Ka Makaainana, Volume I, Number 6, 5 Pepeluali 1894 — Page 5

HONOLULU, OAHU, POAKAHI, FEBERUARI 5, 1894. 5

na poe Pi Gi mai no kela ike nema ona, e like ai no hoi me Kiwini, a haule like no i ka makalua hookahi. Aka, no Wilisona nae hoi, aole paha i kupono kona hoike e ana i kela hoolala, eia no nae, aole no ia he mea e poino ai o ko kakou kulana. Aia no ko makou ilina maluna o Wilisi, no ka mea, ua hoike aku no o Wilisona iaia nana wale iho no kela mau hoolala, aole hoi ma ke ano pili oihana, a ua kuleana ole o Wilisi e hoike i ka mea i hoike pilikino ia aku iaia ma ke ano malu. Ua like no ia hana ana a Wilisi me ka hele aku o kela a me keia a hoike aku iaia i ka lakou mau hoolala ana no na mea e hoea mai ana, me ka maopopo mua ole iaia o ka oiaio a o ka pono paha ia, a ua aponoia la hoi. Aole e like me keia iho la, ua awiwi oia e hoike koke aku i kona Aupuni me ka maopopo mua ole iaia o ka oiaio ia a ua aponoia la hoi.
            Mai manaoia mai e kakoo ana makou ia Wilisona; aole loa pela, no ka mea, ke manao nei no hoi makou ua kupono ole no kona hoike e ana i kana mau hoolala ana. Aia no a hiki mai ka manawa kupono no ia mea, alaila, ua pono a ua kupono ia ia wa, aohe i kahi wa e ae. A mamuli nae hoi o ka puka ana ae la o kela hoolala, ua alala ae la kekahi poe me ko lakou imi mua ole no hoi i ka oiaio. Aole e hiki ke hooleia kona makee i kana Alii a me ke kupaa hoi mahope o ka aina nei, a o na olelo ana ua hana oia i keia mea mamuli o ke pahele a apuhiia, he kahamaha loa ana aku ia mawaho ae o ke kahua kupono, no ka mea, he kanaka oia na makou i hilinai aole oia e hiki ke hooliloia i mea paani wale ia a oniu wale ia hoi ma na manamana lima o kekahi mea a poe paha. Nolaila, mai awiwi kakou i ka hoahewa e me ke akaka mua ole o ka mea maopopo loa no ia mea. Malia ma keia mua koke iho e maopopo loa ae ai, a e hoike aku no hoi makou mai ka mua a ka hope, e like no me ka makou e hana nei ma na mea e ae i pili ia kakou.

OWAI LA KA PUNIKOKO?

                Nui na walaau ana i na la i hala iho la iwaena o na poe Pi Gi no ka hihiu, lokoino a punikoko o ke Aliiaimoku. Iwaena nae hoi o ua poe hoohuiaina la, ua ike ole ia a ua nele hoi ka manao makee "maluhia" a "kalahala" hoi o ua poe la. Eia iho na olelo a kahi poe o lakou i loheia.
            Iluna o kekahi kaa alahao i ke ahiahi Poalima, Ianuari 26, ua kukai olelo ae he lala o ka Aha Kuhina a me kekahi lala o ka Ahaolelo Pi Gi, oiai laua e kamoe ana no ka halawai o ka Ahahui Amerika ia ahiahi. Ua loheia kekahi i ka olelo ana ae: "E pono ia kakou e hookaawale aku iaia (ma ke ano wahine—pili paha i ke Aliiaimoku). Na kakou hoi ia e kono aku i kekahi poe o ka Liki Amerika e hooko aku ia hana."
            I na hora hope no hoi o ia auwina la Poalima, ua kukai olelo ae no he lala i pau o ka Ahaolelo Pi Gi a me kekahi lala o kekahi hale kalepa, a ua loheia kekahi e olelo ana, "O ka mea pono loa ia kakou e hana ai, oia no ka hookaawale loa aku iaia (e like no ka manao me ko ka mua maluna ae.)
                Heaha ke kaona o keia mau kukai olelo ana? Ua hele keia poe a pau loa i ka halawai o ka Liki Amerika ia ahiahi, a ua oleloia ua noonooia ke kumuhana no ka hookaawale a lae ae i ke ola o ke Aliiaimoku. Ekolu ka poe e ae i manaoia e hoolilo i ko lakou mau ola i mea ole wale. Owai ka hihiu? Owai ka lokoino? A owai hoi ka punikoko? He mau ninau kupono loa wale no keia ae la e ninauia aku i ua poe hookamani la. E kala kahiko i loheia ai na olelo no ka lawe i ke ola o ke Alii, a ua hoaoia ae no hoi. Ua makau honua keia poe i ka wahine, a pakela loa aku paha i na he kane oia. Ina aole o lakou ake e lawe i ke ola, no keaha la hoi ke kumu o ka hoonoho ana i na kiu ma ke alo o Wasinetona Pa, ma ka aoao makai, a malalo iho hoi o ka malumalu o na paia o ka luakini o ua poe pakaha a hookamani la? He ole loa keia i kela olelo "okipoo," niniau nae ua poe la. Ke noho a ke kakali nei makou, me ka manaolana, e paneia mai ana a e hoaiai maopopo ia mai ana hoi ke kumu o ka lakou mau olelo a me ka lakou mau hoao e hana ana.

"HUAI KA ULU O LELE."

                Ua waihoia ae he kanawai imua o ka Ahaolelo Pi Gi i ka Poaha iho la, e Mr. Haki, no ka hookaawale ae i na kulana oihana Peresidena a me ke Kuhina o ko na Aina E. A ua noi pu ia ae no hoi i $10,000 ka uku makahiki o ka Peresidena. Ea, aia ka a ano pulepule ae i ka omaimai mau, manao ua poe oehaa la e hanai ai aku a e hoomama ae hoi i ke kaumaha o ka noonoo o ua paioa la.

            A imua no o ia Ahaolelo i waiho ae ai o Loio Kuhina Kamika i noi no ko ke Aupuni kauoha aku i 25,000 poka pu raifela no na pualikoa. Oi hana malu nui iho nei a ua koa loa, eia la ke hoike okoa nei i ka makemake. Nawai ana la auanei e uku i keia lilo pomaikai ole o ka aina nei?

            Pela no hoi me ka ke Kuhina Waiwai hoike hebedoma mau, e pau ana i Ianuari 31. Ua ikeia iho ua loaa hou mai i ke Aupuni he $3,000 no na bona i hoolilo ia, aole nae hoi he lilo no ia hoolilo ana i nei wa. Nui kela! Eia nae, ke pehu mau ae nei no ka huina aie o ke Aupuni, ua "ku ke ahua, hana ka haawe," a loaa ka puu nui o $3,396,459 87, oia hoi, he $2,678,200 no na bona e aieia nei, he $678,259 87 no ka aie i ka Banako Hunahuna Hale Leta a me na nota a ka Luna Leta Nui, a he $40,000 no na nota Waihona. Ea, ua nui no! A o na lilo hoi o ke Aupuni Kuikawa, ua pehu ae a loaa ke ahua o $198,092.83. Me he la aohe palena o ka lakou mau hoolilo mana ole.

            Holo aku nei o Pi Ki Keoni i Ame rika a hoi hou mai nei, ua ahu ka pala o ka "maia a kuu keiki." Ua oleloia iaia i hoea aku ai i Wasinetona a ku imua o Peresidena Kalivilana, ka mea ana i holo aku nei e hoopiilunanui, ina ua aeia mai oia e ku aku, ina ka i eu ae ka Peresidena mai kona noho, ina la ua hoomamau kona ihu i ua noho la. Eia nae, o ke ahu paha ia o kana pala o ka hoi ana mai nei, ua ku a haiolelo ae oia imua o kana papa Kula Sabati i ka La Pule, Ianuari 28, ma ka Luakini o Kawaiahao, a olelo aku la imua o lakou, he poe makee Alii ka hapanui, aohe ka he manaolana i koe no ka hoihoi hou ia ae o ka Moi. Oioi no hoi ua opukeemoa!

            O kekahi hana hou a ke Aupuni i ka pule i hala iho la, oia no ka piepiele dala o ka Waihona. Ua hoolaha ae ke Kuhina Waiwai he $50,000 ma ke dala gula Amerika no ka hoolilo aku, a ma ke kohokoho e lilo ai. Elua kohokoho i aeia, o ka Waila Ma no $20,000 ma ka 1 1/2 pa-keneta, a o ka Kalausa Sepekula Ma no $30,000 ma ka 1 1/4 pa-keneta. Ua haule loa iho ka Bihopa Ma koho. He $618.35 ka mea i loaa i ka Waihona ma ia hana ana. O ke kumu nui ka o keia hoolilo ana i ke dala ulaula, no ka nui loa ka o ke dala keokeo e laulaha nei.

            Ua mihi akea ae ka wahaolelo pahemo alaula o ka poai pakaha a hoohuiaina ia Kanikela Kenerala Mila, no ko lakou kikaho ana ua pane oia i ke Aupuni Kuikawa no kona kumu i hele ole aku ai e ike ia Kolekaaka ma ka la 17 o Ianuari, ka la hoomanao o ko lakou lawe aihue ana i ka aina nei o na oiwi ponoi. Ahahana, i kau hana, a mihi okoa ana ka hoi! Aole kona hoa kuilima o ka liula i mihi ae, a malia no ka nele uhane maikai mai no hoi ke kumu. He nonohua hoi kona no ka hoolohe ole ia a makauia hoi o kana hanehane.

            O ka buke alemanaka a Huiteka (Whittaker's Almanac), oia ka buke hoike pili oihana i ikeia a i hilinai ma Enelani a me na wahi e ae o ke ao nei. A ma ka buke hoi o keia makahiki, ma kahi i hookaawaleia no Hawaii nei, ua hoikeia o ke Alii Liliuokalani ka Moi, a o ke Kama'liiwahine Kaiulani ka Hooilina Moi. Ma kahi hoi o na Kuhina, ua hoakakaia no ke ano pualewa a opikipikio o ka aina nei, ua maopopo ole kakou. Aohe mau olelo ana maloko o ia buke no Kolekaaka a me kona poe paalalo ole wale. Hu hoi ai ia oukou?

            Eia i o kakou nei o W. N. Limaikaika, ia welo mikanele, he mau pule i hala ae kona hoea ana mai. Ua ku ae oia imua o ka Liki Amerika a hoike aku la he hoohuiaina kahiko oia mai mua loa mai. A iaia no e noho Loio Kuhina ana iloko o 1880, a mahope mai paha, e lolii ana no ka ia manao iloko ona. Ka moonihoawa no hoi! Ua pane ae no hoi o Mr. T. H. Kowiki iaia no kona noho me ka manao kue ma ka oihana malalo o ka Moi Kalakaua, a ua hoike akea hou ae oia ma kekahi nupepa no ko laua (oia a me ka Moi Kalakaua) kuka pu ana no ia mea ma Europa, ma kela huakai kaapuni honua a ka Moi, a oia hoi kekahi ukali a paalalo pu me Kale Kauka. Hoopunipuni! Ke olelo nei oia no ka mea ua make, me ka ike no aohe leo o ka mea make e hiki ai ke pane mai i kana wahahee ana. No ke ake oihana no ke kumu o nei welo mikanele i hoi mai la, oiai, ke ake nei oia e lilo i Kuhina no ko na Aina E no ke kulana hoehaa a na hoa welo a mamo ona, a ke hookehakeha mau nei hoi i kona manao hoolilo aina. Olalau no hoi ua paa ipukuha o ka Moi i make, ka hoa hele kula hoi o ua ohua palemo la o ka noho ana i na aina e, a ianei i manao ai e loaa ka ikeia, ka hanohano, a me kahi ola.

            Ma ka Auseteralia i ku mai ai i ka Poaono, Ianuari 27, i hoea mai nei he Komisina a Kanikela hou no Farani, a hiki mai i keia la, aole oia i hoea aku imua o

[Nana i ke koena ma ka aoao 8.]