Ka Lei Momi, Volume I, Number 13, 30 ʻOkakopa 1893 — Page 4

HONOLULU, OAHU, POAKAHI, OKATOBA 30, 1893

4

 

I NA POE HELUHELU

 

E hoomanao e ko makou poe heluhelu a pau, o na hooponopono no ana a pau no

na mea e pili ana i na hookaa dala ana, na palapala hookaa a me na kikoo dala ana, o ko

makou puuku

 

MR. F.J. TESTA (HOKE)

 

a oia wale no ka mea mana ma ia mau mea, aole o kekahi mea e ae, a mai keia la aku, ke

hookohu pono ia aku nei oia ma ia hana, a o kana mau hooponopono ana a pau he mea

mana ia.

Eia iho ka auhau no KA LEI MOMI:---Mai ka helu 1 a pau keia makahiki, he

ekolu-hapaha (75 keneta); mai ka helu 8 a pau no keia makahiki, he hapalua (50 keneta).

O ka wa keia no na Hawaii e alu like mai ai e kokua ia makou. Mai hookaulua!

Aia ma@ ke keena loio o ka Mea Hanohano A. Rosa, Helu 15, alanui

Kaahumanu, e loaa ai ko makou Puuku.

E hoolohe i keia.

W.H. KAPU.

Ona a Lunahooponopono

Honolulu, Oahu, Oct. 2, 1893

 

KA LEI MOMI

 

W H KAPU,

Luna Nui a Lunahooponopono

 

F J TESTA (Hoke),

Puuku.

 

Poakahi, Okatoba 30, 1893

 

OIAI ua mihi ae ka “Holomua” puka la namu no na mea e pili ana i ka Adimarala

Amerika, e like la no hoi me ka makou o kela pule aku nei, pela no hoi makou, no ka

mea, ua ehaeha makou no ua manao la, he manao hoi i kakauia mai e kekahi mea. No ko

makou makemake ole e hailiili aku i na luna o kekahi aupuni hoa’loha me Hawaii nei,

nolaila keia e pale nei ia makou iho mai na koikoi a pauo ua manao la.

 

MAKAU honua na poe o ka Ahalolo Pi Gi mamuli o ka lono ua hoolakoia na poe

kea e kupaa nei mahope o ke Aliiaimoku me na aahu hou, a pela no ka hoi i na lala o ka

Puali Puhiohe Lahui. Hu no hoi ka aka ia lakou nei, a malia no ke kokoke loa io mai no o

ka manawa o ko ke Alii hoihoi hou ia ae. No keia makau honua o lakou, ua lilo ia i

kumuhana na ka ahakuka malu a lakou o ka ka Poaha, la 19. Pii ka haikea o ua poe la, a o

ka puai ae paha koe o ka leua, ke poha ae ke au. Eia aku a hoea mai, aole no e hala ana ke

 

poha ae o ke au, puai ae ka lena, kualena a kuawehi mai na kiionohi, nananakea na

helehelena, opa ae na papalina, opaipai ae na au, mama pu ka hehi ana, a o ka hina aku

no ka hopena ilalo a mauliawa ae.

 

NA KA LAHUI E HOOHOLO

 

            O na lono hope lea i loaa mai nei no kakou, ua hoomaopopoia mai aia no ia iloko o na poho lima o ka lahui oiwi. Ua olelo ia na Komisina, a Kuhina mahope mai, Balauna i waiho aku i ka manao e hoihoiia ae a na ka lahui e hoomaopopo i ko lakou hopena iho, a ma ka pahu balota auanei e maopopo ai ke ola hou ae o ko kakou kulana hooponopono Aupuni Moi. Aole o ia wale ae la no ka lono, aka, ua oleloia ae ina e ae ole ana ko kakou mau poe Pi Gi, alaila, na Amerika Huipuia no e lalau lima ikaika mai i ua puulu la a kapae loa ae ma kuaono lilo loa, a na kona ikaika no hoi e hoihoi hou ae i ke Aliiaimoku a kau hou iluna o ka Nohoalii o Hawaii nei.

            Ma keia mea ae la, o ko Amerika Huipuia hooko ana no ia i ke kahua alakai i walaau nui ia e ua poe hoohuiaina maloko o ke Kuahaua Kuokoa o ia aupuni, i hehihehikuia hoi e launa ohumuhumu kue Amerika ana a Kuhina Kiwini a me na koa o luna o ka Bosetona me kekahi poe kip@ kakaikahi iloko o Ianuari i hala. Ua lilo no keia lono ae la i mea hoehaeha ia lakou nei ma ae, e like no hoi me ko kakou hoehaehaia ana iloko o na la kinohi o keia hoao e aihue i ka ea o ko kakou aina aloha. A maanei hoi, ke hoike aku nei makou ua hooia ia mai keia lono maluna ae mamuli o kekahi mau palapala i loaa mai nei i kahi poe o kakou, a aohe hopohopo ana no ka oiaio ole, a o kekahi o ia mau palapala mai kekahi mai no o na poe hoohuiaina.

            Nui no hoi ua mea i oleloia oiai aole o Amerika Huipuia he Aupuni Moi, nolaila, ua kue ia aupuni i na mea pili Alii a pau, a ua like ia me he maunu ino la i kona mau makaai@ana. Aka, i hooia no ka oiaio ole o ia wahanui wale iho no, o Adimarala Skerrett (Sekerete), eia oia maanei i nei wa, ma ke an@ e hoomalu ana i ko Amerika mau pualikoa moana i huiia me Kapena Belknap (Belenapa), na laua i hookau ae ia Kalakaua ma ka nohoalii. O na kokua ma ka aina nei, oia no k@ kakou Lunakanawai Kiekie Kauka, i muhee iho nei ia kakou i keia wa, a me S. G. Waila a me Hanale A. P. Kaaka, ua hala laua i ke ala hiki ole ia laua ke huli hou mai, eia nae, mahope mai ua ohi lakou i ka pomaikai no ia hana a lakou. Aole o ia wale no ka Amerika Huipuia me i hana ai, eia aku ilalo i Samoa kekahi, ma ka heihoi hou ana ae ia Malietoa a kona kulana Moi mua no ia aina. Nolaila, ua lilo ia mau olelo ana i mea palaualelo@ wale iho no na keia poe pakaha wale me ko kakou ae ole a me ka nana nui ole mai hoi ia kakou.

 

E! PEHEA @O HOI NEI?

 

            I keia wa @ kakou e nanea nei, eia ke wel@wela mai nei he kaua kipi ma Berazila. Aole i loihi loa ae nei na la, he eha paha na makahiki, i kipi ai no keia poe e kipikipi nui mai nei, a hookaulihiaia aku la ka emepaea o ka Emepera oia hoi o Doma Pedero. He alii hanau oia no Potugala, o oia hookahi ke alii Europa ma kekahi huli o ka Moana Atelanika, mai ka loa a me ka laula o ka hapa komohana o ke ao nei. Ua mahaloia oia a me kana hooponopono ana i ke aupuni me ka pakiko, a ua nui no ka holomua, aka iloko o ka manawa ana @ upu mua ole ai, ua hookahi ka eu like aua ae o na aliikoa ana no i hoopunahele ai, a me na koa ana i hilinai ai, a hookahulihia ae la i kona aupuni. Ua haalele iho ka Emepera ia Berazila, oia a me ka Emeperesa, a ua holo aku la no Europa, a ilaila aku mamake, a ua oleloia mamuli no ia e ka ehaeha a me ka naha ana o na puuwai no Berazila.

            Ma na ano a pau, he alii holomua o Doma Pedero, a ua oleloia no hoi nona ua makaukau mau no oia e haawi aku i ka lahui na hooponopono ana e ke aupuni ina nae hoi oia e ike ana ua makaukau kupono lakou no ia mea, a e waiho maluhia aku no hoi oia i ka nohoalii, aka, aole pela ka mea i ikeia. Iloko o ka piha haakei o na kipi, ua hulihia ke Aupuni Alii, a ua ku ae la ma ia makalua mua he Aupuni Repubalika no na makuainana. Mai ia wai a hoe@ loa mai i keia la, ua pii ae a nui hewahewa launa ole mai na hooliho dala ana, i oi loa aku hoi i ko ke au o ka Emepera ke Alii Imeperiala. A heaha ka mea e hanaia mai la i keia wa ma ua aina la? Ua hoala kipi ae a ua kipikipi nui iho no ua poe la ia lakou iho, a mamuli no hoi o na hana a lawelawe lima kakauha a ka Peresidena, a kue mai la ea aumokukaua i ke aupuni, o ke ano mau no hoi o na hana o na Aupuni Repubalika kipikipi o Amerika Hema. Ma kela aina, aole i akaka o ka noao hea  ana la ke lanakila, na aumoku paha a o ke nupuni paha, eia nae, ke huli nui la na makaainana mahope o ka Adimarala o na aumokukaua, a haalele iho hoi i ka Peresidena.

            Eia he kumu no a he kumu alakai kupono na na poe o ia ane hulu like i o kakou nei. E lawe mai i kela mau loina malena ae a e hoopaanaau iho. Aohe kipi e pakele ana i ke kipi ole ia aku. Aia o Berazila ke alakai. Ua ano hoohalike aku no keia poe o kakou nei me ko kela aina, aka, ua lilo loa lakou nei i ko lakou mau manao piha hoakei, ako oihana, ake loaa, ake hanohano, a pela wale aku a "kini Kailua, mano Kaneohe." Nui ua hana ane e a kakou e ike nei i neia wa, i like ole hoi me ka lakou nei mau mea i wahakani nui ae ai me na "lohelehe eueu hana lokoino" o lakou. He puulu alelo pelu nei poe, a aole hoi i ike i ka hooko i ka lakou mau mea e olelo nui ai.

 

HOOPOLOLEI

 

            Mamuli o ka haule ana o ka ino o kekahi o ka poe ewalu i koho ai ma ka aoao o ka hapnui, e kue ana hoi i kela bila kanawai aihomu dala a Dilinahama ma, nolaila, ke hoopuka hou aku nei no makou i kela papainoa i hoopololei a hoopononpono hou ia, penia iho:

            KOKUA: ---Na Kuhina King, Damon a me Smith; na Hoa-kuka Brown, Waterhouse, Allen a me Bolte---7.

            KUE:---Na Hea-kuka Ena, Mendonca, Nott, Young, Tenney, Morgan, Emmeluth ame Suhr---8. Aole i koho o Peresidena Dole a me Hope Peresidena Hatch-

            O ke kumu o ko makou hoopuka hou aku, i hiki ai hoi i ka lahui ke ike a hoopaanaau pono iho i ua poe la. Ua mahalo makou i ka aoao hapanui ma ua koho ana la, oia hei ke koho i make loa ai o kela mooomokoko, aka, no ka lakou mau hana, aole loa makou ilaila me lakou. Ua mamao mai makou mai ia lakou mai, oiai, ua aikena ao nei hoi i ka lakou mau hana.

 

            Hoopunipuni no hoi kahi nupepa namu hoea kakahiaka a na welo mikanele hoohuiaina no kela mahele o ka Puali Puhiehe Lahui i hoolaulea ae ai ma ke kahua kaa poniuniu i ka po Poakolu i hala iho nei. Ua hoike ae ma ke ano pahenehene no ka huro ana o na kanaka no ke puhiia ana o ke mele Lahui o Amerika Huipuia. Heaha la hoi ka hewa o ia? Mai oi lea aku ka pono ina he oiaio ia mea. Hookahi mea maopopo, e hoea mai ana no ka wa o ka lahui e haawi ai i na leao hooho hauoli no ia mele, no ia lahui a no ia Aupuni, a e ku nui iho ai hoi ua puulu hoohuiaina la i kahi o ka hoka. Ua kuhihewa paha i kahi paha i kahi paele hookani ogana o ua kaa poniuniu la, a malia nana ae paha ua mele la i hookani ae. Aohe hewa---e pau nui aku ana ua poe la i ka hoka, o ka hoka no ia a hoka loa, pee loa a huna loa i na pee o lakou, aohe ea nui hou ae no ka hoka.