Ka Leo o ka Lahui, Volume II, Number 870, 6 Pepeluali 1894 — HE MOOLELO KAAO HAWAII NO LAUKAIEIE. Ke Kino Kamahao Iloko O KA Punohu Ua-koko. Ke Kahulileole'a o ke Kuluaumoe o na Pali o Waipio Hawaii. [ARTICLE]

HE MOOLELO KAAO HAWAII NO LAUKAIEIE.

Ke Kino Kamahao Iloko O KA Punohu Ua-koko.

Ke Kahulileole'a o ke Kuluaumoe o na Pali o Waipio Hawaii.

Unuhiia e Mose Manu no "KA LEO." Loaa o Kawelo'naakalailehua ia Makanikeoe— Kana mau hana maalea— Hanaio ke aloha i ua keiki kaili la ala o Lehua. — Ka ike o ke kahuna o Kukaalamanu. I ke kokoke ana aku o ka la e nalo i ka ili kai, ua hookuu malie mai la na manu ia wa i ua keiki nei iluna o kona mokupuni o Lehua a hoomaka aku la ua poe manu nei e hoi no ko lakou mokupuni o Kaula. Ia Kawelo'naakalailehua i komo aku ai iloko o kona wahi mau me kona mau kahu hanai e noho mai ana, ua makaukau i na mea ai a pau no ko lakou paina ahiahi. I keia wa a lakou e ai nei, ua puiwa ia ko kakou elele hoomanawanui i keia wahi ia he Pao'o, i ka lekei ana ae mai loko ae o ke kai me ka wai iloko o ke omo, (he ipu wai ke ano), a waiho ana iluna o kahi e ai ai, a o ka hoi aku la no ia o ua wahi Pao'o nei a kona wahi mau, a o ke pani iho la no ia i ka wai, a oia ka mea e olelo ia nei, o ka wai a ka Pao'o. O keia wa a lakou e ai nei, ua loaa ia Makanikeoe he manawa maikai ana e hoohana ai e like me kona ano mau, ua hookuu pau aku la oia i kana mau apu puhipuhi makani hoinele o ke aloha i ua ui la o Lehua ma ka inoa o Laukaieie, o ka hoomaka ana iho no ia o lakou e ai, aia nae ua komo pono aku la ke aloha iloko o ka houpo o ua keiki kaili la nei o Lehua, a ke hana mao ole ala ke aloha iloko me he puhi la ka oni, a o ke oki honua ae la no ia o ka ai ana, a o ka hina aku la no ia hiamoe. Ia pili ana iho no o kona mau maka, o ka halawai koke aku la no ia o kona ike ma ke kahoaka ano

hihio i ke kino o keia kaikamahine ui e noho ana iloko o kau Punohu ua koko me kona nani oi kelakela maluna aku o kekahi awaawa nui i haiamu ia e kona mau hoa noho oia wahi, oia kana i muki aku ai ma kona papalina akau, me ka hooheno ana o ko laua mau kino wailua me kona hoomaopopo i na helehelena a pau o keia wahine ui ana e kuwili nei, ma keia hiamoe honua ana o ua ui nei me ka liuliu ole o ka ai ana, ua lilo ia he mea haohao i na makua hanai ona, oiai, aole ia he mea maa mau i ka laua hanai. E ka mea heluhelu, ua like no keia me ka haawina i loaa i ka mea nona keia nanea, e like me na mea i ike ia mamua ae nei o keia moolelo. Aka, aole nae i loaa ia Kawelonaakalailehua he haawina oia ano like me ia i ike ia ai e Laukaieie ma kana moeuhane, pela no keia. Nolaila, ke awaiaulu mua ia nei laua ma ke aka kino wailua, hanehane paha auanei a hui kino aku laua ma ka ike maka ana i ko laua mau helehelena nani, a oia auanei ka mea nana e hoomaalili i ko laua mau puuwai me na iini o ka manao hauoli. Ma ke kakahiaka o nehinei i kapalulu mai ai ka mokumahu Kina i ke awa lai o Kou nei me na nu hou ano nui.