Ka Makaainana, Volume I, Number 41, 17 December 1887 — Page 3
NA AINA MAMAO.
Na Lono Nu Hou Hope Loa.
HE MAKANA MANAWALEA NUI.
Ua hoouna ia aku; kekahi palapala i ka Emeperoa o Rusia me ka haawi makana manawalea nui o £2,000,000, mai a Barona Hirsch aku, no ka pomaikai o na Iudaio ma Europa, a o kona manao nui, oia no kona hoala ana i na kula a'o mua ma Rusia. Ua ae ka Emeperoa i keia haawi makana, a aia ke dala ma ka Baneko o Enelani kahi i waiho ai. O Barona Rokekaila a me Barona Heneri de Worms na kahu malama i hookohu ia.
HOEA AKU MA SOFIA.
Ma ka la 27 o Novemaba i hala i hoea aku ma Sofia, Bulegaria, ke Kama'liiwahine Kelemenetine, i ukali ia e kana keiki, ke Kama'liikane Feredinana. Ua apo aloha ia mai laua e na luna o ke kulanakauhale a me na makaainana. Ua haawi aku ke Kama'liikane i kona hoomaikai mahalo ana i ka lehulehu.
KELA A ME KEIA.
Ua hoopuka ae ke Aupuni o Mekiko i kekahi makana o $10,000 no ka hopu ana i ke kino o Eraclio Bernal, he alakai powa nui. Oia ka powa oi kelakela loa o na hana ino i ike ia ma ka moolelo o Mekiko.
Ma ka la 1 o Ianuari, 1888, e wehe ia ai ke kia hoomanao o Gamabeta ma Parisa.
O ka manawa o kela heihei hoehoe waapa mawaena o Bika a me Hanalana he 19 minute a me 55 3/4 sekona.
Ua olelo ia iloko o Aperila, 1888, e holo ana o Pohakuhauoli no Ame rika Huipuia.
Ua olelo ae ka o Emeperoa Uilama ua minamina oia i ka haalele ana o Gareve.
E onou aku ana o Rusia i ka hana ana i na alahao a hala loa aku ma kela huli o Siberia.
E hoohanohanoia aku ana ke Kama'liiwahine Beatrice o Enelani ma ke kulana Dukesa ma o kona kuleana ponoi iho, nolaila, e loaa no i kana keiki me ke Keikialii Batenabuga kekahi noho iloko o ka Hale Ahaolelo o na Haku, ke mau hoi ka Hale o na Haku ka hoea mai i kona manawa e kanakamakua ai.
Ke hooikaika la na hoa o ka aoao kuokoa o Kanada i wahi mea e pau ai o Sir J. Makakonala, ke Kuhina Nui, ma ka hookauhihi ana aku maluna ona i na hana kolohe ma ke kohobalota ana mai nei.
Ma ka la 2 o Dekemaba nei, ua hoouna ia ka Haku Meia o Dubelina iloko o ka hale paahao no elua mahina hoopaahao me ka hana ole, no kona hoolaha ana maloko o ka nupepa i ona ia e ia i kekahi mau manao kupono ole e hoolaha akea ia.
HE PAHAOHAO NO KA PONEI
Eia Hou no ua Hana Apa.
Kolohe la e!
Nawai ka Hana? Owai ka Eu?
Mamua iki aku o ka hora 9 o ka po nei, ua loaa aku kekahi mau palapala i kakaulima ia, a ua kapai ia ma kekahi mau wahi o ke kulanakauhale nei. O ka mea mua ka i loaa, ma ke alo iho o kahi noho o Kauka Lokeke, a ua loaa aku kekahi mau palapala ma kekahi mau wahi e aku, e laa ka Hale Aupuni a me ka Pa Alii. Ua loaa keia malalo iho ia lutanela makai Kahumoku a me ka makai S. Ku, ma ke kihi o ka pa o Haalelea, kihi o na alanui Likeke me Halealii, penei:
"Dec 16 th 1886"
"Ia oukou e na Knhina kipi e hoihoi mai oukou i ka hookohu e pono ai Ua ana makou i ka oukou hana ino I na e mau ana keia hana alaila e makaala oukou i na minuke a pau o ko oukou ola ana o loaa ia oukou he pahu kupapau ko oukou, hopena"
(Hoailona Pahu Kupapau.)
Ua kahakaha ia, maluna iho o ka hoailona pahu kupapau, ka huaolelo "Kuhina."
I ka loaa ana o ka lono i na aliikoa o loko o ka Halekoa, ua hoouna koke ia kekahi koa e huli hele aku, a ua loaa aku keia malalo iho, ua kapai ia ma kekahi aoao o ka puka mauka o ka Pa Alii, penei:
"Ia oukou e na Kuhina kipi e hoihoi mai i ko oukou hookohu e pono ai. Ua lawa makou i ka oukou mau hana ino Ina e mau ana keia hana alaila e makaala oukou i na minute a pau o loaa ia oukou he pahu kupapau ka oukou home mau."
(Hoailona Pahu Kupapau.)
Ua kahakaha ia maluna o ka hoailona pahu kupapau na huaolelo, "He Hoomanao no na Kuhina."
Ma kekahi o na pou o ka pa o Aliiolani Hale i loaa aku ai kekahi, i ano like no me kekahi o kela mau palapala ae la maluna. Malia, ua kapai ia no kekahi ma kekahi mau wahi okoa aku, aole i maopopo.
Ua makemake ia na hoa a pau o ka Pualikoa Pualu Queen's Own e akoakoa ae ma ka Halekoa i ka hora 7 o ke ahiahi o keia Poakahi ae. E hoolohe i keia. MA KE KAUOHA.
KELA ME KEIA.
Eia ae ke holo mai nei no keia awa ka mokukaua Beritania Constance.
I keia Poalua ae e holo aku ai o Mr. T. R. Walker a me Mr. T. P. Cummins, maluna o ka Auseteralia, no Kapalakiko.
E holo aku ana ka Luna Makai Nui o Kauai, Mr. S. W. Wilikoki no Amerika Huipuia ma ka Mariposa i keia la.
Ua hiki aku paha ka loaa o kela fea, no ka pomaikai o ka waihona dala hana i ka Luakini hou o Sana Anaru, i ka $2,000.
Aole e haalele mai ana ka mokukaua Ame rika Juniata i keia awa aia a hiki aku i ka la 1 o Ianuari, 1888.
Ua nui no na waiwai i koe iho o ka fea, a e hoolilo ia aku ana ma ke kudala i ka hora 10 o keia kakahiaka, ma kahi no i malama ia ai o ka fea.
Ua aihue hou ia no na wahi moa i koe iho a Mr. H. Berger, a aohe wahi moa hookahi i waiho ia iho; he nele loa no paha i kahi moa ole.
I keia kakahiaka e ku mai ai o Kinau a me Mokolii, a i ke kakahiaka nui hoi o ka la apopo e ku mai ai o Likelike, Kilauea Hou a me Mikahala.
He aha hulahula ka i malama ia ma ka Hale Paikau o ka likoa Honolulu Raifela, i ka po nei na ke Komapani D, i noho kapena ia e ka Loio Kuhina.
I nehinei ka hoomaka ana o ka hoomaha Kalikimaka ana o na kula Aupuni a pau o keia Aupuni, a e pau no ma ka la 4 o Ianuari, 1888.
Ua lonolono lauahea ia ae ma na alanui i nehinei ua mahae lua na lunakanawai eha o ka Aha Kiekie maluna o kela ninau "mana hoole" o ka Moi.
Mamua ae o ka hora 8 o ke ahiahi nei i ku mai ai ka Mariposa, a i ka hora 11 o keia kakahiaka e holo loa aku ai no Kapalakiko.
I keia la e ike hou ai ko ke kaona nei poe i ka pukuniahi o Kona Hema. Ma ke Kinau oia i kaili ia aku ai i ka Poalua nei a nana no hoi oia e hoihoi hou mai.
I ka hora 10 o ke kakahiaka Poakahi e akoakoa hou ai na Solona o ka Ahaolelo ma ko lakou keena hana, no ka noonoo hou ana i na bila a ke Alii ka Moi i waiho mai ai me ke kau ole i kona pulima. Aole paha auanei e loaa ka elua hapakolu o ka hale?
WEST, DOW & CO.
Helu 105, - - - Alanui Papu.
Ua loaa mai nei he heluna o na waiwai hou, a e loaa no na Lako Hale, na Pela Moe, na Lako Pa, na Kaa Pepe, na Laau Pukaaniani, na Laau Kii, na Aniani Nana a me na Peahi o na ano a pau, na kiaha Inu Ti nani a me na Pa,
He Mea Maikai No Ka Haawi Makana
Na Buke waiho kii a me na Buke Kakauinoa,
na Pahu Kahi, na Waiala, na
Paku Aikala me Pulima, na Pahu
Hainaka me Mikinilima, na Kahi
na Palaki Lauoho, na Eke
Waiho Dala, na Paiki Ili,
na Kaa holo honua
na Kaa huki a
Huilabalala,
na Lio
laau hooluliluli,
na Waapa mahu e hiki ai
ke holo, na waapa hoe e
hoe ia ana e ke kanaka, na
kaamahu e hiki ai ke holo, na
kii koa, na Pu o na ano a pau, na
kaa piula me na lio; na kapuahi, na
Pahu waiho lako hana, na Pahu kii, na
O-le, na kii milimili o na ano a pau loa,
mai ke nui a ka liilii a mai ka poupou
a ka loloa. Na Kinipopo o na ano a pau
a me na Laau uhau popo,
Na Pahu Lako Paani Koloke,
na Uhimaka kii; na buke kii hoonanea a kamalii, ka oi aku o ka nani i paiia, he HAPAHA DALA wale no o ka buke. Na
kaa kii, na lako hana mahiai me kamana,
na pahu hookani o na ano a pau, mai ke
nui a ka liilii, a mai ka pauhananuu a ka pauhakakii, a e puunaue pa-iwa aku ia 999, no ka ua mea o ka nui launa ole mai o na waiwai, a aole e hiki ke helu-papa aku, a e hoolilo ia aku no no ke kumukuai
Dala Kuike Haahaa Loa.
Aohe auhau no ka nana ana. A no ka
manawa kupono e kuai ai, i hiki pono
ai ke wae a ku i ka makemake,
a e kapae aku
no a hoea
mai ke Kalikimaka. A e loaa no hoi ma
ko makou halekuai he huina
nui o na Lako Mele,
e laa hoi na
Mea Kani o na ano a pau, na Buke Ao, na Buke Mele a me na Pepa Mele. Na Buke himeni huikau, 20 keneta pakahi.
nov1,'87-t f.