Ka Leo o ka Lahui, Volume II, Number 1372, 8 January 1896 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO Puaapualenalena [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO Puaapualenalena

Ka hele hou ana o Mokumeha no Molokai a me Maui, - a noho wahine oia ma Hana, a me kona hele ana i ke kaua - a loaa iaia na pilikia ma kona kino, - a hooleiia oia iloko o kekahi Pa Puaa, - ma Wananalau. I ka pau ana o keia mau olelo hope loa a Mokumeha, ua emi malie aku la ua puhi nei a nalo wale aku la i kona wahi mau, a he mau minute hoi keia no kona kaikaina e hoopulu nei i kona mau lihilihi i na kulu waimaka o ke aloha hoahanau aia hoi ke kino aka o ua puhi Laumeki nei me anuenue ala e moe loihi ana iluna o ka ilikai mai loko aku o Honouliuli aku.

A maia hope iho, ua haawi ae la o Mokumeha i kona aloha hope loa i na makua a me ko laua kaikuahine hanau mua a me ohana a pau o kahale, a hele mai la oia no ke kula laula o Ewa, a hiki oia maluna o Kapukaki, o keia kahi e pau ai ka ike ana aku i na ka maokioki o ua aina leiula i ka [illegible] a ka makani a oia no hoi ka palena o Ewa a me Kona. A hala keia wahi iaia, ua hiki mai oia no Huluomanu a me Koleana ma Moanalua, a hiki oia ma ka wai o Lapakea a me ka uiina o Kauwalua, a ua kamoe loa aku kana hele ana a hiki me Maunalua, ua moe oia ma kekahi hale kamaaina malaila a hala elua la no ka manao e ike oia i kekahi waa e holo ana no Molokai. I ke kolu o ka po, aia hoi, ua ike aku la o Mokumeha i ke aka kino wailua o kou kaikuaana puhi Laumeki ma kona ano kino kanaka maoli e like me kela hoike ana ma Laiemaloo, a oia kana kino akua la i olelo iho ai ia Mokumeha. E kaina - e - apopo e nana aku i ko alanui e hiki ai oe e hele no kahi au i makemake ai.