Ka Leo o ka Lahui, Volume II, Number 894, 9 March 1894 — HE MOOLELO KAAO HAWAII NO LAUKAIEIE. Ke Kino Kamahao Iloko O KA Punohu Ua-koko. Ke Kahulilelole'a o ke Kuluaumoe o na Pali o Waipio Hawaii. [ARTICLE]

HE MOOLELO KAAO HAWAII NO LAUKAIEIE.

Ke Kino Kamahao Iloko O KA Punohu Ua-koko.

Ke Kahulileole'a o ke Kuluaumoe o na Pali o Waipio Hawaii.

Unuhiia e Mose Manu no "KA LEO." Hiki hou o Makanikeoe makai o na pali hulaana —Hui hou oia me kona mau hoa aukai—Haawi oia he papaaina nui na na Mano —Hoolilo oia ia lakou i mau kino kanaka maoli —Nui ka hauoli oia poe eepa—Hookaawale oia i na poe malihini me kona kaikuahine. Mamuli o ka lealea me ka nanea o ua poe hapa eepa nei i ka leo o na pu, ua ala like ae lakou a ma- kaukau no ka hoi no ko lakou wahi mau i hele mai ai, mai ke alo mai o ke Alii nana i hoouna mai a ua haawi aku o Makanikeoe he mau Puawa hiwa a me na ano awa e ae he noi wale, me ka maia Kanaloa, a me na ko Lahipilimai, a me ke ko Manulele ma ke kahua mokomoko o Hinakahua ma Kapaau Kohala, a o keia na ko i pili loa ia Makanikeoe. A o keia na ko a ka poe hana aloha e hana ai, a kaulana ai o Ko hala i ke mele: "Mai noho oe a hana mai, I Kokea hoi o Koholo.'' I ka wa i ala ae ai ua poe eepa nei, ua haawi ia ke aloha hope loa mawaena o lakou me Makanikeoe, a huli aku la lakou no ke ala moana, oia kana i hoomakeaka aku ai me keia mau huaolelo: 'Good By, olo Pipihuhu o ka moana." Ia lakou i huli hoi aku ai, ua hooholo iho la o Kahakauakoko me Hoolalekaimu, ka Elele nana e kaapuni o Hawaii, oiai, ua hele na makalae a hani iaia, aohe mau poopoo i koe, he kawa ia nana i hele a Lehia. Nolaila, ua hoi lakou ma Hamakua Hikina a me Hilo-paliku a hoea ma Hilo-one. Ia lakou i hiki aku ai malaila, ua hookipa ia lakou e ko laila kamaaina o Kaneialehia, nona hoi ke kai maluhia mai ke kai o makaoku

ma Mokuola, a hiki i ka lae o Le- leiwi ma Keaukaha, o ka lae ulu- hua keia a ka poe hula. "Hookahi a'u lae uluhua ea O ka lae o Leleiwi ea He ukali o Makahaneloa ea Me ka Ulili holo kahakai ea." A ua waiho aku lakou i kona lokomaikai, aole no hoi lakou iho malaila, a ua huli hoi aku lakou no Punapaiaala, a ua ukali pu aku hoi ke kamaaina a hiki ma kai o Papai me Paukupahu, ua kuhikuhi ae la o Kaneialehia i ka lua o ko laila wahi mano kaulana i ka olelo ia, "Aia a Mano nana i kumu pali." Ina ua hele oe e ka mea heluhelu ma ke alanui mai Hilo aku no Puna, alaila, e ike no oe i kahi i kapaia o "Aia a Mano, nana i kumupali," mawaena o Kumu me Haena ma Keaau. I ka hiki ana aku o ua huakai mano nei ma ka lae o Kalohi ma Hopoe i ka wai koo lihilihi, aole lakou i kaulua iho malaila, ua puahi lakou i ka hoi ana mai a hiki i kumukahi, ma keia lae i huli hoi ke kamaaina o Hilo, a ua kuupau ua huakai mano nei i ka holo a hiki ma Panau, ma kahi o Kaehuikimanoopuuloa, ke keiki a Kapukapu me Holei, aole nae oia ma kona home, ua nele mai oia no ka nuku o Puuloa ma Ewa Oahu nei. A ua kikihi loa aku la ua poe eepa nei mawaho ae o Kukalaula, kahi i opiopi ia ai e ka la: "Opiopi ka la o Kukala Ke hele i ka loa o Maukele—a". A hala o Punalu me Honuapo mahope, kahi o ke kai kauhaa a ka malihini, aia o Kawelohea ke kuhea leo nui mai la ia lakou nei, aole nae o lakou wahi mea a maliu mai i kana uwalo aku, ua alo ae la o Kamilopaekanaka me Kaalualu mahope, a ua halawai aku la lakou me ka mano oia kahakai me Keliikanakau, o ka mano keia i hakaka ai me ke alii wahine o Puuloa, oia o Kaahupahau, a kaulana ai ka olelo, mehameha Puuloa, ua hele o Kaahupahau, aole no lakou nei i hoolohe aku i kana au'a mai, ua huli hoi pololei loa lakou no Kahoolawe me na makana mai a Makanikeoe mai. Ma keia wahi o ka kaua nanea, aole kaua e hoomanao hou no keia poe aiwawa o ka moana. E hoomanawanui iki kaua pe ia ka mea heluhelu a puka hou aku ka la apopo. Aole i pau.