Ka Leo o ka Lahui, Volume II, Number 1352, 9 December 1895 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO PUAAPUALENALENA [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO PUAAPUALENALENA

Ka imi ana i kona kahu - Pela no keia Puhi kaulana i oleloia He Puhi ka i'a - He oni ka Lala. (Hoohenoia no Ka Leo.) A pau ka ai ana a ua puhi Laumeki nei, ua olelo ae la o Mokumeha i ka makuahine, eia ka ia la a olua e ou mau makua he anae, ua lawe ia mai nei e ke puhi a olua he ia na olua e aiai a hiki i ko olua mau la hope, elike me kau olelo mau ia olua, a ano, e kuu mama, ke kapa nei au i keia wahi pohaku ma kou inoa ponoi, oia hoi o Kai hukuuna, a ola mau auanei kou inoa maluna o keia pohaku i na hanauna a pau loa ma keia muaku, a pela no hoi me keia anae e holo mai ai mai Honouliuli Ewa mai, nolaila, e lalau iho ou lima i elua anae eia ma keia pohaku au i kapa iho i kou inoa, a e lawe kaua a maluna o kela wahi ahua kiekie e waiho iho ai i keia mau anae me ka awa lau a me ka aahu [he kapa ke ano oia mea] a me ka ai he uala, a nolaila e hoomanao oe oia kou, kuleana i ka aumakua o ke keiki puhi nei o Laumeki, he Hinapukuia a o kau kane hoi oia ma ka aoao o Kuula a iuka kana koa i ko olua wahi

ponoi, oia ka mea e pono ai a e ai mau ai me olua a mai huhu olua i ke kii o na kanaka e hoopuni i ka anae no ka mea. O ke kanaka ka mea kahea mai ia olua e ai, nolaila e hoolohe oe a me kau kane i keia mau olelo au a ke keiki kanaka maoli a olua. I ka pau ana o keia mau olelo ua hooko ia na mea a pau ia wa me ka eleu, a mai ia hope iho, ua olelo iho la e Mokumeha ia Laumeki e kii aku ia Pueo e noho mai la iluna o na waa kaulua e lana malie mai la iluna o ka ilikai. A i loa no a pau keia mau olelo auwe! ka emoole, ua hoomohala aku la o Laumeki i kona loihi iloko o ke kai me ka pinana ana aku o ka ihu o ua Laumeki nei iluna o ka laau kea mua nana i hoohui i na waa i mau kaulua a he hoa bipi ka inoa oia mea. O keia hi'u o ua puhi nei ka mea nana i lou aku a paa i ua laau kea nei, a huki ia mai la e kona ikaika lua ole a pae ana iuka ma kahi o Mokumeha e noho nei me ka muli makuahine o kona makuakane.