Ka Malamalama Hawaii, Volume I, Number 11, 15 July 1898 — KA MOOLELO O KA NAIKINIKELA Ka Manu Leo Lea O ka Honua [ARTICLE]

KA MOOLELO O KA NAIKINIKELA

Ka Manu Leo Lea O ka Honua

I ka wa kahiko loa, i au wale ka la ma ka olelo wale ana, e noho ana kekahi Emepera o Kina me kona hanohano nui iloko o kona halealii nani i hana ia me ke aniani. He keu aku a ka lahilahi me ka nahaha wale, ina e hoopa wale aku no kahi i ua halealii la, o naha ana ke aniani, a nolaila, me ke akahele wale no e pono ai ke ku ana o ua halealii nani la o Kina. Ua hoopuni ia ka halealii me kekahi malapua nani, i kanu ia me na pua i wae maiau ia mai waena mai o na pua nani a pau o ke aupuni o Kina, aohe he palena o ka loa me ka laula o ua mala pua nei e hoopuni ana i ka halealii, a ua maopopo ole i ke kanaka kiai kona mau palena, koe he poe kanaka lawaia ka i kamaaina i kona mau alahele poaipuni mawaho o ka halealii. Aia ma ka aoao malalo aku, e ulu ana kekahi ululaau nani a uliuli maikai, me ka iho o kona ulu ana mai ka pa alii a hiki i kahakai, aia maluna o kekahi kumulaau kiekie nona na lala e haiamu ia ana e ka ulu wehiwehi o na pua, e kani ana kekahi manu leo lea loa i kapaia he Nakinikela; a i na po a pau e kani

ana ua manu nei aia kona leo me ke onanona ilihia ke hoolohe aku. O na malihini kipa mai i ke aupuni o Kina e makaikai ai, a i lohe hoi i ka leo o na manu leo lea i ko lakou hoi ana aku i ko lakou mau aina ponoi iho, ua pai buke iho la lakou i ka moolelo e pili mea nani a pau a lakou i ike ai o Kina, aka, o ka oi aku nae o ka lakou i mahalo loa ai, o ka manu Naikinikela ua like wale no ka mahalo o ka poe a pau i pai buke i ka moolelo o ke aupuni o Kina, a me ua manu leo lea kaulana Naikinikela hulu gula nei o Kina. I kekahi la, oiai ka Emepera e nana wale ana no iwaena o kana mau buke moolelo, loaa iho la kekahi buke iaia e pili ana i ka moolelo o ua manu nei, a i ka heluhelu ana o ua Emepera nei i ka moolelo, ua nui kona hauoli me ka mahalo ia o kona aupuni, aka, a hiki i kahi o ka moolelo e pili ana i ka manu Naikinikele, ua hoopahaohao loa ia oia ia mea a ninau iho la oia iaia iho, heaha la ke ano o keia mea? He manu anei kekahi e like me keia iloko o ke aupuni? ina pela aole au i lohe iki ia mea. I kona ike ana i ka moolelo o ua manu leo lea nei, kahea aku loa oia i kekahi o kona mau ukali e hele mai imua ona, a i aku la, "Wahi a keia moolelo, eia ka kekahi manu o ke kupanaha loa ianei nei o kou kihapai pua, he manu leo lea loa i kapa ia - ka Naikinikela; a ua olelo ia hoi, oia ka mea maikai a nani hookahi iloko o kou aupuni nei. Eia kaʻu mea haohao, he kupanaha kou ike ole i keia nani kamahao." "Aole au i lohe i kona inoa," wahi a ukali. "Aohe no hoi i hoike ia mai imua o koʻu aloalii nei. O koʻu makemake, e ike au i ua manu la i keia ahiahi maanei nei," wahi a ka Emepera. "Aka, ihea auanei e loaa ai ka manu leo lea Naikinikela," wahi a kona ukali i pane mai ai. I keia manawa i haawi ai ka Emepera i kana olelo kauoha, no ka huli ana i na wahi a pau o ka halealii no ka manu Naikinikela. Aole i pau.