Ka Leo o ka Lahui, Volume II, Number 889, 2 March 1894 — HE MOOLELO KAAO HAWAII NO LAUKAIEIE. Ke Kino Kamahao Iloko O KA Punohu Ua-koko. Ke Kahulileole'a o ke Kuluaumoe o na Pali o Waipio Hawaii. [ARTICLE]

HE MOOLELO KAAO HAWAII NO LAUKAIEIE.

Ke Kino Kamahao Iloko O KA Punohu Ua-koko.

Ke Kahulileole'a o ke Kuluaumoe o na Pali o Waipio Hawaii.

Unuhiia e Mose Manu no "KA LEO."

Wehe i ka pili o Makanikeoe me kona mau hoa i ke Alii nona ka lokomaikai—Huli hou no Hawaii—Ka huakai a na Ma no—Pau ma Haena Kohala.

Aia ka maka mua o na mano ke hele ala i ka hapalua like o ka moana o Alanuihaha, a o ka hope mai aole ia i laua mai, aia no ia i Kahoolawe, a ke kalali ala na lala o ua poe mano nei iluna o ka ilikai, aia hoi ke nana pono aku nei na poe malihini i ka oni mai a Maunakea me Maunaloa a me Hualalai, a oia ka ua poe malihini nei e ninau malu nei ia Pupukanioe, a ke hahai mai la oia i na inoa o na wahi a pau o Hawaii ma ka aoao o ka huli a lakou e nana aku nei, aia hoi na wahine noho mauna ke kahiko mai la i ko laua kapa hau, a ke hohola mai la hoi i ka pili laau, a oia paha keia la: "Maemae i ka hau ka luna o Maunakea, Opu iho la iluna o ka hinahina, Ka pua luhiehu a ka Mamane, He lama wale ala no ke ike aku, Aloha mai nei hoi ka aina, Me kuu kaikaina o launiu o ke kaha." Aia hoi ke kuahiwi kaulana o Maui ke kunihi ae la i ka makani, nona hoi ka olelo ia: "Akaka wale no Haleakala, Ka uwe a ke kini o Koolau." No keia wa a Pupukanioe e olelo nei i na hoahele, aia lakou ke hele ae la mawaho o ka lae o Upolu a ua hoohuli ae la lakouo no ka aoao lulu a ke nana ia mai la e ka poe o uka o Kohala, keia pipio o ke anuenue me ka ua koko e halii pau nei iluna o ka ilikai a ke hookani uwa mai la na kanaka a pau o uka o ka aina, a ua maopopo no nae ia

lakou ke koho ana mai: ma ke ano o keia mau hoailona, he alii nui ka mea nona ke anuenue me ka ua koko, oiai, ua maa lakou i ka ike ana i na ouli kupanaha he nui wale, aohe he mea pohihihi ia lakou, a he Lahui pookela ko Hawaii nei ma na ike lehulehu wale he nui i ka wa kahiko, ua like ko lakou ike me na Magoi, ka poe nana i ike i ka Haku, a oia ka lakou i hoomanao ae ai, ua hanau ia ka Mesia. Aole i pau.