboseda ma no ka hoomakaukau ana ia lakou iho no ka hele ana aku e kaua me na enemi.
            Hopu iho la ua kaeaea la i kana o le e waiho ana iluna o ke pakaukau a puhi aku la me ka ikaika ma ka aoao hikina a wawalo hele aku la ka leo o ua o le la ma na paia pali o na kuahiwi o Hagara, ka home noho hoi o ua elemakule la. A I ka hookuu ana iho o ke kani o kana ole, ua panai koke ia mai la ke kani o kana ole me kekaleo

ole kani kikiko’u mai ua mau pali la, me he leo hone la no ke kahuli i ka po lai, a ike ia aku la na kanaka o ua Igeboseda la e oiliili mai ana mai ko lakou mau home mai a ma ki mai la no kahi o ko lakou haku.
            Ia manawa i holo aku ai na kauwa e hana i ka lio o ua elemakule la, oia o Muero, a i ka makaukau ana, ua hele like aku la ana me kona hoaloha a kau ae la maluna o ko laua mau lio, a nee aku la no kahi i kauohaia mai ai. E alakai ana mamua o ua kaoo lio la o na kanaka puuwai wiwo ole o Hagara, o Iseboseda me ka Hololio i ka wa Hooilo, a mahope akuo laua na kanaka i hiki aku ka heluna i ka 2,000, he poe wale no hoi i hele a lehia ma ka oniu ana i na mea kaua, a ua lilo ia mea i mau mea paani wale no ia lakou.
            A hala paha he eha hora o keia nee ana o ka huakai a Igeboseda imua no kahi o ka Pua Lilia o Subjeda, ua huli mai la ua elemakule la a kamailio mai la i kona mau kanaka:
            “Maanei e a’u poe keiki e haalele iho ai maua ia oukou a pa oukou no ia e hele ae mahope, aka, awiwi ka hele ana, oiai, ua kokoke mai ka manawa e hoohanaia ai ka oiao ka oukou mau mea kaua. E hele e ae maua e ike i na mea e hanaia la o na enemi.”
            Ia manawa i hao ae ai na kepa o ua mau koa nei ma na opi aoao o ko laua mau lio, a oili pulelo aku la kea hi lele o Kamaile maloko aku o na ulu nahelehele i na lio o ua mau kanaka la. A he hora paha a oi ko laua hoomau ana i ka holo o ka laua mau lio me ka hoomaha ole, ua hoea kau la laua ma na palena waho o ke Aupuni o Samanadala, a ke mau la no ko laua nee ana imua no ka haawi ana aku i ka laua maa kokua ana i na koa o ka Pua Lilia o Subieda.
[Aole I pau.]

LAUOMIDIHAE.

-KA-

UI I MOHAI IA I KE KOKO

-KA-

NANI I ALANA IA I KA OI O

KA PAHIKAUA.

Ka Mea Pohihihi i ka Maka o ke
Kuikele.
-A O KE-
Keiki Alii Numaredina
-KE-
Komo Lima Maka Popoki.

MOKUNA VII.

Na Mea Ekolu I ke Alahele – Ke
Kupua Enuhesilika o Mauleleda
-Na Kiai Elua I ka Punawai hookahi
-Ke Alahele I huna ia e na wai.

            Ia manawa i unuhi ae ai o Numaredina i kana pahikaua a paa ae la ma kona lima akau, a meha pu wale iho la no ia wahi, aohe leo pane mai.
            Ia manawa ike aku la oia i kekahi waapa e hoe pololei mai ana i kahi ana e ku nei, he hookahi no mea oluna. A i ka pili ana mai o ua waapa la ma kahi ana e ku ana, akahi no a ike iho o Numaredina, o kona hoaloha no ka! ka Wahine hoehoe waapa o ka muliwai Muzine.
            “E aha ana oe e Numaredina e lohi apa wale nei no. E wiki, e hoopakele ae i kou kaikuahine i keia wa. E hoomanao iho oe a ke keikialii, aole i make o Enuhesilika o Mauleleda ia oe.”
            I keia i komo mai ai na pihoihoi iloko o ke keikialii, a maopopo ole iho la iaia kana mea e hana ai, aka nae, o ke aloa kaikuahine aia ke paila malie ae la i kona puuwai, a oia kana i pane aku ai:
            “Pehea la au e hana ai i pakele ai ko’u mau kaikuahine?”
            “E oniu pakolu ae oe i kau pahikaua maluna o keia mau pohaku mabala e ku nei, e wiki! Aole keia wa no ka hoololoiahili wale ana,” wahi a ka wahine hoe waapa i pane aku ai.
            Me ka hookaulua ole iho, ua oniu pakolu ae la o Numaredina a nalowale aku la ua mau pohaku mabala la, a ma ia wahi e ku ana o Mulisedera a me Rahe Biama.
            A iloko o ia manawa i aleale ae ai ka wai o ua muliwai la, a ia manawa pu no hoi i pane mai ai ua wahine hoehoe waapa la.
            “E Numaredina, e hele mua oe e pepehi i kou enemi a make, a owau ke hele mua ae e nana