Ka Lei Momi, Volume I, Number 19, 11 December 1893 — Page 5

Ka Lei Momi.

 

HONOLULU.              OAHU, POAKAHI,  DEKEMABA 11, 1893      5

 

HOOPAU I NA LUNA AUPUNI.

 

            Ma ka akoakoa ana o ka Ahakuka a Ahaolelo Pi Gi i ka auwina la Poaha i hala iho la, ua onou ae o Mr. Haki be olelo hooholo, a ma ke ano nui, e kauoha ana i ka Manu Hooko e noii a e hoomaopopo aku i ko na luna aupuni kakoo i ke Aupuni a me ka ole, a me ke kokua hoi e hiki ana ia lakou ke haawi mai i ka wa e makemake ia ai.  Ua kokuaia ka olelo hooholo e Mr. Tene, a ua hoololi mai hoi o Mr. Emaluka ma ka hoomaopopo ana i ka makee io o na luna aupuni, e komo kino maoli aku no lakou ma ka auamo pu ana no ka pono o ke Aupuni.  Lehulehu na poe i kamailio, a ua hooholoia o 11 ae a me 1 hoole, penei:  Na Ae--- Hatch, Waterhouse, Bolte, Emmeluth, Tenney, Morgan, Allen, Young, Nott, Wilder a me Ena.  Hoole---Suhr.  Aole na Kuhina i kono, oiai, he ninau keia i pili ia lakou.

            O ke kumu nui o keia olelo hooholo, mamuli no ia o kekahi mau luna aupuni i manaoia eia no ke koe nei he wahi aweawea aloha aina a aloha alii hoi ma ko lakou aoao.  Ua hookikinaia ka Aha Kuhina e ka Ahahui Hoohuiaina a me ka nupepa "Hoku," a na Mama Emaluka hoi a me Mr. Haki, ka Peresidena o ka ahahui i oleloia, i kokua ikaika ae imua o ko lakou Ahaolelo Pi Gi.  O kekahi kumu paakiki loa, no ke Kuhina Damona ae ole o hoopauia kekahi poe mai kana oihana aku, e like no hoi me ka makou i hoaiai mua aku ai.  Ua haiolelo ikaika ae o Mr. Damona no kona kahua ma ia mea, a me ka olelo ae no hoi he elua no pule o kakali ai no ka lono mai Wasinetona mai, oiai, he ano kahu malama waiwaiwale no ko Aupuni e ku nei, a me he la, no ka makau maoli mai no kekahi a he makemake paha e hookau aku i ko lakou inaina maluna o na Hawaii.  Aka, ua lilo kana mau olelo ana i mea ole, a ua kaa aku la ka lanakila ma ka aoao kue Hawaii a alunu oihana.

            Eia ke hene nei na aka ana a na poe hoohuiaina, a eia ke olioli a ke pakoli nui nei no hoi no ka hookoia o keia iini o lakou.  Ua mahalo makou ia Mr. Damona no kona kupaa ma kona manao mua ma keia hana ekaeka, aka nae, ua haule aku la nae kana mea i manao ai he pono, a ua like kela hooholoia ana me he olelo hooholo hilinai ole la iaia.  Aole oia i haalele aku, e like hoi me ka makou i manao wale ai, aka, eia no ko hoomau nei i ka lawelawe ana, a ua haawi pio aku la hoi oia iaia iho a me kona kahua mamuli o ko ka hapanui manao, a i ka Poaono iho la i hoopauia ai kekahi mau luna oihana aupuni.  Ae, aole e hewa keia, he loaa ona wahi hoomaha iki, a he kumu alakai maikai loa hoi no keia mua aku o ka aina nei.  Ua eha ka lahui i keia wa, aka, eia aku a eia iho ko lakou eha oi loa aku.  Ua lilo ko lakou aloha Hawaii i mea ole, a he alunu oihana maopopo ko lakou iini nui.

 

            UA oleloia---"He manu ino (pelapela) ka manu e hana ino ana i kona punana ponoi iho."  Aohe wa e aku i akaka ai o ka oiaio loa o ia mau olelo ae la.  O na Hawaii a pau, mai na kane a me na wahine, a oi loa aku hoi na wahine i moe i na kane haole, o na poe hoi i pili pono loa ai o keia mau olelo ae la, oiai, aohe alo ana ae e pakele ai.  He keu aku lakou a na poe aloha ole a hilahila ole hoi i ke kee o na makua a me na kupuna, a ua like loa hoi ia poe me na opala i luia ma kae alanui.  Pono loa no i ka lahui ke laulima ole ku a hookipa ole hoi ia poe.  I ka ipuka aku no, hookuu aku e hele loa, a mai manao hou aku.  E kapae loa aku no ia poe mai na hooluana ana mai me na oiwi, oiai, ia lakou hoi ua "ino ka ia a Umiamaka, he okea o loko.!"

 

ILOKO o na la makamua o ka malama o Okatoba i hala, ua waiho aku ke Aupuni Panalaau o Wale Homa Hou i ko lakou aie hou o @2,500,000 o 4 pa-keneta ukupanee ma ke kahua kalepa dala o Ladana.  Ua papa-kolu ae na dala i luluia no ka lawe ana i keia aie, hookahi koho no @1,000,000 a elua mau koho e aku no @89,000 pakahi.  He $11.50 ka pakeo aku o ka mea i haawiia, oia hoi, he uku kaulele ia maluna ae o ke kumu waiwai io, me ko kakou hoomaopopo iho no hoi ua hoopukaia na bona no ko kumu waiwai io maoli no ma ke alo, aole malalo iho e like la me ko kakou mau bona a na Pi Gi e hoolilo nei no 98 pa-keneta o ke dala hookahi.  Ua laweia keia loina holomua ma Kikane i mea e hooia ae ai no ka oi aku o ka maikai o ke kulana makamaka mawaena o Enelani a me na Panalaau, a e hoolilo ana hoi i na olelo kahamaha a na auna Amerika koko ino o kakou nei i mea ole wale.  Haule na bona o kakou i nei au Pi Gi, a pokeoeo hoi ko kela Panalaau, o Beritania Nui  Ua oi loa aku hoi na dala i makaukau no ka hoaie ae mamua o ka mea i makemake maoli ia, a o ko kakou nei hoi---he neo maoli no.  No keaha mai ke kumu o keia neo---no ka nele maoli mai no kahi, no ka hoihoi ole ia mai no hoi kahi, a no ka makauia mai no hoi kahi o loaa hou ole mai ka mea i hoaieia i keia poe, oiai, he Aupuni keia mamuli o ka pakaha a me ka limanui.

 

Hoopunipuni Wale:

 

            Ua wawaia ae he lono i ka Poaha iho la ua kau aku ke Aliiaimoku iloko o ka mokukaua Kamepi@ na ma Waikiki ae, oiai ka moku e hekau ana mawaho ae i ka holo kiki pu ana aku nei.  He kiu Pi Gi ka ka mea i ike, mai luna ae o Puowaiua, i ka hoea pono ana aku o ka moku mewaho o kuaau o Walkiki, ua kau ae la ka ua kiu la i kana ohenona a ike aku la he waapa hueloboti, me ke Aliiaimoku o luna, e hoeia ana no ke Kamapiona.  Ua hoi koke mai ua kiu la a hoike ae la i na poe Pi Gi o lakou.  Imi wale no hoi ka puni hoopunipuni la, i loaa kahi mea e mau ai ma ka hana.  Hele pela!

 

Na Luna Aupuni i Hoopauia.

 

            I ka Poaono iho la i hoopauia ai o Mr. G. E. Smithies (Keoki Kamila), Luna Malama Buke Helu Aupuni, Mr. C. Widemann, Mea Malama Buke o ke Keena Waiwai, a me Mr. Palmer P. Woods, he Kakauolelo no ka Hale Dute.  He poe Hawaii lakou a pau.  Ua lonoia ua hookohuia na poe malalo iho ma kela mau kulana i hakahaka ae la:  W. G. Ashley, G. C. Ross a me R. C. Peterson.  I keia la, a i ole ia, ma keia mua koke iho paha e hoopauia aku ai kekahi poe e iho.  O ke kumu nui o keia hoopau ana, no ka ae nui ole e kakauinoa no ka hoohuiaina a me ka auamo pu ole.

            Ua pane aku kekahi o kela poe i hoopauia, iaia i hoea ae ai imua o ka Ahakuka i ka Poaono iho la mamuli o ke kauoha, i kona ninaninauia ana aku ina paha oia e kakoo i na poo Pi Gi, a i ole ia, i ka hoihoi hou ia ae o ke kulana Aupuni Moi a me ke Aliiaimoku, ma ka olelo ana aia kona iini o ka ike i ka hoihoi hou ia mai o ke kulana mua me kona Moi maluna o ka Nohoalii.  Ua mahalo aku o Mr. Dole iaia no kona hoike kuokoa i kona manao.  A ua ano like no hoi ka lakou mau pane a pau.

            Ua oleloia ua waiho aku o Mr. Keoni Kalauka i kana oihana o ka lawelawe loihi ana ma ke ano he kiai no ka Oihana Dute, a pela no ka hoi me Mr. Uilama Olo o ka Halemai Pupule, i ka Poaono iho la.  E lehulehu ana paha na poe e ukali aku ana me laua la ae la.

 

            I ka hoomaamaa ki pu pololei kekahi poe o ka Oihana Makai i kakahiaka Poaono iho la, i kai o Kukuluaeo.

 

Kahua Kie Hoomanao.

 

            Iloko o na la i hala aku la i hanaia ai he kahua pohaku no ke kukulu ana aku i kia hoomanao maloko o ka pa o ka Ekalesia Katolika Roma.  Eia ke uhau puna ia @e malalo o ka hana ana a Mr. E.B. Tomasi, ma kahi i ka ai o ka luakini Katolika mua loa, a e lilo aku ana ia i kia hoomanao hiwahiwa a i mea hoi na na hanauna o keia mua aku e kaao mau ai i na mamo.

 

Ka Hewa O Mr. F. W. Wanabaga

 

            Ua hoomahui aku no makou ma ka helu i hala no ko Mr. Wanabaga hoopauia mai ka oihana ae, oia hoi ka oihana Hope Kakauolelo no ka Aha Kiekie, a me kona nienieleia ana imua o na Lunakanawai ekolu o ka Aha Kiekie, mamuli hoi o ka hoopii ana a ka Loio Kuhina, a ua hoopaneeia a Poakolu.  Ia la mai i noho hou ai, a ia la no hoi i hoomaka ai ka lawe ana i na olelo ike, a i ka Poaha mai i pau loa ai.  Mahope iho o ka paio ana a na loio, ka Loio Kuhina ma ko ke Aupuni aoao, a o P. Numana me C. W. Akepoka ma ko Wanabaga aoao, ua waihoia aku i na Lunakanawai no ka lakou olelo hooholo, a i ka Poalima iho la i waiho mai ai i ka lakou olelo hooholo lokahi e hoopau ana i ka Hope Kakauolelo mai ka oihana aku.  Ua nui na mea i huaiia ae, a ua ike mua no hoi e hooholo mai ana na Lunakanawai a pau ma ke kipaku ana mai iaia mai ka oihana aku.

 

            He aha ike a hooluana ka Kuhina a me Mrs. Wilisi i ka auwina la o ka la apopo, mawaena o na hora 3 a me 5, no na poe a pau e kipa aku ana e ike, a pela mau aku ana hoi i ka Poalua o kela a me keia pule.

            Laukanaka o kai o ka uwapo Osianika i ke awakea Poaono iho la i ka holo ana aku o ka Auseteralia no Kapalakiko, a o na haawina mau no hoi ka i ike ia makai o laila.  Lehulehu no na ohua i holo aku.  Ilaila ae no hoi ka bana Pi Gi kahi i "kalapoku" ai.

            Ua paa ae he hapa Pake i ka hopuia i ka po Poalua nei no ka hoao ana e komo kolohe i kekahi hale ma Alanui Kamika, a ua waihoia aku kona hihia e ka Lunakanawai Apana imua o keia kau kiure o ka Aha Kaapuni, ma ka nienieleia ana i ka Poano nei.  He kamaaina kahiko oia ia Kawa, a i ka la 11 o Novemaba aku nei i hemo mai ai, a ua manaoia nana no i hana kekahi mau komo aihue i na kauhale mamua aku o keia hopuia ana iho la, a ua manaoia ua lawa na ike e ahewa ai iaia.