Ka Makaainana, Volume I, Number 2, 8 January 1894 — Page 1
Ka Makaainana
BUKE I---Ano Hou. Honolulu, Oahu, Ianuari 8, 1894. HELU 2 .
ALOHA AINA OIAIO.
Leo: Song King, aoao 144.
1. Ku a paio no ka pono,
E Aupuni o Hawaii,
Mai na 'Lii ka lahui,
I hookahi puuwai,
Hana me ka hooikaika,
E na hui aloha e,
A haule mai na lani,
No ka pono o Hawaii.
Hui:---E Hawaii, e ala e!
Pau ka po, ua ao kakou,
Kani kui na leo e,
O Hawaii ua ola hou!
2. Ku a paio e na hoa,
O ka hui aloha e,
No ka pono, no ke ola,
O Aupuni Hawaii,
E kupaa luli ole,
Ma ka pono io no,
A hooho mai na lani,
A e lanakila no.
3. Ku a paio na haipule,
No ka home aloha e,
Noi, imi, kikeke la,
Ma ka puka gula e,
Kali iki, meha iki,
Na leo u luuluu,
Aia hoi he leo oli,
O Hawaii, eia mai!
MISS KALEI EWALIKO.
Puueo, Hilo, Hawaii.
AINA MAMAO.
Ke Ola Kino o ka Moi Vitoria.
Ke ano emi mai la ke ola kino o ka Moi o Beritania Nui, a ano koke mai nei hoi ke hele loa aku la oia i ka nawaliwali loa. Aohe no ona mai maopopo, aka, ua hoikeia ae ua akaka loa na kahoaka o kona emi pu mai, a ua lilo hoi ia i mea e hoopioloko ai i ke aloalii a ku i kahi o ka hopohopo loa ia. Ua akaka loa kona oopa a hele oi i keia wa, a ua lilo hoi kona nanaina i mea e hopohopo nui ia ai no kona pilikia. E holo hoolanalana aku ana oia i Felorena, Italia iloko o Maraki ae, a i Mei aku hoi e hoea loa aku ai i Geremania.
Na Lono Kaua o Berazila.
(O na lono malalo iho, he mau lono ia mawaho ae o ka makou i hoike aku ai ma ka helu i hala, oiai, ua lawe ano nui mai makou o ia mau lono me ka hoike pu aku hoi i na lono hope loa i loaa mai.)
Ua hoea aku ka mokukaua Ni teroti i Penamabuco, Berazila a i Dekemaba 16 i haawiia aku ai i ke Aupuni. Ua ulu koke ae no he pilikia me kona mau alii a me na luina, oia hoi, aia a hoomahuahuaia ae na uku, alaila, lakou ae e noho. I keia poe no nae i holo aku ai, ua maopopo mua no ke hoea aku lakou i Berazila, e kepa hou lakou. Me he la aole ko Peresidena Peisoto poe agena e ae ana i keia koi, a e kepaia aku ana i poe kanaka Berazila. O kekahi no hoi i hoikeia ae, mamuli o ka limanui ka e loaa ai na kanaka no keia moku a me na moku e ae no paha o ua o Peisoto. Ma ka la 19 nae i holo loa aku ai oia no Rio me ka lawa pono i na kanaka, me ke koe iho no nae o kekahi poe Amerika.
He lono ka i huaiia ae ua ule le kaua moana ae ko Melo mau moku i ko Peisoto mau moku, aole nae i akaka loa ka oiaio o keia lohe, no ka mea, ua haalele aku o Melo ia Rio ma ka la 20 ma kona mokuhae, e huli ana hoi i ka Ni teroi, a ke loaa aku, alaila, e ulele ana laua mamua ae o ka loaa ana o kai malino i ka Niteroi a hoohana mai i kona pu dainamaita.
Ke hoopaahaoia la na poe a pau e hoike ana i ko lakou manao kokua ia Melo a i na poe kipi paha, a ua pihakui na halepaahao. Ma Penama buco, he 800 a oi aku poe i hoopaahaoia. Lehulehu na hale kalepa ma ia Aupuni i poho. Ua hoea aku ka waapa topido Aurora, a Peisoto i kuai ai ma Enelani, a ua hoole na luina Pelekane e kepa hou.
I ka hoao ana o ko ke Aupuni mau pualikoa e lawe hou ae i ka Mokupuni o Govenado, ua hoopuniia lakou e na pualikoa malalo o De Gama, a me he la o ka haawi pio aku no ka hopena.
Ua noi ae ka mea kakau o ka nupepa Manawa, ma o ke Kuhina Beritania la, e ae mai ke Aupuni i ka lawelaweia aku o na hana e ka Ahahui Kea Ulaula no ke kokua a malama ana i na poe mai a eha o ka aoao kipi. Ua hooleia keia noi mamuli o ke kumu, ke ola hou o ka huli mai no ia a hakaka kue hou i ke Aupuni. O ke kau koho balota keia ma Berazila, ua hoopaneeia a Maraki 1, mamuli o ko Peisoto mana o ua kupikipikio ka aina, aole ia he wa kupono no ia mea.
Kupilikii Kulana o Italia.
Nolaila, aia oia ma ke poo o ko Italia Aha Kuhina hou i keia wa, a mamuli wale no o ka lawelawe hana oolea e pakele ai ia aupuni mai ka pilikia, a me he la mai ke kaua kipi huliamahi. Ma ka wehe ana o ka Ahaolelo i Dekemaba 20 nei, aohe mau mea ano nui i waihoia ae. O ka manao o ke Kuhina Nui ma ko Italia kahua alakai kuwaho, ua ike lea i ano, oia hoi ka noho hoa'loha ana me na aupuni a pau a me ka malamaia hoi o na kuikahi. Ua lilo na olelo a ka Elele o Sicilia, aohe hoi lakou e uku hou i na auhau, i mea e hoopioloke ai. A ua olelo ae no ke Kuhina. Nui no ia mea, ua kokua no oia i na ahahui o na paahana, aka, aole nae e hiki ke hookuuia aku na ahahui o ia ano e hooweliweli i ke kulana paa o na oihana o ka aina. (Hooho hauoli loihi ia.)
Olelo Hooholo kue ia Kile.
Ua hooholoia imua o ka Aha Hookolokolo ma Ladana, Dekemaba 20, ka hoopii a ka Repubalika o Kile i ka Hui Mokumahu a me ka Banako, no ka hoounaia ana o 388 auka sileva ma ka mokukaua Beritania E sepiegele, i hiki ka waiwai io i ka huina o $650,000, ma ke noi a Peresidena Balamaseda, oiai kela kaua kipi mamua aku nei ma Kile. Ua kaa ka pono ma ka aoao o ua poe i hoopiia.
Aole e Hakaka me Peru.
No kahi wa i hala ae, ua ulu ae he paee mawaena o Ekuadoa a me Peru, no ka pelena aina mawaena o laua. Ua hoouna aku ke Kuhina Peru ma Kito i ke Kiaaina o Lima e hoike aku ana ua makaukau o Ekuadoa e hooponopono i na ninau paee mawaena o laua malalo o na kumu ku i ka maluhia a me ka hanohano.
Paio me na poe Nihilisi.
Ma Mosekao, Rusia, Dekemaba 16 ua hoopuni ae na makai i kekahi halawa nui a na nihilisi mawaho aku o na palena o ke kulanakauhale, a ua ulu ae he hakaka hahana. He 15 makai i hoehaia, a he 5 poe nihilisi i lawe maoli ae no i na ola mamua ae o ka hopuia. Ua hopuia he 50 a he 22 i pakele aku.
Na Hunahuna Laulaha.
Ua loaa aku ka ea aa ilalo o kekahi punawai e eliia ana ma Monetereala, Kanada, ma kahi o 1020 kapuai ka hohonu.
Ua hoikeia ua loaa ae ia Karisipi, Kuhina Nui mua, he Aha Kuhina hou no Italia, mahope iho o ka haule ana o kekahi poe e ae ma ia hana.
E lilo ana he 63 pa-keneta o na makana o ka Hoikeike Nui o Kikako i na poe hoikeike o na aina e, a he 37 pa keneta i loaa iho i ko Amerika poe.
Ua olelo ae ka Pope aohe ona hopohopo no ko Kerisipi hou ana ae i kahi o ka mana, no ka mea, ua maopopo mua no kona kue, a e aho hoi ia mamua ae o ka maopopo ole.
Mai Sana Dominigo, ma Haiti ae, ka lono no kekahi hoao e lawe i ke ola o ko laila Peresidena. Nolaila, ua hoouna aku o Amerika Huipuia i mokukaua malaila, oia ke Kearesage, no ka hoopakele ana i na pono Amerika.
Ua hookui ae he mokukaua Beritania me kekahi kiapa Italia mawaho ae o ka Lae o Matapana, ka palena hema loa o Helene, a ua moku pu ae a ka iliwai. Aole mau lono e ae. Ua holo aku he mokukaua Beritania e ae no ka haawi ana aku i na kokua.
Ua hookulanalana loa ia ko Eeropa maluhia e kahi Aupuni uuku o Serevia, mamuli o ka hune dala, kipi na koa no ka uku ole ia no kahi wa loihi, a ua kunana hoi na hana o ke aupuni. Ua hoike aku o Auseturia ua oki na hana apakau wale ma na palena, a i ole, e lawe no oia i ka hopena o ia mau hana hoonene.
Ua manaoioia e huikala aku ana ka Emepera o Geremania i na kiu Farani elua i loaa ai maluna o kekahi moku Pelekane, e kaha ana i kii o na papu, no ka mea, he mau kauwa wale no laua malalo o ka aelike me ke Aupuni o Farani, a e hooko ana hoi i ka hana a laua i manao ai he pono e loaa mai ana ia laua.
Ua pau o Alanui Alakea i ka hoopihapihaia a hanaia a laumania, makai aku o Alanui Moiwahine a hala loa i kai o ka uapo, ma ka aoao iho o ka Hale Makeke hou. He alanui ku maoli i ka nani i keia wa.
Aloha Miowera! Ua hala aku oia no Kapalakiko i ka hora 1 me ka ohua ole, o ka pohaku wale no paha o ka auwina la Poalima nei ka hoopihaia ana iho nei. Iaia i puka ai a waho ae o Laeahi, ua hekau ae oia a Hoailona mai la, eia ka no ka hoolele mai i kekahi haole holo mahuka. Na ke Kaala i hoihoi mai iaia i kula nei, a i ke kii ana aku o kekahi makai, ua pili mai i ka aoao o kekahi kiapa, ua kau aku oia iluna ona a mai laila aku a ka uwapo a holo loa aku la me ka loaa ole i ko ka makai alualu aku mahope.