Ka Leo o ka Lahui, Volume II, Number 1378, 16 January 1896 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO Puaapualenalena [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO Puaapualenalena

Ka hele hou ana o Mokumeha no Molokai a me Maui. - a noho wahine oia ma Hana, a me kona hele ana i ke kaua - a loaa iaia na pilikia ma kona kino, - a hooleiia oia iloko o kekahi Pa Puaa, - ma Wananalua. E ka mea e kaunu pu ana i keia moolelo o ka Puhi Laumeki, he mea nau e nana aku i ka huakai hele makaikai a kona muli pokii kanaka Mokumeha ma ka mokupuni o Maui. Aia i kela la i wehe aku ai o uwahi i na hoa kanaka alo ehu kai o na ale o ka moana no Molokai, a oia no hoi ko Mokumeha la i haalele iho ai i ke kamaaina wahine puuwai hamama ma Honolua, a i ukali ia hoi e kekahi mau keiki oia wahi, mamuli o na manao makemake ia Mokumeha i aikane nalua, a ua hookoia ko laua manao iini no ke kamahele, ua hele aku lakou me ke kipa kauhale ana ma kahi o na ohana i pili i keia mau keiki e hele nei a moe lakou ma na hale kama-

aina ma Kahakuloa me ko laila puu kaulana o laila e ku kilakila ala ma ko laila pali kahakai, a i holo hoi i ke meleia ka inoa o ua puu la me ka aina. Ua pau kalihi hoihoi ia Kahakuloa. He loa Puukoae papai kamakani. Ma ia po a ao ae, ua hele maila lakou no na alu, a me na pali lehulehu o Kaukini, a hiki lakou no Kauakilioopu o Waihee, a me Wai ehu, ka aina nona keia mau wahi lalani mele hooheno nui wale. A ka lai au i Waiehu Ike i Kauahoehaili Ke loku mai la i Eleile I ka wai hoihoi lau-i He kupa mai au no laila He paniwai au no Iao. Ua hoomau no lakou i ka hele ana a moe ma Wailuku i ka malu a ke ao, aia ma keia wahi a lakou e hele nei ma ke alanui, aole loa i hoonele ia lakou i na leo heahea e kekahi poe kanaka e kipa kauhale e kamau wahi ai elike me ka mea mau i keia Lahui. Aole i Pau.