Ka Lei Momi, Volume I, Number 66, 7 September 1893 — KU-I KA HEKILI HEAHA KA HANA? [ARTICLE]

KU-I KA HEKILI HEAHA KA HANA?

He mea maa mau iwaena o keia lahuikanaka mai kahiko loa mai, mai ia Papa mai laua o Wakea, a mai na hooauna mai mahope 'o laua, ke hoike mai nei na ouli lani i na hana kupanaha a kamahao me ka noono mua ole ia, e hoea mai ana kekahi mea nui i ike ole ia mamua aku, he mau kahoaka wale no ia e hoike mai ana, aia he hana a hoea mai e hoohauoli ia ai ka manao a i ole, e hookaumaha ia ai paha.

Ma ke kakahiaka Poakolu nei mahope iho o ke ku ana mai o ka mokuahi Australia mai Kapalakiko mai, a me ho mea la i ka makou koho iho mawaena paha. o ka hora 9:30 a me ka hora 10, ua lohe ia aku la he leo kani nakolokolo o ka hekili, e kani pamalo ana iloko o Ikuwa a puiwa ae la makou me. ka hikilele, a u-i ae la, hoaha hoi keia leo hekili e ne-i nakolokolo nei o keia la malie aohe ua?

I ko makou hookolo pono ana aku i ka mehou oia ka he kani leo pukuniahi,, e hea ana i na manu o ua puu, na wao ululaau na manu o na kualono e akoakoa pau mai, no kekahi ahakKuka malu ilalo o ka lahamauleo o Ewa, no ka noonoo ana i kekahi kumuhana e pili ana i ka pono o na manu liulu ole a me na manu hulu ke komo like iloko o na pomaikai o.keia noho ana.

Nolaila, ke hohono mai nei ka uahi aia malalo mai o Kalaehea, eia ke hoomakaukau ia nei kekahi hana malu a, ka pohai o na kolea kauahua e hookau aku maluna o ka poe hala ole, a

oia kela hakui leo, aole no ka i hekili, aka. he uwalo leo pukuoiahi inai ka poopoo mai o-Ka-welohea, e u-i ana ia Kaikipaananea ma, ia Kaahupahau ma, e komo iloko o ke awa o Puuloa no ka halawai a na oopa, oia la i lohe oukou, a mai puiwa a kanalua.