Ka Lei Momi, Volume I, Number 5, 4 Kepakemapa 1893 — Page 1
| This text was transcribed by: | Presley Ah Mook Sang |
| This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
KA LEI MOMI
E Mau Kou Olino Ana.
BUKE I HONOLULU, OAHU, POAKAHI, SEPATEMABA 4, 1893. HELU 5
----
He Moolelo
-NO-
LAUOMIDIHA E
-KA-
ULI MOHAI LA I KE KOKO
-KA-
NANI I ALANA IA I KA OI O KA PAHIKUA.
---
Ka Mea Huna iloko o ke Kiaha Waina.
Ka Mea Pohihihi i ka Maka o ke Kuikele.
-A O KE-
Keiki alii Namaredina.
-KE-
Komo Lima Maka Popoki.
---
MOKUNA II.
---
Ka Huakai Kaahele Honua a ke Keiki Alii Numaredina - Ka Palapala Noi MAre a ka Moiwahine Delauzia o Peresia - Ka Mea Pohihihi i ka Maka o ke Kui-kele - Na Mea Kino Elua ma kahi mehameha.
----
Nolaila, haalelo hou iho la ke keikialii ia aina a hele aku la oia no ka aina o Peresia, kahi a ka moiwahine Delauzia e noho alii ana, a ua hoohiwahiwa i oi loa aku mamua o ka keia mau aupuni, no ke ano hunona no paha kekahi kumu i oi ai kana hoohiwahiwa ana.
I waena o na launa ike alii ana i ike mua loa ai ke keikialii i na helehelena nani o ke kaikamahine alii Weremiere kana wahine hoopalau, a ua puana ae la ua keikialii nei iaia iho me ka i ae, -
"O ka moa huna iloko o ke kiaha waina."
No ka ike ana o ke keikialii i keia mea, ua ulu ae la ilko ona he kaikamahine hou aku no paha kekahi a ka moiwahine Delauzia i koe, nolaila, ninau aku la oia i ke kaikamahine alii Weremiere:
"O oe wale no anei ku ka moiwahine Delauzia keiki?"
I mai la ua kaikamahine nei, pela paha, aole i maopopo ia'u, aka, ma ko'u hoomanao iho owau wale no.
No keia hoohuoi ana o ke keikialii, nolaila, ua ninau aku la o Weremiere i kona makuahine, a no ia mea i pane mai ai kona makuahine me ka i mai. he oiaio e kuu kaikamahine, he elua olua i hanau mai ai mailoko aku o ko'u puhaka, o kou mua aole ia me kaua i keia manawa, a aole ma ka lima o ko kaua ohana, a ua hiki no nai ia'u ke hooia aku ia oe, ua make oia, oiai i kona mau la i hoea mai ai he mau la ia no ka ehaeha me ke kaumaha.
A nona hoi ka moolelo kaumaha a'u e hai ole aku nei ia oe o lilo loa hoi ia he mea ehaeha loa i kou naau.
Me keia mau huaolelo i hoopau iho laua i ke kamailio ana no ia mau mea me na manao hoi o ke kaumaha.
----
MOKUNA III.
---
Ka Wahine Hana Gula Kamahao o Bagadaka - Ka Olelo Hoopaa a ka Moi Aromozeda - Ke Komo-lima Make Popoki - Ka Makana a ke Kaikamahine Alii Waremiere o Peresia - Ka Huakai huli hoi a ke Keiki Alii Numaredina.
----
I ka makaukau ana o ke Keikialii Numaredina no ka hoi ana i kona aina, ua haawi makana aku la ke Kaikamahine Alii Waremiere i kekahi kupee gula i hoonohonoho ia me na pohaku makamae o kela a me keia ano o ka honua, a @@@@ hoi ke kumukuai i emi ole iho malalo o na haneri tausani dala.
O keia makana ana i haawi aku ai, no ke kaikuahine no ia o Numaredina, oia hoike Kaikamahine Alii Murisedela, a ua lawe aku la ke keikialii i keia makana a ke Kaikamahine Alii Waremiere, a me ia makana oia i huli hoi aku ai no kona aina.
Ma keia wahi, e kuu makamaka heluhelu, e waiho aku kaia i ke Keikialii Numaredina e huli hoi ana ma kona alahele, a e huli no kaua a nana aku i na hana a kona pokii kaikuahine ma ke aloalii o ka laua luaui makuakane.
I ka manawa mua loa a ke keikialii i haalele iho ai i kona aina no ka hele ana ma kana huakai kaahele honua, ua ulu ae la ka naauao iloko o kona kaikuahine e hana i makana nana i kona kaikunane ke huli hoi mai oia mai kana huakai makaikai mai, a no ia mea, ua hooholo iho la oia e hana i elua makana.
O ka makaua mua - i komolima i hoonoho ia me na pohaku makamae o ka honua, a e hoopaa ia hoi maluna o ka onohi o ua komo la, ke kii o kona kaikunane.
O ka makana alua - e haku oia i mele i ka wa e hoi mai ai kona kaikunane, a nana ponoi no e mele imua o kona alo.
Me keia mau noonoo ana iloko ona, ua ulu hou ae la he manao iloko ona e hele aku e hai i keia mea i ko laua luauimakuakane a ua hooko aku la oia ia manao ona.
----
Na Anoai o Kalaupapa
----
E Mr. Lunahooponopono;
Aloha oe - E oluolu oe e hookomo iho ma kahi kaawale o kau LEI MOMI i na hunahuna materia o ke kahua mai lapera nei a na na kini puni mea hou hoi ia o kaua e kilohi iho:
KOKUA KOMOHEWA.
I kela pule aku nei i hala, ua hopuia he elua mau wahine komohewa nei o Kalawao, a ua lawe ia i Pukoo e hookolokolo ai, a ua ko-pi ia i na puupuu paakai he umi pakahi, a me na koina pu no hoi o ka aha. He mau kane lepera ka keia mau wahine, a ua noho loihi no hoi laua ma Kalawao, a akahi no a hoike ia mai imua o ka luna nui.
I ka Poakolu nei hoi, Aug. 30, ua hopu hou ia no kekahi wahine komohewa me ka bebe nuku i ka aina o ka Papa Ola ma Kalaupapa, a e lawe ia aku ana paha i Pukoo e hookolokolo ai. He wahine keia na kekahi o na legara mai o Kalalau. Ua hele mai keia poe wahine mahope o ka lakou mea i aloha ai he kane, aka, ua loaa i na popili eia a ke kanawai; a na mea no hoi keia o ao mai ana i na poe e ae e malama pono, mai hele hewa iluna o na aine o ka Papa Ola, o kau auanei ka poino. Aka, ua olelo mai no hoi ke kauaka naauao, "O ke aloha, aole ia e mokuhia i na waikaho he nui."
AHAAINE PALALA.
Ma ka po Poaono, Aug. 26, ua malama ae o Mr. Hanakahi i paina hoomanao la hanau no kana keiki ma Kalaupapa, malalo o na hooponopono ana a Chas. Kahalehili, a me he mea la, oia kekahi o na paina nui oia ano i maluaia iama ka Panalaau nei. Malaila ae ka hana kahi i ho@@@ ai i ka lakou mea hokeo; ua nani no. Ua loha mai au he haneri a oi iki na loaa, aka hoi o na hoolilo ua oi loa aku mamua o na loaa.
ONA KE KAIKO.
Ma ka la 26 i olelo ia ae la maluna, ua hoouna ia ae na makai aupuni elua o nana i ka maluhia o ka ahaaina, oia hoi, ka poe ona a hoohaunaole paha, aka, o ka mea kupaianaha, ua hele ae no ka makai C. Kopena me kona ona no, a ua nui ko laua hoopaapaa ana ma kahi o ka ahaaina, me ke hoopuka ana ae i na olelo oolea. He kanaka maa no keia ia hana o ka ona. @ ua ike no a ua kamaaina no hoi ka luna nui i kona ano, aka, ua koho ia aku no oia i makai, no ka punahele nae paha? I ka nana aku a ka poe makaikai i ka laua mau hana, he mea ku i ka hoihoi ole. Ina no makou ia ona ana ke noho la ke aha hookolokolu, aole hoi e hihi no lakou no hoi. Ua haki no. Mai hoopau olua i ka makai ona, e sahio ole auanei hoi makou.
KE PAIAI.
O ka elua keia o ka pule o ko makou ai ana i ka ai a Lee Chu, a i ka nana iho, ua maemae no ka hana a ke keiki o ka aina pua eia nae hoi makou i ka welau no ka hoomaka ana, pehea aku ana la keia mau la? O ka 'u wale no i ke keiki o ka aina pua: Imua a lanakila.
PELA PAHA?
Ua ike iho au i ka pane ana a Geo. Keliimihihopeloa ma kekahi o kou mau kolamu, no na mea e pili ana i ka poe ona, no ka hoohaunaele ole, a pehea la ka hoi ka makai a lakou i ona ai a kukahalake ai o laua makai iho no? No ka ona ole paha ia la? A pehea la hoi lakou i hookolokolo ai ia Maiuli (kokua) no ka ona ma ka la 26 o Aug, no ka ona ole iho la paha ia la? A pehea la hoi i kipaku ai ka bosi o ua o Geo K, i ka wahine ana, i ka ike ana ua hele a sahio i ka bia a ke keiki kaulana o Waihanau? E uhi wale no oe aole e nalo, oiai ua ike na kini o ka aina i ka hana kapakahi a oukou. Pehea la koia aole anei i lawa iho la na puupuu? No kahi wa aku, ke oni mai oe, pa ko lae.
Ua lawa kaua maanei, a me oe ke aloha, a me na keiki, oniu hua @@@ ka anoi.
C. K. MAKAI.
Kalewao, Aug. 24, 1893.