Ka Lei Momi, Volume I, Number 17, 27 November 1893 — Page 6

Ka Lei Momi.

6                                    HONOLULU, OAHU, POAKAHI, NOVEMABA 27, 1893,

 

Ka Hoa'loha o ke Aliiaimoku.

       

        No ka mea, aole no i hoopuka pau loa aku makou i ko Mr. T. H. Kewiki manao ma ka helu i hala, nolaila, ua hooholo hoi makou i keia helu no e huai pau aku ai. Eia iho ke koena mai kahi a makou i hoeki ai:

      "E houluulu ae au i ke kahua a ' u i kakoo ai ma na olelo a'u i hoopuka ai ma kekahi kukai olelo pili oihana ana ma Wasinetena a ma na olelo hoi a kekahi luna oihana kiekie o oukou i hoopuka ai i kela malama aku nei no. Olelo au iloko o Maraki:

        "He mea oiaio aole keia ano hana e hiki ke hoomauia aku no ka wa mau loa; ma kekahi wa no paha e hoea mai ana, he mea maopopo e uiia aku ana no na poe koho balota. He 9500 ana ke heluna o na Hawaii koho balota, a e pau nui aku ana no paha lakou i ke koho no ko lakou kuokoa, a he 4000 wale no o na poe e ae, pela ka mea i akaka, ke huiia me 2000 Pukiki, he poe limahana wale no nae ka hapanui.

        "O ka olelo hoi a kekahi o ko ou kou luna pili oihana kanekela i ike nui ia i pane mai ai ia'u i kela mahina aku nei: 'Aia pu oe a me a'u ma ka manao hookahi, pela ka'u e ike nei—ua makemake kaua i ka hana pono ia mai.'

        "Ua hookahahaia mai nae hoi au iloko o na uwalo ana a pau a na Komisina i hana ai, ua pili wale no ia mamuli o ke ano maamaalea o na poe kalaiaina, a ma ke ano laulaha hoi, ua lilo hoi kamakamailio ana ma keia aekai, no ko Amerika Huipuia hiki ke ae aku a hoole paha i na manao noi o na Komisina.

        "Aka, o ke kumu mua loa nae, oia no ka hoomaopoo ana i ke kahua o keia mau manao noi. He halawai makaainana iloko o Ianuari i hala ka @@@a, a @a ia halawai i kohoia ai he 15 poe kunaka kuonoono maikai i komite. He mea oiaio loa aole ia he kahua lawa kupono no ka hoolilo ana i kekahi ahupuni kuokoa me 100,000 kanaka, a me ia aupuni hoi oukou i kukai aku ai i na hooia ana o ka manao maikai a me ka mauno makamaka.

        "Ua hoao aku au e kamailio i kekahi o ko oukou poe kalaiaina i Maraki i hala, e like no hoi me a'u e kamailio aku nei i keia la, aole loa o Amerika Huiipuia, e kulo@ iho a hoohui ae i kekahi aupuni a kona mau poo alakai kuikawa i manaoio moakaka ai e kue loa ia aku ana ia hoohuiainaana. Mai ko'u la mai i lohe ai no ka huliamahi kipi a hiki i keia la, aole loa au i halawai iki me kekahi luna aupuni hookahi o Amerika Huipuia, a ole loa no hoi me kekahi mea ku kaokoa ae, i nele ole ka hooia ana mai ia'u me kekahi manao ku maoli no i ka makee hanohano a kaulike a ko oukou aupuni o koi ikaika ai ma na lawelawe ana e pili ana ia Hawaii.

        "He mau hewa a he mau kuia lehulehu no ka i loaa i ke Aupuni Kuikawa e pale aku ai, a owau paha ke kanaka hope loa e hoonawaliwali okoa aku ai no i ko lakou mau lima. Aka, he hookahi a lakou hewa ino loa i hana ai i ko lakou wa i hele ai mawaho aku o na palena o ke aupuni me ka ae ole o na kanaka oiwi. Aohe pane a ae a ia ano haawi aina ana i kupono mai kekahi aupuni Karistiano o keia au hou mamua ae o ka mea i loaa aku ia lakou mai keia aupuni aku, a ina, me ka pono ole nae no lakou iho. I ko na Komisina ma ka lakou huakai, ua hilinai au e lilo no ka lakou hana i mea e manaoia ai he pakaha a he kumakaia maoli no paha, o like no me ka lakou i kapa nui iho ai ia lakou iho he poe enemi a he poe hoa'loha paha no ha Hawaii.

        Ke manaoio nei au ua hoohilikauia mai au me kekahi hana pili kalaiaina, aka, aole loa he wahi kahua no ia mea, a ke manaolana paa loa nei nae hoi au aole e lilo na manao ikaika a'u e paa nei i mea e alako aku ai ia'u e hana aku ai i kekahi mea e hoomahuahua loa aku ai i na popilikia o ke Aupuni Kuikawa, oiai, aia iwaena o lakou kekahi o ko'u mau hoa'loha pillkino pumehana loa.

        "He oiaio he ea kupono loa e kapaeia aku ka huaolelo 'kuikawa,' eia nae, heaha aku ana la ma kona wahi? Ke manaoio ne au i na la mua paha o 1894 e pau ai ka bila haawina a me na loaa. Aole anei he kahoaka o ka hooponopono kau kanawai malalo o ke Kumukanawai a e hoomau aku no paha auanei keia poe keonimana he umikumamalima e hoohana aku i na loaa o ke Aupuni me ke kue loa aku i ke Kumukanawai, oiai, mamuli o ka hoopakele ana i ua Kumukanawai la ka mea nana lakou i kahea ae e ku ma ke ano he aupuni.

        "Me he la elua no mau ala i hamama—hookahi, oia no ka hoomau ana aku i ko na Hawaii noho kuapaa ana malalo o na haole i like la me lakou i keia wa, a i ole ia, e komo pu ae ma kekahi aelike ana me lakou.

        I Feberuari i hala ua hooikaika au i hooponopono ma ke ano hookuikahi aku. I keia wa no, e hooikaika hou aku no au, aka, ua oi loa ae ka hihipea o na kulana i keia manawa, oiai, ahoe me i koe iho i ka hana ole ia e na poe hoohuiaina e hooi loa aku ai i ka hoowelawela ana i na manao inoino a me ke kue mai hoi o na Hawaii.

        "Aia no ma na aoao a'i elua he hoomaopopo ana, ma keia mua aku nei, no ka waiho ole ana aku o na hoopomaikai ana a ke kaua me na poe hoohuiaina. Ua lu lakou i ko lakou a pau loa maluna o kekahi mea i hiki ole loa ke ko, a i ka nele ana o ia, heaha iho ka i loaa ia lakou? O ka waiho aku no paha i na poe koho balota, a i ole ia, i kekahi halawai makaainana hou aku, a ko manao nei no nae hoi au e kuemi hope mai ana no na poe piepielo dala a me na poe kalepa, na poe hoi i welawela mua no ka hoohuiaina, mai na manao ana aku no kekahi hooponopono aupuni ana ma o ka halawai makaainana la."

        Ma keia wahi la, o na maka maka kaunu o Ka Lei Momi, pau ka manao o ua o Mr. Kewiki i hoopuka ai i ka mea kakau o ka nupepa "Pou" o Kapalakiko, a i hoolahaia ae ai noi e ia nupepa ma ka la 21 o Okatoba i hala aku la.

 

Na Mea Hou o ka Ua Kanilehua o Hilo.

 

MR. LUNAHOOPONOPONO:

        O kau nupepa ke kila mageneti hoonaue puuwai o ka lahui Hawaii, a ua nui ka hoohialaaiia me ke ohohia, a ua kaunuiia aku hoi kona hoea mau mai ma na noku a pau. Ua koho maopopo aku makou iaia he kolopa uneune nana e wawahi na pali paa, a o ka makou ia e li'a mau aku nei e apo pumehana mau aku i kau LEI MOMI.

        He wahi hunahuna mea hou ka'u e panee aku nei imua o kou hanohano, ke oluolu ia mai e kou ahonui, a nau hoi ia e hookomo iho ma kahi kaawale o kou mau kolamu mea hou i keia mau wahi kulu wai lehua malalo iho nei nona ke poo manao e keha ae la maluna.

 

NA OULI PAHAOHAO.

        Kulu 1: He ano loli iki ke au o ka manawa o ka aina, pela no ia e ikea nei i keia mau la. Malie a kalae ka lani i kahi wa, a i kahi wa no hoi, hoohanini mau mai no na omaka wai eloelo o Kulanihakoi, hele ia la a pii ka he'a i Hiikea, a ke huli ae kou leua ike a motio pololoi aku ma ke kukulu hema o ka aina, e ike aku ana no oe i ka ula wena mai o ke ahi hookalakupua o Kilauea, nana aku oe, "kauluwela Puna i ke ahi a ka wahine, ua @kle a engena ka papa o Kulilikaua, ke lohi laka papa o Maukele i ka la—e." Ae. A ke huli ae a nana aku i na luhiehu o ka aina, aia hoi, e waiho lahalaha mai ana imua ou kona mau hiona ulumahiehie, kona mau kualono uliuli, ua hele wale a lipo me na lau onaona o ka wao, aia na oawa wai kahe ke huli papu mai la, na mauna e waha iho ana a e hoopulu mau iho ana ke Kanilehua i ke kulanakauhale o Hilo, a ke pawehe iho la ka lau o no laau ma kona mau kaupaku i hele a makamaka no ka ua i Hilo one, i ka hele no a kipa i Hanakahi; o aloha e.

 

NO KA HUI HAWAII ALOHA AINA.

        Kulu 2: O ka Hui Hawaii Aloha Aina a ko Hilo kini, he oia mau no kona holomua, oiai, ma na la halawai mau o ka Hui, e piha-u mau ana kona mau kuineki me na makaainana aloha alii, aloha aina a makee kuokoa, na kane, na wahine a me na kamaiki o ua aina nei a ke onaona lu lehua i noho ai, a nona kahi hooheno o kou mea kakau o nipo iho ai, "Mahalo piha au i ka Ua Kanilehua o Hilo, o ka'u helu okahi no ia e ike nei." Hookahi mea oi lea aku o ka mahalo, e malama mau ana keia hui he anaina pule i ka hora 2 P. M. o kela Sabati keia Sabati, no ka mea, he kokua kokoke oia nou e Hawaii, a he palekaua hoi nana i hoohiolo na manao o ka po, o Iehova o na kaua kona inoa. E pule mau ana i kona lokomaikai, ma kona manao aloha, e hoihoi hou ia mai ke ea o ka aina a me kona kuokoa, a e pule ana e hoihoi hou ia ae ke Alii ka Moiwahine Liliuokalaniikekapu ma ka noho moi o Hawaii aloha.

 

KA NOHO ANA O NA KANAKA.

        Kulu 3: He oia mau no ka maikai o ka noho ana o na kanaka, aole he uluaoa iwaena o lakou, mau no ko lakou malama ana i ka maluhia o ka aina, a o ka mea nui wale no i ko lakou waha ke lohe aku oe, "aloha i ka Moi, aloha i ka aina, aloha i ke kuokoo o ka lahui Hawaii, a ke kau aku nei na maka o ka la hauoli e hiki mai ana, a ke hele nei no imua me na manaolana o ka hauoli. Ua hoala ae nei no ka Hui Hawaii Aloha Aina o ko Hilo nei i kekahi pahuhao he 50 kapuai ke kiekie e ku nei ma ke kahua o ka hale hui, a e welo aku ana ka hae nani o Hawaii ma kona huini ke hiki mai ka la o ka hauoli.

        He ma'u wahi mea hou ia o kuaaina nei.

                HENRY L. KAUANOANO.

        Waiakea, Hilo, Nov. 9, 1893.

 

        Ua hoike aku o Rev. E. G. Bekewita i ka Papa Kahu waiwai o ka Luakini Hoole Pope kuwaena (ua like me Kaukeano mamua) i kona waiho i ka nmoho kahu ana no ia kihapai mamuli o ka elemakule, a no ka mui mai hoi kahi o ka hana i kona mau la kanikoo, a e hoi aku ana i kahu no ka Luakini Haole o Makawao, Maui. E lilo aku ana paha kona wahi ia Rev. W. Rader o Okalana, Kaleponi, he mea i haiolelo no mamua aku noi iloko o ia luakini ae la no o kakou o Honolulu nei.