Ka Lei Rose o Hawaii, Volume I, Number 6, 30 April 1898 — Page 6

6

NA KUHIKUHI
O KE
OLA KINO.

                Eia iho malalo nei kekahi mau laau kupono no ke pale ana ae ina ma'i i na e hiki mai ana maluna o kakou, ina ua nele ia wahi me ke Kauka ole, elike paha me na wahi kuaaina, a me na wahi e ae no hoi e hiki ole ai ke Kauka ke loaa. A i mea e pale koke ia ae ai ka pilikia; he mea pono no ke lawe a hoohana i keia mau laau malalo iho, elike me na kuhikuhi ana malalo.

NO KEANU, LIA A ME KA HA'UKEKE.

                Ina e loaa ke kanaka i ka ma'i i hoike ia ae la maluna, he mea pono ke paila koke ia ka wai wela a wela loa, ninini koke iloko o ke pola, hookomo i ka nioi iloko lomilomi mua a wali ka nioi, alaila, hookomo koke iloko o ke pola wai wela me ka hui pu ana iho me hookahi a elua paha puna ko iloko, elike me ka momona kupono; alaila, e inu aku i ka wai no e wela ana ka wai, e hoomanawanui i ka wela, alaila, uhi i ke kapa a paa, aole e liuliu; o ka pau koke no ia o ke anu, ka lia a me ka ha'ukeke, mai poina i keia, o ke pani o keia o ka hoonaha wahi laau mahope aku.
                O ke kumu i oi aku ai ka maikai o keia laau; no ka wela o ka nioi, ua hikiwawe ke pale ana i ka fiva [fiver] mai loko mai ou, a hikiwawe ka hoopuka ia ana mai o ka hou mai loko mai oka mea i loaa i keia ano ma'i.

NO KE KUNU.

                Ina e loaa kekahi i ke kunu ikaika, e hoopumehana i ka ai me ka lole huluhulu; a penei e hana ai: E hoopaa i ka welu huluhulu a paa pono ka a'i, wili a paa; alaila, hoopaa mau pela a hiki i ka wa e ola ai ke kunu, aole make wehe iki a hiki i ke ola loa ana; ina he wa hu'ihu'i, a oia ka-wa i loaa ai i ke kunu, e hoopaa mau ka wawae me ke kamaa i pumehana.

NO KE INO O KA OPU

                Ina paha he ino ka Opu, hokuku paha, a pilau ka makani oloko ke puka mai, e manao ia no ua piha oe i ka pilau, eia ka laau ikaika a kupono loa; i na e loaa ana ma ia wahi, o ka hua o ka vi pala, wae ka ili a pau, paila a mo'a, wahi i ka welu lahilahi a hookau ma ka Opu, aole e emo o kou naha no ia me ka hakalia ole. He laau maikai keia no ka poe maka'u i ka inu paakai, a me ka huaale a aila paha.

NO KA MAKA ULAULA

                E paila i ka lau o ke ki Kookoolau a mo'a, mamua o ka moe ana i ka po, e waiho a maalili kupono, alaila, e owili iloko o ka welu lahilahi alaila, kapili iho maluna o ka maka, a i kou ala ana ae i ke kakahiaka eike ana oe i ka oluolu o ko maka aole i kana mai, a e ike pu ana no hoi oe i ka piapia. Ina no hoi he ki Pake maoli, e hana no elike me ia i kuhikuhi ia ae la maluna; e hoomalu iloko o ka hale aole e hele i ka makani.

NO KA HOOPAILUA

                1—O ka hoopailua; oia kou ai ana i kekahi mea ai au i ai ai i kupono ole i kou waihona Opu,
                2—O ke ino o ka Opu kekahi kumu;
                3—O ka piha o ka Opua i ke ko'e kekahi kumu a me na mea ano like.
                Eia ka laau hikiwawe loa, ina e hoopailua mai oe a haku'i mai e luai; mai au-a i kou luai ana, e nao koke oe i mea e ikaika ai kou luai ana, alaila, e ike ana oe, i na ua luai hoopailua oe no kahi mea au i ai ai, i kou luai ana ua pau kou hoopailua, pela no hoi; mamuli o ke ino o ka Opu a me ka piha ko'e a naio o ka Opu.

NO KA EHA O KE POO.

                Ina e e'ha mai ke poo a kaumaha mai ka maka, a o'e paha iloko me he mea la e wa-hi ia ana ke poo; he piha koko ke ano oia ma'i, ua hakuhaku a ua hu'ahu'a ia kahi wa, oia hoi ua halawai, he pono no eunuhi ia mai ia koko mai loko mai o kou poo i mea e pau ai kela pilikia. Aohe laau helu ekahi e ae elike me ka o-o ana ike alelo i kapaia e kakou he "Koholua," o keia no ka laau i maa ia kakou i ka wa kahiko, e hele i ka poe akamai i ka o-o ana, na lakou e hana; e ike auanei oe, e hemo mai ana kou koko aole i kana mai ka eleele a me ka hakuhaku, paakiki, a inoino maoli no.
(Nana ma ka aoao 11.)