Ka Leo o ka Lahui, Volume II, Number 892, 7 Malaki 1894 — EIA HOU NA OULI KUPANAHA. [ARTICLE]

EIA HOU NA OULI KUPANAHA.

I ka po o Kane, ma ka helu Hawaii i ike hou ia ai kekahi hoike kupanaha a ke Akua, iloko o na ao o ka lewa lani, a eia kona ano: Oiai ka mahina e hoike mai ana i kona nani ma ia po, ua ike aku la ke kilo ouli manawa i kekahi ouli kupaianaha oia hoi kekahi ao i like me ko ke kanaka ano, e ku ana ma ka aoao Hikina. Oiai ke kilo ouli e nana ana i ke ano o keia ao. ua ike ia aku la ka loli ana ae o ua ao ala a mahae lua oia ka wa i ike ia aku ai he mau Kahili Elua, e ku ana ma ke kulana hi-o me ka pili ana o lalo. A mawaena kona e kau ana kekahi ao i like me ke Kalaunu kona nanaina, ua kau keia ao pela no elima minute, a nalo aku la. A ike hou aku la no ke kilo ouli i kekahi mau ao elua e pii like ae ana a ku pololei, a oia ka wa i loli ae ai o ua mau ao ala a lilo i mau Puloulou, a mawaena o laua e ao Kalaunu no, a no elua minute ua nalo aku la. Mamuli o keia mau ouli kupanaha e ike ia ai ko ke Akua nani a me Kona aloha i ka Lahui kanaka Hawaii. Mamuli o keia ouli e hiki ai ke hoomaopopo ia kona ano: i keia la, aia ko kakou Moiwahine Liliuoka- lani i luna o ka Noho Alii o Hawaii nei. Oiai hoi, o kela ao i like me ke kanaka, o ka Haku no ia, a o kona loli ana ae a lilo i mau Kahili a me ke Kalauna, oia kona hoike

ana mai ke Aupuni Alii oiaio no o Hawaii nei. Oiai o ke Kahili, oia na hoailona Kapu o Hawaii nei mai ka po mai, a o ke Kalaunu, oia ka hanohano o ko ke Akua aloha. O na ao i lilo ai o mau Puloulou, he hoailona ia nona 'Lii Aimoku, e like me Liliuokalaniikekanu, he hoailona paa keia mai kahiko loa mai Nolaila, e na hoa makaainana alo- ha, e hoolana i ko oukou manao mao ka Haku ala, oiai, ua paa kona aloha manawa kolu ia kakou, a nana no e kokua mai. E ola ka Moiwahine Liliuokalani i ke Akua Kiekie Loa, a pela pu kona Lahui, O ka pono ke hana ua, a haule mai na lani.