Ka Lei Momi, Volume I, Number 11, 16 October 1893 — Page 8

Ka Lei Momi.

 

HONOLULU, OAHU, POAKAHI, OKATOBA 16, 1893 8

 

HE MOOLELO KAAO

MONE TIKERO

-KA-

HOLOLIO I KA WA HOOILO

-KA-

UI MAALO I KE KUPULAU

A O KE

KEIKIALII HARE MATINE

-KE-

KIAHA OPAKA O NINEWA.

 

MOKUNA VI.

          Ka Ui Maalo i ke Kupulau-Ke Kakele Pahikaua Akamai-Ka Makana a ka Pua Lilia o Zubieda.

 

          Mahope iho o kana mau kakelekele ana i kona lio, ua ahai koke ae la oia i na mahalo ana mai ka lehulehu aku.

          Alaila, kani hou mai la ka o-le a pu-ko ao la ka laua mau pahi i ka lewa. Hookui ae la na umauma o ko laua mau lio, a ke awala la hoi ka laua mau pahikaua me ka ikaika, a ke puapuai mai la hoi ka ula ohelohelo ma ko laua mau papalina.

          O ke anaina kanaka i kela wa aia lakou ke noho la me ka hamau, a e kali ana hoi kela a me keia o ka hiki mai i ka hopena o ka laua mau hana.

          Iloko o ia manawa i ike ia aku ka naita Meriba i ke kaikai ana ae i kana pahikaua iluna, a mamua o kona iho ana iho e inu i ke koko o kona hoa paio, ua loaa koke aku la kana pahi i ka hauna pahikaua a ka Ui maalo i ka wa Kupulau, a mahele hapalua like ia ae la.

          Ia manawa i uwa ae ai ka lehulehu me ka haawi ana i na mahalo kiekie ana iaia, a aia hoi kekahi mea nona na helehelena nani i puia i ke ala me ke onaonaona ke minoaka mai la maluna o ka aleo.

          Ua hoike mai oia i kona makahehi i na kiina palanehe a ka Ui maalo i ka wa Kupulau, a ke puana mau la oia i na huaolelo,-

          "E unuhi no au i ka pua lilia o Zubieda a hoohoni aku i kela Ui maalo i ka wa kupulau ina e kokoke mai oia maanei," a akaaka ae la oia me ka palulu ana ae i kona mau helehelena i kona hainaka.

          A no ia mea i unuhi hou ae ai ka naita Meriba i pahikaua hou nana, a hou mai la e paio me kona hoa.

          Ua oi pakela loa ae ka hahana o keia paio ana a laua i ko ka wa mamua iho, ke hele la a lele liilii ua huna ahi mai ka laua mau pahi ae, a ke ake la kela a me keia o laua pakahi e lanakila, aole nae e hiki.

          No ka manawa loihi keia paio ana a ua mau moho nei, ia manawa i ike ia aku ai ke ano uhalu mai o ka naita Meriba, a no ia mea i pane aku ai o Mone tikoro, i ka i ana:

          "E pale nou iho e ka naita Meriba i pakele ai oe mai ka hauna pahikaua a ke kupua Fuginidera o na mauna Urala. Ane, e makalaa oe.,"

          O ka manawa no ia i uhau iho ai o Mone Tikero i ke palaulau o kana pahikaua maluna o ko poo o kona hoa lealea pu, a na ia mea i hookunewa aku iaia a haule mailuna aku o kona lio.

          Huro ae la ke anaina me ka piha hauoli nui, a ke mahalo aku la a mahalo mai ke anaina no ke akamai a me ka ikaika o ua Ui maalo la i ka wa Kupulau a he nui wale aku o na olelo hoohiluhilu i puana ia ae.

          Kukala mai la ka Ilamuku e hoomaha iki na lealea o ia la a kekahi la ae, oiai ke aneane aku la o Lehua e huna i na kukuna olinolino o ka la, a no ia mea i huro ae ai ke anaina a paiakuli ae la ka lewa i ko lakou mau leo hauoli.

          Iloko o ia manawa i ike ia aku ai ka pii ana ae o kekahi hae mai kekahi ae o na halelole e ku ana, a pulelo ae la i ke ahe makani, me na huapalapala moakaka i kahakahaia, penei:

          "Na ka Ui maalo i ka wa kupulau e lei i ka Pua Lilia o na awawa o Zubiede."

          A pela ka mea kakau i hoomanao ae ai i keia mau wahi lalani penei,-

          "Ina pela kau hana,

          Pakela oi aku ka pipih,

          I kau hana olu noeau,

          Ane like me Waialeale."

          He mea oiaio, i ka wa i huli ae ai ka Pua Lilia a ike i kela mau huaolelo kamahao e pulelo ana i ke ahe makani, puili ae la oia i kona mau lima ma kona umauma a puana ae la,

          "He oiaio anei na olelo a kela hae e hoike mai la? Ina pela, alaila e hauoli auanei ka Pua Lilia iloko o na la a pau o kona ola ana. Nolaila, e ke aheahe lau makani, e lawe oe i ko'u aloha a haawi aku i ka mea nona kela hae."

          Me ia mau hiohiona kamahao i huli ae ai na mea a pau no ko lakou mau home pakahi iho, me ka hoomanao ana hoi i na hana i lawelawe ia ma ia la.

 

          Ua haawi ae ka bana Lahui he puhiohe hoonanea ma Sans Souci, Waikiki, i ka po Poaono nei, a ua nui na poe i naue aku e hoolohe i ka lakou mau kileo lea.

          Ke loaa he kowa kupono ia makou, e hoopuka aku ana makou i ka moolelo kupanaha o kekahi kanaka akeakamai kaulanai i lele ai me kona hale uwila i ka mahina.

          Ke oili mau aku nei makou me na ono like ole i hoonu'anu'a ia i Apuakalamaula, a e ka nuu iho no ka ka oiwi, oiai he papaaina iho na me na onoono a Liua a me ka Kaehu i awili pu ia me ka ohelo.

          "Aia he kuukuu!

          He malihini ma ke ala,

          Apopo hiki mai."

          Maluna mai e ka mokumahu Mariposa, ke ku io mai hoi, alaila pae mai ke kuhina hou (Hon. Albert S. Willis) a me ke kanikela-kenerala hou (Mr. Ellis Mills), na kiai o ke Amerika Huipuia mau pono maanei.

          Eia mai no o Lauomidihae, ke oili aku nei me kona mau hiohiona ua hele a eaea-kai, mai hookohukohu loa iho hoi oe, o ku ae oe i ka peku-kahi a ka lio keokeo o olua me ke aikane e halulu iho la ma ke kua ua kokoke loa e hooa iho.-Auwe, eia ae ka hoi ka huakai makaikai o Kauka Talamega mai Kanaana mai. Makena a makou mea hou o keia la.

          E hoomanao i ka Wahine me ka Miu-lana. Eono-eha, lawa ia mau nunu maka onaona. Ae io ka, alia nae hoi, elima-eha lawa na lei o maua. Pololei.

 

KA LEI MOMI

HE NUPEPA OILI PULE

W.H. KAPU,

Luna Nui a Lunahooponopono.

Ma Honolulu kona wahi noho.

 

UKU PEPA:

No ka Makahiki $2 00

No ka Eono Mahina 1 00

No ke Kope Hookahi 10

KUIKE KA RULA.

 

          E hoopuka mau ia ana i kela a me keia Poakahi.

          O na kauoha nupepa a pau e hoouna pololei mai i ka Lunahooponopono.

          Aole loa e hoouna ia kekahi pepa ma ka owili pakahi ke ole e hookaa mua ia mai ka uku. Aole no hoi e loaa ka pepa a kekahi mea ke hookaa mua ole ia mai ka uku, ina ma ka makahiki a ma ka eono mahina paha.

          E hoouna mai i na Mea Hou, na Kumumanao, na Olelo Hoolaha, na Kanikau a me na Mela Inoa i ka Lunahooponopono.

          Aole loa e hoopukaia kekahi olelo hoolaha, kanikau a mele inoa paha ke ole e hookaa mua ia mai ka uku.

          O na hookaa dala ana no ka makou pepa, e hoouna pololei i ko makou Puuku Mr. F.J. Testa (Hoke), a me ia wale no na hooponopono dala ana no ka makou pepa. Pela me na kikoo dala ana.

          E hooko ana makou i ko makou mau rula maluna ae me ka nana ole i ke kulana o ke kanaka.

          Keena Hana: Ma kahi noho, alanui Kula.

          Telepona Bele Helu 527