Ka Makaainana, Volume I, Number 9, 26 February 1894 — Page 1

Ka Makaainana.

 

BUKE 4 ---- Ano Hou.           Honolulu, Oahu.  Feberuari 26, 1894.           HELU 9

 

HUA HAULE A KAKINA.

 

Imua o ke Komite Nieniele Hawaii o ka Aha Senate.

 

            Aia no ke Komite o ko na Aina E o ka Aha Senate ke hoomau la i ka lakou nieniele ana.  Aole o Kakina i aeia e hoike hou aku, mamuli o ko Geresehama kue ana, oia hoi, o lilo kona hoea kino ana aku imua o ke komite i mea pono ole.

            Ianuari 30, ua hoea aku o F. W. Rida (Reader) o Sida Rapida, Iowa, imua o ke Komite Senate, a ua lilo oia i hoike kakoo i ke Aupuni a me Balauna.  I Honolulu nei oia i ka wa o ke kipi.  Ua hoike aku oia aohe wahi kumu iki no ka hooleleia ana o na pualikoa, ua maluhia na poe a pau, a aohe waiwai Amerika i hoopilikiaia.  Aohe no hoi oia i ike i kahi kumu e kukalaia aku ai o ka Amerika hoomalu ana aku i ka paeaina koe wale no ina no ka hoopakele ana i ke Aupuni o Dole.  Aia no ko na oiwi iini i ko lakou Aupuni ponoi iho, a oiai hoi ua 12 paha ko lakou poe koho kupono i ka 1 o na haole, he mea pono na lakou no e hoomalu.  Aole nae oia i manao, mahope iho o ko ke Alii manao ana e kulai i ke Kumukanawai, e hookuuia aku oia e hoomau aku i kona nohoalii mai.  Mai pono loa ina oia i hopuia a hoopaiia a o kana kaikamahine hoahanau hoi ke hapaiia ae iluna o ka nohoalii.

 

Hoka ua Hoohuiaina.

            He makahiki ae nei i hala i ka po o ka la 22 nei, ua hoopaapaa ko makou Puuku me G. W. Kamika o ka halekuai laau lapaau o Benesona Kamika Ma, ma ka mea pili i ka hoohuiaina me ka olelo mai o ua haole la ke piha ka makahiki, e hele aku ana ko makou Puuku a hoike aku iaia no ka pomaikai nui i loaa mai.  Ua hele aku oia i ka Poalima nei, la 23, a ua hoike aku ua hoka kona manao, a ua ae mai kela, aka, me kona hoike mai no nae i kona manaolana ke hala ua makahiki hou, ua loaa ka hoohuia.  Pelaka u, e loaa io ana no !

 

            Ua lilo ae nei ka halekuai i laau lapaau o Holiseta Ma, ma alanui Papu, a ua lilo ae nei hoi i hui i hoohuiia malalo o ka inoa Hui Laau Lapaau Hollister, (Kaupalenaia).  Eia ma kekahi wahi o keia helu ka hoolaha no ke kohoia ana e na luna.

 

HUA O KA HOOKO HANA.

 

Hoao e Hopu i kekahi Mea Hoopae Opiuma, o na Kino no nae ka Luahi.

 

            Mamuli o ka lono i hoike mua ia ae i na makai kiu o ka Oihana Makai, ua kiai makaala loa ia ke kiapa S. C. Alani, e ku nei ma ka uwapo makai iho o Ulakoheo, a i ka hora 7 o ke ahiahi Poakahi i hala, ua ikeia ka lele ana mai o ke kuke, Joseph Casieto, he kanaka paniolo no Kili a pii ana hele mauka.  Ua hookoloia aku oia e na makai kiu, J. Kauhane a me H. Kaouli, a ua kokoke no hoi e hiki i ke kihi o na alanui Maunakea me Moi, hoao aku la o Kaouli e hopu i ua kuke la.  Iaia i hoomaopopo mai ai he makai o Kaouli, ua wehe ae oia he pahi loihi, o 12 a oi paha iniha a ua hele a oi a winiwini, a hou aku la i ka makai.  Ua loaa aku o Kaouli ma ka uwala o ka lima hema, mawaena o ka muku a me ka poohiwi, a loaa he moku o hookahi iniha ka hohonu a me elua me hapa iniha ka loihi.  O ko Kaouli wa no nae hoi ia i aumeume aku ai me ua limakoko la, a ku hou aku la no nae oia i ka pahi a moku ma ka uha hema, he eha me hapa iniha ka loa a he ekolu iniha ka hohonu.  Ua hamama ae la ka moku hope a kahe makawalu aku la ke koko; ua hoomaka ae ko ka makai ano nawaliwali a kahea ae la no ke kahi kokuaia mai.

            Poha ae la ko Kaouli leo, ua kokoke mai la o Kauhane a hopu aku la i ua kuke nei mahope aku o ke kua, a holo hoi o Kaouli e telepona i ka Halewai.  Ia Kauhane e paa ana i ke kuke me ka manao e ka iho ilalo, ua houia ae ka pahi ma ke kua a ku a moku o Kauhane ma ka uha akau, malalo iho o ka puukole, he eono iniha ka loa a he ekolu ka hohonu.  Ua hou hou ia aku no oia a moku ana maluna ae o ke kuli hema, he ekolu iniha ka loa a he hookahi ka hohonua.  No ka paa pono ole o ua kuke la, oiai, e pakaawili ana no me ka hoomano mai no i ka hou ana i ka pahi.  Mahope iho, ua ka o Kauhane a waiho ana ka hiena ilalo, a na laua makai iho hoi i palukuluku a eha loa, o kahi aho nae ka i koe iki ae, me ka loaa o na palapu iaia a me kekahi eha inoino maluna ae o ka maka hema.  I keia wa a lakou e auume nei, ua wehe ae o Kaouli i kana pu panapana a kani ana ke kiko, ua pane koke aku o Kauhane aohe e ki.  Ina no i kiia a make ina ua oi loa aku ka pono.  Nolaila, ia laua no laila i poino ai.  Aohe wahi e ae o ke ao nei e hana ole ia a pela ka maalahi.

            Hele a hoea aku na kokua o ka Halewai aku, e paa ana no o Kauhane i ka lawehala ilalo, ua hele nae hoi oia a nawaliwali i ke kahi makawalu o ke koko.  Ua pau nui lakou i ka laweia i ka Halewai, a ilaila aku maule na makai.  O ke kuke hoi keia, aohe ike ae a mahope wale iho, a na ke kauka i hoomaemae a hooponopono i kona mau eha.  O na makai hoi, ua lawe loa ia i ka Halemai Moiwahine, a ilaila aku i humuhumuia ai na moku a hoomaemaeia na palapu.

            Ua huliia ke kuke ma ka Halewai a ua loaa he eha tini opiuma, me he la ua helelei aku ka nui, oiai, ua maopopo he iwakalua tini ma kona kino.  Aole oia he malihini ianei, aka, ua kamaaina no a ua walea hoi ma keia hana.  Oia no ka mea i aa ai i kona hopuia e na makai, he mau makahiki i hala ae, ma kona uhi ana iaia iho me ka hae Amerika a ua hopuia no nae.  Ua lawe pu mai nei oia i kana wahine a me kona ohana, a ua hele nui ae e ike iaia i kakahiaka ae.  He kanaka ano hauliuli kona nanaina, me he Italia la, uliuli ka umiumi lehelehe a ano punikoko no hoi kona kii.

            Ua oi loa aku ko Kaouli eha i ko Kauhane, a ua hopohopoia oia.  I ka po Poalua ua moe maikai laua, a wahi a ka oleloia mai, ua moe pauhia o Kauhane a ka hora 2 o ka wanaao ae, no ka nui loa ae paha hoi o ka eha, ua oni ino ae la oia, a me he la pau ka lopi i ka mokumoku a heleawai hou mai la ke koko.  Aohe i hiki ke hoopaa hou ia, ua ano paupauaho mai ka hanu ana, a ma ka hora 4:30 o ia wanaao Poakolu, ua kuu mai la ko Kauhane aho a niau aku la oia ma ke ala polikua a Kane.  Ua waeia ae he kiure kolonelo, a ma ka hora 9:30 i noho ai lakou, aohe nae i haawi i ka lakou olelo hooholo a hiki mai i keia la, aia a oluolu ae o Kaouli; a no Kaouli hoi, eia oia ma ke ala e palekana aku ai.  Nui na olelo a me na manao inaina ia o kela hiena mamuli o ko Kauhane make ana, a ina paha ma Amerika, laweia oia e ka lehulehu a liia.  I kinohi, ua manaoia e hookuu i ua hiena la malalo o ka pela, aka, i ko Kauhane aili ana i kona aho a nalo aku la ka lamaku o kona kino, ua hoole hou ia kela manao mua.  Apopo oia hookolokoloia no ka laweola a pepehikanaka paha, a no ka hoopae opiuma malu hoi kekahi.

            No Kau, Hawaii, ko Kauhane hanauia ana, a ua piha iaia ke 37 makahiki, a ua loihi no hoi kona noho makai ana.  I ka auwina la iho no o ia Poakolu, ua maneleia ae kona kino wailua a nalo ma ka ilina o Kawaiahao, malalo o ke alakai haipule ana a ka Rev. H. H. Paleka.  Ua hoohanohanoia ka hoolewa e na makai, o kahi no hoi o lakou ua hele aoao, oia o Nohunohu, Kupihea, Kaaikaula, Kaimihau, Nahau a me Fernandez; a ua hoohiwahiwa ae no hoi e ka puali puhiohe a me elua mahele koa Pi Gi, ka Loio Kuhina, ka Ilamuku a me kahi poe Pi Gi e ae.

            Eia kana wahine kanemake ke noho nei iloko o ka hune, oiai, ua hala aku la ka mea nana e imi ke ola o keia noho ana.  Ua noi hele ia ae i ka Poakolu ka lulu aloha ana o ka lehulehu nona, a ua loaa no na koku.a  He puukani o Mrs. Mele Kauhane, a oia no hoi ka leo alakai o ka papa himeni o ka luakini o Kawaiahao.  Ua mare o Kauhane ia Pale, he kaikuaana no Mrs. Kuaihelani Kamabela, a ua okiia, a mahope iho mare ia Mrs. Mele Kapolena ka wahine kanemake a J. Kapolena.  Oiai oia e noho kapena makai ana malalo o Ilamuku Wilikini, ua hoopaa oia i kona ola no $2,500 panihakahaka, a no ka hala o kekahi mau manawa hookaa ua pau wale.

            E haawiia ana he aha mele no ka pomaikai o na wahine a na makai i poino, maloko o ka Hale Opera Hawaii, ke hiki aku i ka po o Maraki 17 ae, malalo o na lawelawe ana a W. Kuelo, kakauolelo a ka Hope Ilamuku.

 

Kanono Pono na Hoopai ana.

 

            He Pake piepiele opiuma ka i loaa ia Kapena Anaru uhai bibi a me na makai i ka la 31 o Ianuari, maloko o kekahi hale ma na alanui Moi me Maunakea.  Ua hooiaia kona kuai ma ka loaa ana aku o na apana dala i hoailona mua ia maluna o kona kino, mai na Pake kiu aku, a ua loaa aku no hoi kekahi poe i ko na makai komo ana aku e momoe, nui mai ana me ka hauhau mai.  Imaa o ka Aha Apana i ka Poalua i hala i hala iho la, ua ahewaia a hoopaiia e uku i $500 me eono malama hana oolea ma Kawa.

            He Pake hou ae no hoi kahi i hopuia i ka la 16 nei, ma kela hale hoomana ma Kaumakapili, no ke kuai opiuma iloko o ka hua lai-ki.  Imua oia o ka Aha Apana i ka Poalima nei, ua hoole aole oia i loihi iloko o ka rumi kuai, eia no nae ua ahewaia a hoopaiia no e like me ka mea mua maluna ae.