Ka Leo o ka Lahui, Volume II, Number 895, 12 March 1894 — UA PAUAHO MAI LA O MRS. KAMAKEA KALIMA. [ARTICLE]

UA PAUAHO MAI LA O MRS. KAMAKEA KALIMA.

Me ka naau mokumokuahua i kihaehae ia e ke kaumaha. pela ka Anela o ka make i kipa ae ai ma ke kihapai uhane o ko Mrs. Kamakea Kalima ola kino ana, a niau palanehe aku la ma kahi a na mea ola uhane a pau e paio nei me ka weliweli. Aka, o ko ke Akua amakemake, aole ia e hiki i ko ke kanaka mana ke hoololi. Ma ka hora 12:30 P.M. o ka Poalima nei, i kunewa lani aku ai kona uhane no ke ala Koiula a Kane. a waiho iho la i ka ukana a ka ehaeha, i haawe na ke kane e auamo aku ai ma keia ao mauleule kona hoa uhaiaholo o ke anu me ke koekoe; aole wale oia kai komo kuhohonu iloko oia haawina hookahi. aka, aia na hua elua mai kona puhaka aku, ke noho u nei me ke kaumaha kulipolipo nona. He lehulehu wale o ka ohana e noho u aku nei nona, me ka puulu o na makamaka he lehulehu wale. Ua hanau ia oia ma na Pali Hauliuli o Koolau, ma kahi e o nei keia inoa kamahao. "Kini Kailua Mano Kaueohe, a me he mea la, o ka huina o kona mau makahik, aia no ia i ka heluna o 50 makahiki. He wahine puuwai heahea oia, a he lokomaikai palena ole hoi e hiki ole ai ke hoohewahewa ia kana mau hana maikai, a he kia hoomanao hoi nana i waiho iho na ka poe o keia ao e hoomanao ai. He lawe pepa kahiko ia no ka nupepa KA LEO O KA LAHUI, a oiai oia e waiho ana iloko o na la onawaliali loa, a ua hiki ole hoi ke uku i ke ola o ka milimli a ka lahui, nolaila, ua hoololi i ka manao e lawe i ka nupepa KA OIAIO, a me ia oia i kuilima ai i na la hope o kona ola ana. He lala oia no ka Hui Aloha Aina o na Wahine me ka puuwai kupaa no ke aloha i ka Moiwahine Liliuokalani, aole i poina na hoomanao ana iloko ona, no ka hoihoi hou ia o ka Moiwahine a hiki aku la i kona mau minute hope loa ma keia ao. Aloha no ia makuahine o ka lahui.