Ka Makaainana, Volume I, Number 3, 15 January 1894 — Page 2

2 HONOLULU, OAHU, POAKAHI, IANUA RI 15, 1894


HE MOOLELO KAAO
—NO—
LAUOMI DIHAE.
—KA—
UI I MOHAI IA I KE KOKO
—KA—
NANI I ALANA IA I KA OI O KA PAHIKAUA.

Ka Mea Huna iloko o ka Kiaha Waina
Ka Mea Pohihihi i ka Maka o ke Kuikele.
—A O KE—
Keiki Alii Numare dina
KE
Komo Lima Maka Popoki.

MOKUNA VI.

Ka hoopakele a ke kaikaina i ke kaikuaana—Ka pahikaua a ka mea hookahi i na poo ewalu—Poo akahi, heaha aku ia?—Poo elua, owai mao?—Poo ekolu, aole au i ike—Poo eha, Poo elima, aia iluna i ke aouli la o luna aku—Poo eono, Poo ehiku, elua laua—Poo ewalu, o Moleka ka Pilikua Anela.

            Ua hele makaikai aku nei oia maluna o ka honua iloko o na makahiki he umikumamaono, a akahi no a hoi mai nei i keia mau la, a i ka hoi ana mai nei, ua poalo ia kekahi maka ona e kona makuahine e Dauseleta, a ua hanaia i komolima no ke kaikamahine alii Murisedela o ke aupuni o Siama.
            Iloko o ia manawa i noonoo ae ai o Numaredina, o kona pokii ka paha o Boba e olelo ia mai nei, nolaila oia i pane aku ai.
                O ke kaikamahine alii Murisedela a oukou e olelo mai nei, o ko'u kaikuahine ponoi no ia, a o ka mea nona ka onohi maka i hanaia i komolima no kuu kaikuahine, he onohi maka no ka popoki, aole no ke kanaka a oukou e olelo mai nei.
            Ia manawa i akaaka ae ai ua poe kaikamahine la a olelo mai la ia Numaredina.
            Oia, oia ke kino o Boba he popoki, a oia kino popoki ka mea nana i hookauliilii i ke aupuni o Sisilia, a i kekahi manawa e loli ana oia ma ke ano kino kanaka.
            Iloko o keia manawa i hooho mai ai ka leo o ka lehulehu ma na alanui: "Ei ae keia mea nui eleele ke iho mai nei," a o kekahi poe hoi. Auhea? Aia i ke aouli la o luna aku, iluna lilo loa aku.
            Iloko o keia manawa i hoea mai ai ke kanaka eleele nana i lawe mai o Numaredina, a pane mai la me ka huaolelo wikiwiki.
                E wehe e Numaredina i kou komolima maka popoki a e kau ma ka maka o kau pahikaua.
                Ia manawa i wehe ai o Numaredina i kona komo a kau ae la ma ka maka o kana pahikaua, a o ka manawa no ia i loli ae ai ua komo la he lio ulaula, i paa i na pono a pau, a pane hou mai la ua kanaka la.
            E wehe oe i ke kaulawaha o keia lio, a e lilo auanei oia i mau ilio hahai elua, i paa ko laua mau a'i i na apo gula, a e hoomanao iho oe o ua komo la no ia ou i ka a'i o keia mau ilio.
                Ia manawa i ku ae ai o Numaredina iluna a wehe ae la i ke kaulawaha o ka lio, a o ka wa no ia i kahuli ae ai o ua lio la a lilo i mau ilio hahai elua i paa i na apo gula.
            Ia manawa i ninau aku ai o Numare dina i ua kanaka la me ka i aku.
            Heaha ka hana a keia mau ilio a me keia lio. I mai la ua kanaka la.
            O keia lio, he lio lele oia ma na wahi a pau au e makemake ai, a he lio ikaika ma ke kaua, a o keia mau ilio, he mau ilio ikaika laua ma ke kaua, a he hooko i ke kauoha me ka pololei loa, a o lakou nei kou mau kokua e hele ai a hiki i na ipuka o ke kihapai pua o Numere, kahi a Lauomidihae e kali mai la.
            Iloko o keia manawa i uwa mai ai ka piha o na kanaka o ke alanui me ka hoopuka ae i ka huaolelo.
            Auwe! ka mea nui eleele e iho mai nei mai ka lewa mai. He kupua, he kupua.
            Ia manawa no i haalele mai ai o Numaredina i ka halealii o Pamaburia, a kau ae la ia maluna ka lio ulaula o ke komo lima popoki, a lele aku la oia iluna o ka lewa me kana pahikaua e paa ana i kona lima, no ka paio ana me Moleka ka pilikua anela, a na kanaka e uwa mai. Ia, a i ka ike ana mai o Moleka i ka lio ulaula o Boba ka Moi Pamaburia e lele aku ana imua ona, ia manawa oia i huli ae ai a hoi aku la iluna o kona aupuni kahi a kona ikaika i waiho ai.
            O ka mama o kona lele ana, ua papalua ia aku ia imua o ke kikiao makani nui ikaika, a o ka ikaika hoi o ka lele ana a ko Numaredina, ua pokole aku ia imua o ke kikiao makani, a me ia ano laua i hele aku ai me ka ikaika, a iloko o ka manawa a Numaredina i kokoke aku ai mahope ona, ua komo e aku la ua kupua la i ka ipuka ana i komo ai i kinohi, a o kahi hoi a Numaredina i uhiia ai e ka pohaku pele.
            I ka manawa o ua kupua la i hoea ai iwaho o ua ipuka la, o ka manawa no ia i hoea pu aku ai o Numaredina, a o ka mea haohao loa iaia iloko oia manawa, ka nalowale hikiwawe ana iho o ua kupua la, a me na mea a pau ma ia wahi o he mehameha wale no i ka nana aku, o ke ku no a na laau, aohe he luli i ka makani, o ke kau no a na manu iluna o na lala laau, aohe o lakou kani mai, a he mehameha wale no me he la he aupuni akua, nolaila, olelo iho la o Numaredina iaia iho.
Aole no i pau.

Ko Waihee Mau Mea Hou.

                Ua malama ae ma Kee, Waihee, na hana hauoli makahiki hou e Mr. J. W. Momona, oia hoi na lealea hula, a pela aku. Ua hiki ae malaila na haumana elua ana i a'o ai, oia o Mrs. Maewaewa Tolona a me Miss Kina Nui, a he maluhia na hana i lawelaweia.
            Ua makana aku o M r. a me Mrs. W. S. Maule a me Miss Hattie K. Maule ia Mrs. E. L. Amau i keia mau makana makahiki hou, penei: 1 uha puaa momona, 1 uha moa, 10 hua alani a me ka ahui maia ono, a 1 puolo kope o Kona.
                Ma ke ahiahi, ua hiki ae na puukani o Waihee ma kahi o ka Luna Nui, a ua haawi ae lakou i na mele hoonanea maikai loa e ne hone ana i ke one o Kahului. Ua malama ae na hui kinipopo o Wailuku me Waikapu he lealea ma ia la, a ua kaa ke eo na ka inoa hope, he 8 kue ia 6.
O. PONIAULANI.
                Waihee, Maui, Jan. 5, 1894.

            Eia he kahua kiki pu hou mauka o Makiki, ma kahi kokoke i ka Home Lunalilo. Nawai la e uku na lilo poka? Na na poe hookaa auhau no hoi paha.
            E hala ana paha pule i ka Miowera ma keia huakai aku nei ana i Kapalakiko. Aohe no i manaoia e kuupau aku i kona holo, aka, o kahi holo kupono no, aia ka pono o ka hoea aku ilaila.
            Ma ka Malulani mai o ka Poalua i hala i loheia mai ai no ka nui o ka ua ma Kau a me na Kona, a pela no ka hoi me Maui, a ua uhi paapu ia ke aouli e na ao eleele hakumakuma. Oiai ma Kau, ua hana na luina iloko o ka ua. Ola aku la no hoi ia mau wahi.

Anoai o Hanalei.

                Ma ka la 1 o Ianuari iho nei, ua haawi manawalea ae ka Makai Nui o Hanalei he paina hoomanao hauoli, a ua nui na poe i hiki ae e haupa i na mea i hoomakaukauia. Ua nuu iho a lawa, ua inu a kena.
            Ua hopuia iho nei o W. A. Kinney e na kaiko o ke Aupuni ma Honokoa no ka hewa he puhi okolehao, a ua noho ka Aha Apana e hoolohe i kona hihia a ua hoopaiia he $300 me $3.00 koina. Ua hoohalahala hou i ka Aha Kiure.
            He ma-u ia wahi mea hou.
HAHANE.
            Hanalei, Kauai, Jan. 5, 1894

E Hea Mai i ke Kanaka e Komo Maloko.

                Na Hoike Kula Sabati o Maui Komohana. Kula Sabati o Lanakila ma Olowalu, a me Wainee, Lahaina, ua hoike ia ma Wainee, Lahaina, Dekemaba 31, 1893.
            Na Kula Saba ti, Halealoha, Lahaina, Lahainaluna, Kahana, Kaanapali, Honokohau a me kekahi mau haumana no Olowalu, ua hoike ia ma ka Luakini o Kapiolani, Kahana, Kaanapali, Ianuari 1, 1894.
            O ke ano nui, he maikai wale no na hana Kula Sabati i hoike ia o na manawa i hoike ia elua. No ka mea, o na haawina noloko mai o ka ke Akua olelo a me na himeni a ka Makua L. Laiana i unuhi ai no ka pono o na Kula Sabati o Ko Hawaii Pae Aina.
                E Hawaii kuu one hanau e,
                Kuu Home kulaiwi nei,
                                Happy New Year.
S. K. K.

Ua Hala i ke Ala Hoi Ole Mai.

                Ua hala aku la ma kela aoao o ka honua o Lucy, Koko Kahoalii ma ka la 1 o Ianuari, 1894, a ua haalele mai ia'u a me ka maua mau keiki e paiauma aku nona ma keia ao. Ua hanauia oia ma Honokua, Kona, Hawaii, i ka 1840, a ua piha iaia ke 54 o na makahiki o ke ola ana a hala wale aku la no. Ua mareia maua o Rev. O. H. Kulika ma Waiohinu, Kau, Hawaii, ma ka la 8 o Feberuari, 18—, a ua hanau mai na maua he umikumamaha mau keiki. Ua make elima a koe eiwa, a he hookahi keiki hanai, hui he umi. He 29 na makahiki o ko maua noho ana ma ka berita o ka mare. Ke noho nei au a me na keiki me ka paumako nona. Aloha wale ka makua o ka home. He haipule oiaio oia, he heahea a he hookipa i na makamaka a me na hoaloha.
Owau no,
J. W. KAHOALII.
            Kamaoa, Kau, Hawaii, Ianua ri 8, 1894.