Ka Lei Rose o Hawaii, Volume I, Number 7, 15 Mei 1898 — Page 8

Nuhou Kuloko

Eia na makaainana o ke aupuni-alii Moi o Enelani ma Honolulu nei, ke liuliu mai nei i na hoohiwahiwa ana no ka la hanau o ka Moiwahine Vitoria, nona ke aupuni i olelo ia aole e napoo ka la ma Enelani. E hoomanao, o ka la 24 o Mei o keia mahina e hiki mai ana, oia ka piha ana o 79 makahiki o kona ola ana; a o ka 61 hoi o kona mau makahiki o ka noho ana i ke Kalaunu o ke aupuni o Beritania.

Mai ka manawa i hoomaka mai nei ke kaua mawaena o Amerika a me Sepania, ke hoomaka ae nei ka pii mahuahua ana o ke kumukuai o na mea ai a me na mea ea e.
                Maluna o ka mokuahi Helena i ka auina la o ka Poalua nei o kela pule aku nei, ua poi ia iho la kekahi sela ona e ka ale, a haule aku la oia iloko o ke kai.
                Ke hoike wale ia mai nei ma na nupepa o Kaleponi, e haalele ana ke aupuni o Amerika i kona kahua hooponopono aupuni kahiko a Monroe, a e hahai ana i ka Enelani alahele e alakai nei, oia ka hapuku i na aina.
                Ua hala ia keiki papa o ka aina, oia o Keaweamahi, he keiki lalawai no ka aina nei, he kaikaina no W. L. Moehonua i hala. He luai a-koko kona ma'i i make ai, ua loihi no kona mau la o ka ma'i ana a haalele mai la ka wahine me na keiki a me ka ohana holookoa e paiauma aku nona, i ka Poaha nei ka manele ia ana ae o kona kino kupapau: Aloha no.
                Ua hoolaha ia mai nei ma na nupepa o Kaleponi; he leta ma-lu mai Wasinetona mai, e olelo ana. Ua makemake ia o Hawaii nei i awa hoolulu moku no na mokukaua o Amerika, no ka hoolako ana aku i ka nanahu, ka wai, ka ai a me na mea a pau.
                Ua komo ka hoomakaukau iloko o ka poe e noho la ma na aoao o Puoina no ka hale pauda, oiai, o ka ulia he mea ike ole ia, nolaila, ke noi nei lakou i ka mana hooko, e hoonee ia ka hale pauda i na aole e hookoia ana ka lakou noi, alaila, e hoopii maoli ana lakou i ke aupuni.
                Ua haalele iho nei o Chas. Cunwell ia Honolulu nei, oia ka haole i hoopaa hewa ia ai i ke kaua kipi hope loa ana iho nei, a ua uku aku nei ke aupuni iaia i na dala $3,500 a ua kau koke aku la oia maluna o ka mokuahi Aorangi no Jamaica, ma ke alahele aku o Vanakoua, he kanaka Beritania maoli oia—"Pokeokoe."
                Ua lohe ia mai nei ua komo aku la o Jas Judd kekahi o na keiki a ko kakou Luna Kanawai kiekie Alabaki Kauka, iloko o ka puali lapaau o ke ke'a ulaula, iloko o ka puali kaua o Amerika ka aina o na kupuna. Ua ao ia oia i ka oihana kaua iloko o ke kula nui, e haaheo kakou na Hawaii e pono ai, oiai ke hahai la no o Hawaii i kela olelo kaulana—O Hawaii no ka oi.
                Ua lawe ia ae imua o ka Ahakaapuni no ka hoopii a ke aupuni kue ia H. Wright a me Ed. Norrie no ka hewa laipila.
                Ua hapai ia ae nei ka noonoo ana i ka bila Opiuma, a e hoolei ia ae ana paha ma ka puka aniani a i ole ia hookomo ia paha iloko o ka lua o ka manu-ku wahi a ka haole.
                Ma ka huakai hope aku nei a ka mokuahi Gaelic o Apr. 22, ua halawai mai la me kekahi makani ino ikaika loa, a no ka ikaika loa o ka ino ua hiki ole iaia ke holo, ua le tu oia he 24 hora a ua manuheu no kekahi mau mea ona, a ua loaa pu aku no me ka moku pe'a Alden Besse iloko oia poino hookahi.
                Ua hopu ia kekahi wahine pake mamuli o ka make ana o kana mau keiki liilii elua, mamuli o ka manao ia ana na keia wahine pake no i hanai i kana mau keiki i ka laau make, (Opiuma) ua bela ia oia $3,000 a he lawe ola ke kumu hoopii a ke aupuni.

Nuhou Kuwaho.
O NA
LONOKAUA O MANILA

Hon Kong, Apr. 30. Ua hoole na nupepa o Honkong i ka oiaio o na mea i olelo ia ai, ua haulele iho na mokukaua o Sepania ia Manila, no ka maka'u o halawai me na aumoku kaua o Amerika, oiai, aole e hiki ke haalele wale ia o Manila e ko Sepania mau aumoku kaua. Ua lnaa mai he lono mai Manila mai, ua ike pono loa ia aku na mokukaua o Amerika, aka, no a ino o kamakani ua hiki ole i na moku Amerika ke kamailio me na poe kipi o Manila ma na hoailono mai kai mai o na moku.
Ladana Apr. 30—Mai ka nupepa puka la mai o Singapore, ke manao ia aku nei e kaua ana na mokukaua Amerika me na mokukaua Sepania i na minute a pau. Mailaila mai no, ke olelo la ke Kamadoa o na aumoku kaua o Amerika, i na e loaa ana he lanakila i kona mau mokukaua, he pale kana ana ia no na moku kalepa o Amerika malaila. He 11 mau mokukaua Amerika e manao ia nei, o na ano a pau e ku mai ana ia nei e-a hanau paha auanei ka hua a ka manu-nene iluna ou e Hawaii—Aloha wale.