Ka Makaainana, Volume I, Number 1, 1 January 1894 — KO MAKOU ALOHA. [ARTICLE]
KO MAKOU ALOHA.
Eia mai hoi makou makaainana ke oili aku nei ma ke ano he makaainana no Hawaii a no ke Aliiaimoku, malalo o ka inoa a makou e auamo hou nei o Ka Makaainana, a ke panee aku nei hoi i ko makou aloha makaainana imua o na hoa makaainana no ka hala ana ae la o ka makahiki a na makaainana i noho hoomanawanui ai me ka paupauaho ole iloko o ka inea a me ka pilihua, a I ko kakou komo hou ana hoi i keia makahiki hou me ka manaolana nui e loaa mai ana i na makaainana oiwi ka hauoli a me ke ola hou ae o ka aina nei. Nolaila, e ae mai oukou ia makou e haawi aku, e panee aku, e uwai aku, e hooneenee aku a e kunou aku hoi i ko makou aloha ohaoha a olu mahaha palena ole o ka Hauoli Makahiki Hou.