Ka Makaainana, Volume I, Number 6, 5 February 1894 — Page 7

HONOLULU, OAHU, POAKAHI, FEBERUARI 5, 1894. 7

NA AINA MAMAO.

He Mau Lono mai kela a me keia Pea o ke Ao nei.

Pau na Pukuniahi Kaumaha.

                Ua hooholo ka Papa Adimerala o Beritania Nui e haalele i ka lawe ana i na pu nunui o 67 tona maluna o na mokukaua hou e hanaia la, pela ka lono mai Ladana o Ianuari 15. O na pu 50 tona wale no ke laweia aku ana. Ua hoawiwiia keia hooholo ana mamuli o ke ano e ana mai nei o ka mokukaua Resolutiona, a pela no ka hoi me ka mokukaua Warspite (Wasapaita) mawaho ae o Kuinitaona he ma la mamua ae.

Hopena Weliweli o na Beritania Hopo Ole.

                Mai na poe paele aku me na poe o ka aoao o ka Moi Lobenegula i loaa aku ai na hoakaka piha no ka pau ana o ko Kapena Wilisona puali i ka lukuia, pela ka lono mai Lae Taona, Ianuari 15. Aia ma ko Wilisona aoao he 40 poe koa Pelekane a me 100 poe paele kokua, a ua loaa aku ia lakou ka Moi Lobenegula me kekahi puali nui. Me ka manao hoi ua hooweliweliia ka manao o na poe Matabele a me ke kaunui hoi e hopu pio i ke kino o ka Moi, me ko Wilisona hoomapopo mua ole ae ai no ka lele ano hoopuiwaia mai, ua hou aku la oia imua me kona poe koa kakaikahi. I ka ike ana mai o ka Moi i ko lakou uuku, ua hoolala ae oia i kekahi hana maalea. Ua kauoha oia i ka mahele waena o kona puali e kuemi hope aku imua o ko na Pelekane nee papa aku, a hiolo like aku la hoi na aoao ma o a maanei. Ua hololea keia hoolala ana. Me ka paukiki loa i hou aku ai na koa Pelekane imua a haule loa aku la na kokua paele i hope lilo, a o ka wa no ia o na Matabele mamua mai i ku iho ai a kaua mai, a hoomaka ae la na aoao e upoi hou ae. Ua ike koke ae la no o Wilisona i kona pilikia a hoao ae la e nee hou aku i hope a loaa kona poe kokua, eia nae, ua pinai loa aku na Matabele ma na pea a pau me ka heluna nui hewahewa o na kanaka. Pau na lio o na koa i ka hina malalo iho o lakou, a ua konoia lakou e ku a e paio aku no ke ola a no ka make, me ka hoolilo hoi i na lio make o lakou i palekaua. Mahope aku o na lio lakou i paio aku ai a pau na poka o na pu raifela, a ua iho nui iho i na pu panapana a lakou, a i ka pau ana o ka lakou eha, ua hoomano aku no me na pahikaua.
            Ma ia hope iho ua hoomau aku no ko na paele nee papa ana, e kokoke loa aku ana hoi i kela a me keia wa, a hiki wale no i ko lakou lele paukiki ana aku maluna o na poe Pelekane kakaikahi, a luku aku la me ka manaonao i na poe e ola ana me na pahi a me na newa a koe hookahi ole iho, a ua pau ae la hoi na ola o ia poe koa wiwo a hopo ole. A pela iho la hoi i pau ae ai ia mokuna ma ka moolelo o ko Beritakia Nui lawelawe ana i na hana kaua ma Aferika, a malaila, e like no hoi me kekahi mau kahua kaua e ae, i pau ai kekahi o kona mau koa wiwo loa a me na keiki opio hoi o kekahi o kona mau ohana maikai, i hoouna nui ia hoi e loaa ka hana mua ana i ka hohono uwahi pauda ilaila.
            Ua oleloia i ka manawa hope loa o ko na Beritania ku paio ana mai, aole loa he mea hookahi iwaena o lakou i nele i ka eha a ua umikumamalua paha ku ana o kekahi o lakou i ka poka. O na olelo hoike a pau, ua koa a ua hopo ole no na koa opio, me ka loihi loa hoi o ka manawa o ko na paele hookunana a hookuhauia mamuli o ka pololei o ke ki ana a me ka like hoi o ko lakou aa aku i ka make maopopo, oiai no e ku aku ana imua ponoi o lakou. Ua kohokoho wale ia ua aneane e 4,000 na paele, ua oleloia he 34 wale no na Beritania. Mahope iho o ka pau ana ae, ua uhaehaeia na aahu komo o na koa e na paele lanakila, hanainoia na kino, a lawe nui ae la hoi i na lako kaua.
            He lono mai Kapetona, Aferika Hema, o ka la 20 nei, e olelo ana ua hoopoai puniia ka Moi Lobenegula a me kekahi poe kakaikahi me ia ma kahi kokoke i ka muliwai Zamabesi. Ua haawi pio aku na alii e ae i kokoke i kahi i lukuia ai o ko Wilisona poe a ke lawe la i mau apana aina o lakou.

Maumaua no ke Kaua ma Berazila.

                Na ke Kuhina o ko na Aina E o Berazila i hoike maoli ae no i na poe kakau nupepa Amerika no ka pakele ana o Bage mai ke kaua paniku ia aku no 18 la. Ua hoauheeia na poe kipi, me ka haalele nui aku hoi i na ukana a me na lako kaua. Ma ko ke Aupuni aoao he 36 i make a he 90 i eha, a he 100 hoi o na kipi i make a eha. Ua oleloia ua hana uko ole na poe kipi i ko lakou kuemi hope ana. Pau na lako o na hale i ka hoopoinoia a ua loaa aku kekahi poe ua pau na puu i ke okiia. Elua mau koa Aupuni i hopu pio ia i puhi ia me ia ola no.
            Ua hakaka hahana ae hoi ka moku kipi Guanabara, i kokuaia e na pu o ka mokupuni o Cobara, pela ka lono mai Rio de Ianeiro o Ianuari 15, me ko ke Aupuni mau kuluna i ka Poaono, la 13. Na ke Guanabara ka ai o ia la a ua hoopioia na leo o ko ke Aupuni mau pu. Oiai hoi, ua kokoke mai ka mokukaua i ka aekai, ua hoao aku na aliikoa o Peisoto ma na waapa liilii i piha me na koa e kaua kue a e lawe pio mai, eia nae, ua lilo ia hoao ana i mea ole me ka nui o na make, a ua manao wale ia ua 100 a oi na poe i make, aole nae he maopopo loa. Ma kekahi aoao hoi, ua oleloia he hoonui olelo wale iho no ia a na kipi.
            Ma na olelo o kekahi palapala kokua i ke Aupuni, ua hoikeia aia na kipi ma ke ala e poino loa ai a ke emi aku la ko lakou ikaika ma ka hema. Aia a hiki ia Melo ke loaa mai he pono hou a hoohoihoi aku hoi i kona poe kanaka, alaila, manao ae kahi pono, a ke ole ia, he hopena poluluhi loa ko lakou. Ke mahuka mau la na koa kipi lehulehu, a mamuli o ia a me ka luku a ka ma'i fiva, ke emi loa iho la lakou. O na kanaka hoi o Rio, ua molowa loa lakou no ke kaua, a mamuli hoi o ka ma'i kekahi e ahulau la, ua akenui lakou no ka maluhia. Ke emi mai la nae hoi ka holapu ana a ka ma'i fiva lenalena.
            Ma kekahi aoao hoi, ua loaa aku na palapala o ka la 26 ma Bueno Ea, ua lawe ae ka mokuhae kipi Akuidabana i ke kulana ma ke alo ae o ka hale dute me ka makaukau e hoolele aku i na pualikoa. Ua lawe pio ae na kipi i ka mokupuni o Eugenio. He 40 koa aupuni i make a he 60 i lawe pio ia. Ua hoouna aku ke Aupuni i na kokua hou no Niteroi.
            Ua loaa ae i ka Ahailono (nupepa Herala) o Nu Ioka, mai kona mea kakau ma Rio, he lohe o ka la 19 ua loaa he lanakila hou i na kipi i ka po o ka la 16. Ua lohe mua ae o Adimerala da Gama e manao ana ke Aupuni e lele kaua ae i kekahi mokupuni, nolaila, ua hoopuipui malu aku oia i ka papu me 250 koa malina. I ka wa a ke Aupuni i hana io aku ai, ua hoohikileleia mai lakou me ka haupu mua ole, a iloko o ko lakou auhee ana ua poino he 100 kanaka, he 20 hoi i make a eha ma ka aoao kipi.
            Ina e hiki ana ia Da Gama ke paa i ka mokupuni, e like me ka mea i manaoia, ua hiki no iaia ke hoohana mai i na pukuniahi i lilo mai iaia mai ia Peisoto me ka maikai loa mai ia wahi mai. Ke kau ilaila, ua hiki loa ke hoomaluia ke alahao Peteropolisa a me loko aku, a ua hiki no hoi ke hoopoino aku i ke kahua ea aa o Niteroi a ke anai pau aku hoi me ko lakou mau luai ahi i ka mokupuni o Mocanague a me na wahi kiekiena e ae e kokoke mai ana.
            Aia o Hope Adimerala Benehama o Amerika Huipuia i Rio de Ianeiro, a ua manaoia i hiki aku oia ma ke ano uwao a me kona lawe ae hoi i ke kulana oia ke alii poo iwaena o na aumokukaua o na aina e malaila. Ma na kahoaka o na mea a pau, ina e lawelawe kuio ia ka hana uwao e Benehama, aohe no e nele ana ka loaa o na hopena holopono.

Na Hunahuna Laulaha.

                Aia o Pohakuhauoli i Farani i keia wa ma ke ano hoolanalana.
            He elima o Beritania Nui mau mokukaua ma Rio de Ianeiro, Berazila, a he ekolu no hoi o Amerika Huipuia.
            Aohe o Evana, ka powa mahuka i loaa iki i ka hopu hou ia, a aia i kuahiwi o Kaleponi kahi i hele auwana ai me kekahi mau hoa.
            Ua ao ae ka Bihopa o Hunegari i na kahunapule, maloko o kekahi palapala pili ekalesia, e kakoo lakou i ke kulana o ka ekalesia a e kue aku hoi i na kanawai kivila e pili ana i na mare hui a kivila.
            He mau oehu hoohaunaele ka i puko ae ma Sanatiago, Kili, mamua aku o ka la 9 nei, a ua oleloia mamuli no o na poe kokua ia Balamaseda. Ua hoaoia ae e lawe i ka papu pukaa a ua hopuia he umikumamalua o na alakai ma keia ohumu kipi.
            Ua lilo ka hookuuia ana o na paahana a me na poe Farani e ae i komo ma na hana hoohaunaele ma Augue-Motese i mea e ulu ai na manao pono ole ma Italia no Farani, no ka mea, he poe Italia na poe i pepehiia a make ma ia hoohaunaele ana i Augate, 1892.
            He papaaina pili oihana ka Peresidena a me Mrs. Kalivilana i haawi ae i ka Aha Kuhina a i na luna kiekie o na aina e ma ka Hale Keokeo, i ka la 11 nei, a o ia ka mua loa a laua i haawi ai i keia kau o ka noho Peresidena hou ana. Ua maikai a hiwahiwa na mea a pau.
                Nui ka uluaoa o loko o ka Hale Ahaolelo o Iapana, e pili ana hoi i ke kulana Peresidena o ka Hale, a ua pau wale no i ko ke Aupuni hookuu ana i ka Hale a hoopauia hoi ka noho ana o na mahele elua o ka Ahaolelo. Ua manaoia e hahana ana keia kau koho balota hou aku.
            Ua lonoia, ua loaa hou ka maluhia mawaena o na poe Hoole Pope, Katolika a me Mahomeda ma Uganada, Aferika, ma ke kahua o ka mahelehele i ka aina a hokaawale hoi i ka apana hana o kahi a me kahi. Ina aole i loaa keia maluhia, ina la ua poino loa ka aoao e hoauheeia ana ke kaua lakou a luku ia no a koe hookahi ole iho.