Ka Lei Rose o Hawaii, Volume I, Number 5, 15 April 1898 — Page 5

5

Nuhou Kuloko.

                Ua hala aku nei na Komisina a ka lahui e hoike aku imua o ka lehulehu, oia J. K. Kaulia, D. Kalauokalani, no ka laua misiona i hele aku nei i ke kapitala o Wakinekona, no ke kue ana aku i ka hoohuiaaina.

                Eia iho ka nui o na poe make o ka malama aku nei o Maraki ma Honolulu ponoi nei, he 73 ka huina, penei na mahelehele ana: Kane 50 Wahine 23. Na Hawaii 38, Pake 15, Pukiki 8, Japana 4, Beritania 3, Amerika 5, na lahui e ae 2.

                I ka poakahi nei i ka auina la waiho ae la na Komite i kohoia ai e ka papa loio Hawaii i ka lakou hoike, e pili ana i ke kanawai hou i hooponopno hou ia ai e loio S. M. Ballou, ua aponoia ia hooponopono ana i ku like ai me ke Kumukanawai hou o ka aina, me na kuhikuhi ana a me na hooponopono ana.

                Ua lohe mai makou ua loaa i ko makou mau makamaka a hoa'loha maikai R. W. Wilicox a me W. H. Rincord ko laua kalaia ana mai a me ko laua mau pono Kivila i ka hoihoi ia mai, mamuli o ko laua nonoi ana imua o ka Ahakuka o ke aupuni i noho Peresidena ia e Peresidena Dole, he oiaio ua loaa ia laua ko laua pono a me na pomoikai a pau malalo o ke kanawai,: Mahalo.

                He Ahamele nui kai malama ia ae i ka po Poaono iho nei ma ka hale mele hou no ka pomaikai o na luakini o Moanalua a me Kalihi, ua aneane 1,000 a oi Kikiki i lilo, ua ikaika maoli no ko makou makamaka maikai Mr. W. H. Cummins i hooikaika hookahi iho nei, e hoomanawanui ia: E lawe i kela kuhikuhi, o ka mea hoomanawanui a hiki i ka hopena, e komo ana oia i ka puka o ke kuikele.

                Ua loaa mai ia makou ka lono paumako, ua make ia hoaloha a makamaka o ka pono, ka Rev. J. M. Kealona, a ua haalele mai oia i keia ola ana; e hoi ka lepo i ka lepo.

                Ke makemake nei ke Kuhina S. Daimana e hoopau loa ia ka auahau kino, elike me ka bila kanawai i lawe ia mai ai e ka loea kanawai Hon. W. C. Achi o na apana o Kohala Akau a me na Kona, ua kakoo ikaika loa ke Kuhina: Nui kela hala ia kaumaha.

                Eia ma ka hale kuai papale o Murats; ua hiki loa ke hoomaemae ia na papale raiki inoino a maikai elike me kona ano mua 40 wale no keneta,

                Ua ike iho makou, ke lolelolea mai nei ka palapala Memoriola a kakou i hoouna aku nei i Wakinekona, imua o ka Aha Senate, liki pa'u Pata iho ka H. K. A. O ka lakou wale no ka i ike ia mai, a loaa la; Pehea keia.

                Ua lohe mai makou, aohe makemake o ke aupuni i ka bila kanawai auhau loaa makahiki, no ka mea, aohe i ike iki ka Ahakuhina he wahi lewalewa iki kahi o ka hoauhau wale ana aku no maluna o na kanaka, nolaila, ea no uka hele pela.

                Mai kahi mau makamaka maikai mai o kakou o na Koolau, ua hai ia mai ua lawe ia uku e ka wai kahe he mau hipi mai ke kuahiwi mai, na paila wahie keia o ka mahi ko o Kahuku pau aku a ku iloko o ke kai: Laki aku la o Mano ma loaa ka wahie ho-a imu pipi a ia keiki, nolaila, e ola ana ia kini.

                Ke hoolaha ia nei ka Buke moolelo a ka Moiwahine Liliuokalani, ana i kakau mai na i Wakinekona, me kekahi mau mea kupono ole ke hoike ae i ke akea, oia nae paha e kaulai ia ana paha na iwi i ka la.

                Ua loe mai makou ua holo pono ka hana kukulu Banako a Moses Palau ma laua o Bipikane i hele aku nei i na mokupuni o Keawe, hookahi wale no kee o ka ino o ke alahele e hoomau aku.

                He ku i ka nani na hana o ka luakini Pihopa a me Kakorika ma ka malama ia ana o ka pule Mesa, ua nani a oluolu maikai na leo mele.

                Eia ma ke kuea Palisa [Palace] ae nei, ke hoomakaukau ia nei ke kahua no ke kukulu ana i ke kii pohaku o Ch. Carter i make iho nei i ke kaua kipi hope iho nei.

                E na makamaka, i na e makemake i ka ike Baibala e hele ae i ke kula Sabati a Wala, [Mr. Y. W. Waller] malaila e loaa ai kahi mau mea, ao ole ia kakou mamua iloko o ka Buke Baibal ae, hele ae i pau kuhihewa.

                Ke hoi mai nei na la malie, ua pau ka lohe ana i na leo o ka hekili a me ka anapa ana a ka Uwila.

                Ua pau aku nei kekahi mau loio o kakou i ka holo i ke kau Jury o Kona, maluna o ka Mauna Loa. (Hiu wela)

                Ua make ia ke keiki papa oia aina kaulana o Laupahoehoe, a he kanaka oiaio o na'lii Aimoku a pau, he iwi kuamoo alii mai ka po mai, me kona ohana ko makou paumako pu ana.

                Ua hoopanee ka paani hookuku a na Ahahui kinipopo a ka la 16 o Aperila nei, o na Ahahui kinipopo e ulele mua ana. O ka Aonolulu kue i ka Union. Nolaila, ke liuliu mai nei lakou no keia kikina.