Ka Makaainana, Volume I, Number 7, 12 Pepeluali 1894 — Page 1

Ka Makaainana.
BUKE I----Ano Hou. Honolulu, Oahu, Feberuari 12, 1894. HELU 7


KE KUMUHANA HAWAII.

Na Lono Ahaolelo Hope Loa, a me kela a me keia Lono.

Imua o ka Hale Makaainana.

                Iwaena o na paio ana no ka papa hoakaka pili kopaa ma ka bila kanawai dute iloko o ka Hale ma ka la 22 o Ianuari, ua hoouna palapala hou ae ka Peresidena i ka Hale me na palapala hope loa e pili ana i ke kulana o Hawaii mai ia Wilisi aku. Mahope iho o ka heluheluia ana o na kukai palapala Hawaii, ua hoopaakiki aku o Butele i kona ikeia mai. Ua kuhi ae oia ua akaka loa mai na palapala ekolu mai ka Peresidena i hoouna ae ai i ka Hale, oia ke Aupuni ke lawelawe nei i na hana e hoeueu ai i ka haunaele iloko o kekahi aina a Amerika Huipuia e launa ana me ka maluhia. Ua makemake oia e hapaiia ae kana olelo hooholo i aeia ai ka pono. Mamuli o keia noi, ua ulu ae he papa leo hahana mawaena o Butele a me ka Lunahoomalu.
            Ua noi o Haki e hoopaaia ka Butele mau olelo, a ua kauohaia hoi o Butele e noho ilalo. Aole oia i ae e hana pela, nolaila, ua kauohaia ka makai o ka Hale e kakoo ae i ka mana o ka Lunahoomalu. Ua ukaliia keia me ka uluaoa nui. Ua heluheluia ae ka rula, a ia wa hoomaopopo aku ai ka Lunahoomalu no kekahi noi e hapai hou ia ka noonoo ana o ka bila dute. Ma ka mahae ana o ke koho, ua olelo ae o Butele no ka lawa ole o ka Hale. Aole na poe Repubalika i ae e koho. Ua hookohuia i poe na lakou e helu pono i ke koho ana, a me he la e lawa ole io ana no, a e hookauluaia ana hoi ka paio ana no ka bila dute. Eia nae hoi, ma ia hope iho, ua loaa no he wahi lawa kupono a ua hoomauia ka paio ana no ke kopaa.

Imua o ka Aha Senate.

                Ma ka la 23 mai, ua hoike ae ke Komite o ko na Aina E, ma ka aoao kokua, i ka olelo hooholo malalo iho:
            "Hooholoia, mai na kumu maopopo a me na palapala i waihoia mai imua o ke Senate, ua ikeia he mea naauao ole a kupono ole hoi, malalo o na kulana e waiho mau nei, e noonoo i keia wa i kekahi kumuhana no ka hoohui ana mai i ko Hawaii Paeaina ia Amerika Huipuia; oiai hoi, ua ike pono ia ke Aupuni Kuikawa maloko iho olaila, nolaila, ua kono mai na launa pili aupuni kiekie ana i kona hoomau aku no i kona kahua alakai ponoi iho. E manaoia no na akeakea kuwaho ana aku a na aupuni e i na hana pili kalaiaina o keia mau paemoku, he hana hoa'loha ole ia i ke Aupuni o Amerika Huipuia."
            Na Tupi i waiho aku i keia olelo hooholo ma ka aoao o ke komite, a ua olelo aku oia e noonoo koke ia, no ka mea, oia no ka hoike manao holookoa o ke komite mawaho ae o ko Senatoa Dolope kue no ka mahele mua. Ua hoakaka hou aku no hoi oia aohe keia olelo hooholo i pili i na nieniele a ke komite e lawelawe ana ia wa.
            Ua kamailio ae o Kuloma ( Cullom) maluna o ka olelo hooholo me ko Kanala haawi aku hoi i ka papahele iaia no ia mea. Me ka eena oia i kapeku aku ai i ke kue i ke Aupuni, me ka hoike aku hoi ua nui na olelo ike e kue ana i ke kahua o ka Peresidena a me kona Kuhina Nui, oia hoi, ma kahi e olelo ana na Kuhina Kiwini a me Kapena Wilise i hoeueu a i pulama i kela kipi. O ka mea maopopo loa nae, ua loaa aku ia Kalivilana ua ku ke Aupuni a e hoomalu kaokoa ana hoi i ke kahua, ua ikeia e ke ao holookoa. Ua hoohalike oia ia Balauna me he kiu la ke ano o kana mau hana ma Honolulu, a ua kupono hoi e loaa iaia ka hopena kupono o na kiu, e like la hoi me ka hoopai i loaa ia Mekia Anaderea i na la i kipi ai i ka lahui, oiai, oia ke kiu a ke Aupuni o Beritania Nui i hoolimalima ai.
            Mamuli o ko Tela kue i ka noonoo koke ia o ka olelo hooholo no ke pai ole ia, ua hala ae la ia puu nui malalo o na rula, a ua hoolaha aku hoi o Mila ke hoea mai i ka wa e noonooia ai, e noi aku ana oia no ka hoomahae ae i ka ninau ma ke koho ana.

Na Olelo Hooholo imua o ka Hale.

                Eia iho he olelo hooholo pakui i na olelo hooholo mua, i waihoia ae ia la no, e Suita (Momona—Sweet), he Repubalika no Idaho.
            "No ka mea, aia hoi ke hoaoia mai la i keia wa e kukulu ae i repubalika ma ko Hawaii Paeaina; a
            "No ka mea, ua nui hoi na lono lauwili e pili ana i ko Ame rika Huipuia kahua no ia mea; nolaila,
            "E Hooholoia, eia ma keia ke haawi aku nei o Amerika Huipuia i na alakai e paonioni mai la o na paemoku i oleloia i kona manao aloha kukonukonu me ka lakou mau hooikaika ana e hoopalahalaha aku hoi i na loina o ka hooponopono aupuni lanakila ana."
            Ia auwina la iho no hoi i waiho aku ai o Makaliele, Lunahoomalu o ke Komite o ko na Aina E o ka Hale, i kekahi olelo hooholo e hoakaka ana i ke kahua o na lala Demokarata o ke komite e pili ana ia Hawaii. O ke ano nui ma ia olelo hooholo, oia no ka hoahewa loa ana i ka manao hoohuiaina a e kakoo ana hoi i ko ka Peresidena kulana, oia hoi, i kana kahua alakai.

Na Lonolono Huikau.

                Ua kipa ae o Kakina ma ke Keena o ko na Aina E, Ianuari 25, a ua ike pokole aku ia Kuhina Nui Geresehama. O ka mua keia o kona kipa ana aku mai ka hoi ana aku nei, a ua like no kona ikeia ana mai e like la me ia mamua ae o kona holo ana aku. Ua hoea aku oia ma ka rumi o ke Komite o ko na Aina E o ka Aha Senate ma ka la 22 aku, aole nae oia i aeia e komo, no ka mea, e noho ana ke komite ia wa. Oia a me Kiwini ka i haalele pu aku. Aohe no ana mau pala hou no na hana ma Honolulu.
            He palapala hoopii a paipai manao ka i loaa aku i ka Peresidena mai ka Ahahui Aloha Aina Hawaii aku, Ianuari 21, a ua hoounaia i ka Ahaolelo i ka la 22 ae. Ua haawiia kela palapala ia Kuhina Wilisi e Keoni Kamaki a me A. Makuisa, ma ke ano o laua ke komite o ia ahahui. He palapala okoa ae no kekahi i hoounaia i na hoa Ahaolelo a pau mahope iho o ke paiia ana, a ua kakauinoaia e Keoni Kamaki, Peresidena Hanohano, a me J. K. Kaulia, Kakauolelo.
                O kekahi hoike i huai aku i ka oiaio imua o ke Komite Nieniele Hawaii o ka Aha Senate, oia o Kauka M. Stalker (Setoka) o Dese Moine, Iowa. Oia kekahi ma Honolulu nei i ka wa o ke kipi ana. Ma ka olelo hoike, ua olelo aku oia ua manao oia ua kupono ole loa ke ala kipi ana, a ua manao no hoi oia ina aole no ka hooleleia ana o na koa Amerika, aole no e hololea a lanakila na kipi.
            O ko Palani He sekina kono ole ia ana i kela ahaaina pili oihana a ka Peresidena i haawi ai ma ka Hale Keokeo, aole i poina maoli ia, aka, ua manao maoli ia no pela e hoohaahaa ai iaia. Ua ike ole ia ko Hawaii kulana mamuli maoli no o ka ka Peresidena kauoha.
            Imua o kela Komite Nieniele o ka Aha Senate o J. A. McCandless (Makanelese), kekahi lala o kela komite kipi a hoakuka hoi i pau o ka Ahakuka Pi Gi, ma ka la 22. Ua kakoo oia i na hana a na kipi a me ka Kuhina Kiwini. Ua olelo oia aole loa oia he koo ikaika no ka manao hoohuiaina, eia nae, ua manao oia ua waiwai no o Hawaii nona iho, a ua hiki loa no hoi i na ili keokeo naauao o ko Hawaii Paeaina ke hookele a hoomalu ia lakou iho.
            Ua manaoia ma ka la 1 o Feberuari nei, e hooholo pau loa ia ai ka bila kanawai dute, a mahope aku e hapaiia ae ai ka noonoo ana i ka ninau pili ia Hawaii. O ka la 2 nei ka la i manaoia ai no ia hana, a o ka olelo hooholo a Makaliele ke kahua o ka hana, a maluna o ia e hookahuaia ai na paio ana.

Loaa aku ua Make.

                Iloko o kekahi hale ku hookahi ma Waikane, Koolaupoko, i loaa aku ai ke kino make o Mahoe, he hapauea o 90 paha makahiki, i ka Poaono, la 3 nei. E ole e kaalo ae kekahi mea malaila, honiia ai i ka pilau make, a komo ae la ka hoohuoi iloko o ia mea. Ua holo aku oia a hoike ia E. P. Aikue, ka lunakanawai, a i ko laua hoi hou ana ae a ka hale a wawahi i ka puka, ua loaa aku oia e noho ana iluna o ka moe ua make, a me he la ua eha a elima paha la o ka make ana. E hoomakaukau ana paha oia e hiamoe a make ai, no ka mea, ua loaa aku aohe i pau loa na aahu i ka hemo. He elemakule kuonoono oia no ia wahi, a ua hooili oia i kona waiwai i ke kaikamahine a kana wahine hope, oia o Mrs. Kale Kauka opio e noho la ma Kualoa aku. Elua ona mare wahine ana, a aohe no i loihi loa aku, he mau mahina paha, ka make ana o ka wahine hope.

            Aole i keia la, aka, i keia Poakahi ae e hooloheia ai ke noi a ka wahine kanemake no ka waiwai o Ona Iuko i make. Ua paewa makou ma ka hunahuna ma ka aoao 7 o keia helu.
            I ka po a ao iho holo aku nei ka Auseteralia, la 3 nei, ua manaoia e huli hoi aku ana o Mrs. Mere Ailau ma ia moku no Kapalakiko, ua haawi ae na keiki o ka hui himeni a ke kane i make he aha mele hoolaulea nona ma ka hale makamaka ona i noho ai ia po.