Ka Makaainana, Volume I, Number 1, 1 January 1894 — Page 3
HONOLULU, OAHU, PAKAHI, IANUARI 1, 1894
HE MOOLELO KAAO
MONE TIKERO
-KA-
HOLOLIO I KA WA HOOILO
-KA-
UI MAALO I KE KUPULAU
A O KE
KEIKIALII HARE MATINE
-KE-
KIAHA OPAKA O NINEWA.
MOKUNA VIII.
Hohola na eheu o ka maluhi- Poho na manaolana - Hoi nele i ke Kula o Malama - Ka Aha Hulahula a ka Pua Lilia o Subieda - Ka paio hahana me na powa he nui - Ka lima hei ma ka hookani Gita - Owau ka hoa e like ai
I kela wa i opiopi malie ae ai ua Hololio la i ka palapala, a kamailio malie aku la imua o ka Moi.
"Ano e ke alii, ua lohe aku la oe i na mea i upuia no kau kaika mahine a me oe pu, a pela pu no hoi me ke ola o keia anaina hanohano. A me he mea la, e ke Alii, he mea i kamaaina i keia mau kaiaulu ka mea nana i hoouna mai nei keia poe, mamuli hoi o na hookonokono ana a kekahi keikialii, a me he la ua ike no oe i ua keikiaiii la. He puuwai eleele maopopo kona o ke kanaka hohe wale. A oiai na kau mau kauwa nei i hoopahua, i na manao puuwia eleele o kela poe i keia po, nolaila, e paa kau kauwa nei i keia palapala i hoike no ka hemolele o kona kinai ana i na enemi mamua o ko lakou hooko ana i ka lakou mea i hoouna ia mai ai. A e hoomanao e ke Alii, o keia ka hoohiki a'u i hoike aku ai ia oe, i ko olua wa i ka-ua mai ai ia'u no ka hulahula, he kanaenae hoi i hoohiki ia e a'u maluna o ka pahikaua, aia a hookoia, alaila, ae aku au i ka olua kono no ka hulahula ana. A no ia mea, ua hooko ia iho la ua hoohiki la. No kau noi hoi, e hele mai makou i ka hora 10 o ke kakahiaka o ka la apopo no ke kii ana mai i kan makana ia makou, no ka hana a makou i hana iho nei, ke noi aku nei au ia oe me ka haahaa, no'u iho aole o'u iini no i mea, ua lawa au ma keia hana a'u i hooko iho la a oia no ka makana nui a'u i manao ai."
I kela wa i paiakuli ae ai ke keena hookipa nui me ka leo huro o ka mahalo mai na poe a pau e noho ana iloko, a oia no ka manawa i ku ae ai o ka hapauea Igeposeda iluna, a noi aku la i ka oluolu o ke Alii, e kala ia lakou a pau ma ia mea o ka loaa mai o ka makana, oiai, ua hana lakou no ka hoopakele ana i ke ola o keia anaina hanohano a me ka Moiwahine o na Pua Lilia.
Ma ka panina hope o kana mau olelo, ua ku mai la ka Moi a pahola mai la i kona hoomaikai a nui i na koa oiaio o ka makakila no ko lakou hana ana i kekahi hana e poina ole ai i na mea a pau, alaila, hookuu mai la oia ia lakou e hoi e hooluolu, a ua koe iho la no ka Ui maalo i ka wa kupulau.
1. keia wa a ke anaina e noho nei, ua konoia mai la ka kakou hiwahiwa e hula pu me ka Pua Lilia o Subieda, a ua lilo iho la no ia he mea maikai i ua keiki, a he wai olu iho la hoi ia no ke kaikamahine alii, oiai aia iloko ona na noii nowelo ana a ka makemake kahi i lolii malie ai.
I keia manawa i eu ae ai ua Mone Tikero la mai kona noho ae, a oia pu no hoi ka manawa i hura ae ai ke anaina, a ke minoaka wale la no hoi ka pua lilia me ka hoomahie ana. Alaila, lawe mai la kekahi o na kauwe i pila gita a haawi mai la ia Mone Tikero, a oia no hoi ka manawa i ku ae ai o ke kaikamahine alii iluna, a hoomaka ae la o Mone Tikero e lawe palanehe i na kaula o ua gita, a oia no ka manawa o laua, i hulahula like ae ai.
E like me kana hookani ana i ka pila, pea no ka palanehe a me ka maiau o ka laua kiina wawae ana, a o ka oi aku no paha eia no ka kakou koa, he lua ole ka nani a me ka maikai, a ua kaili maoli aku oia i ka puuwai o na poe o ka aoao palupalu, oiai, aia lakou ke hoike mai la i ko lakou mau hiohiona o ka makahehi a me ka hoohai maoli no.
A i ka panina hope o ka laua hulahula ana i hooki iho ai o Mone Tikero i ka hookani i na kaula ume o ke gula, a hoomaha iho la no kekahi mau minute." Aia i kela manawa i noho like iho ai ua mau opua hiki ahiahi la, a lihi lou aela ka laua mau makau i Waialua, e haawi pakahi ana hoi laua i na olelo e hiki ole ai ke mawehe ia e ka inaina o ka pahikaua a me ka make.
I keia wa i hoike aku ai o Mone Tikero i kona manao imua o ka pua lilia o Subieda, i ka i ana aku, -
"I keia po e haalele iho ai au me ko'u mau hoa i kou kulanakauhale nei a hoi aku no ko makou home kuahiwi, oiai, ua loihi ae nei na la o ko makou noho ana a aole i ike hou aku i na maka o ka ohana. Nolaila, e ke aliiwahine o ka nani, e oluolu mai kou hanohano e hookuu mai ia makou e huli hoi aku no ko makou wahi i hele mai ai."
Me ka puuwai i piha i ke aloha i puliki ae ai ke kaikamamahine alii Mozunadine i kona mau lima ma kona umauma, a pane mai la me ka leo kaumaha,—
"E haalele ma ana anei oe ia'u a me ko'u makua, e naho iho me ka manao mokumokuahua o ke aloha ia oe, ka mea nana i hoopakele ae i ko maua mau ola mai na lima mai, o kela poe puuwai eleele, na poe hoi aole o lakou mau hoaloha maluna o keia ilihonua, koe wale iho no, ka lakou mau pahikaua a me na koikaua a me na laau iho?"
"Aole pela, e ka pua lilia o Subieda, aka, ua hooia loa ae nei ka manawa a'u i hoike aku ai i ko'u mea nana i malama a ke kali mai la paha oia o ko'u hoi aku. No ka mea' ua hoike aku au iaia e nana pono oia i ka mahina, a i ka wa e pii ae ai ka mahina a kokoke; e kau maluna o kela puu (me kona kuhikuhi pu ana aku), alaila, e hoomanao iho ia ua kokoke au mawaho o ka ipuka hale. A oiai, eia ke hoomaka mai nei na kukuna olino o ka mahina e pahola i kona nani maluna o ka papalina o ka honua, nolaila, e ae mai kou hanohano e hookuu mai ia makou e hoi aku no ko makou home. A o ka'u kauoha wale no ia oe, e malama i ke aloha i kakia paa ia mawaena o kaua. Aia a pau ae ka mana o —"
Aole i pau pono ae ka Mone Tikero mau olelo ka hoopuka ia, aia hoi, lohe koliuliu ia aku la ka leo o kekahi o-le ma kahi mamao a ia msnawa i holo mai ai o Igeboseda a hawanawana mai la ma na pepeiao o kona hoaloha,—
"He leo no kekahi o-le ka'u e lohe-nei, he enemi paha, aole peha."
Ia manawa i hoolono pono aku ai ka kakou koa i kela leo o-le, a i kona lo-he maopopo ana huli ae la oia a pane aku la i kona hoaloha,—
"Aole kela he enemi, aka, o kuu makua kela e kahea mai la ia'u e hoi awiwi aku. Nolaila, e hoomakaukau mai i ko kaua mau lio, oiai, ua kokoke mai ka manawa."
Aole i pau.
Ua Hala ma ke Ala mau a Kane
-
I kakahiaka Poaha, Dek. 21, hoi i kuu mai ai ka luhi o Mr. Robert Gray, he kamaaina no 30 paha makahiki i ko kakou mau kaiaulu, ma kahi noho o ia keiki a kana wahine, ma Peleula Alanui Nuuanu. Ia auwina la iho no i nalo aku ai iuka o maemae. Ma Kualoa, Koolaupoko, kona wahi i noho hana mua loa ai ma ka mahiko o Waila, a mahope mai ua noho ae ma ka halekuai laau lapaau o G.C. McLean, ka haole i kamaaina ia kakou ma ka inoa Polapola. I ka make ana o ka Polapola, ua lawe ae oia a mare iho la i ka wahine kanemake, a ua noho pu me ia a hala wale aku la no oia i ke 72 makahiki me 6 malama me keia ola ana. Ua hanauia oia ma Wemisa, Fifesia, Sekotia, a ua noho no kahi manawa ma Amerika Huipuia a me Kolumebia Beritania. Ke u nei kana wahine a me ka ohana nona.
-
Water Lily.
-
Na ke kehau a i lawe mai,
I ke ala o ka pua Roselani,
Na'u i lei mua ia pua rose,
A hoohihi mai pua Lanatana.
HUI: - No Water Lily ke aloha,
Ka pua a'u e hiipoi nei,
Ua kuhi au a he pono,
Ka iala e naue nei.
Ua lei aku au a hoohie,
A waiho aku au ma ka paia,
A miki mai ana pua Lanatana,
I kuu wahi lei mae ole.
LILOKELA.
-
Apopo e hoomaka ai ke kau kiure o Hilo, Hawaii, a ua hala aku no laila i ka Poalua i hala ka Hope Loio Kuhina a me kekahi poe loio.
Ma ka La Kalikimaka nei, ua ohuohu ae na i-a a me luna loa o na kia o na mokukaua Kamepiona a me Adamu me na lau nahele wawae-iole, maile ieie a pela aku o ka uka waokele.
I ka auwina la Poaha i hala, i hookuuia ai o Kapena Kalua, no ka hewa malama opiuma, o ka Lunakanawai Apana. O Amai hoi keia, ka mea i kuhiia ai nana ua opiuma la, ua hoopaiia e uku i $100
Ua komo kolohe ia kekahi halekua Pake mauka o Auwaiolimu i ka La Kalikimaka nei, a ua lilo aku he umi ope pahupahu elua mea hoopahu Pake, ekolu dala Mekiko a me hookahi dala ma na mea liilii.
Ma ka auina la Poakolu i hala ua holo pukaka ae kekahi lio meke kaa pio helu 132 ma ke alanui Moi, a ua holo pololei aku a hiki i ka hale hoolulu kaa ahi, ua lele aku la ka lio maluna o ka pa a kau pu aku la me ke kaa iluna o ka pa, a heo aku la hoi ka lio me na pono ili maluna o kona kino. Pakele nae mai okaoka liilii ka lio a nahaha ke kaa.