Ka Makaainana, Volume I, Number 9, 26 February 1894 — Page 3

Ka Makaainana.

 

HONOLULU, OAHU, POAKAHI, FEBERUARI 26, 1894

 

LAUOMIDIHAE.

KA

UI I MOHAI IA I KE KOKO

KA

NANI I ALANA IA I KA OIO KA PAHIKAUA.

 

Ka Mea Huna iloko o ke Kiaha Waina

Ka Mea Pohihihi i ka Maka o ke Kuikele.

A O KE

Keiki Alii Numaredina

KE

Komo Lima Maka Popoki.

 

MOKUNA VII.

Na Mea Ekolu i ke Alahele – Ke Kupua Enuhesilika o Mauleleda – Na Kiai Elua i ka Punawai hookahi – Ke Alahele i huna ia e na wai.

 

                Iloko o ko Numaredina hiamoe nuim ua puoho ae la oia i ke nahu ana iho a ka ukulele ma kona ihu, a i kona nana ana ae aole kona mau kaikuahine ma kona aoao, a no ia mea i kaniuhu iho ai ua kekialii imi wahine la, a i iho la:

                “Auhea iho nei la hoi o Murisedela ko’u pokii. Ua holo malu anei oia ia’u, a i ole ia, ua lilo paha i ka enemi?”

Iaia e nalu ana pela, ua ike aku la oia i kona kaikuahine me kana aikane ke kaikamahine alii Rahe Biama o Inia, e noho pu ana me kekahi maui kanaka ua ma na aoao o ka muliwai pahaohao.

                I kela manawa i kahea aku ai oia me ka leo nui – “e Murisedela – e Murisedela, ka ui o Haredina, e hoi mai kaua.”

I kela manawa i akaaka mai ai kona kaikuahine iaia,a pane mai la:

                “Heaha la kau e kahea mai nei ia,u e Numaredina, aole anei ou ike mai ia’u me keia kanaka opio ui?”

                Ia manawa hookahi no hoi i huli ae ai o Murisedela a muki aku la ma na papalina o kana ipo aloha o ka muliwai pahaohao a huli hou mai la e nana i kona kaikunane, a i mai la, -

“E Numaredina – e Numaredina Ka Nani o Hurema – e aha ana, Ka nani o na pua – aole i like, Ka hulali  o na wai – aole i pili mai,

Owai ka mea e like ai,

Heaha kona mea e kohu ai,

Ka mea huna i ke Kiaha Waina,

Ka mea pohihihi i ka Maka o ke Kuikele.”

                I ke kuu ana iho o ka Murisedela mele ana aku imua o Numaredina i keia mau @alani maluna ae ia manawa no i pane aku ai kona kaikunane:

                “Pehea la kaua e hiki aku ai i kahi o ka Mea Huna i ke Kiaha Waina, a pehea la hoi au e ike ai i ka nani o ke kihapai pua o Numere, oiai, ke hoonui hana mai nei oe? Heaha la hoi, e noho olua me na ipo a olua a owau hookahi no ke hele ae e imi i ka mea a kuu puuwai e li’a nei.”

                Ia manawa koke no i o mai ka leo mele o Rahe Biama imua o Numaredina, i ka i ana, -

“E Numaredina – e Numaredina Ka Nani o Hurema – nawai ia, Na ka Mea Huna iloko o ke Kiaha Waina,

Moe ana ia hoomanao ia Numaredina,

He nani kona i like me oe,

A o na lia ana a kou puuwai nana e hoomaha,

E ike ana oe iaia.”

                I ko Numaredina lohe ana i keia mele ana a keia kaikamahine iaia, ua pane iho la oia iaia iho:

                “Pehea i lohe ai keia kaikamahine, o ka me huna iloko o ke Kiaha awina ka mea nana e hoomaha i na li’a ana a ko’u puuwai? Ua hoike aku ka paha ko’u kaikuahine iaia, oia ka’u mea e hele nei e huli.”

                Iaia e nalu ana no keia mau hana a kona mau kaikuahine iaia, ua mawehewehe loa ae la kaiao, a ke mau la no ka ike a kona mau maka i na kanaka kiai opio elua e noho ana ma kapa o ua lokowai la, ke alahele hoi e hoea aku ai i ke kihapai pua o Numere, iluna o ka aina o ke Ao Olino, kahi a ka mea pohihihi i ka Maka o ke Kuikele e noho la.

                A iaiai i huli ae ai e nanan maluna o ka aina o Mauleleda, e waiho mokaki mai ana na kino make o na enuhu kupua o ua aina la, a ke ike la kona mau maka ma kahi mamao loa i kekahi hale pohaku, e ku ana iwaena o na ululaau, a o ka huini o ua hale pohaku la ka mea e pii haoeoe ana i ke aouli.

                Ia manawa i huli ae ai oia a nana aku la ma kahi a kona mau kaikuahine i noho ai, aia hoi aole laua ma ia mau wahi a he mau pohaku mabala keokeo ke waiho mai ana ma kahi a lakou i noho ai. Ua lili iho la ia he mea kaumaha loa no Numaredina keia nalowale ana o kona kaikuahine, a no ia mea i kani uhu iho ai oia me ka olelo iho:

                “ Heaha no la ka’u i lawe mai nei ia oe, alaa ka nui o ka hana. Ina no oe i noho aku nei i ke alo o ko kaua mau makua, aole la e loaa keia mau haawina popilikia ia oe.”

                Ia Numaredina i hooki iho ai i kana mamailio ana, lohe koliuliu ae la oia i kekahi leo, me he leo la no ka hanehane, -

                “E wiki, e Numaredina, e hoopakele i kou kaikuahine, i h@@a maalahi aku ai oe i ka aina o ke Ao Olino. E wiki, mai lohi, ke kali mai la ka Mea Huna iloko o ke Kiaha Waina ia oe o kou hiki aku. E hoomanao oe aia ilaila ka Ui i mohai ai oe i kou koko, ka nani hoi i alanaia i ka oi o ka pahikaua, a ilaila aku hoi e hoomaha ai kou luhi o ka hoomanawanui ana ma keia huaki imi wahine.”

                Aloalo ae la kona mau maka ma o a maanei, aole nae oia i ike aku i kekahi mea kino kanaka, a nowai la ua leo kamahao la.

                Ia manawa i ninau ae ai oia me ka maopopo ole nae iaia, owai la kana e kamaili aku ai, i ka iana aku, -

                “Owai oe e ka mea nona keia leo kamahao a’u e lohe nei?”

                “Owau no o kou hoopakele e Numaredina, ka mea nana e kiai nei ia oe mai na lima pakaha aku o na enemi. E wiki oe, mai lohi. He wahi uuku wale no koe ia oe a ike oe i ka aina o ke Ao Olino.”

                Ia manawa i haawele ae ai ua keiki la i kana pahikaua ma kona puhaka a hele wawae aku al no kae o ka muliwai. A iaia i kokoke aku ai ma kahi o ka pohaku mabala keokeo e ku ana ua poha mai la kekahi leo imua ona e i mai ana:

                “Owai keia kamahele e hele mai nei mai ke komohana mai.”

                “O Numaredina,” wahi a ke keikialii.

                “Ahe!” wahi au a leo kamahao la i pane mai ai. :A heaha kou makemake o ka hele ana mai nei i keia wahi, oiai, he kapu ko makou aina aole e hele wale ia e na poe e like me oe ke ano?”

                “I hele mai nei au e huli i kou mau kaikuahine, a aia la laua ihea i nalowale iho nei,” wahi a Numaredina.

                “Aole makou i ike i kau mea e kamailio mai nei, a e pono oe e hoi aku ma kou wahi i hele mai nei, o halawai aku auanei oe me na haawina paino a ka make.”

                “Aole au e kuemi hope a hiki i ko’u halawai ana he alo a he alo me oukou,” wahi a Numaredina i pane aku ai.

[Aole i pau.]

 

                Ma ke Kiau o Pakolu, Feb. 14, i hoea mai ai kekahi makai o Lahaina, ola o Mr. J. Kahalepua, me kekahi lawehala hookahi, he wahi keiki uuku o 10 paha makahiki, o Kemiki Kuemanu ka luaui i paa mai no Keoneula i ka aihue. Ano ole no hoi ko ka Hope Makai Nui hoouna ana mai i kekahi makai no ia lawehala, he mea haawi ae no hoi ia i ke kupakako o ka moku oiai, he lawehala ia e hopohopo ole ia ai.

 

Ko Makou Hanau Mua, ua Hala

MR. LUNAHOOPONOPONO:

                Ma ke kakahiaka Sabati, Feb. 11, ua loaa mai la ka lono no ka make ana o ko makou hanau mua P. K. Kauimakaole, ma Hana, Maui, i ka hora 12 o ke awakea Poalina, la 9. A ua ili iho maluna o makou ke kaumaha luuluu nona, na pokii hoi i ike ole i kona hanu hope lea.

                A ke komo pu aku nei makou me ka wahine i hooneleia i ke kane ole, a me na keiki hoi i ka makuakane ole, a pela pu hoi me makou kona mau pokii. Aloha wale oia.

                Hoonaauaoia oia ma Wananalua, Hana, e Mr. J. K. Kahookano. Mahope mai ua komo i Lahainaluna, i ka wa o S. E. Bihopa ke kumu. Puka mai oia mailaila mai, kohoia i kumukula no Wananalua, Hana, Maui.

                Ua mare oia i ka wahine a mahope mai waiho i ka oihana kumukula. Holo mai oia e ao kanawai ma Honolulu nei, a ua loaa iaia ka laikini e lawelawe ai ma na Aha Apana. He Notari a he Anaaina oia. He oluolu, heahea a he waipahe oia i na mea a pau. Ua 27 ka nui o kona mau makahiki a hala wale aku la. He kakoo ikaika oia no ke Aupuni Moi.

                O makou iho no,

                S. KAILI,

                G. W. KAUIMAKAOLE,

                J. P. KAUIMAKAOLE,

                G. K. KAUIMAKAOLE.

Kapalama, Feb. 19, 1894.

 

                Ma ke awakea Sabati, Feb. 18, ua hanau mai la na ka wahine a ko makou makamaka Isaac D. Iaea, ma Waiau, Ewa, he keikikane nui momona.

                Eia i o kakou nei ka Mea Hanohano Paulo Isenebega, o k a Hui Kalepa o H. Hakafila Ma, he Alii Ahaolelo malalo o ke Kumukanawai o 1864, mahope o ka hala ana iaia o kekahi wa loihi ma Geremania. Ma ka Monowai oia i hoea mai ai.

                I ka Alameda i holo mai ai mai Kapalakiko mai ma kana huakai hope loa iho nei, ua haule oia he elua la, aka, mamua ae o ka hoea ana aku i Aukalana, Nu Kilani, ua lilo ia haule hope ona i mea ole, a ua hoolele aku oia i na eke leta ma Kikane he 53 hora mamua ae o ka manawa. Ua eleu no a ua holo no.

                I ke kuaua eloelo o ka auwina la Poakahi i hala Feb. 11, ua pehu ae ka wai o ke kahawai o Nuuanu, i kokuaia mai e ko Pauoa kahawai, a lilo ana na hale-liilii, na moa, puaa kaka a me na apanapana laau iloko o ke awa. He ahele kaula ka hana a kekahi poe i na pauku laau, a he hopuhopu hoi kahi. Piena na Pake no na moa me na kaka, hoea ka makai, a no ka hoailona ole, ua hookuuia no na poe hopuhopu. He e.ima kaka i loaa ia auwina la no $1. Ola makapehu o kamalii!