Ka Lei Momi, Volume I, Number 18, 4 Kekemapa 1893 — Page 3

Ka Lei Momi.

 

HONOLULU, OAHU, POAKAHI, DEKEMABA 1, 1893            3

 

LILIUOKALANI.

 

E ola o Liliuonalani,

E paa i ka noho o ka lanakila,

E mau Kou ibikapu Lani,

Ma na kaiaulu o Hawaii.

            HUI:

E o mai oe e Liliulani,

Ka wahine puuwai hao kila,

Silaia i paa ko Aupuni,

Me ka pono kuokoa o ka Lahui.

            2

E mau Kou hilinaiia,

E Ou mau makaainana,

Me ka puuwai aloha aina,

Aina kaulana i ka hanohano.

            3

E hoi e Liliu i Ko kapu,

I ka Noho Kalaunu i Halealii,

He Alii i poniia e na Lani,

I Moiwahine no Hawaii.

 

            [Ua hakuia ka himeni maluna ae e Mrs. E. K.  Naipo o Honopueo, Kohala Akau, Hawaii, ma ka la 18 iho nei no ka pomaikai o ka Hui Himeni Manaolanakila, a me ka hauoli hoi makou e hoola@a aku nei.  L. II.]

 

HE MOOLELO KAAO

-NO-

LAUOMIDIHAE.

-KA-

UI I MOHAI IA I KE KOKO

-KA-

NANI I ALANA IA I KA OI O KA PAHIKAUA.

 

Ka Mea Huna iloko o ka Kiaha Waina

Ka Mea Pohihihi i ka Maka o k@ Kuikele.

-A O KE-

Keiki Alii Numaredina

KE

Komo Lima Maka Popoki.

 

MOKUNA V.

Ka holo waapa o ka muliwai Muzine - Ka mea Huna iloko o ke Kiaha Waina - Na alakai ana a ka mea kino pahaohao.

            Nolaila, ku ae la ua kaikamahine alii la a hele aku la ma kehahi rumi e aku, a i kona hoea ana aku i ka ipuka o ia rumi, ku iho la o ia e nana ia loko a ike ahu la o ia i kekahi kaikamahine nani o na helehelena i like me kona, e hilinai ana iluna o kekahi noho koki ua kaia loa ia oia i ka hiamoe, a no ia mea ulu ae la ka manao iloko o ke kaikamahine alii Murisedela, no keia wahine ka paha keia leo i hoomaewa mai nei ia'u.

            Iloko o keia manawa, emi hope mai la ua kaikamahine alii nei i hope a noho iho la iluna o kekahi noho, a puana ae la oia i kekahi leo himeni aloha no kona kaikunane, ke mele hoi e himeni ai laua i ko laua aina, -

            "E Numaredina-e Numaredina

            Ka nani o Hurema - auhea ia

            Ka nani o na pua - aole i like

            Ka hulali o na wai - aole i pili

            A owai ka mea i like me ia

            A heaha kona hoa e kohu ai

            Ka mea huna iloko o ke kiaha waina

            Ka mea pohihihi i ka maka o ke kuikele."

            I kuu ana iho o ke mele a ke kaikamahine alii; ia manawa no i o mai ai ka leo mele o ka ui e moe mai la ma kela aoao i ka i ana mai; -

            "E Numaredina-e Numaredine

            Ka nani o Hurema nawai ia

            E moe ana Numaredina hoomanao ana ia'u

            He nani ko'u i like me oe

            A o na lia ana a o ko'u puuwai nau e hoomaha"

            I ka lohe ana @ Murisedela i keia mele, ua lilo ia he mea haohao iaia me ka ninau ana iho iloko iho ona, pehea la i loaa ai ka inoa o ko'u kaikunane i keia kaikamahine?  Owai la ka mea nana i hai aku iaia.

            Iloko o keia manawa i hemo mai ai ka puka a hoea mai la oia imua o Murisedela.

            Me ke pihoihoi nui i hopu mai ai ua kaikamahine la i ka lima o Murisedela a honi iho la oia me ka ninau mai - Owai kou inoa e ka nani a'u e ike nei? - I aku la ke kaikamahine alii, - o Murisedela ko'u inoa.

            "O! wahi a ua ui la, ke kaikamahine a Aramoseda a Siama, ke kaikahine o ka mea i kapaia ka nani o Hurema, auhea ia?

            I aku la o Murisedele, aole ia me a'u, a uwe iho la ua mau kaikamahine nei, a i ka hope loa o ka laua uwe ana, ninau aku la o Murisedela i ua ui la, - Owai kou inoa, - A no ka aina hea oe?

            I mai la ua kaikamahine nei - o Rale Biama ko'u inoa, ke kaikamahine a ka Moi Zu - @o ke aupuni Iniana.

            Auwe! wahi a Murisedela i pane aku ai, - o kaua anei na kaikamahine a na Moi o ka honua i haalele aku i ko laua mau makua i kahi loihi loa?

            I mai la ua kaikamahine la, aole - aole na kaua i haalele, aka, na ka lima o ke kolohe kaua i lawe mai, a e noho iho kaua ilalo a o hai aku i ko'u moolelo mai ka mua ahiki i ka hope, a noho iho la ua mau ui nei iluna o na noho, a hoomaka mai la @e kaikamahine Rela Biama i ke kamailio ana i kona moolelo penei.

            Owau no ke kaikamahine alii o ke aupuni o Inianapoli, a hepunahele hoi au na ko'u mau makua, mai ko'u mau la kamalii mai, a owau ka laua mea nui i na manawa a pau, a ua hiki no ia'u ke olelo aku ia oe e kuu ho@hanau, ina au e manao e lawe i ka nohoalii no'u, aole no ia e huhu mai ana.

            O ka halealii o ko'u makuakane, ua kokoke ia ma kapa o kekahi lokowai i kapaia, "o ka Lokowai o na i'a unahi ole," a e nana aku ana na ipuka aniani o halealii o ko'u makuakane i ua Lokowai la.

            1 kekahi la, oiai au e holoholo ana ma na kapa o ua lokowai la ma kahi kokoke i ka halealii o ko'u makuakane, ua ike aku la au i kekahi waapa e holo mai ana mai kekahi aoao mai o ua lokowai la, e hoe ia ana e kekahi wahine nona na helehelena i paanaau loa ia'u a hiki i keia manawa.

            E waiho ana mamua iho o ua wahine la he ie i piha i na huaai, a ma ka aoao iho o ua ie la e noho ana kekahi popoki eleele hookahi no ona maka, a ua makapaa kekahi maka.

            Ia manawa i puoho ae ai ka leo o ke kaikamahine alii Murisedela me ka i ana ae, -

            "O kuu popoki no ka mea hookahi no ona maka, - aole paha ia he popoki okoa no paha ia; wahi a ua kaikamahine nei, me ka hoomaka hou ana mai e kamailio i kana olelo mua."

            I ka hiki ana mai o ua wahine la ma ko'u alo, ua hoohuli ae la ia i kona wahi waapa uuku a i mai la ia'u, -

            Auhea o keia mau mea elua kau makemake, o ka popoki paha a o ka hua ohia paha, a no ia mea i nana aku ai au me ka makahehi maluna o ke kino nani o kela popoki, a ua koho aku la au o ka popoki ka'u a me kekahi hua ohia hookahi, a haawi mai la ua wahine la i keia mau mea elua i kuu lima, a ua paa ae la au me ka olioli, me kuu manao ole iho o ko'u mau mea keia e haule ai i ka poino, eia ka e haule ie ana no au i ka poino:  a kulou iho la ua kaikamahine la ilailo e uwe ai, a no ka manawa loihi ea ae la o ia iluna, a hoomaka hou mai la e kamailio.

            "I ko'u hoi ana aku iloko o ka hale, a ia'u e noho ana iloko o ko'u rumi, ua ai ae la au i ka hua ohia, a i ka pau ana o ka'u ai ana, ua hoomaka mai la ke ano o ka hiamoe i ko'u mau maka, a no ia mea i puhene mai ai au i ua popoki la i kuu poli, a hiamoe aku @a au iluna o kekahi koki o ko'u rumi.

(Uumi malie iho pela.)

            Ua mahalo ko makou Kiu i ke kahi lede ma ka po Poakahi i hala, oiai oia e hele ana @ himeni ma na Kauhale, i ka maikai a me ka nanahe o kona leo.  O ka pono ia.

            Elua mau keiki, no laua na inoa o Kaimi a me Kaonohi, i hoounaia aku e ka Lunakanawai Apana no ke Kula Heopololei o Keoneula, i kakahiaka Poalua i hala, no ka hele ole i ke kula.

            O ke mele "Ulumahihie" puka ma ko Makou helu o ka la 13 o Novemaba iho nei ua lawe kolohe ia aku e kekahi kanaka e hoonoho hou ma kekahi o na haleqai, aole iho la ua mea la nana ka i haku i ua mele la.i  Auhea oe e ke kolohe, mai hoao hou oe e hana pela, o loaa aku oe pau ou mau iwi i ka haihai.  Eia no o Luina ka mea nana i haku ua mele la ke ola nei, a ke ulele nei no maluna o na hua kepau.

 

KA WOHI E.

 

Ne-i nakolokolo ka honua

Uina, olapa i ka lani

Hanini, Kulanihakoi

Ka hele'na au e Kawohi

            Hui:

            Ka wohi e!  Wohi hoi!!

            Lei momi a na wahine

            Milimili oe a Kalaau

            Hiialo he aloha na makou

I ahaina oe i niniau ai

I maliu ole mai ka uwalo

Na kaohi pauaho ole aku

Me na waimaka e halo'i nei.

 

Hale Hoolako Limahana Iapana.

 

Helu 135 -       Alanui Moi.

            E loaa no na limahana kupono no na ano hana a pau, ke hele mai e ninau ma keia Hale Hoolako Limahana Iapana.  He oluolu loa ka uku hana.  E hele nui mai i ike ku maka i na keiki o Iapana.

Nov. 13. 15--4t.

 

KAUKA YONG KAM PUNG

APANA

HELU 81 -      Alanui Maunakea.

KAUKA LOEA O KA AINA @UA.

            Ua hiki ke hoola ia kela a me keia no mai, mai ko na wahine a me ko na kane a me ko na keiki liilii.  Ua hiki ke hoola ia na ma'i hano, na ma'i a pau o ke akemama koko ino hu'i o na wahi a pau o ke kino.  Na ma'i wahine o kela a me keia ano.  Na ma'i Lele, oia ka Fiva Lenalena, Hebera, ke Kolela, a me kekahi mau ma i e ae he nui wale.  Ua hiki no hoi ke lawelawe ma na lapaau oki ana i na palapu o kela a me keia.  O na ma'i koko paa a pehu ua hiki loa ke lapaau ia me ka uku haahaa loa.

            E kipa nui ae e na makamaka, ka poe hoi i loohia me na ehaeha a ka ma'i e loaa no au ia oukou me ka hauoli e kokua aku i na mea a apau me ka auhau mama loa.

            O na pilikia a pau e pili ana i ka hanau keiki, ua hiki loa ia ia'u ke hanai aku a h ohemo, me ka ehaeha ole a me ka oluolu no hoi.

            I na e hemo ke keiki e @u hou i ka laau i mea e hoomaikai aku ai ia loko o ka waihona keiki, a me ka hoopau pu @o hoi i ka maeele o ke kino.

            Me ka malama pono no nae i na rula a'u e kuhikuhi aku a@, a nolaila, e hele mai mai ke nui a ka liilii.  A mai Hawaii ho'i a Kauai.

YOUNG KAM PUNG.

22-3 @