Ka Leo o ka Lahui, Volume II, Number 1382, 22 January 1896 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO Puaapualenalena [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO Puaapualenalena

Ka hele hou ana o Mokumeha no Molokai a me Maui, - a noho wa- hine oia ma Hana, a me kona hele ana i ke kaua - a loaa iaia na pilikia ma kona kino, - a hooleiia oia iloko o kekahi Pa Puaa, - ma Wananalua. He huakai hele keia me ka awiwi ole. Ua noho lakou malaila no elua la.

A i ke kolu o ka la, ua kau koo mai lakou no Wailua nui a me Wailuaiki kahi o Kapo i noho ai ke la Ka'ea'ea nana i hoopunini i ka moopuna Puaa a Kamaunuaniho o Oahu nei. A hala ia wahi ua iho maila lakou nei no ka pali kaulana o ua Koolau la. Oia hoi o Kaliae a pii aku no Kalipula a hoea i luna o Kapehu a iho i Waiohue kahi e kihe ai ka ka ihu o ka ino. A hele aku la ma ke ala pili kahakai a hiki ma Kahulaaua o Kamokupau. Aia ma keia wahi ka mea hele e like pu me ka moo ka pili i ka pali, Oia o ke alanui e hiki ai ke iho aku a pii mai, he aa o ka puhala e paa'i i na lima, he ku i ka makau ame ka weliweli. Oia ka palena o na pali o Koolau a me na hula ana. A ua hiki mai la lakou nei no Nahiku, a ke akua, a me ka hoonee malie no o ko lakou nei hele ana a hiki i kahi o kela mau kanaka a ke kupanaha nui wale i lele ai i ke kawa o Kapalalau. A na ke kanaka hope i hoopuka ae i ka olelo hope loa a make a ku la ua mau kanaka ala elua, a oia hoi keia!

Aole hoi ou olelo mai e aole he wai aohe wai-e, a haule ana i lalo o na pohaku a ha'iha'i na au a make loa. Aia no ia wahi i ke alanui hele e waiho la a hiki i keia wa ma Opikoula. A hala keia wahi ia lakou ma hope, ua hele aku lakou nei no Kauluena a me na [illegible] elua. A hiki lakou ma Leleikeoho ka palena ia o Koolau me Hana, a hiki lakou ma Ulaino me ka hookipa ia e ko laila poe kamaaina. A pela no lakou i hele a no Honomaele a ma Honokalani a hoohiki loa a ku la lakou nei no Wakiu kahi o na ui kaulana i ikeia ma na moolelo kaao o Hawaii nei. A hoea i Pihohe a me Kahapouli, o ka hiki no ia i ke kahawai o Kawaipapa.