Ka Leo o ka Lahui, Volume II, Number 1349, 4 December 1895 — HE MOOLELO KAAO HAWAII NO KA Puhi o Laumeki. KA MEA I LIKE ME KA ILIO PUAAPUALENALENA [ARTICLE]

HE MOOLELO KAAO HAWAII NO KA Puhi o Laumeki.

KA MEA I LIKE ME KA ILIO PUAAPUALENALENA

Ka imi ana i koua kahu —Peia no keia Puhi kaulana i oleloia He Puhi ka i'a—He oni ka Lala. (Hoohenoia no Ka Leo.) A no i keia manawa ua hiki aku la ka waa ma kahi o ka puhi e lana nei. Ua lawe ae la o Pueo i na mea ai a pau a haawi aku la ia Laumeki, i ka moana ana ae o ua puhi nei, ua hoomaka koke aku la oia e oni e kona ikaika nui a ke hukia pu ia la na waa mahope o kona au me he moku ala e koio ia ana. A no ka wa pokole loa, ua hala hope ae la e Makapuu a ke hele aku la ka puhi me ka anae no Koolaupoko me ka awiwi nui oiai eia no ka la i ke kakahiaka. A hiki ka huakai nui a ka i'a ma Kualoa ma ka lae o Kaoio ka palena o Koolaupoko, ke aui ae la ka la ma kona alahele lani. A ua nee aku la ka i'a no Kaaawa me Makaua a me Kahana me ka hoopuni mau ia no e na kanaka o keia mau wahi pela no ma Punaluu Haleaha, Papaakoko, Kaluanui, Kapaka, Hauala, Kaipapau. A ke aneane aku la ka la e kaoli i ka ilikai, ai ke ano ahiahi ana 'ku aia ka i'a ke hoolulu nei mawaho o Laiemaloo a hiki i ka lae o Laniloa. A oia moana kai, ua paa pono i ka anae mai lalo ae a hoa iluna o ka ilikai, ua like ka mahiki ana a ka anae iluna o ka ilikai me na pakaua, a no keia wa a ka i'a e oi nei i o a ianei ua hookokoke aku la ka puhi Laumeki no kahi o ka i'a e pili aku ai a ka pili iuka o ke one a me na waa. Nolaila, e waiho iki kaua e ka mea heluhelu no ka puhi Laumeki a me Pueo ma keia wahi, a e olelo ae kaua no Mokumeha me ka makuahine i mea e maopopo ai keia keia wahi aku mamua o keia moo lelao ke kupanaha nui wale ma ka ike a me ka heluhelu ana i keia pauea, a oia hoi keia.