Ka Lei Momi, Volume I, Number 10, 9 October 1893 — Page 8

Ka Lei Momi.

 

8                      HONOLULU, OAHU, POAKAHI, OKATOBA 9, 1893,

 

[Hoomauia mai ka aoao 6.]

 

            meia mau kumu hoohalahala iloko o keia papahelu malalo iho nei,

            1. Ka oleloia o ka Ahaolelo i ka popopo a me ka lapuwale.

            2. Ka oleloia i ka popopo a me ka lapuwale o ke aloalii.

            3. Ka oleloia i ka hoomanamana o ke Aliiaimoku.

            4. Ke kulana ano nui a mahuahua o na pono waiwai kalepa a me mahiai o na haole.

            5. O ka hoao ana o Amerika Huipuia e hookristiano a hoonaauao i ka lahui Hawaii.

            6. Ke akenui o na haole e loaa ona aupuni maikai.

            Wahi a Mr. Davies, he mau mea hiki no paha keia ke manao ia aku, aka, ma kona noonoo akahele ana, ua hiki iaia ke aa e olelo ae aole loa i loaa ke kuleana i kekahi poe okoa e luwaiele wale i ke kumukanawai o ke Aupuni Hawaii malalo e kela mau kumu ae la, koe wale no na kupa ponoi o ka aina.

            He elua mau ninau e ulu mai ana i kupono e pane ia, wahi a Mr. Davies, a oia keia:

            1. Ua panai io mai anei o Hawaii e hoolilo i kona mana nohona aupuni Aliiaimoku?

            2. He kuleana anei ko kekahi mea okea e haawi wale ia mana?

            Ua olelo ae o Mr. Lyons ua haawi io no o Hawaii, alaila aia maluna ona ka hoike ana mai i ka manawa, a, me kahi a Hawaii i haawi aku ai.  He ninau hohonu a ano nui keia o ke koikoi, a ua noi ia o Mr. Laiana e waiho ae i kana mau hooiaio no keia mea ana e kamailio nei.

            Ua hoike pu ae Mr. Davies i kona heluhelu ana maloko o kekahi mau nupepa i ka huli ana o Rev. Kiwini ma ka aoao hoohui aina, me ke kue hoi i ka makemake o ka hapanui o na hoahanau o kona ekalesia a me ke kue pu hoi i kona mau hoa makaainana o ka lahui hookahi.

            Wahi ana, he kuleana no ke Hawaii e hoololi i kona Kumukanawai, he kuleana no hoi e hookahuli i ka noho Aliiaimoku a he kuleana no hoi e hoolilo i kaona mana aupuni.  Aka aole loa nae he kuleana o kekahi mana okoa e ae e hoao ai e hana i keia mau mea, o ka limanui ana ia a me ka pakaha kuleana ole.  Ua maopopo lea aohe kumu e ae a Amerika Huipuia i hoole loa ai i ka hoehuiaina i panai ia iloko o Feberuari, hookahi wale iho no oia kona hoomaopopo ana, aole loa i kuka pu ia o Hawaii, a aole loa no hoi i haawi mai i ka mana a kuleana e hana ia ia mea.  Ma ka noonoo ana iho, aole loa i hana ia kekahi hoowahawaha nui ia Amerika, kela aupuni nui a ake kaulike mamua e keia onou ia ana kau o ka mana aupuni o Hawaii malalo o ka uhi na Hawaii ponoi maoli no ka i hana a i ae ia mea.  He eui a lehulehu wale na kanaka i lahilahi a mama loa ko lakou makee i ka pono a me ke aloha aina, a ua manao lakou he hiki wale no ia lakou ke ui aku i kela a me keia aupuni no ka hooko ia o ko lakou makemake.  A pela no, aa lakou e hoonele hou ia ano e Amerika, (a he mea maopopo oia no ka hopena) ke olelo nei ua poe nei, alaila e onou ia aku ana ua kumuhana nei ia Enelani, (a aohe kanalua no kona hoole mai) alaila, pehea aku ana la?  E onau ia aku ana paha ia Kelemania, alaila ia Farani aku a pela aku e pakaukau hele ia ai keia waiwai aihue ia e like me ka olelo a ka nupepa Manawa o Nu Ioka.

                        (Aole i pau.)

 

KUMUMANAO.

"Ka Euanelio no Kristo."

 

            Mr. Peresidean a me na lala o keia ahahui;  Me ka mahalo:

            I ka hoomaopopo ana i ka huaolelo "Euanelio," he Olelo Maikai ke ano.  He olelo mai ke Akua mai i hoike mai i na kanaka hewa mao Iesu Kristo la ko kakou Hoola.  Na Iesu ponoi no i hoolaha mai i keia Euanelio ma kona ao ana, ma kona make ana, kona ala hou ana a me kona pii hou ana i ka lani.  Oiai oia i ke ao nei, aole nae i hookipa ko ke ao nei iaia.  Iloko ona ke ola a o ua ola la ka malamalama no na kanaka a pau.  O ka olelo mai ke Akua mai, he olelo mai ka hookumu ana o ka honua a mamua loa aku no.  Oia hoi, "I kinohi ka Olelo, me ka Akua no ka Olelo i kinohi, iloko o ka Olelo ke ola, a o ua ola la ka malamalama no na kanaka a pau," oia no o Kristo, a o kaua Euanelio ke ola no na mea a pau i manaoio.  O ka Euanelio a Mataio, hoike mai no Iesu, oia no ka Mesia, ka manaolana o ka Iseraela, ke Alii o ke Aupuni o ke Akua.  O ka Euanelio a Mareko ua hoike mai no Kristo, oia ke Kaula ikaika hana a me ka olelo mai ke Akua mai.  Ua hoike ia ma ka Euanelio a Luka, he makamaka aloha o Kristo i ka poe hewa a he Hoola no ke ao nei.  Ua hoike mai ka Euanelio o IoIoane he mea Hoola ke Keiki a ke Akua ma ke kino a ma ko ka uhane a me ke ola hou mao ka Uhane la, a me ka hana a ka Uhane Hemolele, a o keia mau euanelio eha ka oi kelakela ma ke Kauoha Hou, a he nuhou pookela no hoi i ko ke ao nei.

            Ano, e na lala a me na hoa o keia ahahui, he mea maa mau iwaena o na lahui a pau o ke ao nei ka ui ana aku i kona hoaaloha ke halawai laua ma ke alahele me keia mau hopunaolelo, "Heaha ka nuhou?"  "O Miowera ua ili."  Wahi a ka pane.  He oiaio he mea hou ka ili ana o kekahi moku a e hai mai ana oia ia oe i ke kumu o kona ili ana.  Pela hoi ke hemo oia mai kona ili ana, he mea hou no ia, a e hai mai ana no oia i ke kumu o kona hemo ana mai kona ili ana.  He oiaio, he nuhou kaumaha i awili pu ia me ke aloha kona ili ana, a he nuhou hauoli nae kona hemo ana.  Nolaila he elua nuhou iloko o ko kakou kukulu manao i keia ahiahi, he poino a he ola.  Owai nae o keia mau nuhou kau e koho ai i keia ahiahi?

            Ea, e na hoaaloha a me na makamaka, i makamaka i na hana maikai a me na hana pono a pau, i makamaka i ka hoomahui ma na hana pono, na hana ku i ke aloha a me ka hoolaulea ana i na hoaaloha me ka oiaio.  Ea, e koho oe i ke ola, a o ka nuhou o ke ola kau e koho ai a e hauoli ai, oia no ka Euanelio o Kristo, e koho oe ano, a mai hoopanee i keia nuhou pookela, no ka mea o ko ke akua mea ia e ola ai.  E hopu a paa e na lala a pau o keia ahahui, a e hooili i keia nuhou maluna o ko kakou mau hokua a e lawe i keia nuhou maikai a e hoike aku i ko kakou mau makamaka ma na huina alanui, na kauhale a iwaena o na aha halawai, mai hoopanee a mai hilahila i ka nuhou o ka euanelio o Kristo iwaena o na makamaka a me na hoaaloha o kakou, e akahai a e haahaa ka olelo ana imua o na mea a pau, no ka mea he mama kana ukana, a he oluolu hoi kana auame.  Ke kono mai nei keia kukulu, manao ia kakou e lilo i poe hai i ka nuhou o ke ola, aole i poe hai nuhou make, a e pale loa aku ia mea he hilahila i ka hoike ana i ka olelo a ke Akua imua ona hoaaloha, a maluna ae o na mea a pau e lilo kakou a pau i poe kea oiaio no Kristo, a e hele hoi ma kona mau kapuai, a e hoike aku i ka nuhou maikai o ke ola ma ona la, oia ka Euanelio o ko kakou Haku e ola ai, ke alanui o ka malamalama a me ka oiaio, a nana no e kokua mai ia kakou i na la a pau o ko kakou ola ana ma keia ao.

                        Samuel K. Kamakaia.

            Ahahui Paio Baibala o Ema Hale.

 

            Nui ko makou kahaha i ka ike ana aku i ke anaina pule o Kaumakapili i ke Sabati iho nei ua oi ae ka nui o na noho mamua o na wahi kauna i akoakoa ae.  Aole o keia la wale no paha pela, aka, ina he mea pono e ola ai, alaila "e uhuki ia ke kanaka hewa mai ka aina aku," "i kaawale ke ala no ka laau o ke ola."

 

Hunahuna Mea Hou.

 

            Ua kopi ia iho imua o ka Aha Apana o Koloa nei he 11 poe piliwaiwai.

            He onawaliwali mau ke ola kino o ko makou Hope Makai Nui.

            E holo aku ana o Kauka J. K. Smith i na aina e no ka hooluolu ana i kona ola kino.  A o ke Kauka ana Pahu o Kilauea ke hoi mai ana i Koloa nei.

            He nui ka make o ua holoholona o Koloa nei i ka nele i ka mauu ole e hoonuu iho ai, mamuli o ke kinai mao ole ana a ka wela a ka la.

            He oia mau no ko hoalona nei e noho ae la i ka lai o Koloa.  O ke ku no a na puu kinikini o ua aina nei.  Me ke aloha,

                        Nomilu.

            Koloa, Kauai, Oct. 7, 1893.

 

            Eia no ka aina iloko o kona kulana mau e ku nei, aole loli ae mai na hana pauaka he nui.

            Ke pau mai nei i ka hopuhopu ia na poe kuai bia me ka laikini ole iloko o keia mau la.  A ke kopi mau mai nei no hoi Lunakanawai Apana.

            Ma Aiea, Ewa, Oahu, ua kikou mai la ka make ia M. Kawaa, a lawe aku la i kona hanu hope loa ma ke Sabati iho nei, a ua haalele iho i kona mau kini a pau ma keia aoao e kani-uhu ai iaia.

            He minamina nui loa makou i ka lilo ana o kekahi mau koo ikaika o ko ka Haku kihapai i mea kokua i ka hewa a lakou i kue ai, a ua ike ia ka hua o ia hana ana ma ka hale kanana o ke kanawai.

            He elua mau keiki malalo iho o 14 makahiki i lawe ia mai e ka Mikahala i ka Poalima aku nei mai Kau mai, ua hoopai ia laua no ka hewa aihue ia $170 mai ka misiona Katolika mai.

            E hoomanao i ke Keena o Ka Lei Momi, aia ma ke alanui Moi e kokoke ana i ka uwapo e Haaliliamanu.  Aole hewa o ke kipa mai e lohe i na leo hoene o ko makou mau keiki paahana.  He waipahe na kukai olelo ana Ua hamama ko makou keena no makamaka a me na hoaaloha.

 

HALE AINA.

SAGAMIYA.

 

Ai poi me bipi             5 kenata.

Ai raiki me bipi           5 keneta.

mu kope me                 5 keneta.

mu ti                            5 keneta.

            Alanui Moi kokoke i naaliliamanu uwa pa. Helu 6.

10 tf w.