Ka Leo o ka Lahui, Volume II, Number 1371, 7 January 1896 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO Puaapualenalena [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO Puaapualenalena

Ka hele hou ana o Mokumeha no Molokai a me Maui.—a noho wahine oia ma Hana, a me kona hele ana i ke kaua - a loaa iaia na pilikia ma kona kino, - a hooleiia oia iloko oo kekahi Pa Puaa, - ma Wananalua. I ke kakahiaka nui o kekahi la, ua ala ae oia a hele aku la ma ka lua o ka puhi Laumeki e noho nei ua kahea koke oia i kona inoa me na mea ai e pa aaa ma kona mau lima, ai ka oili ana mai o kona poo i waho o kona lua a hoea ae la iluna o kaili kai ua pane koke iho la kona pokii Mokumeha i na olelo kaukau e kauoha na iaia, a oia hoi ke-

ia mau olelo a ke aloha nui wale. E kuu hanau mua o ka puupuu hookahi mai, ano mamua ae o kou hele ana i keia la, ua hele mai nei au e ike mua ia oe oiai au e manao hou ana e hele makaikai aku ma kekahi mau aina aku ma ka ka Hikina aku nei ma ka aoao makani, nolaila, ke haalel nei au ia oe me ka hanau mua o kaua a me na makua o kakou. A eia kau olelo kauoha mua ia oe elike me kou ano kino kamahao a papalua au iike ai a hoomaopopo ia oe e kuu hanau mua, ua hiki ia

oe ke ike i ka pono a me ka pono ole o ke alanui kahi au e hele nei, nolaila, aole paha au e poina ana ia oe, no ka mea he hilinai ana au ia oe me ke aloha i na wa a pau, ua ike oe ia mea ma ka kaua huakai aku nei no Koolauloa. Oiai, nau hoi ka huakai mua i

kahi o na makua o kaua ma Laiemaloo, a nau i imi ae ia'u mahope me ka pomaikai nui pu i lawe ae ai i ka ia [Anae] na ia mau makua o kaua, a pela no au e manao nei ia oe. I ka pau ana o keia mau olelo kauoha mua a Mokumeha i ka puhi Laumeki, aia hoi, ua oni malie ae la ua puhi nei me ka pii malie ana ae o kona poo iluna o kaili kai a ku pololei ae la iluna me he kumu Niu ala mailoko ae o kona lua aia hoi kona mau onohi maka ke haka pono ala i kona pokii Mokumeha, me he mea la e kulu mai ana kona mau waimaka aloha no kona pokii e hele nei, aia nae maia wa ua hookau mai la ua puhi Laumeki nei i kona poo iluna o na poohiwi o kona pokii, oia ka manawa a Mokumeha i puana ae ai i ka inoa o ua puhi nei, ma kona ano he mea kino lau ano kupua. e ka Puhi - e, E ka Lauakeaka, I maalo i ka make, Noho mai i kalua, E ka puhi o ke Ale, Ko kino kauila, Oia o Laumilo, Ou kino laau, Oia o Laumeki-amama-uanoa.