Ka Makaainana, Volume I, Number 5, 29 Ianuali 1894 — Page 6

6 HONOLULU, OAHU, POAKAHI, IANUARI 29, 1894.

NA AINA MAMAO.

He Mau Lono mai kela a me
keia Pea o ke Ao nei.

Manao Makee i ko Farani Kulana.

He buke i kakauia e kekahi kanaka Farani ka i olelo ae he mea no Farani e pono ai ke hoohui aku me na poe Mu sulamana ma Aferika. Mamuli ka o ia e mau ai ko lakou noho maluhia ana me na poe Sepania, a he mea no hoi ia e hoolilo ai ia Farani i haku aliiwahine no ke komohana o ke Kai Waenahonua a kono aku hoi ia Sepania e hoonoho i mau pualikoa pukaa ma kekahi wahi kokoke e hiki ai ke hoolilo aku ia Gibaralata i wahi hiki ole ke hoomauia aku o ka noho ana iho.

Paio me na Pu Panapana.

He paio hakaka lua me na pu panapana ka i malamaia ma kahi wahi mai nei o Rusia mawaena o ke Kama'lii Cagarini, he aliikoa i pau o na Koa Kiai Imipe riala a he ukali no Duke Nui Valadimira, a me Kapena Miatefa, he lala no hoi no ia puali like ae la, a he iwakalua keehina wawae ke kowa. Elua poka i kiia a aohe o laua mea i ku. Ua ulu ae keia mamuli e ko laua aloha i ka ipo hookahi.

Kipakuia he Aki duke.

He lono ka i pua ae ua hoa o mai nei o Akiduke Oto, hooilina o ka nohoalii o Auseturia, e lawe maoli ae no i kona ola, a aia ke hoaoia la e hoonalonalo mamuli no hoi o na hopena poina ole no ka make ana o ka Hooilina Kalaunu Rudope mamua loa aku nei. E holo ana o Oto no Aigupita, a ua manao wale ia he kipaku ia, iaia no ka manawa. Ua lohe loa ia ae nae ua lilo ka Oto mau hana ano e i mea e hoehaeha loa ai i ka Emeperoa a na ia mau mea i kono aku iaia e hookau aku i hoopai maluna o ka Aki duke.

Na Poe Hiena Anaki sa Lawe Ola.

Aia ke hookolokoloia la ma Maderida he elua mau anakisa i hopuia iloko o Aperila, 1892, ma ka puka o ka Hale Ahaolelo me na mea pahu iloko o na ekeeke a me na palapala, e hoike ana ua manao lakou e hoopoino ia hale, i na aha hookolokolo, na luna o ka Ahaolelo, ke Kuhina Kaua, ka halealii a me ka banako o Sepania. He palapala ka i loaa ae i ke Kiaaina o Maderida, i Dekemaba 26, mai kekahi poe aku i manao e hoopoino i ka hale keaka, a ilaila hoi ka Moiwahine Kahu Aupuni a me ke Kama'liiwahine e hele aku ai ia po. Ua hoikeia aku ka lohe i na Alii a ua hele ole ia po, eia nae, ua lauahea ae kela lono no ka hoopahu ia iwaena o ke anaina a ua ulu ae he uluaoa pioloke. E ole nae na makai, ina ua loaa na hopena ku i ka weliweli. Iloko no nae o keia mau hoao ana a na makai e hoomalielie, ua hiki ole ke hoopioia na manao uluku o ka lehulehu a ua pioloke loa ma o a maanei o ke kulanakauhale me na lono hoohikilele hauli loa a ao ia po holookoa.
          Ua loaa he puolo iloko o ke alanui ia elua mau paahana o Berelina i Dekemaba 27 nei a ua wehe akahele ae laua, eia nae, ua pahua ae la a ua pakele no laua me na palapu ma na nanaina a me na lima. Ke noii la na makai no ia mea.
            A ma ia la no i loheia ae ai ma Parisa no ka loaa ana aku o kekahi palapala i ka Meia o Sana Etiene e hooweliweli aku ana iaia me ka make ma o ke ki pu ana. He lono teregarama mai Anaguleme aku e hoike ana no ka hoomakaia o ka hookolokolo ana i na poe Farani he umikumamaono a me hookahi Italia no na hana hoohaunaele pili lahui ma Aigue-Motese ma ka la 16 o Augate, 1893.

Hoohaunaele ma Taranavaala.

Ua uluku ae he pioloke hoohaunaele ma Taranavaala, Aferika Hema, i Dekemaba 26, iwaena o na kanaka maoli o ia wahi. He poe kanaka maoli wale no ka hapanui a ma na lua minerala ko lakou wahi i hoohanaia ai i hiki i ka heluna o 2,000. Ua oleloia he 100 paha poe i eha, he eono nae hoi o ia poe i eha kukonukonu loa. Ua hoao ae keia poe hoohaunaele e hoopoino aku i kekahi hale aupuni, eia nae, ua hoopuehu liilii ia e na makai kuikawa. Aole ma ia wahi wale no keia uluku, aka, ua laulaha loa aku i kekahi mau wahi eli minerala e aku.

Mau Lono Oehuehu e ae no A ferika.

No Masowa ka lono o ka la 9 nei, mai Kasawa mai, no kekahi hoouka kaua mawaena o na pualikoa Italia a me na poe Derevise. Ua oleloia no hoi he 4,000 o ia poe i waiho make ia iho ma ke kahua, a ua pau pu me ko lakou alakai, oia o Hamede Ali, a me na poe alii e ae malalo ona.
          Ua lawe pio ia ae ka Hale Aupuni ma Kameruna, Aferika Komohana, e na poe kipi. No kanaono la ko lakou paa ana a hiki i ke ku ana aku o kekahi mokukaua Geremania. Ua hooleleia na luina a me na koa malina, a ua lawe pio hou ia ae ka hale, he eono nae poe ili keokeo i eha ma ia hakaka ana. He elima o na kipi i make, a ua liia he eha i hopu pio ia.
          Ua hoauheeia na poe Eu ropa e na poe Araba ma Rasonozo, a aia hoi na kauwa kuapaa holo mahuka ke huli hoi nui hou la i na haku.
          He wahine ma Ponedelani, A ferika, ka i ahewaia no ka hoomanamana, a ua hoopaiia oia ma ka hapalaia ana me ka aila holoholona pilipili a hikiikiiia iluna iho o kekahi puu nonanona, a na na naonao oia i ai a pau a koe na iwi.

Hoouka Kaua ma Amerika Waena.

He kaua kipi ko Honodu rasa, a ua komo pu aku la me ko Nicaragua e kokua i na kipi, a ua lilo hoi i kaua mawaena o ia mau aupuni. Ma ka la 12 nei i lohe ia ae ai ma Nu Ioka ua kauoha aku o Pere sidena Vasakueza i kona mau pualikoa e nee aku a ke kahua a na poe Ni caragua kokua i na kipi i paa ai, a ua poe la hoi i kuemi hope aku ai mai ia wahi aku. Ua ukaliia aku keia nee ana me ka hoouka kaua ana aku i ka aoao hema o na enemi, a ua hoauhee nui ia me iwakalua poe i make.
          Ua loaa aku na pu hou mai Ame rika Huipuia aku a ua hoounaia aku hoi he puali pukaa i ke kahua kaua. O na poe Nicaragua nae hoi ka oi aku ma na mea e pili ana i na pukuniahi, eia nae, me he la e loli ae ana ia kulana mamuli o ka loaa ana aku o na pu ki pinapinai. Aohe e loaa na kukai ana me Amapala. Ua lonoia no hoi ua huli aku la ka papu o laila mahope o Polikapo Bonila, ke alakai kipi, eia nae, aole na poe pio o ko Benila aoao i hooia aku i keia mau lono.

Ko Ame rika Huipuia Kanawai Dute.

O ka manao nui iwaena o na aoao kalaiaina Demokarata a me Repubalika, i ka po o ka la 12 nei, e hooholo loa ia ana ka bila kanawai dute a Wilisona imua o ka Hale o na Lunamakaainana me ke akeakea nui ole mai ka aoao Demokarata. Aia wale no kahi kue oolea ma ka aoao Repubalika,a oiai nae hoi he uuku loa lakou, aohe ia kue ana e lilo i mea nui.
          Ma ka la 8 ua lanakila na poe kokua i ka Wilisona bila kanawai dute ma ka noho ana o ka Hale ia la. Ua loaa keia lanakila mahope iho o kekahi paio hahana ana mawaena o na alakai o na aoao kalaiaina a elua.
          He 189 kue ia 0 ka puana ma ke koho ana, he oi o umi mamua aku o ko ka Hale lawa pono no ka hoohana, a na ia koho ana i hoolilo aku ia kumuhana ano nui no ka pomaikai kuloko iho o ia Aupuni i mea e noonoo ia ai. Ua aponoia no hoi he kauoha no ke koho ana ma ua bila la ma ka la 29 (keia la) Mamuli  o ka hololea ana o keia mau mea ae la, ua hoomaka ae ke Komi te o na Loaa me na Hoolilo i ka paio ana no ia bila.

Na Hunahuna Laulaha.

E pokeia aku ana ke poo o Vailana, ka mea kiola mea pahu o Parisa.
            Ua hooweliweliia aku o Kouna Uilama Bisimaka, keiki a ke Kama'lii, e hoopahuia kona hale noho.
            Ua makau loa na poe hiena anakisa o Sepania i keia wa. He umi poe alakai e li nui ia aku ana iloko o na la pokole.
          Ke mea la ka Aha Kuhina o Belegiuma e haalele aia a haawi aku ka aoao o ka Akau i na hooia no ka hoomalielie ana i ko lakou kue.
            He ala hooehu haunaele pili hoomana nui ke hooweliweli la ia Leke ria, Mekiko, a ua $70,000 ke poho o na waiwai i loaa i keia wa.
          Lehulehu na hoomaikai ohohia i loaa aku ia W. E. Gladstone (Pohakuhauoli) i Dekemaba 29, ka piha ana o ke 84 o kona mau makahiki.
          No Belegarade, Serevia, ka lono i ka la 12 nei no kekahi helelei hou aku o ka Aha Kuhina, a aia ka Moi ke kukakuka pu la me na alakai o ka aoao kue.
          Ua maluhia hou o Sicilia. Aohe hopohopo o na luna kiekie o na aina e ma Roma, Italia, no na hopena popilikia mamuli o na hana hoohaunaele mai nei o laila.

          I kahi la o keia mau mahina ao e mareia ai ke Duke Nui o Hese ia Kama'liiwahine Vitoria o Cobuga, a e hoea aku ana ka Moi o Enelani ma ia anaina mare.
          O ka hookomo aku i ke kopaa iloko o Ame rika Huipuia, oia kekahi hoololi a ka aoao Demokarata iloko o ka Ahaolelo e manao la e hookomo iloko o ka bila kanawai du te.
          Ua hooholo ka Oihana Kaua Moana o Beritania Nui, pela ka lono mai La dana o ka la 6 nei, e hana i eha mau mokukaua nunui hou o ka papa ekahi, ma kahi o $4,000,000 pakahi ka lilo.
          Ma ka po o ka la 8 nei i pau ae ai kekahi o na hale hoikeike ma Kikako, a mai hoea aku na poho i na miliona ina no e mau ana ka hoikeike. Hookahi kanaka kinaiahi i make a ekolu i eha.
          Ma ka po o ka la 8 nei, ua uhauia o J. L. Sulivana ke kaeaea hakaka mamua, e kana wahine me kekahi newa laau Ilikini iaia i hoao aku ai e pepehi. Ua waiho oia he hookahi hora me ka ike ole ae.