Ka Lei Momi, Volume I, Number 15, 13 Nowemapa 1893 — Page 1

Ka Lei Momi.

E MAU KOU OLINO ANA.

BUKE 1          HONOLULU, OAHU, POAKAHI, NOVEMABA 13, 1893.         HELU 15

-----

HE MOOLELO KAAO

 

MONE TIKERO

---KA---

HOLOLIO I KA WA @OILO

---KA---

UI MAALO I KE KUPULAU

A O KE

KEIKIALII HARE MATINE

---KE---

KIAHA OPAKA O NINEWA.

-----

MOKUNA VI.

 

 

Ka Ui Maalo i ke Kupulau

Ke Kakele Pahikaua Akamai

Ka Makaua a ka Pua Lilia o Zubieda.

 

            I kela manawa i huli mai ai ka hololio ka wa hooilo, kunou mai la imua o ko Aliiwahine o ka Nani, a iloko oia manawa i paiakuli koko hou ae ai ka lewa me na leo hooho o ka hanoli.

 

            Ku koke ae la Pua Lilia o Subieda iluna a iho mai la ilalo o ke alapii o hui pu me ka mobo nana ka lanakila o ka la, a oia no hoi ka manawa i lele awiwi iho ai o ka Ui maalo ka wa kupulau mailuna iho o kona lio, a kuikui hele aku la me ka Ilamuku Nui o ka la.  A ia laua i ku iho ai ma ke anuu o lalo loa o ke alapii, oia no ka manawa i minoaka iho ai o ua Pua Lilia la me na awihi maka ana hoi imua o ka ui maalo, a ke kau pono la hoi na maka o kela a me keia pakahi o laua i kahi a me kahi, a ke pauma ae la na manao ano e iloko o Mazunadime no ka ui maalo, me he mea la, ua ehu aku la oia i ka oha lima ole a ke aloha.

 

            A iaia i ku iho ai mo kona mau ukali ma ke anuu olalo loa, poha mai la kona leo nanaho i ka i ana mai:

 

            “E ka moho nona ka lanakila kamahao o keia la, ano, ke haawi aku nei au ia oe i ka makana hope loa o na lealea o keia la me kona unuhi ana ae i ua makana la a olinolino ae la i na kukuna malamalama o ka la, oia hoi keia komo daimana.  Ano, e neenee mai oe i hookomo aku ai au iloko o kou manamanalima.”

 

            Alaila, hele iki aku la ua Ui maalo la imua a ku pono iho la i kea lo o ka Pua Lilia, a ia manawa i hookomo mai ai ua nani la o Samanadala ma ka manamanalima eha o ka Ui maalo i ka wa k@pulai, alaila pane hou mai la ua pua lilia la me ka minoaka pu ana iho;

 

            “O kau makana ia’u e ka Ui maalo i ka wa kupulau, eia au ke pulama nei me ka hoomanao mau ana iaia, a no ia mea ke unuhi nei au i kekahi o na pua nani o Subieda a haawi makana aku ia oe, i hoike no ke aloha pilipaa mawaena ou a me a’u.”

 

            Me ia mau huaolelo, wehe ae la oia i kekahi pua lilia e kau ana ma kona umauma a hoohoni aku la ia Mone Tikero, me ka olelo pu ana aku.  “E lawe i keia me ka hoomanao mai ia’u, a na ke au kokoia o ka manawa e hoohui hou ia kaua.  E haomanao i ka pua lilia o Subieda i na wa a pau.”

 

            Huli ae la ua nani la a hoi aku la no kona wahi o noho ai, a oia no ka manawa i huro ae ai ke anaina a kan aka me ka piha hauoli, a e mahalo ana hoi kekahi poe i ka ui o ua hololio la i ka wa hooilo, a o na poe hoi o ka aoao palupalu aia lakou ke hoohai wale no i ua hololio la a ke olelo ae la hoi kekahi poe a ke olelo ae la hoi kekahi poe “makemake ino kela ui—ina e pili mai ma ko’u aoao, hauoli loa au.”  Ke olelo ae la hoi kahi, “owau kona ha e kohu ai.” a pela wale aku na olelo a he nui wale aku.

 

            Iloko o keia wa e paiakuli nei ka lewa i na leo hooho o na kanaka, oia ka manawa i huli hoi aku ai o Mone Tikero no kona halelole, a oia no hoi ka manawa i pii ae ai kekahi hae ma kahi o kela hao mua me na olelo hou “Ua laa ka Pua Lilia o Subieda na Mone Tikero, ka Hololio i ka wa Hooilo, Ka Ui maalo i ka wa Kupulau.”

 

            Ua lilo kela mau huaolelo i mea hookahaha i ka manao o ka lehulehu a pau, a huro hou ae la ka anaina kanaka me ka hauoli hui, a ke hele la ka iwi aoao a kokoke e haihai i ka ua mea o ka noke i ka aka me ka uwauwa ana.  Mahalo aku a mahalo mai, a pela wale aku na olelo he nui.

 

            I kela wa i kani mai ai ka o-le no ekolu manawa, a i ka hooki ana iho, ia wa i @oha mai ai ka le o ka Ilamuku i ka i ana;

 

            E lohe, e lohe na mea a pau, ua pau na hana o keia la a ke hookuu ia aku nei ke anaina e hoi me ka maluhia.  A ke haawi aku nei ke aliiwahine o ka Nan ii kena mahalo nui i na moho a pau i komo pu iloko o na lealea e nei la no ko lakou hoomanawanui ana mai a hiki i ka pau ana o na hana.

 

            I kela wa i puka like mai ai na naita a pau maluna o ko lakou mau lio a holo ma la a ku malalo o kahi a ke aliiwahine o ka Nani e noho ana, alaila, haawi aku la i olelo kanaenae imua na, a pau ka lakou mau kukahekahe ana, ua huli hoi aku la lakou no ko lakou mau home, a hookuu ia ae la na hana o ia la me ka maluhia.

 

            He mea oiaio, ua huli hoi aku la kekahi poe no ko lakou mau aina pakahi, a o kekahi poe hoi ua noho iho la no lakou e hoohala i koena o ia la ma Samanadala, a aia hoi i ka waha o na naita e ae i noho iho na huaolelo mahalo he nui no ka kakou hiwahiwa.

 

            Aka nae, o kekahi o na naita aia iloko ona na manao uahoa o ka inaina i ka mea nona keia moolelo, a ke lolii la ua manao la iloko ona me ke kali ana o ka hoea mai o ka wa kupono ana e hooko aku ai.  A e ike aku ana no kaua e ka mea heluhelu ma keia mua koke ilio.

 

            I ka wa i uhi mai ai ka malu o ka po maluna o ka aina holookoa, aia ka kakou hiwahiwa ken oho la maloko o kona rumi ma kekahi o na hotele kaulana o Samanadala i ka piha mau ia e na ano kanaka i maa i ka lawelawe ana i na hana puuwai eleele, a pela pu no hoi me kona mau hoa o luna o na kuahiwi o Hagara.

 

            Iaia e nauea ana me ka ulu ole ae e kekahi mau manao ana e iloko ona, lohe ae la oia i kekahi mea e kikoko ana ma ka ipuka o kona rumi, a ia manawa i ninau aku ai oia, “owai kela?”

 

            Pane mai la ka mea mawaho mai i ka i ana, “owau no keia ka mea nona keia hotele au e noho nei.”

 

            Ku koke ae la ua Mone Tikero la iluna a hele aku la a wehe i ka puka, a i ka hemo ana, ua pane mai la ua ona hotele la:

 

            Ua makemake kekahi mau lede e ike ia oe i keia wa.

 

(Aole i pau.)

-----

 

            Ua hala i ke ala hoi ole mai o Mr. D. W. Kanoelehua ma ke ahiahi hora 6 o ka Poaha iho nei, me ke kaa ma’i ole, a ma ka Poalima mai i manele ia aku ai kona kino wailua no ka hoi ana aku o ka lepo i ka lepo a o ka uhane i kona mea nana i hana.  Aloha wale oia.

 

            Ua haawi ae e Mr. W. G. Irwin he aha hulahnla ma kono wahi noho ma Waikiki i ka po Poaha nei, a ua nui na poe i naue ae malaila e hoonanea ai.  Ua hoowehiwehi ia ka hale me na liko lau nahele e ka wao.  A ua hoomau ia na lealea ana a hiki i na hora liilii o ke aumoe.

 

            Ua hoolilo aku o Keoni Kolopana (J F Colburn) i kanaoihana kalepa ai lio i ka Hui Ai-Lio Kaleponi, o uka e Leleo, a i ka Poaono iho la no oia i waiho loa aku ai.  Ua lawe ae oia i keena oihana pilikino nona iho ma alanui Kaahumanu, helu a5, mamua iho o ko ka Mea Hanohano A. Rosa keena loio.

 

            Ua hookohuia o Mr. L. M. Balauwina, kekahi a Mr. D. D. Balauwina, i Hopo Makai Nui no Lahaina ma kahi o R. Pika@ Hose, i hoopauia me ke Akaka ole o na kumu.  Eia nae hoi kahi mea lea loa, ua hoohoku loa ia ko Lahaina poe haole mamuli o kela hookohu ae la, oiai, aole e ka mea i hookohuia ka ua poe la i makemake ai.

 

            Ua lilo i mea hookahaha i ka manao o na poe a pau e noho ana maanei ke ku ana mai o Adimarala Irwin o na Aumokukaua Amerika ma na kai o Asia, maluna o ka mokuahi Kina i ke ahiahi Poakahi i halu.  Ua ukali ia moi oia e na Lutanela Parmenter a me Adams.  A ua hoi aku oia no luna o ka mokukaua Piladelepia, a huki ia ae la kona hae iluna o ia moku me ka haawi pu ia ana aku o na kani pu ana no kena hanohano.  E noho ana oia maanei i pani o ke Adimarala Skerrett i kauoha awiwi ia mai nei e hoi pololei no ka home.