Ka Makaainana, Volume I, Number 5, 29 January 1894 — Page 8

8 HONOLULU, OAHU, POAKAHI, IANUARI 29, 1894.

KELA A ME KEIA.

He mau kaoo kohala ka i ike ia mawaho ae o Waikiki i kekahi mau la o ka pule i hala iho la.

Ua hololea na hooponopono ana no na Kepani o Koloa i olohani ai, a ua pau hou i ka hoi i ka hana.

I keia Poaono ae, Feberuari 3, e ku mai ai ka mokumahu Arawa mai na Panalaau Beritania mai ma ka Hema.

He 27 poe mai lepera a Lehua i lawe aku no Kalawao i ke ahiahi Poalua i hala iho la mai Kalihi aku.

Ma ka la 10 o Maraki ae nei i manaoia ai no ko ka Hoku Ao ku mai, mai na paemoku mai o ka Hema aku nei.

He mau tona lako ai a mau pono e ae ka i loaa mai nei ma ka Warimu no ke Kamepiona. E hoike mai ana ia aole oia e holo koke aku ana.

Ma ka Poaono, Ianuari 20, akahi no a haule wahi kulu pakaua ma Kohala, no kekahi mau mahina loihi. O ka wela a ka la ka mea nui.

E haule ana o Malulani he hookahi i keia pule, no ka mea, e ku ae ana oia i Lahaina e uhao kopaa ai, a i ka Poakolu e ku mai ai, aole hoi i ka auwina la o ka la apopo.

Ma ka Poakolu i hala, mahope iho o ka hora 10 o kakahiaka, ua akoakoa ae ka halawai makahiki i hoopaneeia o ka Hui Paahana a Hoolawa o na poe Mahiko, a ua hoomaluia e W. G. Iwini, Peresidena.

Ua uwaiia ae i kahi la o ka pule i hala iho la ka noho agena ana o ka Hui Kalepa a Kopaa Hawaii, mai ka hale kalepa aku o W. G. Iwini Ma a i ko H. Hakapila Ma. O keia ae la no ka hui mahiko o ke Kula o Kamaomao.

Ma ka hora 10:30 A. M. o ka la 16 nei i hoea aku ai ka mokumahu Miowera i Kapalakiko, a ma ka nanaia ana mai nei e hiki aku ana na lilo no ka hoomaemae hou ana iaia ma kahi o $50,000, i ole ia, $100,000 paha. Nui no.

O kela keiki Pake, nona ka inoa o Chun You, i hou ai i kekahi keiki Hawaii, nona ka inoa o Keoki, ma ke kua ma ka la 11 nei, ua waihoia aku kona hihia i ka Poakolu i hala iho la, e ka Lunakanawai Apana, a i keia kau kiure ae.

I kakahiaka Poalua a me Poalima nei i hookahakaha paikau topido ae ai na waapa o ka Naniwa, maloko nei o ke awa, me kekahi poe lana i koloia e kekahi waapa mamua, a ua paikau waapa ae no hoi na mokukaua Amerika i ka Poalima nei.

Ua poohu ae ka lae o kekahi Pake, imua o ka Aha Apana i ka Poakolu iho la, he $500 a me eono mahina hoopaahao no ke kuai opiuma. Ma ka la 18 nei oia i hopuia ai iloko o kekahi keena o luna o kekahi hale ma alanui Beritania, oiai no e kuai maoli ana i ua mea kue kanawai la i loko o na hua lai-ki, a na Kapena Anaru i hopu, no ka mea, oia a me ke kiu na mea i ikemaka. Ua hoohalahala ua Pake la i keia hoopai.

Ua polenaia iloko o ka hipuu o ka mare o J. K. Nakookoo me Miss Elikapeka K. Lokai, e ka Rev. J. Waiamau, maloko o ka luakini o Kaumakapili, i ka po Poakolu iho nei. Ua hoopaa hou ia no ia luina okoa aku o ke kiapa Magareta malalo o $200 bona, a e like no me ka mua, e malama oia i ka maluhia me ka hoopoino ole i ke kapena. Eia na luina a elua ma Kawa e noho nei a hiki i ka wa a ka moku e holo ai.

Ma ka la mua o Feberuari ae e wehe loa ia ae ai ka Hoikeike Hooilo ma Kapalakiko. Ua ano ulolohi na hana, a no ia mai ke kumu o ka panee ana mai he mahina okoa mai ka manawa i manao mua ia ai e hamama loa ana ma ka la makahiki hou.

E loaa no ka buke moolelo o "Olando Kaaka" ma ko makou nei keena no ka hapalua (50 keneta) o ka buke hookahi. E loaa no i na luna ka buke ke hookaa mua ia mai ka uku me ka lawe mua ae i ko lakou uku luna, he 25 keneta no ke dala. Ma ke kuike wale no.

Ua pau i ke ahi a koe wahi mea ole iho ka halekuai lole o Alina, ma Waialua, Oahu nei, i ka hora 1:30 o ka wanaao Poakolu i hala iho la. Iluna nei ka mea nona ka halekuai, a he pokii nona ka mea hookahi o loko. Ua manaoia he hana na ke kolohe, a ke noiiia la.

Ua ku mai ka Auseteralia i ka hora 8:30 o kakahiaka Poaono nei, i ka hora 2 p.m. o ka la 20 nei i haalele aku ai ia Kapalakiko. I ka hora 3 o ka auwina la o ka la 23 nei, ua kaalo ae oia i kekahi moku kia-ha Pelekane me ke akaka ole o kona inoa, e holo ana ma ka akau.

He 59 poe Pake i hoea ae imua o ka Aha Apana i ka Poakolu i hala iho la, no ke kue i ke kanawai piliwaiwai Pi Gi, ma ka lealea ana me na poke laau. He 12 i ae ua hewa, nolaila, eono i hoopaiia he $10 pakahi a he $5 pakahi iho hoi o kahi poe eono, a o ke koena aku ua pau i ka hookuuia.

O ka Poaono iho nei ka la hanau o ka Emeperoa o Geremania, a ua malamaia ma ke kipa ike ana aku i ke Kanikela o ia Aupuni i ke awakea o ia la, ma ke kahua halekuai o H. Hakapila Ma Halekauwila. Ua houhene ae ka puali puhiohe Pi Gi ilaila, a ua welo ae no hoi na hae Aupuni a me ko na aina e ia la.

O ka la 25 nei ka la i manaoia ai e hookoia kela paio mokomoko lima mawaena o na kaeaea, Kimo Kobete ko Ame rika a o Kale Mikila hoi ko Enelani, a ma Felorida, Amerika Huipuia, e malamaia ai. Ua oleloia e akeakea ana ke Kiaaina, aka, ua manaoia e pau e ana mamua ae o ka hoea aku o kana akeakea. Nawai ana la ka ai a laua?

Ma Wailuku, Maui, ua hele aku o Makai Uilama Kini a me kahi poe iho ma ke kahua 5 o ka mahiko o ka Ona Miliona ma ke Kula o Kamaomao a pau nui ana he poe Pake piliwaiwai i ka hopuia i ka po Poaha, la 18 nei. I ka hoaoia ana ae e hoopakele aku i ua poe Pake la, ua ki o Kini i kekahi Pake me ka pu panapana a ku maluna ae o kekahi poi kuli.

Ma ka halawai ana o na lala o ka Hui Kaawai Polohuku i pau i ka po Poalua i hala iho la, ua ao aku lakou i na elele e kue a e hoole loa i ka ae ana e hoolilo i ko lakou pa ilina mauka o Maemae. He $75 ka i haawiia no ia pa.

Ua puiwa ae ka lio o kahi kaa lawe bipi o ka halekuai bipi ma alanui Nuuanu, mauka aku o ka Nekina, a ua holo pu aku me kahi kaa. I hookuiia e ke kaapio o kekahi haole ke kumu o ka puiwa ana. Ua lilo ua wahi kaa la i mea poino, aohe nae he bipi o luna ia wa, a ua hooia aku ke kahu o ke kaapio nana e uku ka hapalua o na poino.

Lehulehu na poe i ikeia i ka puka ana mai, mai kahi noho mai o ka Lunakanawai Kiekie, mamua iki iho o ka waenakonu po o ka Poalua i hala iho la, a he poe kane haole nui wale no a pau. Heaha la ka lakou hana o laila? Malia he halawai ohumu malu paha no ka hooponopono hou ae i ke Kumukanawai.

Imua o ka Aha Apana i ka Poaha nei i hookolokoloia ai kela mau keiki aihue hainaka o kela pule aku no elua aihue ana. Ua hoopaiia ke keiki Hawaii, o Geo. Wainee ka inoa, no eono mahina e noho ai ma ka Halekula Hoopololei o Keoneula, a he ekolu mahina hoi o kahi keki Pake, o Akuna ka inoa.

Mai kekahi makamaka mai o ka aina o na mauna ekolu na lono malalo iho: "Ma kakahiaka Sabati, Ianuari 21, ua ikeia aku la ka 'moa kane uakea' e kau ana i kaupoku o Mauna Kea a me Mauna Loa. He wahi ua kulu paka-kahi wale no ko ka Poaono aku, la 20, o ke ano ua hau no nae. Oia mau no ka maloo, aohe wai, aka, hanaio ke anu."

Maemae ka nanaina e ka hapanui o na alahele aoao o ke kulanakauhale nei. He pohaku na paepae, a ua uhiia o luna iho me ka pohaku, puna a me na mea e ae e laumania ai na aoao helewawae. Aohe keia nani na na poe Pi Gi, aka, na ke Aupuni Moi a lakou e hoino nui nei mamuli o ke kanawai i hooholoia i ke kau Ahaolelo o 1892, a Kakina nae hoi i hooikaika nui loa ai.

I kakahiaka nui, hora 6:30, o ka Poalima nei i ku mai ai ka mokumahu Warimu mai Vitoria, Beritania Kolumebia, mai. Ua ulolohi oia no ka lohi o ka hoea ana aku o na eke leta Pelekane, a i ka hora 8 ahiahi o ka la 17 nei oia i haalele aku ai. I ka moana mai nei hoi, ua loaa i ka ino. Lehulehu na ukana ana i lawe mai nei no keia awa. A mahope iho o ka hora 11 o ke awakea i haalele hou mai ai a holo loa aku la no Kikane ma ke ala ae o Fiji.

Ua hoomanao ae na poe Sekotia o kakou nei i ka piha ana o ka 135 makahiki o ka la hanau o Robert Burns, kekahi o na kanaka kaulana loa iwaena o ia lahui, ma ko lakou keena halawai ma alanui Kalepa i ka po Poaha nei. Lehulehu na poe malaila, a ua hoohalaia ka manawa iloko o ka piha lealea haiolelo me himeni a ua nui ka hauoli. Ua hookuuia i ke au moe mahope iho o ka laulea ana me na mea ai mama, oiai nae hoi e hooloheia ana na hana o ka po.

E hauoli konohi ana na keiki o ka Aina Pua i keia Poakahi ae, a ua lako mai nei hoi lakou me na mea a pau, o lakou e hauoli nui ai ma na moku lehulehu mai nei mai Honokaona mai.

Eia ke okiokiia nei na kumulaau ohai a ke hoomaemaeia nei hoi ka pa ilina Katolika Roma ma Koula. He hewa ka ia, he ui ae. Ua kaheaia ae he halawai no na poe mea aina ma kahi kokoke ia pa kupapau, a i ka la 12 o Feberuari ae e akoakoa nui ai ma ka ilina.

He elua mau wahine i paio hahana ae ma Kapuukolo ae nei i ke kakahiaka Poaono nei, no kekahi wahi kumu ano ole, a ua hoopau kokeia nae ma o ka noho koke ana mai o lunakanawai wahine Sa wa e e hooponopono mawaena o laua. Wela na olelo, a kokoke no e hue ia mai na piha-a moewai o lalo o ka uwapo o Haaliliamanu. Aloha no kahi ALA!

E like no me ka makou i hoike aku ai no ko G. A. Long mare me Miss L. K. Kaae ma ka helu i hala, pela no na mea i hanaia. Ua lehulehu na lala o na ohana a elua, na makamaka a me na hoa'loha i hoea ae i kai o ka uwapo, a ua lehulehu na hoomaikai a me na manaolana ana no ka oluolu o keia noho ana aku o na mea i mareia, a hala loa aku la laua ma ka Malulani no ka hoohala ana i na la makamua ma Kailua, Kona, Hawaii. Aia me laua ko makou mau manao maikai.

Ma ka hihia a Kamauleule o Hanapepe, mokupuni o Kauai, kue ia Nagamoto a me Kamatsu, malalo o ka hoohalahala mai ka Aha Hookolokolo Kaapuni Elima kahi i haawiia ai o ka pono no $100 no ka mea hoopii, ke koi holookoa hoi no elua makahiki hoolimalima, ua hooholo ae ka Aha Hookolokolo Kiekie ma ka banako, ina e hoihoi hou aku ka mea hoopii he $50, ka huina i haawiia no ka makahiki mua, alaila, ua ko oia no ke koena aku a e paa hoi ka olelo hooholo a na kiure, a ina aole, alaila, e aeia no ka hookolokolo hou. A Rosa no ka mea hoopii, a o A. S. Hatawela no na mea hoopiiia.

Mamuli o ka lokomaikai o W. H. Rikada, ua hoolaulea aku oia i ke kapena a me na alii o ka mokukaua Kamepiona ilalo o Manana, Ewa, i ka Poaha nei. I ka hora 10:30 o ia kakahiaka ka haalele ana mai, a i ka hoea ana aku i ka Ululaau Remona, ua hoomaka koke ia he aha hulahula a me na lealea a hoohala hooluolu manawa e ae, a ia ahiahi poeleele i pau nui mai ai i ka hoi. Mahope iho o keia ae la, ua hala hou aku no ua poe no laila e hoolealea ai, a iwaena oia poe he mau alii o na mokukaua Amerika. He hulahula no hoi ka ia poe a huli hoi nui mai i ke aumoe ae. Na na keiki himeni Hawaii i hoolawa aku na mele a me na mea kani no keia mau aha hoolaulea elua o ia la hookahi.

HOOKAPU KAI LAWAIA

Ke papa a hookapu loa ia aku nei na mea a pau, aole e hele e lawaia i na papai, limu, pakii, a me na ano i'a a pau ma ke kai lawaia o Koholaloa, a o na poe e kue ana e hoopiiia no ma ke kanawai. E ukuia i 25 keneta e na poe a pau e makemake ana e lawaia ma ia wahi i ko makou luna. LI MUNG.
jan. 29, '94-1 mnw*