Ka Leo o ka Lahui, Volume II, Number 1377, 15 January 1896 — HE MOOLELO KAAO HAWAII NO KA Puhi o Laumeki, KA MEA I LIKE ME KA ILIO Puaapualenalena [ARTICLE]

HE MOOLELO KAAO HAWAII NO KA Puhi o Laumeki,

KA MEA I LIKE ME KA ILIO Puaapualenalena

Ka hele hou ana o Mokumeha no Molokai a me Maui. - a noho wahine oia ma Hana, a me kona hele ana i ke kaua - a loaa iaia na pilikia ma kona kino, - a hooleiia oia iloko o kekahi Pa Puaa, - ma Wananalua. O aeia ka manawa e kau pono ana kaihu o ka waa no Maui, a no ka manawa pokole loa, ua pae aku la ua waa nei no Honolua, elike no me ka nui o na kanaka mai Oahu aku nei, aia nae i ka wa i pae aku ai ua waa nei malaila me na kanaka, aia hoi, ua hookipa ia aku la lakou nei e kekahi wahine kamaaina oia mamuli noia o ko Mokumeha ano kulana kanaka ui. A elike no me ke ano mau o ko ka Lahui Hawaii kulana, he leo

heahea-he ai-a me ka ia haawi wale me ke kumukuai-ole-he puuwai ha-mama-he loko-a he waho he kuono a me ka paia leo ole he haawi mai ke poo a ka hiu, oia ka huahelu kiekie o Hawaii nei aole e pau a hiki i ke kanaka Hawaii hope loa, mamuli o ka lokomaikai o ke kamaaina ua noho lakou malaila no kekahi mau la elike me ka manao o ke kamaaina, aia i kekahi la, ua hoi aku o Mokumeha i kana olelo i ka mea waa e hele kaapuni ana oia ia Maui mauka o ka aina aole ma ka waa, a i ka lohe ana o ka mea nona ka waa, he mea e kona aloha a me kona mau hoa, a oia kona wa i lawe ae ai ia Mokumeha i keiki hookama nana. A ma kekahi la hou mai, ua hai ia ela ka lohe i na kamaaina no ko lakou haalele ana ia wahi, a mamua ae o ko lakou kaawale ana ia la, ua haawi ia ke aloha hope loa mawaena o lakou a pau me na hua olelo kahoahoa, a huli hoi maila na poe kanaka mea waa no Molokai me na manao aloha no ko lakou hoa o ke kai o Kaiwi ame na ale hanupanupa o Pailolo, a ma ia manao lakou i hoomano mau ai ia MOkumeha a hiki i ko lakou pae hou ana i Oahu nei. Aole i Pau.